Türkiyə əsas hədəfdən yayınır

Nizami Cəfərov: "Ankara Ermənistanla sərhədlərini açsa, Azərbaycanı itirməli olacaq"

"Azərbaycan heç vaxt razı olmaz ki, müttəfiqi sonda onu tək qoysun"

"Azadlıq" radiosunun Ermənistan xidmətinin Türkiyənin Ermənistanla münasibətlərini normallaşdırmaq üçün Dağlıq Qarabağla bağlı şərtindən vaz keçdiyi barədə yaydığı məlumat Azərbaycan və Türkiyə ictimaiyyəti ilə yanaşı, rəsmilərin də aktual mövzusuna çevrilib. Türkiyə rəsmiləri açıqlamalarında bu məlumatın həqiqətəuyğun olmadığını bildirsələr də, əsas hədəfdən yayınırlar. Daha çox Azərbaycan ictimaiyyətini bir sual düşündürür: "İşğal faktı olduğu halda Türkiyə Ermənistanla sərhədlərini açacaqmı?". Bu sual Azərbaycanın müxtəlif dairələrində bu və ya digər formada izah edilir. Əksəriyyət isə qardaş Türkiyənin Avropa Birliyinə daxil olmaq və Rusiya ilə münasibətlərini normallaşdırmaqdan ötrü bu oyunda fəal iştirak edəcəyi ehtimalı üzərində dayanır. İctimaiyyətin narahatlığını görən Azərbaycanın Türkiyədəki səfirliyi dünən bu məsələ ilə bağlı açıqlama yayıb.

Sənəddə baş nazir Rəcəb Tayyib Ərdoğan, baş nazirin müavini Cəmil Çiçək və Türkiyə Böyük Millət Məclisindəki Türkiyə - Azərbaycan dostluq qrupunun sədri Mustafa Kabakçının açıqlamalarında Türkiyənin Dağlıq Qarabağ məsələsində tutduğu mövqe açıq vurğulanıb. Açıqlamada o da bildirilib ki, Türkiyə xarici siyasətinin təməl hədəflərindən biri bütün qonşu ölkələrlə problemlərin aradan qaldırılmasıdır: "Türkiyə ilə Ermənistan arasında ikitərəfli əlaqələrin normallaşdırılması məqsədilə aparılan danışıqlar da bu çərçivədə davam edir. Digər tərəfdən Azərbaycanla Ermənistan arasında da Dağlıq Qarabağ probleminin həllinə yönəlmiş dialoq prosesi var. Bu proseslərin birində əldə olunacaq irəliləyişin digər prosesə müsbət təsir göstərəcəyini gözləyə bilərik". Lakin Türkiyənin heç bir rəsmisi Azərbaycan ictimaiyyətini daha çox düşündürən "İşğal faktı olduğu halda Türkiyə Ermənistanla sərhədlərini açacaqmı" sualına cavab verməkdən yayınıb.

Prezidentin İcra Aparatı ictimai-siyasi şöbəsinin müdiri Əli Həsənov bildirib: "Təəssüf ki, Türkiyənin Ermənistanla münasibətlər qurması üçün Dağlıq Qarabağla bağlı şərtindən imtina etməsi ilə bağlı mövzu bir neçə gündür Azərbaycan mətbuatında cavabsız şəkildə birtərəfli qaydada işıqlandırılır". Şöbə müdirinin sözlərinə görə, Azərbaycan ictimaiyyətinin və mətbuatının haqlı narahatlığı, narazılığı mətbuat səhifələrində görünməkdədir: "Həm mərhum Turqut Özalın, həm də ondan sonrakı hökumətlər dövründə, həm də AKP dönəmində cənab Ərdoğanın bəyanatında dəfələrlə bildirilib ki, Ermənistan Azərbaycanın işğal olunmuş torpaqlarını azad etməyincə, qaçqın və köçkünlər yurdlarını qayıtmayınca, Ermənistanla Azərbaycan arasında sülh yaranmayınca işğalçı dövlətlə heç bir siyasi, iqtisadi, mədəni və diplomatik əlaqələr qurmayacaq. Biz bu sözə inanırıq və bu gün də o fikirdəyik ki, belə olaraq da qalıb. Amma nəyə görə bu məsələyə aydınlıq gətirilmir, bunu Türkiyənin Azərbaycandakı səfirindən və digər türkiyəli dostlarımızdan soruşun". Ə.Həsənov Azərbaycan ictimai rəyinin Türkiyənin hakimiyyət dairələri üçün əhəmiyyətsiz olmadığına əminliyini vurğulayıb: "Biz əbədi müttəfiqlik haqqında xalqlarımıza dəfələrlə siyasi və tarixi bəyanatlar vermişik. Bu müttəfiqliyi qorumaq Türkiyənin və Azərbaycanın rəsmi və qeyri-rəsmi dairələrinin borcudur".

