Polad Bülbüloğlu mükafatlandırıldı

Azərbaycanın Rusiyadakı səfiri Polad Bülbüloğlu "Müqəddəs Knyaz Aleksandr Nevski" mükafatına layiq görülüb. Rusiyanın xəbər agentliklərinin məlumatında deyilir ki, bu mükafatı Vətənpərvərlik və Mədəni Ənənələrin qorunub-saxlanmasına və inkişafına kömək üzrə Regionlararası İctimai Fond təqdim edib. "Rossiya" Dövlət Konsert Salonunda keçirilmiş təntənəli mərasimdə SSRİ xalq artisti Vasili Lanovoy və məşhur teleaparıcı Yuri Kovelyonov laureat diplomunu və Müqəddəs "Knyaz Aleksandr Nevski" heykəlciyini Azərbaycanın səfirinə təqdim ediblər. P.Bülbüloğlu bu yüksək mükafata "Rusiya və Azərbaycan xalqları arasında dostluğun möhkəmlənməsinə, millətlərarası sülhün, razılığın qorunub-saxlanmasına görə" xüsusi nominasiyasında layiq görülüb. Tədbirin təşkilatçıları laureatın istər Azərbaycanın mədəniyyət naziri kimi, istərsə də diplomat vəzifəsində ölkələrimiz arasında mədəni və dostluq əlaqələrinin möhkəmlənməsinə, əməkdaşlığın genişləndirilməsinə verdiyi xüsusi töhfəni qeyd ediblər.

Samirə

Həftə içi.- 2009.- 20 fevral.- S. 7.