Balacalar üçün ən böyük hədiyyə

Mütəxəssislər yeni metodikanın uşaqların bağçaya marağını artıracağını deyirlər

Dünən "Avropa" mehmanxanasında Təhsil Nazirliyi və "Çaşıoğlu" şirkətləri tərəfindən məktəbəqədər yaşlı uşaqlar üçün hazırlanmış əyani vəsaitlər toplusunun təqdimatı oldu.

Bir neçə təhsil müəssisəsinin rəhbərləri, millət vəkilləri və digərlərinin də qatıldığı mərasimdə çıxış edən təhsil naziri Misir Mərdanov təhsilin təməlində məktəbəqədər təhsil müəssisəsinin rolunu vurğuladı: "Təhsil sisteminin ilkin pilləsi sayılan məktəbəqədər təhsil müəssislərində, eləcə də ailələrdə uşaqlarla aparılan təlim-tərbiyə işlərinin səmərəliliyi, uşağın hərtərəfli inkişafı üçün əlverişli şəraitin yaradılması onun məktəbə və həyata hazırlanmasının keyfiyyətini şərtləndirir. Məhz məktəbəqədərki dövr uşağın psixi inkişafı və şəxsiyyətinin formalaşmasında mühüm rol oynayır. Amma təəssüf ki, son vaxtlar biz bunu unutmuşuq. Bizim mentalitetimizdə yanlış bir həqiqət mövcuddur ki, gərək uşaq valideyninin yanında böyüsün. Amma artıq müstəqillik əldə edən, inkişafa doğru gedən ölkə üçün bu cür vərdişlər geridə qalmalıdır".

Nazir məktəbəqədər təhsilin yeniləşdirilməsi proqramının təsdiq edilməsi haqda ölkə başçısı tərəfindən 2007-ci ildə sərəncamın imzalandığını və bundan sonra xeyli iş görüldüyünü dedi: "Bakıda 11 yeni bağça tikilərək müasir avadanlıqlarla təchiz edilib. Son tədbirlərin nəticəsidir ki, bağçaya gedən uşaqların sayı 1300 nəfər artıb. "Təhsil haqqında" qanun layihəsinin oxunuşunda da bu sahə ciddi nəzarətə çıxarılıb, 5 yaşlı uşaqların icbari bağçaya aparılması xüsusilə diqqətdə saxlanılır. Amma qanun qüvvəyə mindikdən sonra rayon və kəndlərdə bu işə hazır deyilik. Çünki kifayət qədər bağçalarımız yoxdur, olanların isə bazası zəifdir".

M.Mərdanov hesab edir ki, məktəbəqədər təhsil müəssisələrində uşaqlara saymağı, əlifbanı öyrətmək yanlışdır: "Çünki hər yaşın öz tələbləri və bilikləri qəbuletmə səviyyəsi var. Hesab edirəm bağçalar uşaqları məktəb həyatına hazırlamaq, uşaqlar arasında ünsiyyətqurma vasitəsidir. Bir sözlə, bağça məktəb deyil".

Nazir proqramda nəzərdə tutulan tələblərin yerinə yetirilməsi üçün bir çox xarici ölkələrin təcrübəsindən yararlanılacağını dedi. Onun sözlərinə görə, bunun üçün nümunə Rusiya təcrübəsi ola bilər: "Moskva meriyası ilə danışıqlar aparmaq lazımdır. Çünki həmin şəhərdə bu yöndə ciddi işlər görülür. Bağçaya tələbat var deyə, Moskvada bağçaların sayı durmadan artır. Finlandiya və Baltikyanı ölkələrlə də əlaqələr qurmaq müsbət nəticələr verə bilər. Biz bu təcrübələrdən yararlandıqdan sonra öz milli bağçamızı qurmağı planlaşdırırıq".

Nazir kadr məsələsinə də toxundu: "Hazırda patyxatda fəaliyyət göstərən kollec var və biz ötən il bu müəssisənin rəhbərliyini kollektiv şəkildə dəyişmişik. Ümid edirik bundan sonra orada hazırlanacaq kadrlar əhəmiyyətli işlər görəcək. Pedaqoji universitetdə olan müvafiq fakültə də işlərini bu proqram əsasında qurmalıdır".

Tədbirdə çıxış edən TN məktəbəqədər təhsil müəssisələri üzrə şöbənin müdiri Nərminə Alnağıyeva, Milli Məclisin təhsil komissiyasının sədri Şəmsəddin Hacıyev təqdimatı keçirilən vəsaitlərin təhsil tarixində böyük yenilik olduğunu vurğuladılar. N.Alnağıyeva əksər tərbiyəçilərin bundan sonra vəsait çatışmazlığından şikayətlənməyəcəklərini dedi.

Ş.Hacıyeva isə 2007-ci ildən başlamış bu proqramın nailiyyətlərin əldə olunması üçün zəmin yaradacağını bildirdi. Amma bu işin təşkilində əsas 3 amilin olmasının vacibliyini vurğuladı: maddi-texniki baza, yüksək kadrlar və təlim vəsaitləri.

Millət vəkili Qənirə Paşayeva isə bildirdi ki, bu vəsaitlər "Uşaq ili"ndə balacalar üçün ən böyük hədiyyədir. Amma o, vəsaitlərin - bütün valideynlərin əldə edə bilməsi üçün - satışa çıxarılmasının tərəfdarı olduğunu söylədi. Q.Paşayeva rayondan seçilən millət vəkili olduğu üçün bölgələrdə yeni bağçaların tikilməsinin vacibliyinə diqqət çəkdi. Bundan başqa, balacalar üçün yeni nağılların və yeni ədəbiyyatların yazılmasının zəruriliyini dedi: "Çünki yeni dövrdəyik və yeni baxışlara söykənən nağıllara ehtiyac var".

Millət vəkili Gülər Əhmədova isə bildirdi ki, hələ də yeni dərs vəsaitlərində rus metodikasının izi duyulmaqladır: "Mən hər hansı bir millətin əleyhinə deyiləm. Amma hesab edirəm ki, hər kəs öz övladını öz ruhunda, öz millətinin adət-ənənələri ilə böyütməlidir. Bunun üçün təlim vəsaitlərində yer alan nağılların, rəsmlərin tərtibi öz ruhumuza uyğun qurulmalıdır".

Naibə.

Həftə içi.- 2009.- 11 fevral.- S. 6.