Ədalət Partiyasının sədri, millət vəkili İlyas İsmayılov bildirib ki, Türkiyə rəsmilərinə inanmalıyıq: "Onlar Dağlıq Qarabağ məsələsində Azərbaycanın yanında olduğunu söyləyirlər. Mənim bu məsələ ilə əlaqədar ayrı informasiyam olmadığından digər söylənilən fikir və ehtimallara inanmaq istəmirəm". Deputatın fikrincə, əgər Türkiyə Dağlıq Qarabağ və yaxud da digər məsələlərdə Azərbaycanın maraqlarına zidd hərəkət edərsə, onda yəqin dövlətimizin ona münasibəti məlum olacaq: "İndi isə hələlik dövlətimiz bu məsələdə hər hansı bir addım atmır".

Milli Məclisdə Azərbaycan - Türkiyə dostluq qrupunun rəhbəri, professor Nizami Cəfərov isə bildirib ki, Türkiyənin Ermənistanla sərhədləri açması böyük bir siyasi səhv ola bilər: "İnanmıram ki, rəsmi Ankara Dağlıq Qarabağ problemi həll olunmamış sərhədləri açsın. Danışıqlar gedir, qarşılıqlı mübadilələr var. Sadəcə, mətbuatın bu reaksiyası ki ortaya çıxıb, buna kəskin açıqlama vermək lazım idi. Türkiyə bu məsələdə qəti sözünü deməliydi. Vurğulamaq lazımdır ki, Azərbaycanda bu məsələyə çox həssas baxırlar. Odur ki gərək Türkiyənin dövlət rəhbərliyi, ən azından xarici işlər naziri belə bir açıqlama verəydi". N.Cəfərova növbəti sualımız səfirliyin dünən yaydığı açıqlamasında Türkiyənin bütün qonşu ölkələrlə problemlərin aradan qaldırılmasını nəzərdə tutması ilə bağlı oldu: "Bu o demək deyilmi ki, Ermənistanla iqtisadi əlaqələr qurulacaq, sərhədlər açılacaq". Millət vəkili bildirdi: "Əminəm ki, bu baş verə bilməz. Türkiyə cəmiyyətinə və dövlətinə də məlumdur ki, əgər Dağlıq Qarabağ məsələsi çözülmədən rəsmi Ankara Ermənistanla sərhədlərini açsa, onda istər-istəməz Azərbaycanı incitməli və ya itirməli olacaq. Bir də ermənilər gərək öz məlum iddialarından əl çəkməlidirlər". "Rusiyanın Ankaraya təsiri və Türkiyənin Avropa Birliyinə daxil olması məsələsi burada rol oynaya bilərmi" sualımızı cavablandıran N.Cəfərov onların burada həlledici olmadığını söyləyib. Onun sözlərinə görə, Türkiyə Avropa Birliyinə üzv olmaq üçün türk dünyasına arxa çevirə bilməz: "Mənə elə gəlir ki, burada ictimaiyyətin və mətbuatın narahatlığı müşahidə olunur. Türkiyə cəmiyyətində də məlum güzəştlərlə Avropa Birliyinə girə biləcəyi yaxşı qarşılanmır. Türkiyə öz maraqlarını buna qurban verəcəksə, Avropa Birliyi onun nəyinə lazımdır? Dövlət Avropa Birliyinə üzv olmur, ora xalqı, cəmiyyəti aparır". Millət vəkili onu da qeyd edib ki, gərək Türkiyə Ermənistana müəyyən jestlər etməlidir. Amma bu o demək deyil ki Türkiyə hansısa güzəştlərə gedə bilər: "Azərbaycan heç vaxt razı olmaz ki, hansısa məsələlərdə əvvəlcədən razılığa gələn müttəfiqi sonda onu tək qoysun".

Elnur

Həftə içi.- 2009.- 20 fevral.- S. 1,3.