"Azərbaycan Şərqlə Qərbin
qovuşuğunda"
Oksfordda keçirilən bu toplantıda ermənilərin
işğal siyasəti pislənib
Oksfordda Azərbaycanın
Böyük Britaniyadakı səfirliyinin, Azərbaycan
Diplomatik Akademiyasının və Oksford - Azərbaycan Cəmiyyətinin
birgə təşkilatçılığı ilə
"Azərbaycan Şərqlə Qərbin
qovuşuğunda" mövzusunda konfrans keçirilib. Oksford
universitetinin bölgə üzrə mütəxəssislərinin,
Britaniya ictimaiyyəti nümayəndələrinin, ölkədə
fəaliyyət göstərən Azərbaycan gənclər təşkilatları
təmsilçilərinin qatıldığı konfransda
çıxış edən səfir Fəxrəddin Qurbanov
Azərbaycanla Böyük Britaniya arasında əlaqələrin
bütün sahələrdə genişləndiyini
vurğulayıb. O, ölkəmizdə gedən proseslər,
Ermənistan - Azərbaycan, Dağlıq Qarabağ
münaqişəsinin bölgədə sülhün
yaranması yolunda əsas maneə olduğunu bildirib. Konfransda əsas
məruzəçi qismində ADA-dan tanınmış tədqiqatçı-alim
Brenda Şaffer və Fuad Əliyev, Böyük Britaniyanın
"LİNKS" qeyri-hökumət təşkilatının
nümayəndəsi Dennis Sammut və tanınmış
jurnalist, Cənubi Qafqaz üzrə ekspert Tomas de Vaal
çıxış ediblər. Onlar Azərbaycan prezidentinin həyata
keçirdiyi uğurlu xarici siyasətin davam etdirilməsinin zəruriliyini
bildirib, Dağlıq Qarabağ münaqişəsinin həllinin
uzadılmasının bütövlükdə bölgə
üçün əsas təhdid olduğunu vurğulayıblar.
Azərbaycanın Avropanın enerji təchizatında rolunun
getdikcə artdığı, eləcə də həyata
keçirilən iqtisadi siyasət nəticəsində ölkənin
bölgədə liderə çevrildiyi xüsusi qeyd edilməlidir.
Yeri gəlmişkən,
Dağlıq Qarabağ separatçıları Tomas de
Vaalın Qarabağ müharibəsi ilə bağlı müəllifi
olduğu "Qara bağ" kitabını hədəfə
alıblar. Onlar Tomas de Vaalın bu məsələdə
geniş araşdırma apardığını, Azərbaycanın
ərazi bütövlüyünün erməni
işğalçıları tərəfindən pozulması
barədə ortaya qoyduğu faktları inkar etməyə
çalışırlar. Eyni zamanda, Tomas de Vaalın bu
kitabı yazmaqla Azərbaycanla Ermənistan arasında yeni
müharibənin başlanmasında maraqlı olduğunu iddia
edirlər. Bu barədə Qarabağ
separatçılarının "xarici işlər
nazirliyinin" internet ünvanında bildirilib.
Elnur
Həftə içi.- 2009.- 25 fevral.- S. 4.