"Uşaq ili"nə hazırlıq davam edir
Elnur Kələntərli: "Reabilitasiya mərkəzləri
və sosial sığınacaqlar tikiləcək"
Əmək və Əhalinin
Sosial Müdafiəsi Nazirliyinin (ƏƏSMN) mətbuat xidmətinin
rəhbəri Elnur Kələntərlidən
aldığımız məlumata görə, Azərbaycan BMT-nin
1989-cu ildə qəbul etdiyi Uşaq Hüquqları
Konvensiyasına qoşulan və "bununla bağlı
qarşısında duran öhdəlikləri uğurla yerinə
yetirən ölkələrdən biridir.
1993-cü ildən Azərbaycanda
Heydər Əliyev tərəfindən müəyyənləşdirilərək
həyata keçirilən dövlət uşaq siyasəti
2003-cü ildən prezident İlham Əliyev tərəfindən
yüksək səviyyədə davam etdirilir. Uşaqların təhsili, sosial
problemlərinin aradan qaldırılması, sağlamlıqları
və mənəvi inkişafı, hüquqlarının
müdafiəsi, şəxsiyyət
kimi formalaşmaları
məqsədilə mühüm
dövlət proqramları
qəbul edilərək
layiqli tərzdə icra olunur: "Ölkəmizdə uşaqlarla
bağlı dövlət siyasəti daim güclənməkdədir.
2009-cu ilin "Uşaq
ili" elan olunması barədə dövlət başçısının
sərəncamı da
deyilənlərə bariz
nümunədir. Həmin
sərəncamın icrası
ilə əlaqədar
müvafiq dövlət
qurumları, o cümlədən ƏƏSMN tərəfindən
hazırlanmış tədbirlər
planı cari ilin 18 fevralında ölkə rəhbəri tərəfindən təsdiqlənib.
Sözügedən plana əsasən,
Azərbaycan uşaqları
haqqında məlumat bankının və internet saytının, xüsusi portalın yaradılması, müasir
ailə modelinə dair müvafiq tövsiyələrin hazırlanması,
beynəlxalq Bakı uşaq rəsm müsabiqəsinin və
"Şərq-Qərb"
beynəlxalq uşaq rəqs festivalının keçirilməsi,
eləcə də BMT-nin uşaq hüquqlarına dair konvensiyası ilə bağlı maarifləndirmə
işinin gücləndirilməsi
nəzərdə tutulub.
Uşaqların intellektual
inkişafına, onların
vətənpərvərlik, milli-mənəvi dəyərlərin qorunması
və tolerantlıq ruhunda tərbiyəsinə
yönəldilmiş tədbirlər
də təşkil edilməlidir. Dövlət uşaq müəssisələrində
tamaşaların və
konsert proqramlarının
təşkili, uşaqların
sağlamlığı və
təhsili ilə bağlı uşaq müəssisələrində kütləvi tibbi müayinələr də
aparılmalı, sağlamlaşdırıcı
tədbirlər həyata
keçirilməli, sağlamlıq
imkanları məhdud uşaqların təhsili ilə bağlı standartların təkmilləşdirilməsi
və digər işlərin görülməsi
nəzərdə tutulur".
3 min əlil ailəsinə
yardım verilib"
Bu gün respublikamızda uşaqların, xüsusən
də aztəminatlı
ailələrdən olan,
eləcə də kimsəsiz, yaxud valideyn himayəsindən məhrum uşaqların sosial müdafiəsinin gücləndirilməsi istiqamətində
görülən məqsədyönlü
işlər sırasında
ƏƏSMN-in həyata keçirdiyi
uyğun sosial müdafiə tədbirləri
xüsusi yer tutur. Nazirliyin nəzdində
xüsusi qayğıya
ehtiyac duyan uşaqlar üçün
internat evləri fəaliyyət göstərir:
"Son illər həmin
müəssisələrdə normal yaşayış şəraitinin
yaradılması və
uşaqlara hərtərəfli
qayğının artırılması
məqsədilə ardıcıl
işlər görülüb.
İnternat evlərində bütün
bayramlar, əlamətdar
günlər münasibətilə
şənliklər təşkil
edilir. Onu da bildirim ki,
prezidentin 29 mart 2006-cı ildə
təsdiqlədiyi "Azərbaycanda
dövlət uşaq müəssisələrindən uşaqların ailələrə
verilməsi (de-institusionalizasiya)
və alternativ qayğı dövlət proqramı" uşaq müəssisələrindəki uşaqların ailələrə
verilməsini təmin
etmək və onların həmin müəssisələrə verilməsinə
şərait yaradan amilləri aradan qaldırmaq məqsədilə
nazirliyimiz sözügedən
dövlət proqramından
irəli gələn məsələlərin həlli
istiqamətində qarşısında
duran vəzifələri
yerinə yetirir. Hər il
yeni tədris ili ərəfəsində
tərkibində 2 və
daha çox əlil məktəbli olan ailələrə nazirliyin Əlillərin Sosial Müdafiəsi Baş İdarəsi yardım verir. Ötən il 3 min əlil məktəblinin yaşadığı
ailələrə maddi
yardım göstərilib".
RİH-lər torpaq
sahəsi ayırıb
Xidmət rəhbəri qeyd etdi ki, ƏƏSMN-in nəzdində olmaqla Bakı və Naxçıvan şəhərlərində
uşaq-bərpa mərkəzləri
fəaliyyət göstərir
və onlar müasir tibbi-reabilitasiya avadanlıqları ilə təmin edilib. Hər il neçə-neçə
sağlamlıq imkanı
məhdud uşağa
orada bərpa-müalicə
xidməti göstərilir:
"Respublikanın bir
sıra rayonunda uşaqlar üçün
sosial sığınacaqlar
və reabilitasiya mərkəzləri inşa
olunacaq. Artıq həmin obyektlər
üçün xüsusi
layihələrin hazırlanması
işi başa çatıb. Adıçəkilən mərkəzlərə xüsusi
binaların inşası
məqsədilə yerli
icra hakimiyyətləri
tərəfindən torpaq
sahələri ayrılıb
və yaxın vaxtlarda tikinti işlərinə başlanılacaq".
"163.400-dən çox ailə yardım alır"
E.Kələntərli vurğuladı ki, 1 iyul 2006-cı ildən ölkəmizdə ünvanlı
dövlət sosial yardımı mexanizminin icrasına başlanılıb. Ötən
2 il yarım müddətdə bu yardımlardan bəhrələnənlərin
əksər hissəsi
təkuşaqlı ailələr
olub: "Hazırda respublikamızda 163.400-dən çox
ailə sözügedən
yardımı alır
və onların 41,7 faizi çoxuşaqlı
ailədir. Yardım alan ailələrin 90 faizində uşaq mövcuddur, başqa sözlə, yardım alan ailə üzvlərinin 47,1 faizi uşaqdır. Biz sadaladığımız tədbirlər silsiləsini
yüksək səviyyədə
davam etdirməklə uşaqlarla bağlı siyasətin, uşaqların
sosial müdafiəsinin
möhkəmlənməsinə və gücləndirilməsinə
çalışırıq".
Təbriz Vəfalı
Həftə içi.- 2009.- 25 fevral.- S. 6.