Şollar-Bakı su qurğuları kompleksi
- 100 il: əbədi həyat mənbəyi
«Hər şeyin səbəbi sudur,
hər şey sudan gəlir və təkrar suya qayıdır».
Qədim yunan filosofu Fales həyatın
yaranışını suda görürdü. Həqiqətən
də tarixboyu bütün sivilizasiyalar məhz zəngin su mənbələri
hövzələrində yaranmışdır – Misir (Nil
çayı), Mesopotamiya (Dəclə-Fərat), ari (Hind-Qanq),
Çin (Xuanxe) və s. Sirr deyil ki, əhalinin və
iqtisadiyyatın müxtəlif sahələrinin su ilə
etibarlı təchizatı cəmiyyətin dayanıqlı
inkişafının şərtlərindəndir. Əsrlərboyu
insan öz fəaliyyəti ilə su ehtiyatlarına təsir
göstərib. Bəzən bu təsir cənnəti səhraya,
bəzən isə səhranı cənnətə
çevirib. Bu il 100 yaşını qeyd etdiyimiz Şollar su kəməri
də tarixə «səhranı cənnətə» çevirən
layihə kimi düşüb.
Əvvəlcə
qısa arayış
“Azərsu” ASC-nin məlumatına əsasən, “Şollar” Abşeron yarımadasının içməli su təchizatı üçün çəkilmiş ilk kəmərdir. Birinci Bakı Su Kəməri adı ilə tarixə düşən bu kəmər mənbəyini Xaçmaz rayonunun inzibati ərazisi olan Xudat şəhəri yaxınlığındakı Şollar kəndindəki yeraltı sulardan götürür. Məşhur xeyriyyəçi Hacı Zeynalabdin Tağıyevin bilavasitə dəstəyi ilə çəkilən kəmər 100 ilə yaxındır ki, Bakı əhalisini su ilə təmin edir.
“Şollar” su kəmərinin layihə gücü saniyədə 1,27 kubmetrdir (sutkada 109 min kubmetr). 1917-ci ildə “hərbi variant” üzrə istifadəyə verilən kəmərlə gətirilən suyun həcmi ilk vaxtlar layihə gücünün, təxminən, 1/3 hissəsini təşkil edib. 1925-ci ildən sonra həyata keçirilən texniki tədbirlərdən - əlavə artezian quyularının qazılması, su anbarlarının tutumunun 170 min kubmetrədək, nasos stansiyalarının gücünün 3,5 dəfə artırılmasından sonra nəql olunan suyun həcmi sutkada 109 min kubmetrə çatdırılıb.
“Şollar” kəməri ellipsoid formalı monolit betondan
hazırlanmış borulardan çəkilib. Hündürlüyü 1,7 metr, eni 1,2 metr olan borular marşrut boyunca
torpağa basdırılıb. Borular
özüaxımlı rejimi təmin etmək
üçün ərazinin relyefindən asılı olaraq, bəzi
yerlərdə torpağın 2, bəzi yerlərdə isə
8 metr dərinliyində yerləşir. Məhz
bunun nəticəsidir ki, kəmər H.Z.Tağıyev qəsəbəsindəki
nasosxanaya qədər özaxımlıdır. Buradan su nasoslar vasitəsilə Müşfiqabad qəsəbəsinə
vurulur, oradan isə yenə də özaxımlı rejimdə
Bakı şəhərinə nəql olunur. 1917-ci ildən fasiləsiz fəaliyyət göstərən
bu mənbənin məhsuldarlığı, demək olar ki, dəyişməyib.
Güclü iradənin zəfəri
«Vokruq
sveta» jurnalının 1972-ci il iyun nömrəsində
«Suyun çətin yolu» adlı məqalədə Şollar su
kəmərinin çəkilişi ilə bağlı
maraqlı məqamlara toxunulur. 19-cu əsrin sonu, 20-ci əsrin əvvəllərində
Bakıdakı ümumi vəziyyət ətraflı təsvir
edilir: «Bakının su sarıdan bəxti heç gətirməyib.
