Xocalı soyqırımı anıldı

Şuşa Mədəni Maarif Texnikumunun kollektivi hərbçilərlə bir araya gəldilər

Xocalı faciəsi Azərbaycan xalqının tarixində ən qanlı səhifə, bəşər tarixində insanlıq əleyhinə törədilmiş ən ağır cinayətlərdəndir.

1992-ci il fevralın 25-dən 26-na keçən gecə baş vermiş bu hadisə xalqımıza qarşı həyata keçirilən bir soyqırım idi. Ən müasir motoatıcı silahlardan və zirehli texnikadan istifadə etməklə əhalinin xüsusi amansızlıqla qətli, yüzlərcə insanın yaralanması, işgəncələrə məruz qalması, itkin düşməsi, əsir götürülməsi ilə nəticələnən bu soyqırım əvvəlcədən planlaşdırılmışdı. Erməni qəsbkarlarının həyata keçirdiyi bu kütləvi və amansız insan qırğını həm də Azərbaycanın dövlət müstəqilliyini və ərazi bütövlüyünü hədəfə almışdı. Bir sözlə, bu, bəşəriyyət üçün ən böyük faciədir.

İldönümlə bağlı Şuşa Mədəni Maarif Texnikumu kollektivinin Azərbaycan Dövlət İncəsənət Muzeyinin əməkdaşları ilə birgə Heydər Əliyev adına Ali Hərbi Məktəbdə keçirdiyi tədbir xüsusilə diqqəti cəlb etdi. Tədbiri Ali Hərbi Məktəbin nümayəndəsi - kapitan İsmiyyət Kərimov açaraq çıxış üçün sözü Dövlət İncəcənət Muzeyinin direktor müavini Elmira Qasımovaya verdi. O, soyqırımla bağlı tədbir iştirakçılarını ətraflı məlumatlandırdı. Bildirdi ki, Xocalı soyqırımını törədənlərin hələ də azadlıqda olması o deməkdir ki, bəşəriyyət cinayətkarları gizlədir, onları cəzalandırmır. Daha sonra ora dəvət olunmuş qonaqlardan Bakı Dövlət Universitetinin dosenti, tarix elmləri namizədi Atamoğlan Məmmədli, Azərbaycan Yazıçılar və Jurnalistlər Birliyinin üzvü, Xocalı faciəsinə həsr edilmiş "Şəhid şəhər" poemasının müəllifi Ələmdar Quluzadə, Xocalı mövzusunda silsilə əsərlər müəllifi, rəssam Vaqif Ucatay, "Sonsuz erməni vandalizminin iç üzü" kitabının müəllifi, ehtiyatda olan zabit, Qarabağ müharibəsi əlili Məhərrəm Zamanlı öz fikirlərini hərbi heyət qarşısında söylədilər.

Sonra tədbir Şuşa Mədəni Maarif Texnikumunun tərbiyə işləri üzrə direktor müavini Könül Hüseynovanın həmin texnikumun tələbələri ilə birgə hazırladığı ədəbi-musiqili kompozisiya ilə müşayiət olundu. Onlar Xocalı faciəsinə həsr edilmiş şeirlər söylədilər, həmçinin muğam parçaları ifa etdilər. O cümlədən ulu öndərimiz Heydər Əliyevin və onun layiqli davamçısı möhtərəm prezidentimiz İlham Əliyevin hərbi quruculuq sahəsini əks etdirən fraqmentlər göstərildi. Tədbir Heydər Əliyev adına Ali Hərbi Məktəbin kursantları və məclis iştirakçılarının birgə canlı ifa etdikləri dövlət himni ilə başa çatdırıldı.

Qələndər Xaçınçaylı

Həftə içi.- 2009.- 27 fevral.- S. 6.