Ayaq barmaqları ilə çəkilmiş rəsmlər

Martın 16-da Azərbaycan Fransız İnstitutunda azərbaycanlı rəssam-sənətkar Samirə Salmanovanın şəxsi əsər kolleksiyasından ibarət sərginin açılışı olacaq. Fransanın ölkəmizdəki səfirliyindən Hafta.az-a verilən məlumata görə, 1981-ci ildə anadan olmuş Samirə “uşaq-serebral iflic” diaqnozu ilə anadangəlmə xəstə doğulub.

O, yerimir, ayaq üstə dura bilmir, əlinə heç bir şey götürə bilmir, eşitməsi yaxşı olsa da danışa bilmir. Bütün bu çatışmazlıqlara baxmayaraq Samirədə İlahi tərəfindən verilmiş fitri istedad var. Belə ki, Samirə yeganə ümidi olan ayaq barmaqları ilə olduqca gözəl rəsm əsərləri yaradır. Samirənin heç bir dərs almamasına baxmayaraq o, ayaq barmaqları ilə yazı yazır, şəkil çəkir, kompüterlə sərbəst işləyir, hətta diyircəkli kresloda oturduğu yerdə ayaq barmaqları ilə xırda ev işlərini də yerinə yetirir. 2002-ci ildə Moskvada keçirilən Beynəlxaq “Filantrop fondu”nun sərgisində böyük nailiyyətə imza atıb. Samirənin ayağı ilə çəkdiyi ən qiymətli əsərləri Moskvanın Tretyakovski Qalareyasında nümayiş etdirilərək oranın fonduna qəbul edilib. Hazırda Samirə “Əlil qadınlar”, “Əlillərin beynəlxalq əməkdaşlığı” və digər bu kimi cəmiyyətlərin fəal üzvlərindəndir.

Vüsal

Həftə içi.- 2018.- 16 mart.- S.8.