Qədim zamanlardan burada su quyuları vasitəsilə
içməli su əldə edilib. Keçən
əsrin 60-cı illərindən başlayaraq, Bakı və
Abşeron yarımadasında neft istehsalı bumu
yaşanır. Bakı buxtasının ətrafını
çoxsaylı buruqlar əhatələyir. Əhalinin sürətli artımı fonunda isə
neftlə zəngin bu torpaqlar şirin su ehtiyatları
çatışmazlığından əziyyət çəkir.
Lakin bol şirin suyu haradan almalı? Onillər bu problemin həlli üzərində
baş sındırılır. Həmin
dövrlərdə Bakıda 800 su quyusu olsa da, onların
sanitar durumu, hətta müasir sanepidstansiyaları da dəhşətə
gətirərdi. Buraya kanalizasiya sisteminin
olmaması əlavə edildikdə, mümkün epidemiya təhlükəsi
ilə bağlı real mənzərəni təsəvvür
etmək heç də çətin deyil. Bu təhlükə 1892-ci ilin yayında
özünü göstərir. Bakıda
yoluxucu xəstəlik geniş şəkildə
yayılır». Məqalədə
Şollar su kəmərinin çəkilməsi ilə
bağlı tarixi xronikaya geniş yer verilir. Bildirilir ki,
1898-ci ildə Odessa şəhərində su mühəndislərinin
keçirilmiş qurultayında Bakı şəhər
nümayəndəsi Smolenski ingilis mühəndis ser Vilyam
Lindleylə tanış olur. O, 1899-cu ildə
Bakıya dəvət edilir. Şəhər
Duması ser Lindleyin qarşısına iki məsələ
qoyur; su ya Kürdən, ya da Samurdan çəkilməlidir.
Ser Lindley Samurboyu yuxarı irəlilədikcə,
burada müxtəlif bulaqlarla da rastlaşır. Həmin bulaqların suyunu çox bəyənən
Lindley şəhərə suyun məhz bu bulaqlardan çəkilməsini
Şəhər Dumasına təklif edir.
Su
İstehsalçıları İctimai Birliyinin sədri
Dövlət Məmmədovun araşdırmaları ilə tanış olarkən Şollar su kəmərinin
çəkilişi ilə bağlı bir sıra maraqlı məqamlarla
rastlaşmaq mümkündür. Məsələn,
suyun mənbəyinə olan səyahətdən sonra şəhərin
rəhbəri Hovikov Şəhər Dumasında
çıxış edərək bildirir ki, su kəməri
mütləq həmin bulaqlardan çəkiləcək.
Hovikov xatirələrində yazır: «Mən gördüm ki,
heç nədə tamahı olmayan bu insanın dedikləri
düzdür. Onun məqsədi susuz insanlara su
verməkdir. Mən onun əleyhdarlarının
yerinə onun qarşısında utandım. Qarşıma məqsəd qoydum ki, Dumanı
inandırıb düz yola gətirməliyəm və şəhəri
pis su əvəzinə, keyfiyyətli və ucuz başa gələn
suyla təmin etməliyəm».
Ser
Lindleyin, kəmərin çəkilişi zamanı bir
sıra qüvvələrin ona qarşı
çıxmasına baxmayaraq, ortaya qoyduğu iradə təqdirəlayiqdir:
«Siz ingilis buldoqlarını tanımırsınız. Mən ingilis buldoquyam. Onlar
dişi ilə tutduqlarını buraxmırlar, onları kəssələr
də. Mən Bakıdan bu cür
tutmuşam. Bakıya su verəcəyəm.
Özü də yaxşı su… Mən sizə
qulluq etmirəm və sizinçün işləmirəm.
Mən kasıb bakılılara su vermək istəyirəm.
Siz bu işi məhv edə bilməzsiniz».
Sirr deyil ki, hər bir ölkənin milli təhlükəsizliyinin
təmini həm də su ehtiyatlarına nəzarətdən
asılıdır. Bu gün Azərbaycan müharibə vəziyətindədir.
