Xəzəri xəritəsiz üzən

komandirin son səfəri

4 dekabr "Günəşli" yatağındakı 10 saylı dərin dəniz özülündə baş vermiş faciə aramızdan bir dəniz oğlunu da apardı. Hadisə günü dənizçilərin harayına şığıyan Fövqəladə Hallar Nazirliyinin “Vixr-9” yanğınsöndürmə gəmisinin komandiri, polkovnik-leytenant Vyaçeslav Sergeyeviç Kryuçkov ömrünün 48-ci payızında elə alovu sönmək bilməyən 10-cu "Günəşli" özülündə əbədiyyət səfərinə yollandı. Həkimlər onun həyatını qurtarmaq üçün çox çalışsalar da, əfsanəvi komandiri xilas edə bilməyiblər. Hər halda, rəsmi məlumatda belə deyilirdi.

Qeyd edək ki, Vyaçeslav Sergeyeviç 22 mart 1970-ci ildə Bakı şəhərində anadan olub. Bakı Dənizçilik Məktəbini bitirib. 17 sentyabr 1991-ci ildən yanğından mühafizə orqanlarında xidmət edib, 10 noyabr 2008-ci ildən isə Fövqəladə Hallar Nazirliyi Dövlət Yanğından Mühafizə Xidmətinin Azərbaycan Respublikası Dövlət Neft Şirkətinin obyektləri üzrə Yanğından Mühafizə İdarəsinin “Vixr-9” yanğınsöndürmə gəmisinin komandiri vəzifəsində çalışıb. Xidmətdə olduğu müddətdə özünü yüksək məsuliyyətli, peşəkar və fədakar əməkdaş kimi tanıdıb. İki övladı var.

Onun izi ilə axşamın alatoranında Zabrat qəsəbəsinin işıqdüşməz dar dalanlı küçələrini gəzə-gəzə axırda gəlib düz evinin qənşərinə çıxdıq.

Bizi ilk qarşılayan mərhumun bacısıoğlu Saşa - Aleksandr Astrov oldu. Elə dayısı haqda ilk olaraq ondan soruşduq. Bu sarışın, enlikürək oğlan «dayınız necə bir insan idi?» - sualına təbəssümlü göz yaşları ilə cavab verdi:

"Sadəcə, pozitiv insan idi. Yadımda da elə bu cür qalıb. Onun iki qızı var, amma dörd övlada atalıq edib. Biz çox kiçik yaşlarımızdan ata nəvazişindən məhrum olmuşuq. O, bizə - iki qardaş və anama atalıq edib. Bizimlə dost kimi idi. Həyatda onun kimi dürüst insana rast gəlməmişəm. Nə söz veribsə, vaxtından tez yerinə yetirməyə çalışıb. Deyilənə görə, işdə də belə olub. Heç zaman üzündən təbəssüm əksik olmayıb. Bağışlayın daha danışa bilmirəm".

Yarıqaranlıq həyətə keçəndə gördük ki, içəri qələbəlik olsa da, sükuta qərq olub. Hər kəs komandir haqqında təbəssümlü, ancaq qəhər basmış bir ahənglə xatirələrindən danışırdılar. İçəri daxil olub, başsağlığı verdik. Söhbətlərə qulaq kəsildik. Məlum oldu ki, həyətə toplaşanların heç də hamısı qonum-qonşu deyil, yaxından-uzaqdan gələnlərdir. Sabunçudan, Suraxanıdan, 2-ci Zabratdan və başqa yerlərdən onun bəd xəbərini eşidib, evinin işığına toplaşmağa tələsiblər. Onun iki sotluq həyətində çox adam vardı, amma hələ ki, özü gəlməmişdi. Daha doğrusu, gətirməmişdilər. Cəsəd müayinə üçün xəstəxanada idi.

Mərhum Vyaçeslav müəllimin dostu, ehtiyatda olan zabit Nikolay Krasnov bildirdi ki, komandirin dəfni bu gün olacaq:

"Sabah (bu gün, mərhumun ailəsi ilə dünən axşam saatlarında görüşdük - T.T) saat ikidə Vyaçeslavın dəfnidir. Hər kəs burada olacaq. İşlədiyi idarənin rəisi, nazir müavinləri də dəfndə iştirak edəcəklər. O, elə bir adam idi ki, onun düşməni yox idi. Hər kəs, bütün hamı Volodyanın dostu idi. Mən onu 1993-cü ildən tanıyıram. 20 il bir yerdə işləmişik. Çox mehriban insan idi. Kiminsə xətrinə dəyməyi xoşlamazdı. Onun üzündə şirin təbəssümlə zəhm əkiz doğulmuşdu. Gözəl, aksentsiz Azərbaycanca danışmağı vardı. Onun hər millətdən dostu, tanışı vardı, dostcanlı idi. İnsan onun qəlbinə yatdısa, milliyyətinin fərqinə varmazdı. Ömrü dənizdə keçib. Şturman vəzifəsindən polkovnik-leytenantlığa, komandirliyə qədər yüksəlib. 2013-cü ildə dənizdə yenə güclü yanğın olmuşdu. Həmin yanğını da "Vixr" söndürdü. Bu adamın ömrü bu cür tufanları çox görüb. Bu dəfə isə ürəyi tab gətirmədi. Hələ də inana bilmirəm. Elə bilirəm ki, elə mən söhbət edirəm o, da yanımda oturub təbəssümlə mənə qulaq asır".

