Uşaqlar arasında xəstəliklər çoxalıb

Epidemiya yaranma təhlükəsi yoxdur

"Bəzən valideynlər göz çəpliyi probleminə səthi yanaşaraq buna məhəl qoymurlar"

Son vaxtlar azyaşlı uşaqlar arasında sürətlə infeksion xəstəliklər yayılmaqdadır. Körpələrdə boğaz nahiyəsində hiss olunan xəstəlik sonradan qızdırma ilə müşayiət edilir. Bu da uşaqların zəifləməsinə, halsızlığına səbəb olur.

3 gün müşahidə olunan xəstəlik zamanı mütəxəssislərə müraciət olunmazsa, uşağın orqanizmində ciddi fəsadlar yarana bilər. Bu barədə məlumat verən pediatr Cəmilə Məmmədova bildirdi ki, uşaqlarda müşahidə edilən halsızlıq halları infeksiyanın orqanizmdə özünə yer aldığına dəlalət edir: "Ümumiyyətlə, qeyd etmək istəyirəm son illər doğulan uşaqlar arasında xəstəliklər olduqca çoxdur. Öz təcrübəmdən deyə bilərəm ki, uzun illərdir bu sahədə çalışıram. Ancaq bu illər ərzində uşaqlar arasında bu qədər problemlərə rast gəlməmişəm. Oxşar fikirləri həmkarlarım da sizinlə bölüşə bilər. Bu gün azyaşlıların əziyyət çəkdiyi daha qlobal problem isə müxtəlif infeksiyalarla bağlıdır. Qeyd edim ki, ümumiyyətlə, bu gün övladının sağlamlığının qayğısına qalmaq istəyən valideyn müalicəyə hələ ana bətnində başlamalıdır. Çünki hazırda infeksiyalar birbaşa döldə özünü büruzə verir, doğuşdan sonra isə onun mənfi təsirləri özünü göstərir. Məsələn, hazırda yeni doğulanların 80 - 90 faizində beyin təzyiqi, göz çəpləşməsi, asfeksiya, kəllədaxili travma və bu kimi çatışmazlıqlar qeydə alınır. Statistik məlumatlar da təsdiqləyir ki, hazırda pediatra müraciətlərin əksəriyyəti yenidoğulanların valideynləridir. Bəzi hallarda isə yanlış aparılan müalicə daha ciddi və mənfi xəstəliklərin yaranmasına səbəb olur".

Həkimin dediyinə görə, ölkə ərazisinə yol açan sözügedən xəstəliklərin müalicəsi üçün hazırda püxtələşmiş və təcrübəli mütəxəssislər var: "Belə ki, əvvəlki illərdə yuxarıda adını sadaladığımız xəstəliklərin müalicəsi səhv aparıldığından yenidoğulmuşlar arasında ölüm hallarının sayı çox idi. Ancaq hazırkı preparatlar və həkimlərin təcrübəsi bu kimi hallar törədikdə xəstələrə yardım göstərməyə imkan verir. Bu gün uşaqlar arasında daha çox yayılmış xəstəliklərdən biri də boğaz nahiyəsində qeydə alınır. Bir çox valideynlər bu xəstəlikdən uşaqları ev şəraitində müalicə etməyə çalışırlar. Ancaq valideynlərin diqqətinə çatdırmaq istəyirəm ki, uşaqda ciddi nöqsanlarla üzə çıxan bu problem infeksiyanın təsiridir. Onu da nəzərə almaq lazımdır ki, boğaz xəstəlikləri əsasən boğazında artıq əti olan uşaqlarda daha tez-tez təsadüf olunur. Nəzərə almaq lazımdır ki, 5 yaşlı uşaqların boğaz ətini kəsdirmək yasaq olduğundan onları yeni üsulla müalicə etmək məsləhət görülür. Belə ki, hazırda klinikaların əksəriyyətində lazer üsulu ilə boğaz əti əridilir və onun böyüməsinin qarşısı alınır. Bəzən elə uşaqlarda bu üsulun tətbiqi də müsbət təsir vermir. Ancaq aparılan təcrübədən də bəllidir ki, bu gün yüzlərcə uşaq bu ağrılı prosesdən əməliyyatsız xilas ola bilər".

Mütəxəssis ayrıca olaraq uşaqlarda göz çəpliyi probleminə də toxundu. Bildirdi ki, bu problemin yaranması daha çox nevroloji problemlərlə bağlıdır: "Elə azyaşlılar var ki, onların problemdən xilası üçün uzunillik müalicə tələb olunur. Bu zaman əsasən beyində olan problemlər müalicə edilməli və sonradan göz nahiyəsində olan problemlərin müalicəsinə başlanmalıdır. Bəzən valideynlər göz çəpliyi probleminə səthi yanaşaraq buna məhəl qoymurlar və uşağın yaşı artdıqca vəziyyəti sabitləşdirmək mümkün olmur. Hətta əməliyyata zərurət yaranır".

Respublikanın baş pediatrı Nəsib Quliyev isə hazırda uşaqlar arasında yayılmış xəstəliklərin mövsümi xarakter daşıdığını dedi: "Payız-qış mövsümündə və yazqabağı virus xəstəliklərinə daha çox rast gəlinir. El arasında buna soyuqdəymə xəstəliyi deyilir. Fəsillərin başlanması ilə bağlı nəinki uşaqlar arasında, hətta böyüklərdə də xəstəliklər müşahidə edilir. Xəstəliyi yaradan isə soyuq faktordur. Havalar tez-tez dəyişdiyindən insanlar nisbətən nazik geyinməyə başlayır. Ancaq gözlənilmədən dəyişən hava şəraiti əsasən də uşaqların tez xəstələnməsinə şərait yaradır. Valideynlərin diqqətinə çatdırım ki, bu fəsildə uşaqların immunitetinin möhkəmləndirilməsinə ciddi fikir versinlər. Onların qida rasionu möhkəmləndirilməlidir. Əhalinin diqqətinə onu da çatdırım ki, müxtəlif xəstəliklərin yaranmasına baxmayaraq bu gün ölkədə epidemioloji durum sabitdir və böyük narahatlığa ehtiyac yoxdur".

Mirvari

Həftə içi.- 2009.- 3 mart.- S. 6.