Mobil telefonların qeydiyyatı
Bu sistemin
işə düşməsi həm istifadəçinin özü, həm də
ətrafındakıların təhlükəsizliyi üçün əhəmiyyətlidir
Son illər Azərbaycanda informasiya-kommunikasiya texnologiyaları sektoru sürətli inkişaf mərhələsindədir. Hazırda ölkəmizdə İKT sektorunun sürətli inkişafı mobil rabitə şəbəkəsindən də yan keçməyib. Belə ki, mobil rabitə şəbəkəsi genişləndikcə həm istifadəçilərin sayı artır, həm də mobil operatorlar öz abonentlərinə daha yaxşı xidmət göstərməyə çalışırlar. Lakin təəssüf ki, əksər mobil telefon istifadəçiləri mobil aparat alarkən telefonun yalnız görünüşünə və digər imkanlarına fikir verdiklərindən, bütün hallarda telefondan istifadənin təhlükəsizliyinə xidmət edən İMEİ koda əhəmiyyət vermirlər. Bu, bəlkə də istifadəçinin texniki biliyinin az olması ilə əlaqədardır. Halbuki, İMEİ kodun (İnternational Mobile Equipment İdentity - Mobil telefonun beynəlxalq tanınma kodu) mobil aparatdan istifadənin - həm istifadəçinin özü, həm də ətrafındakı insanların təhlükəsizliyi üçün əhəmiyyəti böyükdür.
Qeyd edək ki, Azərbaycanda rəsmi səviyyədə
mobil cihazlardan istifadənin
təhlükəsizliyini təmin etmək məqsədilə
Nazirlər Kabinetinin 28 dekabr
2011-ci il tarixli “Mobil cihazların qeydiyyatının
aparılması Qaydası”nın təsdiq edilməsi
haqqında qərarına uyğun olaraq ölkə ərazisində mobil
cihazların qeydiyyat sistemi
yaradılıb. Bu sistem
müvafiq qərara əsasən, Rabitə
və İnformasiya Texnologiyaları Nazirliyinin Məlumat Hesablama
Mərkəzində (MHM) formalaşdırılıb. Bununla bağlı MHM-də mərkəzi baza sistemi
quraşdırılıb. Eyni zamanda, Dövlət Gömrük
Komitəsi və Naxçıvan Muxtar
Respublikası da mərkəzi baza sisteminə qoşulub.
2013-cü ilin may
ayının 1-dən etibarən isə mobil
cihazların qeydiyyatına start veriləcək.
Qeydiyyat sistemi istismara başladığı tarixədək
şəbəkədə istifadə edilən bütün
mobil cihazların İMEİ nömrələri
qeydiyyata alınmış hesab
ediləcək və onların şəbəkədə maneəsiz
işləməsində heç bir problem yaşanmayacaq.
IMEI kodu necə öyrənməli?
Mobil telefonların beynəlxalq identifikasiya (eyniləşdirmə) nömrəsi
olan IMEI kodu həmin qurğunun istehsal olunduğu ölkə və firma
haqqında məlumatları əks etdirir.
IMEI - mobil cihaz üçün tək və bənzərsiz olaraq təsis edilmiş
beynəlxalq identifikasiyanı göstərən nömrədir
(İnternational Mobile Equipment İdentification). Mobil rabitə şəbəkəsində istənilən
zaman kəsiyində istifadə olunan (hətta bir saniyə
belə) hər bir mobil
cihazın IMEI kodunu texniki
olaraq monitorinq etmək
və həmin mobil cihazın istifadəsini
məhdudlaşdırmaq mümkündür.
IMEI nömrələr istehsalı zamanı zavodda
mobil telefon
aparatının müxtəlif yerlərinə yazılır.
IMEI nömrələr
hər bir mobil telefonun 15 rəqəmdən ibarət unikal kodudur. Hər bir istehsalçının xüsusi
alqoritmi əsasında hazırlanan IMEI koda əsasən telefon
istehsalçısının adını, hansı ölkədə
hazırlandığını müəyyən etmək olar. IMEI kod telefonun yaddaşına
yazıldığından, çox
asanlıqla telefonda *#06#
kombinasiyasını yığmaqla ekranda
IMEI kodu görmək olar.
İki simkartı olan
mobil telefonlarda 2 IMEI kod qeyd edilir.
Bundan əlavə, IMEI kod
telefon batareyasının altında, zəmanət
talonunda və telefon qutusunda da yazıla bilir. Əgər IMEI kodlar
telefondakı digər yerlərdə yazılanlarla uyğun gəlmirsə, demək həmin telefon saxta, yaxud oğurluq yolla ölkəyə gətirilib.
Bundan başqa, mövcud qaydaya görə,
mobil telefonların sistemdə qeydiyyatı
ağ, qara və boz kateqoriyalar üzrə
aparılacaq. Ağ səhifədə Beynəlxalq
GSM Assosiasiyasının təyin etdiyi
İMEİ nömrələri dəyişdirilməyən, təkrar
İMEİ nömrələri olmayan mobil telefonların İMEİ nömrələri
yer alacaq. Qara səhifədə
qeyri-qanuni yolla ölkəyə
gətirilən, itirilən, oğurlanan,
İMEİ nömrələri Beynəlxalq GSM Assosiasiyası
tərəfindən təyin edilməyən, təkrar
İMEİ nömrələri olan mobil cihazların İMEİ nömrələri
qeydiyyata alınacaq. Qara
səhifədə olan mobil
cihazlara mobil
operatorların şəbəkələrində xidmət
göstərilməsi məhdudlaşdırılacaq.
