Azərbaycan
multikulturalizmi
dünyada mütərəqqi
modeldir
Bu il 25-27 aprel tarixlərində
Bakıda BMT-nin Sivilizasiyalar Alyansının 7-ci Qlobal Forumu
keçirildi. Çox möhtəşəm tədbir idi: 140
ölkədən dövlət və hökumət
başçıları, siyasi liderlər, beynəlxalq və
regional təşkilatların nümayəndələri,
özəl sektor, incəsənət, media və
akademiyaların təmsilçiləri, donor təşkilatlar
və fondlar daxil olmaqla ümumilikdə 2 mindən çox
qonaq iştirak edirdi. Bəri başdan deyək ki, məhz erməni
işğalçılarının aprelin əvvəllərində
başlatdıqları dördgünlük döyüşlərdən
sonra sözügedən forumun Azərbaycanda təşkil
olunmasının milli maraqlarımızın təbliği
baxımından olduqca böyük əhəmiyyəti
vardı. Bundan başqa forum vasitəsilə Azərbaycanın
bu problemin həllində sülh yoluna üstünlük verməsi,
xalqımızın sülhsevər olduğu bir daha dünyaya
bəyan edildi.
Yeri gəlmişkən,
BMT Sivilizasiyalar Alyansının 7-ci Qlobal Forumu Azərbaycanın
iqtisadi baxımından güclü dövlət oluduğunun
təbliği istiqamətində də əhəmiyyətli
idi.
Forum Azərbaycanın
tolerant, multikultural dəyərlərə malik ölkə kimi
daha yaxından tanınmasına imkan yaradıb. Bakıda rus
pravoslav və alman katolik kilsələrinin fəaliyyət
göstərməsini, düşmənlərimizin adı ilə
tanınan erməni kilsəsinin indiyədək paytaxtın mərkəzində
qalmasını, hətta onun bərpa edilməsini buna misal
göstərmək olar. Bu kimi faktlar forumda
iştirakçıların da diqqətinə
çatdırıldı. Tədbirdə
çıxış edən prezident İlham Əliyevin
söylədiyi kimi, tolerantlığın məkanı,
multikultural dəyərlərə sadiq olan müstəqil Azərbaycan
mədəniyyətlərin dialoqunun inkişafına, mədəni
müxtəlifliyin qorunub saxlanmasına yönələn
mühim layihələrin reallaşdırılması sahəsində
zəngin təcrübəyə malikdir. Ölkəmizdə qədim
Alban kilsələrinin, məscidlər, sinoqoqlar, katolik və
pravoslav kilsələrinin bərpa və yenidən qurulması
onu göstərir ki, multikulturalizm Azərbaycanda dövlət
siyasətidir. Bütün bunlar bəzən xarici medianın bədxahların
sifarişi ilə sirli saxladığı Azərbaycan həqiqətlərinin,
yuxarıda qeyd elədiyimiz kimi, 140 ölkə nümayəndələrinin
timsalında canlı şəkildə dünyaya
çatdırılması deməkdir.
Forumun daha
bir əvəzsiz əhəmiyyətini bəzi dünya səviyyəli
siyasətçilərin dilindən də eşitdik. Məsələn,
BMT-nin Sivilizasiyalar Alyansının ali nümayəndəsi
Nasir Əbdüləziz Əl-Nasir bildirib ki, 2016-cı ilin Azərbaycanda
“Multikulturalizm ili” elan edilməsi dünya xalqları
arasında münasibətlərin möhkəmləndirilməsi
yolunda mühüm addımdır. Yəni cənab Nasir Azərbaycan
modelini bəşəri münasibətlərin
yaxşılaşması və möhkəmlənməsi
baxımından nümunə hesab edib. Yaxud da,
İspaniyanın xarici işlər naziri Xose Manuel Qarsia Marqallo
Bakının böyük İpək Yolu üzərində
yerləşməklə əsrlər boyu ideyalar mübadiləsi
və ticarət mərkəzi rolunu oynadığını
deyib. O, əsrlər boyu Bakıda yerləşən
karvansaraylardakı söhbətlərin dünyanın
informasiya təminatıda mühüm yerini qeyd edib və
bildirib ki, sitat: “Orta əsrlərdə İpək Yolu o
dövrün interneti, Bakı isə onun ən mühüm
qovşaqlarından biri idi”.
Forumun Azərbaycan
üçün ən vacib əhəmiyyətini Türkiyə
prezidenti Rəcəb Tayyib Ərdoğan vurğulayıb.
Qardaş dövlətin başçısı deyib ki,
müharibə və münaqişələrin tüğyan
etdiyi, hər gün onlarla, yüzlərlə insanın qana
boyandığı dünyanın bütün məsumlarının
gözü və qulağı Bakıya yönəlib.
