Yubileyin mübarək, böyük insan!!!
Azərbaycanın
ikinci dəfə müstəqilliyinin əldə etməsində
tələbə hərəkatının böyük xidməti
olmuşdur. Bu hərəkat Ümumazərbaycan tələbə
hərəkatı idi. Təəssüf ki, bu hərəkat hələ
də yetərincə araşdırılmamışdır. Hərəkat
bir nöqtədən, daha doğrusu Bakı Dövlət
Universitetində qərarlaşmış Tələbə
Komitəsi tərəfindən idarə olunurdu. Bu komitə də
Tarix fakültəsində yerləşirdi. Bakı Dövlət
Universitetinin tələbə hərəkatında əsas
dayaq nöqtəsi Tarix fakültəsi idi. Tarix fakültəsinin
altıncı mərtəbəsində bizim qərargah yerləşirdi.
Əvvəllər bu qərargah komsomolun otağı
olmuşdu. Tarix fakültəsi tələbələri
buranı ələ keçirdilər.
Maraqlıdır
ki, biz bu otağı qəsb etdikdən sonra bizi zorla
çıxaran olmadı. O zaman hesab edirdik ki, bizim gücümüzdən
ehtiyat edirlər. Amma gəlin etiraf edək ki, bizi milis
(sonradan polis-D.Ə.) qüvvələri oradan çıxara
bilərdilər. Amma etmədilər. Ona görə ki,
fakültə rəhbərliyi buna getmədi. Fakültənin
dekanı isə Yaqub müəllim idi. O zaman Tarix fakültəsinin
tələbələri daha aktiv idilər. Xalq Cəbhəsinin
ən güclü dayaq dəstələrindən biri BDU, BDU
XC dayaq dəstələri içərisində də ən
aktivi Tarix fakültəsi dayaq dəstəsi idi. Müəllimlərimizin
də əksəriyyəti dayaq dəstəsinin üzvü
idilər. Ümumən Tarix fakültəsi BDU tarixində həmişə
inqilabi mərkəz olmuşdur. Azərbaycanın müstəqilliyi
uğrunda gedən mübarizədə fakültəmizin
xüsusi rolu olmuşdu. Məsələn, biz o fakültəyə
qəbul olunanda bilirdik ki, bu fakültədə Əbülfəz
Əliyev (Elçibəy) dərs deyibdir.
Yaxud, Etibar Məmmədov bu fakültədə müəllim kimi çalışır. Bu az şey demir. Elə bunun nəticəsi idi ki, 1987-ci ildə bizim fakültənin altıncı mərtəbəsində komsomolun divar qəzetinə inqilabçı xarakterə malik tələbələr tərəfindən diqqəti cəlb edən bir şəkil vurulmuşdu. Şəkildə ox ilə ikiyə parçalanmış ürək təsvir olunmuşdu. Bu o demək idi ki, Azərbaycan ikiyə ayrılıbdır. Bu şəkil divarda cəmi doqquz dəqiqə qaldı. Çünki agentura dərhal Dövlət Təhlükəsizlik komitəsinə xəbər vermişdi. Şəkli divardan çıxardılar, amma kimsəyə bir söz deyən olmadı. O zaman fakültəmizin dekanı Yaqub Mahmudov idi.
İndi hesab edirəm ki, ayrı dekan olsaydı, bu cür hərəkət edə bilməyəcəkdi. Çünki Yaqub müəllim böyük və qorxmaz ürək sahibi idi. Keçdiyi həyat yolu bəzi məsələlərdə bizə kömək edirdi. İnsan təpədən-dırnağa milli idi. Mühazirələri də milli zəmində idi. Qeyd edək ki, belə müəllimlərimiz az deyildi. Yaqub müəllim XX əsrin 60-cı illərinin sonu, 70-ci illər milli tarixçilər siyahısında öz yerini tutmuşdu. Bu haqda çox sonralar Əbülfəz Elçibəyin xatirələrini oxuyanda gördüm. Orada milli tarixçilər sırasında Ziya Bünyadovun, Süleyman Əliyarlının, Yaqub Mahmudovun, Mahmud İsmayılovun adları çəkilmişdir. SSRİ dövründə bu adamlar qara siyahıya salınmışdı. Onlardan ciddi ehtiyat edirdilər.
