"Konya xalçaları" Aşqabad konfransında

Lətif Kərimov adına Azərbaycan Xalçası və Xalq Tətbiqi Sənəti Dövlət Muzeyinin direktoru Röya Tağıyeva Türkmənistanın paytaxtı Aşqabad şəhərində keçirilən "Səlcuqilər dövrünün ədəbiyyatı və mədəniyyəti" mövzusuna həsr olunmuş beynəlxalq konfransda Azərbaycanı təmsil edib. Türkmənistanın prezidenti Qurbanqulu Berdımuhammedovun rəhbərliyi altında baş tutan konfrans çərçivəsində elmi forum da keçirilib. Tədbirin təntənəli açılış mərasimi Milli Mədəniyyət Mərkəzinin konfrans zalında keçirilib. R.Tağıyevanın mətbuata açıqlamasına görə, konfransın 5 elmi seksiyasının işinin gedişində 140-a yaxın elmi məruzə dinlənib və müzakirə edilib, iqtisadiyyatın, siyasətin, ədəbiyyatın, dekorativ-tətbiqi sənətin, memarlığın və heykəltəraşlığın, musiqi və rəngkarlığın səlcuqilərin hakimiyyətdə olduğu dövrdəki özəllikləri nəzərdən keçirilib. R.Tağıyeva vurğuladı ki, belə bir nüfuzlu elmi toplantıda iştirak etməklə nümayəndə heyətimiz digər ölkələrdən olan tanınmış həmkarları ilə fikir mübadiləsi aparmaqdan savayı, həm də Türkmənistanın orijinal mədəniyyəti ilə daha yaxından tanış olmaq imkanı qazanıb. Xalça Muzeyinin direktoru məlumat verdi ki, XIII-XV əsrlərə aid olan və günümüzə çox az sayda gəlib-çatan səlcuq xalçaları Konyada aşkar ediləndən sonra "Konya xalçaları" adı altında Berlin, İstanbul və Konya muzeylərində saxlanılır. R.Tağıyeva: "Kompozisiyasının əsasını pilləvarı romb şəkli və kvadratlar və bunları əhatələyən qarmaq şəkilli elementlər təşkil edən bu xalçaların əsas naxışı "Memlinq çiçəyi" adı ilə də məşhurdur. Məhz bu cür naxış forması Orta Asiya, Azərbaycan və Anadolunun XX əsrə qədərki xalça yaradıcılığına güclü təsir göstərib", - deyə R.Tağıyeva qeyd etdi.

Samirə

Həftə içi.- 2009.- 15 aprel.- S. 6.