Naftalanın ərazisi genişlənir

Arif Rəhimzadə: "Hazırda şəhərin inkişafı ilə bağlı dövlət proqramı hazırlanır"

"Naftalanda kurort-sanatoriya sahəsinin inkişafı üçün ciddi addımlar atılır. Bununla əlaqədar şəhərin inzibati ərazisi də genişləndirilir" - bu fikirlər dünən Milli Məclisin regional məsələlər komitəsinin dünənki iclasında "Azərbaycan Respublikasının Goranboy rayonunun və Naftalan şəhərinin inzibati - ərazi bölgüsündə qismən dəyişiklik edilməsi haqqında" qanun layihəsi müzakirə olunarkən səsləndirildi.

Regional məsələlər komitəsinin sədri Arif Rəhimzadə bildirdi ki, Goranboy rayonu ilə Naftalan şəhəri həmsərhəddir: "Naftalan unikal müalicəvi neftinə görə dünyada məşhurdur. Hətta yazıçı Marko Polo da əsərlərində bu barədə yazıb. Prezident İlham Əliyev ötən ilin mart ayında Naftalanda olarkən tapşırıq verib ki, bu şəhər inkişaf etdirilsin. Hazırda Naftalanın inkişafı ilə bağlı dövlət proqramı hazırlanır". Əvvəllər Naftalan şəhərinin 4 min hektardan çox sahəsi olduğunu deyən A.Rəhimzadənin sözlərinə görə, sonradan bu ərazilərin xeyli hissəsi məlum torpaq islahatı zamanı Goranboy rayonuna verilib. Komitə sədri qeyd edib ki, indi Goranboy rayonunun inzibati ərazisindən Naftalan şəhərinə 574,82 ha torpaq sahəsinin verilməsi təklif olunur. Həmin torpaq sahələri bələdiyyələrin mülkiyyətinə aiddir. Belə ki, bu bölgüdə 26,4 ha Qaşaltı - Tapqaraqoyunlu, 11,9 ha Qasımbəyli və 2,5 ha torpaq sahəsi isə Tatarlı kəndinin payına düşür. Bundan başqa, Meşə Fondunun 534,02 ha ərazisi də Naftalanın inzibati ərazisinə verilir". A.Rəhimzadənin sözlərinə görə, əslində həmin ərazilərdə Naftalan şəhərinə məxsus obyektlər də mövcuddur.

Parlamentin regional məsələlər komitəsinin sədr müavini Fəttah Heydərov müzakirəyə çıxarılan məsələnin əhəmiyyətli olduğunu bildirdi. Vurğuladı ki, bu dəyişiklik həmin bölgədə kurort sahəsinin inkişafında xüsusi rol oynayacaq.

Komitənin üzvü, millət vəkili Fəzail İbrahimli isə bu məsələnin strateji məsələ olduğunu deyərək layihəni dəstəklədi.

Daha sonra komitə üzvləri Bərdə rayonunun Dilənçilər kəndinin adının dəyişdirilməsi məsələsinə baxıblar. Komitənin sədri A.Rəhimzadə bildirib ki, bu kəndin adının Çəmənli adlandırılması təklif olunur: "Camaat müraciət edir ki, kəndimizin adından xəcalət çəkirik. Məsələyə Toponimiya Komissiyasında da baxılıb və müvafiq qərar qəbul olunub. Həmin kənd doğrudan da çəmənlik ərazidə yerləşdiyi üçün ona Çəmənli adının verilməsi məqsədəuyğundur". Sonra millət vəkilləri hər iki qanun layihəsini müzakirə olunmaq üçün plenar iclasa tövsiyə ediblər.

Azad

Həftə içi.- 2009.- 11-13.- S. 6