Biz tələbə olanda Yaqub müəllim dekan idi. Tələbəlik illərimizə nəzər salanda düşünürəm ki, o zaman doğrudan da çətin və şərəfli dövr idi. O zaman yadımda qalan ən böyük hadisələrdən biri 1989-cu ildə Tarix fakültəsində keçirdiyimiz “Novruz” şənliyi idi. O zaman Bakı şəhərində fövqəladə vəziyyət idi. Bakı komendantı Valeri Bünyadov idi. Belə vəziyyətdə bayırda “Novruz” şənliyi keçirmək hünər istəyirdi. Yaqub müəllim istəyimizə müsbət cavab verdi. Bu şənliyin ssenarisinin hazırlanmasında da iştirak etdi. İki kosa var idi. Mən də Bəy əfəndi idim. O zaman BDU-nun sağ tərəfində böyük meydan var idi. Biz bayramı keçirmək üçün Opera və Balet teatrına getdik. Oradan paltarlar verdilər. Eyni zamanda Atçılıq mərkəzinə getdik. Bura onlardan çaparlar dəvət etdik. Onlar da faytonlarla gəlmişdilər. Bahar qız Azərbaycan Opera və Balet teatrının aktrisası idi. Yaqub müəllim bütün hazırlığa nəzarət edirdi. Tarixi kosa tələbə yoldaşımız Məhəmməd idi. Müasir kosa isə Zahid idi. Bakı kəndlərindən olan tələbə yoldaşlarımız xoruz döyüşü göstərmək üçün döyüş xoruzları gətirdilər. Qızlarımız hamısı milli paltarda idilər. Başlarına ağ kəlağayı bağlamışdılar.
Tədbir saat 12-də başladı. Mart ayının 20-si idi. Təsəvvür edin ki, hay-küyümüz bütün Bakıya yayılmışdı. Bakı şəhəri sakinləri BDU-ya doğru axışırdı.
İnsanlar sevincdən ağlayırdılar. Uzun illər idi ki, bu bayrama həsrət idilər. Xoruz döyüşü başlayanda Az.Tv birbaşa çəkməyə başladı. Xatırladım ki, Novruzla bağlı videosüjetlərdə bu kadrlar indi də təkrar olunur. Hələ iki kosanın bir-biri ilə qarşılaşması və müasir kosanın iddiaları... Bu ssenari birbaşa Yaqub müəllimə məxsus idi. Əslində bu deyişmə birbaşa inqilab idi. Yəni dövlətçiliyimizə doğru gedən yolda bir işarə idi. Meydana milli rəqs qrupu daxil oldu... Tamaşaçılar heyrətdən göz yaşlarını saxlaya bilmirdilər. İndi çoxlarına bu vəziyyət adi gələ bilər. Amma o zaman tamam başqa idi. İnsanlar özlərinin doğma bayramı ilə qucaqlaşmışdılar. Şənlik yüksək əhval-ruhiyyə ilə davam edirdi. Əhali dağılışmaq bilmirdi. Bu zaman xəbər gəldi ki, bəs, Bakı şəhər komendantı buraya öz nümayəndəsini göndərib ki, tədbiri saxlayaq. Onları qorxudan Bakı sakinlərinin bu tədbirdə çoxluğu idi. Hətta xəbərdarlıq etdilər ki, əmrə əməl olunmasa, buraya əsgərlər yeridiləcəkdir. Bu mənada məcbur olub tədbiri saxladıq. Bu tədbir hamı tərəfindən yüksək qarşılandı. Sonradan Azərbaycanın hər yerində bundan danışırdılar.
Yaqub müəllim dekan olan dövrdə birinci kursa daxil olan tələbələr mütləq Qobustana səfər etməli idilər. Bu pozulmayan bir əmr idi. Bizdən əvvəlki tələbələri həm də Dərbənd şəhərinə “Narın qala”nı görməyə aparırdılar. Eyni zamanda tələbələri həm də Azıx mağarasına aparırdılar. Yaqub müəllim təkcə bunlarla kifayətlənmirdi. Yadımdadır ki, bizi tez-tez televiziya verilişlərinə çıxarır və dəyirmi masalar təşkil edirdi. O zaman məsələ qoyurduq ki, nəyə görə bizdə Qazax tarixi, Özbək tarixi, Türkman tarixi, Qırğız tarixi keçirilmir? Nəyə görə Türkiyə tarixi genişliyi ilə keçirilmir?