Torpaqlarımızın 20 faizi işğal
olunub. Belə olan halda, dövlətin nəzarətindən
kənar su mənbələrindən daha az
asılı olması milli təhlükəsiziyin təmini
baxımından olduqca vacibdir.
Ölkənin Milli Təhlükəsizlik
Konsepsiyasında bu amil xüsusi olaraq vurğulanır. Dövlətin əsas
strateji sənədlərindən olan Konsepsiyada deyilir: «Azərbaycan
Respublikasının şirin su ehtiyatlarının
böyük həcminin qonşu ölkələrdə
formalaşması və bu ölkələrin ərazilərində
kimyəvi, radioaktiv və digər zərərli maddələrlə
intensiv çirklənməyə məruz qalması əhalinin
içməli su ilə təmin olunmasında problemlər
yaradır. Bundan əlavə, Ermənistan ərazisində
seysmik zonada yerləşən və texnoloji baxımdan
köhnəlmiş “Metsamor” Atom-Elektrik Stansiyası
bütövlükdə region üçün təhlükə
mənbəyidir».
Coğrafiya elmləri doktoru Rəna Qaşqayın «Azərbaycanda
transsərhəd çayların ekoloji vəziyyəti»
adlı araşdırmasına nəzər salsaq, məsələnin
nə dərəcədə ciddi olduğunu görərik. Mütəxəssis
bildirir ki, Azərbaycanın su ehtiyatlarıın 2/3 hissəsini
qonşu ölkərdən trans-sərhəd çaylar vasitəsilə
daxil olan sular təşkil edir. Azərbaycanın
iki böyük çayının – Kür və Araz
çaylarının və onların bəzi qollarının
aşağı axınında yerləşməsi
respublikanın su problemlərini daha da dərinləşdirir və
onun su ehtiyatlarını qonşu ölkələrdə bu
çay sularının istifadə səviyyəsindən
asılı edir. Kür çayı
suyunun geniş istifadəsi Gürcüstan ərazisindən
başlayır. Əkin sahələrinin
suvarılması məqsədilə Taşis-Kara şəhəri
yaxınlığında 14 suvarma kanalı vasitəsilə
çaydan saniyədə 50 kubmetr su götürülür.
Qabırrıdan çəkilən 14 kanalın
ən irisi vasitəsilə saniyədə 65 kubmetr su
götürülür. Qanıx
çayından ildə saniyədə 42 kubmetr su
götürülür. Ona görə
Kür çayının saniyədə 853 kubmetr təbii
axımı olduğu halda, Xəzər dənizinə
yalnız saniyədə 580 kubmetr su çatır. Gələcəkdə bu çayların suyundan
istifadə nizamlanmasa, Azərbaycanın vəziyyəti pisləşəcək.
Kür və Araz çaylarının digər qollarından
(Ağstafaçay, Həsənsu, Axınca, Tovuz, Arpa,
Bazarçay) da geniş istifadə edilir. Bu
çayların hamısı öz
başlanğıcını Ermənistan ərazisindən
götürür və demək olar ki, hamısının
üzərində su anbarları Ermənistan ərazisində
tikilmişdir. Yalnız dükerlər, yəni
suburaxıcı qurğular sərhəddə yerləşir.
Bu isə təcavüz üçün
geniş yollar açır. Məsələn,
Helsinki (1992) sazişinə qol qoymayan ölkə gələcəkdə
bu kiçik dağ caylarından kanal və arxların çəkilməsi
ilə suyun azalmasına səbəb olacaq və hətta su
anbarlarının doldurulmasına da su çatmayacaq.
Kiçik Qafqaz və Orta Araz vilayətlərindən
axan trans-sərhəd çayların mənbələri Ermənistanda,
Kür dağarası çökəkliyi vilayətindən
axan çayların mənbələri isə
Gürcüstanda yerləşməklə, bu çay
sularının keyfiyyəti də əsasən, Ermənistan və
Gürcüstan ərazisində formalaşır.
