"Qarabağ danışıqlarında irəliləyiş var"

İlham Əliyev: "1 şəxsin 2 dəfədən artıq prezident seçilməsinə səs vermək hüququ demokratik prinsipdir"

Dağlıq Qarabağ münaqişəsi beynəlxalq hüquq normaları əsasında, Ermənistan qoşunlarının Azərbaycan ərazilərindən dərhal çıxarılması ilə bağlı BMT Təhlükəsizlik Şurasının qətnamələri əsasında həll olunmalıdır. Bu fikirləri Azərbaycan prezidenti İlham Əliyev "Wall Street Yournall"a müsahibəsində səsləndirib. Ermənistanın beynəlxalq hüquq normalarına əməl etmədiyini deyən İ.Əliyev bunu münaqişənin həll olunmamasının əsas səbəbi adlandırıb. "Ermənistan prezidenti ilə danışıqlarda irəliləyiş əldə olunsa da, bu, kifayət deyil" deyən prezident Gürcüstan - Rusiya münasibətlərindəki gərginliyin Dağlıq Qarabağ münaqişəsinə təsiri ilə bağlı sualı belə cavablandırıb: "Danışıqlar prosesinə birbaşa cəlb olunmuş ölkələr, Minsk Qrupunun həmsədrləri - ABŞ, Rusiya və Fransa Gürcüstandakı münaqişədən sonra açıq şəkildə elan etdilər ki, Dağlıq Qarabağın tanınması müzakirə mövzusu deyil. Lakin geosiyasi baxımdan, əlbəttə, əgər qonşu dövlətlər bir-biri ilə müharibə vəziyyətindədirsə, demək, bu bizim üçün də yaxşı deyil".

Prezident Ermənistanla aparılan danışıqlar prosesinin Azərbaycanın Gürcüstandakı müharibə zamanı üzləşdiyi çətinliklərlə əlaqəsi olmadığını da bildirib. "Bəli, həmin vaxt bizim üçün asan olmadı, çünki bizim əsas eneryi daşıyıcılarımız Gürcüstan ərazisindən nəql olunur, müharibə isə onun üçün böyük maneə idi. Biz nefti nəql etmək üçün başqa yollar axtarmalı olduq".

Dövlət başçısı "Nabucco" layihəsi haqda da fikirlərini bölüşüb. Uzun illərdir bu haqda aparılan müzakirələrə baxmayaraq, layihənin reallaşdırılması istiqamətində əməli addımların müşahidə olunmadığını deyən prezidentin fikrincə, indi "Nabucco"nun avropalılar üçün daha əhəmiyyətli olduğu üzə çıxıb. Bununla yanaşı, o, layihənin reallaşdırılmasında çətinliklərin mövcudluğunu vurğulayıb: "Nabucco" konsorsiumuna daxil olan şirkətlər üçün böyük həcmdə vəsaiti toplamaq asan olmayacaq. Əsas şərt güclü maliyyə dəstəyinin təmin edilməsidir. Bunun olmaması layihənin həyata keçirilməsinə maneə yarada bilər. Biz çox məmnunuq ki, qazımızı başqa ölkələrin bazarlarına nəql etmək üçün müasir infrastruktur qurmağa müvəffəq olmuşuq. Bu gün qazımız Gürcüstana və Türkiyəyə nəql olunur, sonra isə Türkiyə ərazisi ilə Avropa İttifaqının bazarlarına çıxarılır. Bizim hasilatı daha yüksək səviyyəyə qaldırmaq üçün böyük planlarımız var və bizə daha çox marşrutlar lazım olacaq. Onlardan biri də "Nabucco"dur".

Dövlət başçısı Azərbaycan qazının Rusiya vasitəsilə Avropaya çatdırılması təklifinin yaxın günlərdə irəli sürüldüyünü bildirib: "Biz bu təklifi bu yaxınlarda almışıq. 2008-ci ilin ortalarına qədər bu, ümumiyyətlə, müzakirə məsələsi deyildi. Biz həmin istiqaməti heç zaman qazın nəqli üçün potensial marşrut kimi nəzərdən keçirmirdik və Rusiya onunla bağlı heç vaxt maraq da ifadə etməmişdi. Həmin təklifi məhz yarım il öncə almışıq və hələ qiymətləndirməliyik. Təklif özlüyündə cəlbedici görünür. Əgər biz qazımızı öz sərhədimizdə tranzit ölkə ilə heç bir problem olmadan sata bilsək, həmçinin nəql layihələrinə çətinlik olmadan və sərfəli bazar qiyməti təklif edilərsə, onda təklifə niyə də baxmayaq!? Biz təklifi rədd etməmişik, lakin eyni zamanda, onu daha təfərrüatlı şəkildə nəzərdən keçirməliyik".

Azərbaycan ərazisində xarici radiostansiyaların yayımının dayandırılması ilə bağlı məsələyə toxunan İ.Əliyev bu qərarın parlament deyil, Milli Televiziya və Radio Şurası tərəfindən verildiyini xatırladıb: "Həmin qərar 2002-ci ildə qəbul olunan və xarici radiolara milli tezliklərdə yayımlamaya icazə verməyən qanun əsasında çıxarılıb. Beləliklə, bu, qadağa deyil. Bu radiolar qısa dalğalarda, internet, kabel və peyk vasitəsilə verilişlərinin yayımını davam etdirə bilərlər. Biz bu radioların yayımına qadağa qoymamışıq, sadəcə, vəziyyəti öz qanunvericiliyimizə uyğun formaya gətirmişik və Avropada da bu məsələ ilə bağlı vəziyyət eynidir".

Martın 18-də keçiriləcək Azərbaycan Konstitusiyasına dəyişikliklərlə bağlı referenduma münasibət bildirən dövlət başçısı bu təşəbbüsün parlamentdə çoxluq təşkil edən Yeni Azərbaycan Partiyası tərəfindən irəli sürüldüyünü xatırladıb. O, xalqın bir şəxsin 2 dəfədən artıq prezident seçilməsinə səs vermək hüququnun olduğunu xatırladıb və bunu demokratik prinsip adlandırıb: "Referendum demokratik prosedurdur və xalqın iradəsinə əsaslanır. Eyni zamanda bu, Avropa təcrübəsinə uyğundur".

Cahangir Həsənli.

Həftə içi.- 2009.- 3 fevral.- S. 1-2.