Yaqub müəllim əsl tarixçilər yetişdirmək üçün fakültədə ərəb dili, fars dili, latın dillərinin tədrisi təşkil etdi. Ərəb dili üç il keçirilirdi. O cümlədən fars dili də... Azərbaycan tarixi fənninin öyrənilməsinə xüsusi əhəmiyyət verirdi.
Yaqub müəllimin dekanlığı
doğrudan da çətin bir dövrə
düşmüşdü. Bir an da olsa fakültədən ayrıla bilmirdi.
Çünki fakültədə müxtəlif niyyətli
adamlar var idi ki, tələbələri güdaza verə bilərdilər.
Yadımdadır ki, 1988-ci il hadisələri başlayan ərəfədə
Yaqub müəllimi Daşkəndə tarix elminin tədrisi ilə
bağlı elmi konfransa çağırmışdılar.
Qayıdanda şəhər artıq bir-birinə qarışmışdı.
Yolda eşitmişdi ki, indiki “Azadlıq” meydanı”
çoşub-daşır. Yaqub müəllim bilirdi ki, tələbələrinin
90 faizi oradadır. Birbaşa meydana gəlmişdi. Tribunaya
çıxıb çıxış etdi...
Yaqub
müəllimin fəaliyyətinin əsas istiqaməti arxeoloji
qazıntılarda tələbələrin
iştirakını təmin etmək idi. Bunun
üçün BDU Tarix fakültəsi arxeoloqları
üçün maliyyə ayrılmasına nail oldu və
fakültənin ekspedisiyaları fəaliyyətə
başladı. Mən də üç il mərhum Fərman
Mahmudovun rəhbərliyi altında arxeoloji qazıntılarda
iştirak etdim.
Həyatımda
böyük iz qoymuş bu insan mənim aspiranturada təhsil
almağımda da böyük iş gördü.
Yadımdadır ki, elə bir vaxt idi ki, BDU-da bizə salam verməyə
qorxurdular. Amma Yaqub müəllim mənim üçün Təhsil
nazirliyindən əlavə yer aldı və mənim elmi rəhbərim
oldu. İlk gündən elmi fəaliyyətim məhsuldar idi.
Amma sonradan elmi fəaliyyətim zəiflədi. Bunun da səbəbləri
vardı.
O zaman ailə
saxlamaq çətin idi. Elmdə isə pul yox idi. Mən də
jurnalistika ilə məşğul idim. On il keçdi. Bir
gün həyat yoldaşım, telejurnalist Arzu xanım dedi ki,
Səfəvilərlə bağlı bir film çəkmək
istəyirəm. Onda dedim ki, bu film üçün ən
yaxşı danışa biləcək şəxs Yaqub müəllimdir.
Çünki o, diplomatdır. Kim danışsa işləri
korlaya bilər. Amma Yaqub müəllim belə deyildir.
Doğrudan da Yaqub müəllimdən müsahibə çox
uğurlu alındı. Həmin müsahibənin sonunda Yaqub
müəllim Arzu xanımdan soruşub ki, “o fərari
haradadır?. Qaçıb gedibdir, elmdən
uzaqlaşıbdır”. Arzu xanım bunları mənə deyəndə
ertəsi gün yanına gəldim. Mənə sözləri
bu oldu: “Sən Qarabağ savaşında səngərlərdə
oldun, fərarilik etmədin, bə indi?”. Bu sözlər mənə
ciddi təsir etdi. O gündən elmi fəaliyyətimi bərpa
etdim. Buna görə ona və bir də həyat
yoldaşıma minnətdaram!!!
Bu insan
haqqında çox yazmaq olar... Bu insan əsl vətənpərvər
Azərbaycan alimidir!!! İşdə ciddiliyi sevir,
hamını ətrafında yığmağı bacarır və
çox böyük təşkilatçıdır. Eyni
zamanda hamıya qayğı ilə yanaşan adamdır. Bunu
rayonlar, elmi konfranslara etdiyimiz səfərlər zamanı
müşahidə etmək mümkündür!!! Yubileyin
mübarək, BÖYÜK İNSAN!!!!
Dilavər Əzimli,
AMEA A.A.Bakıxanov adına Tarix
İnstitutunun
aparıcı elmi işçisi,
t.ü.f.d., dosent
Həftə içi.- 2019.- 8
fevral.- S.4.