1980-ci illərin sonlarından bu dövlətlərin
heç bir müəssisəsində təmizləyici
qurğular işləmir. Həmin dövlətlər
ərazisindən atılan çirkab suları qəbul edən
trans-sərhəd çaylar sanki sanitar-təmizlik
funksiyasını yerinə yetirərək ekoloji təcavüzə
məruz qalır. Nəticədə,
onların sularının keyfiyyəti sanitar normaların tələblərinə
cavab verməyən vəziyyətdə Azərbaycan ərazisinə
daxil olur.
Kür və Arazla müqayisədə isə Şollar
suyunun tərkibi o qədər zəngindir ki, hətta digər
mənbələrdən əldə edilən sularla müqayisədə,
onun tərkibinə heç bir maddə vurulmur. Hamburqda yerləşən
“Dr. Kaiser & Dr. Woldmann” İnstitutunun apardığı
mikrobioloji və kimyəvi testlərin nəticəsinə
uyğun olaraq, Şollar suyu Azərbaycanda ən yüksək
standartlara uyğun içməli su kimi qiymətləndirilib.
Bütün qeyd olunan məqamları nəzərə
alsaq, 100 yaşlı Şollar Su Kəmərinin ölkəmiz
üçün nə dərəcədə əhəmiyyətli
olduğunu görərik. Təsadüfi deyid ki, 20-ci əsrin əvvəllərində
bu kəmərin çəkilişini istəməyən qüvvələrin
başında da məhz erməni daşnakları və
Bakıda su satışından milyonlar qazanan erməni
işbazları dayanırdı.
«Biz bu hədəfə doğru irəliləyirik»
Azərbaycanın su təchizatının daha da
yaxşılaşdırılması, milli təhlükəsizliyin
və sosial-iqtisadi inkişafın təməlini təşkil
edən sağlam genofonda malik gələcək nəsillərin
formalaşdırılması daim Prezident İlham Əliyevin
yürütdüyü dövlət siyasətinin əsaslarından
birini təşkil edir. Bu baxımdan, Oğuz-Qəbələ-Bakı
Su Kəməri və Ceyranbatan Ultrasüzgəcli Sutəmizləyici
Qurğular Kompleksini xüsusi qeyd etmək lazımdır.
Prezident İlham Əliyevin “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransda ölkəmizdə su təsərrüfatının inkişafı və görüləcək işlərlə bağlı səsləndirdiyi fikirlər vurğuladığımız məqamların bir daha nə dərəcədə aktual olduğunu göstərir: “Azərsu” ASC-nin qarşısına məqsəd qoyulmuşdur ki, bir neçə il ərzində bütün şəhərlərimizin içməli su və kanalizasiya layihələri tam icra edilsin. Əhaliyə 24 saat fasiləsiz, Dünya Səhiyyə Təşkilatının standartlarına uyğun içməli su verilsin. Biz bu hədəfə doğru irəliləyirik. Hər il bir çox şəhərlərimizdə içməli su layihələri istifadəyə verilir. Hazırda Bakının fasiləsiz su təminatı 80 faizə çatmışdır. Ölkə üzrə isə bu göstərici, təxminən, 65 faizdir. Bu, daha da artmalıdır”.
Bu gün əsası 100 il əvvəl Şollar su kəmərinin çəkilişi ilə qoyulmuş Azərbaycan əhalisinin saf və dünya standartlarına uyğun su təchizatı prosesində gələcək illərdə daha böyük nailiyyətlər qazanacağımızı əminliklə söyləyə bilərik.
Azad Əliyev,
"Azərsu”
Açıq Səhmdar Cəmiyyəti və Azərbaycan
Respublikasının Prezidenti yanında Kütləvi
İnformasiya Vasitələrinin İnkişafına Dövlət
Dəstəyi Fondunun keçirdiyi müsabiqəyə təqdim
etmək üçün
Həftə içi.- 2017.- 28
fevral.- S.3.