Vyaçeslav Kryuçkovun ömür sirdaşı Viktoriya xanım isə hafta.az-a açıqlamasında bildirdi ki, həyat yoldaşı haqqında ilk dəfə onsuz danışmaq bu alicənab xanım üçün olduqca ağrılıdır:

"Bilmirəm nə deyim, hələ də inana bilmirəm. Onsuz necə olacağını təsəvvürümə gətirmək istəmirəm. Biz Vyaçeslavla bir-birimizi sevib evlənmişik. Xoşbəxt ailə olmuşuq. İki qızımız olub, Snejana və Alina. Hər ikisi ali təhsillidir. Ailəmiz isə böyük olub. Bu balaca evdə onun anası və bacısının ailəsi ilə birgə ömür sürmüşük. Ailəcanlı olub. Demək olar ki, ilinin çox hissəsi dənizdə keçərdi. Ailəyə də vaxt ayırmağa macal tapırdı. Qayınanam Faya xala indi varlıqla yoxluq arasındakı bir boşluğa düşüb. Qızlarım da sanki, atalarının ölümünü yuxu kimi dərk edirlər".

Əfsanəvi dəniz cəngavərinin qızı Alina Kryuçkova isə atası haqqında bu gün danışmağın onun üçün çətin olduğunu deyib:

"Dənizçi geyimi onu çox ciddi göstərirdi. Elə ki, paltarını soyundu, ailənin ən sevimlisi olurdu. Yorğun olsa da, bunu evə gətirməzdi. Deyib, gülərdi. O, dünyanın ən şirin, gülərüz və zəhmli atası idi. Bizə vaxt ayıranda həmin zamanı ancaq bizim üçün xərcləyərdi. Bizimlə bacısı uşaqlarına heç bir fərq qoymazdı".

Anası Faya Kryuçkova danışmasa da, gözləri, islaq yanaqları ilə çox şey deyirdi. Bir ağzından çıxan hıçqırtılı kəlmə bu oldu ki... "getdi...". Bu getməyin dalınca yaşı yetmişi haqlamış Faya xanımın bütün irəlidəki ömrü, səadətli günləri də öz köç cehizini hazırlamışdı sanki...

FHN-nin 23 saylı Sabunçu Yanğından Mühafizə İdarəsinin rəisi, mayor Vaqif Hacıyev hafta.az-açıqlamasında bildirdi ki, bu ailə ilə tanışlığı 1999-cu ildəndir:

"O zaman mən Faya xala ilə birgə işləyirdim. O, bizim idarənin mühasibi olub. Mehriban bir ana kimi bizim hörmətimizi saxlayıb. Sonradan bu mehribanlıq ailəvi dostluğa çevrildi. Elə o zamandan da Vyaçeslav müəllimi tanıyıram. Mərd və dürüst bir dənizçi idi. Bu adam xəritəsiz Xəzərdə hara desən üzə biləcək yeganə dənizçi olub. İkinci elə bir adamı mən tanımıram. İki ailəyə baxıb. Dostlar, qonşular onun xətrini çox istəyib həmişə. İnana bilmirəm ki, o, yoxdur. O qədər həyat dolu insan idi ki… Onun ölümünü düşünmək belə yuxu kimi gəlir".

21 saylı Maştağa Yanğından Mühafizə İdarəsinin rəisi Güləli Cavadov isə bildirdi ki, Azərbaycan dənizçiliyi nəhəng və əfsanəvi komandirini itirib.

Əfsanəvi komandirin sinif yoldaşı və qonşusu Seyran Soltanov hafta.az-a açıqlamasında Vyaçeslav müəllimlə bağlı bir xatirəni danışdı:

"Bir köhnə maşını vardı. Səs-küylü… Bir də gördün, harasa gedir. O saat deyirdik ki, Volodya yenə harasa gedir. Biz də buna gülərdik ki, bala, "sroku" keçib də bunun. Dəyiş, başqasını al, sənə yaraşmır. Bir ay bundan qabaq dəyişib, yeni maşın aldı özünə. Heyf, çox sürmədi. Qızı «ATV» kanalında tərcüməçi işləyirdi bir ara, sonrasını bilmirəm. Vyaçeslav hamı ilə dost, qardaş olub. Allah rəhmət etsin".

Sonda isə onu deyə bilərəm ki, başın sağ olsun Vətən! Sənin uğrunda ölənlər adını və özünü yenə də sənin ağuşuna həkk edir. Sarısından, qarasından asılı olmayaraq, hər kəs sənin sağlığına badə olub, canını gah sulara, gah da ki, torpağa tapşırıb gedir.

Allah rəhmət etsin!

P.S. Mərhumun ailə üzvləri və yaxınları foto çəkiliş aparmağımızı istəmədilər. Onların bu istəklərinə hörmətlə yanaşdıq. Bir daha son ana qədər öz vəzifə borcunu layiqincə yerinə yetirərkən həyata gözlərini yuman mərhum Vyaçeslav Sergeyeviç Kryuçkovun yaxınlarına dərin hüznlə başsağlığı verir, səbr diləyirik.

Tural Turan

Həftə içi.- 2015.- 10 dekabr.- S.3.