Şollar - həyat çeşməsi, fəxarət
yeri
“...
Gəlimli-gedimli, son ucu ölümlü dünya”nın
yaddaşında qalmaq bir alın yazısıdır deyəsən.
İlk gənclik illərində qazancı qəpik-quruş olan,
sonra isə ağlı, təmkini hesabına neft
milyonçusuna çevrilən Hacı Zeynalabdin
Tağıyevin də ağlına gəlməzdi ki, bir vaxtlar
millətinin tarixində
əbədiləşəcək. Ölkəsinin iqtisadi
inkişafında, millətinin savadlanmasında böyük və
təmənnasız xidmətlərinə görə
H.Z.Tağıyevə bəslənən sevgi, göstərilən
hörmət onun milyonlarından çox olacaq.
Və XX əsrin əvvəllərində içməli su sarıdan çox böyük əziyyətlər çəkən Bakı şəhərini bu problemdən qurtarmaq məqamında da öz sözünü deyəcək bu məşhur xeyriyyəçi. Bakı şəhər Duması bir sıra axtarışlardan sonra nəhayət, Quba qəzasının Şollar kəndindən Bakıya su kəməri çəkilməsi qərarını reallaşdıranda da məhz ilk qətiyyətli addımı H.Z.Tağıyev atır. Araşdırılan bütün tarixi, elmi, hətta bədii mənbələr də bunu sübut edir. Bakı şəhərini içməli su ilə təmin edəcək bu kəmərin tikintisində mənəvi dəstəklə bərabər, həm də maddi yardımını əsirgəmir bu azman kişi. Bu işə 25 min rubl pul verən H.Z.Tağıyev bununla da əsrin tikintisi olan Şollar-Bakı su kəmərinin inşasına xeyir-dua vermiş oldu.
1903-cü ilədək
reallaşmayan uğursuz
su təhcizatı, həll edilməmiş problem
İnşasına 1903-cü ildə başlanan Şollar-Bakı su kəmərinə qədər, əhalisi sürətlə artan Bakı şəhərinin çox böyük ehtiyac duyduğu içməli su problemini həll etmək üçün şəhər rəhbərliyi bir sıra layihələr həyata keçirməyə cəhd etmişdir. Problemi aradan qaldırmaq üçün Bakı Dumasının yaratdığı komissiya tərəfindən Zaqulba və Buzovna kəndlərində tapılan su mənbələrinin sutkalıq gücü 30 min vedrə olduğundan işə tam yaramır. 1885-ci ildə Maştağa kəndində qurulan "Maştağa-bənd" quyusundakı suyun tərkibində duzların miqdarı qədərindən artıq olur.
1892-98-ci illərdə Bakıya Kür çayından su kəməri çəkmək ideyasını da tikintinin çox pul aparmasını əsas gətirən şəhər bələdiyyəsi rədd edir. 1893-cü ildə dəniz suyunun xüsusi qurğulardan keçirilərək şəhər əhalisinə verilməsi də elə bir səmərə vermir. Gündəlik gücü az olduğundan təlabatı ödəməməklə bərabər, suyun pis qoxusu, dadı ürəkbulanmasına səbəb olur. Buna baxmayaraq, 1898-ci ildə ikinci su təmizləyici qurğu da fəaliyyətə başlayır. Volqa və Kür çaylarından barjlar, gəmilər vasitəsilə paytaxta gətirilən sular da yaranmış içməli su problemini həll etmir. Şəhər sakinləri satılan bu içməli suya pul verə bilmədiklərindən yenə də su quyularından istifadə etmək məcburiyyətində qalırlar. Bu isə xeyli təhlükəli idi. Çünki şəhərdəki 800 quyudan cəmi 100-ü istifadəyə yararlı hesab olunurdu. O ərəfələrdə şəhəri bürümüş vəba xəstəliyi də bunu sübut edir. Bütün bu uğursuz su təhcizatlarından sonra şəhər rəhbərliyi daha ciddi tədbirlər görməyə başlayır.