Boz səhifədə isə mobil operatorların telekommunikasiya
şəbəkəsindən xidmət alan
(hazırda istifadə olunan), ağ səhifədə və ya
qara səhifədə olmayan
mobil cihazların İMEİ nömrələri
qeydiyyata alınacaq. Boz
səhifədə olan İMEİ nömrələri
araşdırma nəticəsinə uyğun
olaraq ağ səhifəyə
və ya qara səhifəyə
daxil ediləcək.
Qeydiyyatsız telefonlarda nömrə işləmir
Yeri gəlmişkən, ötən ilin mayın 1-dən etibarən mobil telefon nömrələri
yalnız “Mobil cihazların qeydiyyat sistemində” qeydiyyatda
olan mobil telefonlarda işləyir. Telefonların
qeydiyyatına gəldikdə isə bunu
satış və digər sahibkarlıq fəaliyyəti məqsədilə
mobil telefonları ölkəyə idxal edən bütün hüquqi və fiziki şəxslər
həyata keçirirlər. Onlar idxal etdikləri mobil
cihazların markaları, modelləri, sayı və
İMEİ nömrələri barədə məlumatları ərizə
ilə qeydiyyat mərkəzinə təqdim
edirlər. Qeydiyyat mərkəzi tərəfindən
üç iş günü ərzində məlumatlar
araşdırılaraq Dövlət Gömrük
Komitəsi tərəfindən MCQS-ə elektron
formada göndərilən İMEİ
nömrələri ilə müqayisə olunur.
Sənədlərdə
çatışmazlıq olmadıqda, habelə təqdim edilmiş məlumatlarda uyğunsuzluq
aşkar edilmədikdə ərizədə
göstərilmiş İMEİ nömrələri dərhal ağ səhifəyə daxil
olunur. Əgər ərizədə
göstərilmiş İMEİ nömrəsinin ağ səhifədə olduğu
və ya onun surətinin köçürüldüyü
aşkar edilərsə, həmin
İMEİ nömrəsi dərhal qara səhifəyə
daxil edilir. Əgər
vətəndaş xarici ölkədən
mobil telefon alaraq ölkəyə gətiribsə, bu halda mobil
operatorların müştəri xidmətlərinə və poçt şöbələrinə
yaxınlaşaraq xaricdən aldığı telefonun İMEİ kodunu qeydiyyatdan keçirə bilər. Bu halda müştəri
xidmətlərinin və ya poçt şöbələrinin nümayəndələri
tərəfindən qəbul edilən sənədlər dərhal
elektron formaya
çevrilərək, qeydiyyat mərkəzinə
göndərilir. Təqdim edilmiş
məlumatlar qeydiyyat mərkəzi tərəfindən
üç iş günü ərzində
araşdırılır və sənədlərdə
çatışmazlıq olmadıqda, habelə təqdim edilmiş məlumatlarda uyğunsuzluq
aşkar edilmədikdə ərizədə
göstərilmiş İMEİ nömrələri dərhal ağ səhifəyə və ya uyğunlaşdırılmış ağ səhifəyə daxil
edilir. Daha sonra bu barədə
abunəçiyə məlumat verilir.
Ərizədə göstərilmiş İMEİ nömrəsinin
ağ səhifədə olduğu
və ya onun surətinin
köçürüldüyü aşkar edilərsə, həmin İMEİ
nömrəsi dərhal qara səhifəyə
daxil edilir və bu barədə müraciət edən
şəxsə (onun nümayəndəsinə)
səbəb göstərilməklə, qeydiyyat
mərkəzi tərəfindən rəsmi cavab
verilir.
Standartlara uyğun olmayan telefonlar bazardan çıxır
«Multimedia» Araşdırmaları Mərkəzinin rəhbəri
Osman Gündüz hesab edir ki,
mobil cihazların qeydiyyatının aparılmasında
məqsəd abunəçilərin
mobil cihazlarından rahatlıqla istifadə edilməsinə şərait
yaradılmasından, mənşəyi
bilinməyən, texniki
parametrləri standartlara
uyğun olmayan, keyfiyyət əmsalları
aşağı olan və insan orqanizmi
üçün zərərli
elektromaqnit şüalanmaları
yayan mobil cihazların ölkəyə
idxalının qarşısının
alınmasından, həmçinin
istehsalçı şirkətlərin
tanınma dərəcəsinin
və rəqabət qabiliyyətinin yüksəlməsinin
təmin edilməsindən
ibarətdir. Eyni zamanda, qeydiyyat
sistemi itirilən mobil cihazların şəbəkədə istifadəsini
mümkünsüz edir.
İtirilən mobil cihaz sahibinin qeydiyyat mərkəzinə müraciəti
əsasında həmin
cihazdan respublika ərazisində istifadə
dayandırılır və
oğurlanmış mobil
cihaz qısa müddətdə lazımsız
əşyaya çevrilir.
Onun
fikrincə, Azərbaycanda
mobil cihazların qeydiyyata alınması həm də cinayətkarlıqla mübarizə
tədbirlərini gücləndirəcək
və bununla da ölkədə törədilən cinayət
hadisələrinin sayı
azalacaq. Çünki beynəlxalq təcrübələr
göstərir ki, xarici ölkələrdə
bu sistemin işə düşməsi
ilə telefon oğurluğu, saxta cihazların yayılması
ilə yanaşı, cinayətlərin qarşısını
da almaq mümkün olub.
Sevinc
Bu yazı Azərbaycan
Respublikası Prezidenti
yanında Kütləvi
İnformasiya Vasitələrinin
İnkişafına Dövlət
Dəstəyi Fondunun maliyyə dəstəyi əsasında hazırlanıb.
Həftə içi.- 2014.-
14 yanvar.- S.6.