İfadəyə fikir verin: bəşəriyyət içindən
çıxa bilmədiyi problemlərdən qurtuluş
ümidini Bakıdan gözləyir. Bax bu kiçik, müstəqilliyi
o qədər də çoxdan qazanmayan Azərbaycanın
qısa vaxtda əldə etdiyi misilsiz uğurdur…
Bəllidir
ki, bu gün bizim Qarabağ kimi ağrılı yaramız və
ondan doğan 1 milyonluq qaçqın və məcburi
köçkün problemimiz var. Forum bu problemə işıq
salmaq üçün müstəsna əhəmiyyətli idi.
BMT-nin Qarabağ münaqişəsinin həllini nəzərdə
tutan 822, 853, 874 və 884 nomrəli qətnamələrinin bu
günə kimi erməni qəsbkarları tərəfindən
yerinə yetirilmədiyi bir daha vurğulandı və Ermənistanın
işğalçı dövlət olduğu bir daha sübut
olundu.
Ən
maraqlısı bu oldu ki, Forumda çıxış edən
prezident İlham Əliyev iştirakçılara Ermənistanın
təcavüzü barədə isbatlanmış faktlar təqdim
edib. Dövlət başçısı ATƏT-in
Faktaraşdırıcı Missiyasının hesabatında
göstərilən işğal altındakı ərazilərdə
mədəni və dini abidələrin
dağıdılması faktını da müsal çəkib.
Bundan əlavə, o, dünya ictimaiyyətini Ermənistanın
təcavüzünü sözdə pislədiyi halda, əslində
bu münaqişənin həlli istiqamətində təsirli
addımlar atmamaqda günahlandırıb. Sitat: “Beynəlxalq
ictimaiyyət, BMT Təhlükəsizlik Şurası erməni
işğalçı qüvvələrinin qəsb
olunmuş ərazilərdən
çıxarılmasını tələb edir. Amma Ermənistan
bu qətnamələrə məhəl qoymur. Bəzi hallarda
görürük ki, BMT qətnamələri bir neçə
saat, bir gün ərzində həyata keçirilir. Azərbaycana
gəlincə, 20 ildən artıqdır, bu qətnamələr
yerinə yetirilmir. ATƏT, Qoşulmama Hərəkatı,
İslam Əməkdaşlıq Təşkilatı da belə
qərarlar qəbul edib. Ancaq Ermənistan bunları yerinə
yetirmir və bu halda heç bir beynəlxalq təzyiqlə
üzləşmir”.
Dövlətimizin
Qarabag probleminin həlli məsələsində haqlı
mövqedən çıxış etdiyi və sülhsevər
siyasət yürütdüyü üçün
münaqişənin həllində yalnız
danışıqlar üsuluna üstünlük verdiyi
aydın şəkildə iştirakçıların diqqətinə
çatdırıldı ki, bu da Forumun Azərbaycana verdiyi
şanslardan biridir.
Millət
vəkili Elman Nəsirov da deyir ki, BMT-nin Sivilizasiyalar
Alyansının VII Qlobal Forumunun Bakıda keçirilməsi
xalqımızın və dövlətimizin tarixən malik
olduğu multikultural dəyərlərinə verilən
mükafatdır. Onun sözlərinə görə, BMT bu tədbirin
Bakıda keçirilməsini məsləhət bilib və təklif
Azərbaycan pezidenti tərəfindən müsbət
qarşılanıb. “Forumun Bakıda keçirilməsi
sivilizasiyalararası dialoqun möhkəmləndirilməsi,
xalqlar və dövlətlər arasında dostluq, əməkdaşlıq
və davamlı inkişafın təşviqi, milli, dini və
irqi ayrı-seçkiliyin, dünyada sülh və təhlükəsizliyi
təhdid edən halların aradan qaldırılması, habelə
ümumbəşəri əhəmiyyət kəsb edən
aktual məsələlərin müzakirə olunduğu,
mühüm problemlərin həllinə dəstək məqsədi
daşıyan qlobal platformadır" deyən deputat əlavə
edib ki, həqiqətən də, Azərbaycan dünyada
multikulturalizm diyarı kimi tanınır. Bu səbəbdən
də ölkəmizdə müxtəlif dinlərin, mədəniyyətlərin
daşıyıcıları harmonik şəkildə fəaliyyət
göstərirlər. Təbii ki, bu da BMT-nin diqqətindən
yayınmayıb: “Multikulturalizm Azərbaycanda dövlət
siyasətidir, ictimai sifarişdir, gələcəyimizin zəmanətçisidir.
Buna görə də BMT forumun Azərbaycanda keçirilməsində
maraqlıdır və bu, təşkilatın
seçimidir".