Nəhayət, Bakı şəhər rəhbərliyi və Duması bu problemi aradan qaldırmaq, paytaxt sakinlərini içməli su ilə təmin etmək işini xarici mütəxəssisə etibar edir. H.Z.Tağıyevin təşəbbüsü ilə bu sahədə kifayət qədər təcrübəsi olan, Avropanın 35 şəhərinə su və kanalizasiya xətləri çəkən su mühəndisi Vilyan Lindey Bakıya dəvət edilir.
Əsrin tikintisi
Burada heç bir mübaliğə yoxdur. Tikintinin
sonunda V.Lindeyin özü də bunu etiraf edir. Çünki Şollar-Bakı su kəməri zəmanəsinə
görə möhtəşəm bir tikinti olmaqla bərabər,
həm də əsil qəhrəmanlıq nümunəsi idi.
Əvvəldə qeyd etdiyimiz kimi, H.Z.Tağıyevin
maddi və mənəvi köməyi ilə başlayan bu
tikintini həyata keçirmək üçün V.Lindey
1899-cu ildə Bakıya gəlir. Vaxt itirmədən işə
başlayan mühəndis bir çox araşdırmalardan,
axtarışlardan sonra qəti qərara gəlir ki,onun axtardığı və Bakı sakinlərinə
çox lazım olan su başı qarlı
Şahdağının ətəklərindən
süzülüb dənizə tələsən yeraltı su
mənbəyindədir. Qusar yaylası ilə Xəzər
dənizi arasındakı bu bulaq sularının analizləri
onun yüksək keyfiyyətə malik olduğunu təsdiq
edir. Quba qəzasının, indiki Xaçmaz rayon ərazisindəki
Xudat şəhərinin şimal-şərqində yerləşən
Şollar kəndindən Bakıya su kəməri çəkmək
layihəsini dəstəkləyən Duma üzvü Əlimərdan
bəy Topçubaşov bu tikintiyə şəxsi
hesabından 25 min rubl pul verir. Duma isə bu layihənin
icrasına 182 min vəsait ayırır.
1903-cü ildə inşasına başlanan
Şollar-Bakı su kəmərinin tikintisi Rusiya-Almaniya
müharibəsi dövründə dayandırılır. O dövrdə həm də
vəsait çatışmamazlığı ciddi hiss edilirdi.
1909-cu ildə Duma bu kəmərin tikintisi
üçün istiqraz vərəqəsinin
buraxılmasını təmin edir. Həmin
ilin 5 mayında Duma Şollar-Bakı su kəmərinin
tikintisinə razılıq verir. Tikintinin
baş mühəndisi layihə rəhbəri Lindey təyin
edilir. "Qaffte K" şirkəti ilə bağlanan
müqavilə ilkin işlərin görülməsinə
start verir. Beləliklə, ümumi uzunluğu
187 kilometr olan Şollar-Bakı su kəməri tikintisinin daha məhsuldar
dövrü başlayır.
İşlərin çoxu ağır əl əməyi
tələb etdiyindən, fəhlələrin istənilən
səviyyədə qidalanmadığı səbəbindən
tikintidə xəstəlik və ölüm hallarına təsadüf
olunur. Bütün bunlara baxmayaraq, mühəndis-texniki
işlər, su borularının basdırılması
üçün torpağın, tunellərin qazılması
davam etdirilir. 1913-cü ildə Biləcəri
və Ataçay tunellərinin inşası başa
çatdırılır. Tikintini sürətləndirmək
məqsədi ilə şəhər rəhbərliyi
buradakı inşaat işlərini öz öhdəsinə
götürür. Beton su hövzələrinin,
su anbarlarının inşası da tənzimlənir. İndiki H.Z.Tağıyev qəsəbəsində
nasos stansiyası inşa edilir. "Aşersleben"
Alman şirkəti tərəfindən burada 600 at gücü
olan 3 mühərrik qurulur. Çuqun boruların Rusiyadan
alınmasına da 29 may 1912-ci ildə nail olunur. Su kəməri tikintisinin daha sürətli bu mərhələsini
I Dünya müharibəsi xeyli ləngidir. Burda çalışan mühəndis və texniki
işçilərin, fəhlələlərin demək olar
ki, hamısı hərbi qulluğa cəlb edilir. Bakı Dumasının ölkə rəhbərliyinə
yaranmış vəziyyətlə bağlı müraciətindən
sonra tikintidə çalışanlar hərbi
çağırışdan azad edilir. Beləliklə,
işlər yenidən öz ahənginə qayıdır.
