Kamal Xudaverdiyev anıldı

Dünən Teatr Xadimləri İttifaqında (TXİ) sevilən teatr və kino aktyoru Kamal Xudaverdiyevin vəfatının ildönümü ilə əlaqədar anım mərasimi keçirildi.

İlk çıxış edən TXİ-nin sədri Azərpaşa Nemət vurğuladı ki, K.Xudaverdiyev sözü vaxtında deməyi üstün tutan insanlardan idi. A.Nemət: "Kamal Xudaverdiyevin filmlərdə, televiziya tamaşalarında və əlbəttə ki, Akademik Milli Dram Teatrının səhnəsində yaratdığı obrazları unutmaq mümkün deyil. Çox təəssüf ki, belə bir sənətkar artıq aramızda yoxdur".

Tədbirdə çıxış edən teatrşünas Məryəm Əlizadə isə K.Xudaverdiyevin səhnə fəaliyyətini təhlil edərək onun yaratdığı obrazların incəsənət tariximizdə öz yerini tutduğunu dedi. K.Xudaverdiyevin 1965-ci ildən "Azdrama"nın truppasına daxil olduğunu xatırladan M.Əlizadə onun "Məhv olmuş gündəliklər"də Ədalət, "Vaqif"də Eldar, "Dar ağacı"nda Aqşin, "Qılınc və qələm"də Fəxrəddin kimi obrazlar yaratdığını, dolğun yaradıcılıq yolu keçdiyini qeyd etdi.

Mərasim iştirakçılarına K.Xudaverdiyevin iştirak etdiyi tamaşalardan fraqmentlər nümayişləndi və hər kəs bir daha mərhum aktyorun təkrarsız səsinin cazibəsinə düşdü.

Samirə

Həftə içi.- 2009.- 14 aprel.- S. 7.