Krımda
fəaliyyət göstərən, "Krımın Azərbaycanlı
İcması" İctimai Birliyinin sədri Rəhim Hümbətovun
fikrincə, apreldə Bakıda təşkil olunmuş forum, əslində
özünütanıtım baxımından hər bir
dövlət üçün fürsətdir. Hansı ki, bu
fürsəti rəsmi Bakı əldə etdi. “Belə tədbirlərin
effektini ölçmək bir az çətindir. Amma birmənalı
şəkildə deyə bilərəm ki, ev sahibi olan dövlətə
yüksək imic gətirir. Azərbaycan doğrudan da istənilən
xalqın nümayəndəsinin və ya dinin
ardıcılının rahat, tam təhlükəsiz
yaşaya biləcəyi əsl vətəndir. Bəlkə də
dünyada yeganə ölkədir ki, heç vaxt burda insanlar
bir-birinə milli və dini mənsubuyyətinə görə
təsir göstərmir. Bu mənada sözügedən foruma
Azərbaycanın ev sahibliyi eləməsi
anlaşılandır. Hətta mən arzulayardım ki, belə
tədbirlər çox keçirilsin Bakıda. Çünki
bu vəziyyətlərdə dövlətçiliyin
bütün sahələrində əlaqələr qurmaq, Azərbaycanı
təbliğ eləmək, mədəniyyətini, mətbəxini,
insanlarını və malaik olduğu milli keyfiyyətləri
dünyaya tanıtmaq üçün əvəzsiz şans
yaranır və düşünürəm ki, dövlətimiz
belə imkanları heç vaxt əldən verməyəcək”
deyən R.Hümbətov əlavə etdi ki, hazırda
yaşadığı Ukraynanın, xüsusilə
Krımın da Azərbaycan kimi belə möhtəşəm
fürsətləri qazanmağa ehtiyacı var. Onun sözlərinə
görə, Ukrayna cəmiyyəti hər zaman Azərbaycan
modelindən yararlanmağa çalışıb və buna
görə də Bakıda haqqında söz
açdığımız forumlar kimi böyük tədbirlərin
hər keçirilməsini arzulayır.
Qərbi
Avropada da bu forumun ölkəmiz üçün əhəmiyyəti
yüksək qiymətləndirilir. Hollandiya “Azərbaycan
evi”nin sədri Elxan Mirhəşimli Azərbaycan xarici siyasətinin
uğrlarından biri olaraq bu forumun Bakıda keçrilməsi
alqışlayır. “Bu Forumun Bakıda keçrilməsi məni
çox sevindirdi.15 ildir Niderlandda apardığım siyasi və
təşkilati söhbətlərdə, eləcə də
müşahidələrimdə Azərbaycanın dini müstəvidə
ittiham edildiyinin şahidi olmuşam. Çünki erməni
lobbisi avropalıları Qarabağ probleminin əsasən dinlə
əlaqədar yarandığına
inandırmışdılar. Mən kilsələrdə, eləcə
də xristian təşilatlarında etdiyim söhbətlərimdə
də dini faktorlarla tez-tez rastlaşıram. Ermənilər məhz
xristian olduqları üçün Azərbaycanda müsəlmanlar
tərəfindən öldürüldüklərini irəli
sürürdülər. Bu səbəbdən də xristian ermənilər
müsəlman azərbaycanlılarla eyni bayraq altında
yaşamaq istəmədiklərini, müstəqil dövlət
qurmaq arzularını dilə gətirirdilər” deyən E.Mirhəşimli
əlavə etdi ki, apreldə keçirilmiş forum
bütün bu kimi ittihamların yalan olduğunu üzə
çıxarmaqda misilsiz vasitədir: “Çox əhəmiyyətli
tədbirdir. Xüsusilə də multikultural baxımdan. Bu
forumdan sonra biz bütün dünyaya göstərdik ki, Azərbaycanda
bütün etnik qruplar və dinlər bir arada yaşayır,
yaradırlar. Azərbaycan tolerantlığın məkanı,
multikultural dəyərlərə sadiq bir ölkə
olduğunu bütün dünyaya göstərdi. Ötən
ay Roma Papasının Bakıya səfərini də Azərbaycanın
multikultural dəyərlərə önəm verməsinin
göstəricisi kimi qiymətləndirmək olar”.
Hollandiya
“Azərbaycan evi”nin sədri bildirir ki, keçirdiyi
bütün görüşllərdə Bakı forumu barədə
məlumatlar verib. Onlar Ermənistanın Azərbaycan
torpaqlarının 20 faizini işğal etdiyini, 1 milyon azərbaycanlını
ev-eşiyindən didərgin saldığını Hollandiya
ictimaiyyətinə çatdırır və Qarabağ
münaqişəsinin ümumiyyətlə, dinlə heç
bir bağlılığının olmadığını
isbat edirlər. “Biz hollandiya ictimaiyyətini başa
salırıq ki, “Böyük Ermənistan” yaratmağın xəyalında
yaşayan ermənilər həmişə dini faktorları
qabardaraq özlərini yazıq millət kimi göstərirlər”
deyən E.Mirhəşimli Bakıda keçiriləcək bu
kimi qlobal tədbirlərin Azərbaycan həqiqətlərinin
yayılmasına kömək edəcəyinə əmindir.
Vüsal Tağıbəyli
Həftə içi.- 2016.- 28
oktyabr.- S.3.