İnşasında 35 müqavilə, 170
sifariş imzalanmış Şollar-Bakı su kəmərinin
tikintisi 21 yanvar 1917-ci ildə başa çatır.
Yazıçı
Manaf Süleymanov “Eşitdiklərim, oxuduqlarım,
gördüklərim” kitabında suyun verilməsi mərasimini
- o həyacanlı günü belə təsvir edir: “... Hacı yanında dayanmış məşhur dəmirçi,
kəmər çəkilişində çox zəhmət sərf
etmiş Ağakərimin əlindən tutub bir yerdə
kranı açdılar. Almas təki
parıldayan şəffaf su nəğmə oxuyurmuş kimi
axmağa başladı... Həmin gün
bütün məhəllələrdə çoxlu qoyun, dəvə,
öküz qurban kəsildi”.
Bu kəmər
artezian üsulu ilə qazılmış 24 quyunun bulaq və lay sularından qidalanır. Birinci
sifon tunelə 16, ikinciyə 5, üçüncüyə 3
quyunun suyu ötürülür. Dördüncü
kartaj xəttinə lay suları və 32
bulaq qoşulur. Buradakı su nasos stansiyasına
qədər öz gücünə axmaqla-özaxımlı hərəkət
edir. Burdan isə nasoslarla Müşfiqabad
qəsəbəsinə ötürülür. Su buradan yenə öz gücünə axmaqla
Bakı şəhərinə verilir.
Saniyədə
gücü 1,27 kubmetr olan kəmərin məhsuldarlığı
bu günə kimi dəyişməyib.
Hündürlüyü 1,7 , eni 1,2 metr olan
ellipsoid formalı monalit betondan hazırlanmış borular
özaxımlı rejimi pozmamaq üçün ərazinin
relyefindən asılı olaraq, 2-8 metr dərinlikdə
torpağın altında yerləşdirilmişdir. Quyularsa mənbədən 2-3 kilometr şimalda,
Şahdağ silsiləsindəki meşədə
qazılıb.
Başı qarlı Şahdağdan başlayıb gələn
şollar suyu dağların, münbit torpaqların süzgəcindən
keçdiyi üçün saf, buz kimi soyuq olmaqla bərabər,
həm də minerallarla zəngindir. Tərkibi təmiz
olduğu üçün uzun müddət keyfiyyətini itirməyən
bu suya onu saflaşdırmaq, təmizləmək
üçün hər hansı kimyəvi maddənin əlavə
edilməsinə ehtiyac yoxdur. İnsan
orqanizmi üçün çox faydalı olan şollar
suyunun tərkibinin dəyişməməsinə səbəb
həm də bərk gildən hazırlanmış və
çox hissəsi torpağa basdırılmış
borulardır. Alimlər, səhiyyə təşkilatları
son vaxtlar bu qənaətə gəlmişlər ki, saf və
keyfiyyətli su insanın fiziki sağlamlığı ilə
bərabər təfəkkürünün
formalaşmasında da mühüm rol oynayır.
Bu da Şollar kəndi
Xaçmazdakı Xudat şəhərindən o qədər
də uzaqda yerləşmir bu kənd. Bu kənddə
yaşayan qonşu Susay kəndində müəllim işləyən
65 yaşlı Ağadayı Vəliyullah oğlu Cəbrayılov
maraqlı həmsöhbətdir həm də. “Şollar”
sözü haradan yaranıb sualına Ağaverdi müəllim
Şollar-Baki Su Qurğuları Kompleksindən aralıda yerləşən,
hələ də yağan qardan ağ
örpəyə bürünmüş kiçik düzənliyi
göstərib belə cavab verdi:
- Müxtəlif
mənada vurğulanan adların heç bir əsası yoxdur.
Həqiqət budur ki, zaman-zaman qonşu ruslarla
vuruşmalarda, toqquşmalarda şil, şol-şikəst olan
döyüşçülərimiz yaxınlara qədər
xarabalığa qalan kiçik barak evlərdə tatar həkimləri
tərəfindən türkəçarə müalicə
olunurmuşlar. Burada
sağlamlığı bərpa olunmuş şillər,
şollar, eləcə də başqaları torpağı
münbit olan bu ərazidə ev-eşik salmağa
başlayıblar. Şillərin,
şolların məskunlaşdığı bu məkan sonra kəndə
çevrilib. “Şollar” sözü də
beləcə yaranıb. Atam da belə nəql
edərdi. Onunla bağlı sualınız
isə məni uzaqlara apardı. Atam Vəliyullah
Xəlil oğlu Cəbrayılov 1889-cu ildə Seyidlər kəndində
anadan olub. 20 yaşından – 1909-cu ildən
1932-ci ilə kimi Şollar su kəmərinin tikintisində
işləyib. Özünün dediyi kimi
iri at hündürlüyündə nəhəng boruları
torpağa basdırmaq üçün böyük arx, tunel
qazırmış. Danışırdı
ki, bu işlərdə əl əməyindən daha çox
istifadə edildiyi üçün xeyli işçiyə
ehtiyac varmış. Tikintidə ruslar,
tatarlar, azərilər, ləzgilər, qırızlar və
digər millətin nümayəndələri
çalışıb. Kəmər
uzandıqca keçdiyi qezanin kəndləri bu işə
qoşulurmuş. H.Z.Tağıyevin təşəbbüsü
və maliyyə yardımı ilə tikintidə ilk əvvəl
qadın və kişilər üçün ayrıca hamam və
ayaqyolu, bir qədər sonra yeməkxana, tibb məntəqəsi,
yataqxana, hətta ilkin təhsil verən axşam məktəbi
belə təşkil edilibmiş. 97
yaşında dünyadan köçən, ancaq heç vaxt
yaddaşını itirməyən atam onu da
danışırdı ki, vaxtaşırı tikintiyə
baş çəkən H.Z.Tağıyev burada
çalışanlara böyük qayğı göstərirmiş.
O işində fəal olan atama əlavə uzunboğaz rezin
çəkmə, ondan daha yaxşı işləyən
qonşusuna öz qızıl saatını
bağışlayır. Burada
çalışanların bir qədər zəif
qidalanmasını görüb çoxlu mal-heyvan kəsdirərmiş
Hacı. Hə, bir əsr keçir o vaxtdan...
El-obasini
çox sevən Ağadayı müəllim tarixləşmiş
bu kəndin digər məziyyətlərindən
danışmağı da unutmadı.
100 yaşın mübarək, həyat
çeşməsi!
Respublikada
su təchizatı sahəsində idarəetməni təkmilləşdirmək
məqsədilə 2004-cü il iyunun 11-də
ölkə prezidenti İlham Əliyevin sərəncamı ilə
yaradılmış “Azərsu” Açıq Səhmdar Cəmiyyəti
ona göstərilən etimadı doğrultmaq
üçün yarandığı gunden geniş fəaliyyətə
başlamışdır. Ölkənin içməli
su təchizatını yaxşılaşdırmaq məqsədilə
“Azərsu” bir sıra layihələri reallaşdırıb.
Şollar Bakı Su Qurğuları Kompleksinin 100
illiyi ilə əlaqədar da “Azərsu” ASC yubileyə
hazırlıq işlərini genişləndirir. Kompleksin özündə və obyektlərində təmir,
tikinti-abadlıq işləri yüksək keyfiyyətlə həyata
keçirilir. 100 ildə bir dəfə də qəza
yaşamayan “Şollar-Bakı” su kəmərini daha yüz il, min il yaşatmaq üçün.
Sənin
də ruhun şad olsun Hacı Zeynalabdin! Həm də
şollar çilənsin ruhuna...
Səxavət Məmmədli
“Azərsu” Açıq Səhmdar
Cəmiyyəti və Azərbaycan Respublikasının
Prezidenti yanında Kütləvi İnformasiya Vasitələrinin
İnkişafına Dövlət Dəstəyi Fondunun
keçirdiyi müsabiqəyə təqdim edilir.
Həftə içi.-
2017.- 22 fevral.- S.3.