Xaçmazda meşələr qanunsuz
qırılır
Ödəniş azaldığından elektrik şəbəkəsinin
və qaz istismarı idarəsinin fəaliyyəti zəifləyib
Xaçmaz rayon İcra
Hakimiyyətinin başçısı Şəmsəddin
Xanbabayevin adıçəkilən məkandakı meşələrin
qanunsuz qırılması ilə bağlı açıqlamalarını
qəzetimizdə dərc etmişik. Xatırladaq ki, onun
açıqlamasına görə, yerli əhalinin yanacaqla təminatında
Yalama Meşə Mühafizəsi və Bərpası Müəssisəsi
(YMMBM) 1725 kubmetr quru odun tədarük edib və onu məktəblərə,
uşaq bağçalarına, xəstəxanalara və
ayrı-ayrı vətəndaşlara satıb. 1,5 hektar tinglik,
100 hektar yeni meşə salınıb: "Lakin meşələrin
qorunması istiqamətində hələ çox işlər
görülməlidir. Meşələrin qanunsuz
qırılmasının qarşısı tamam
alınmalı, belə hallara qətiyyən yol verilməməlidir".
YMMBM-in direktoru Budaq Əliyev deyilənləri təsdiqləyərək
təəssüflə bildirib ki, uzun illər ərzində
ölkəmizə yanacaq mənbəyi kimi
baxıldığından meşələrimizə
böyük zərbə dəyib.
Nəticədə bir
çox yerlərdə meşələr seyrəlib, su
ehtiyatları azalıb, sel və eroziya təhlükəsi
artıb. Son illər Ekologiya və Təbii Sərvətlər
Nazirliyi meşələrin qırılmasına qarşı
çox ciddi mübarizə aparır: "Bəzi
yaşayış məntəqələri, təhsil və məktəbəqədər
tərbiyə müəssisələri qış
dövründə yanacaq kimi hələ də odundan bəhrələnir.
Lakin bu məqsədlə müstəsna hal kimi yalnız
meşələrdəki tör-töküntüdən və
sanitar qırıntılar zamanı tədarük edilən
odundan istifadə edilir. Səylərimizə baxmayaraq,
ayrı-ayrı yaşayış məntəqələrində
hələ də meşələrə qanunsuz müdaxilə
hallarına təsadüf olunur. Ötən il Xaçmazda
meşələrə qanunsuz müdaxiləyə görə
73 akt və protokol tərtiblənib. Rayonun inzibati orqanları
38 halda meşə oğruları barədə cinayət
işi açıblar. Qanun pozuntusuna yol verənlər 6400
manat cərimə ödəyiblər. Meşələrin əhəmiyyəti
ilə bağlı yerli əhali arasında mütəmadi və
geniş miqyasda maarifləndirmə işinin aparılmasına
ehtiyac var. Bundan başqa, alternativ yanacaq mənbələrindən
istifadə genişləndirilməlidir. Yalnız bundan sonra
meşələrə yanacaq mənbəyi kimi
baxılmasına son qoyula bilər".
"İdarəmiz ciddi
sıxıntı yaşayır"
Xatırladaq ki,
Xaçmaz rayon Qaz İstismarı İdarəsi (XRQİİ)
il ərzində həyata keçirilmiş tədbirlər nəticəsində
qaz təchizatı sahəsində müəyyən müsbət
nəticələr əldə etsə də, RİH
başçısı bu sahədə də kifayət qədər
nöqsanların hələ də qaldığını
vurğulayıb: "Verilən təbii qazın dəyərinin
yığılması sahəsində ciddi irəliləyişin
olmaması əsas problemlərdən biridir. Əhaliyə
verilən təbii qazın yığımı 2007-ci ildə
56,3 faiz olduğu halda, ötən il 50,3 faiz təşkil edib.
Bu rəqəm bizi heç cür qane edə bilməz".
Xaçmaz
RQİİ-nin rəisi Azad Yaqubov da deyilənlərlə
razılaşaraq bildirib ki, Xaçmaz və Xudat şəhərlərindən
əlavə, rayonun 32 kəndinə qaz verilir. Rayon üzrə
təbii qazdan istifadə edən abonentlərin sayı 18.900 nəfərə
çatdırılıb. Sayğacların
quraşdırılması başa çatan Ağyazı,
Buduq və Qədəşoba kəndlərinə də
yaxın günlərdə qaz veriləcək. Hazırda Nərəcan
və Qımıl kəndlərində qaz
sayğaclarının quraşdırılmasına
başlanılıb: "Hülövlü və
Üçgünqışlaq kəndlərində qaz kəmərlərində
və paylayıcı şkaflarda təmir işləri
aparılır. Biz köhnəlmiş xətlərin təzələnməsi
ilə məşğuluq. Amma bütün bunlara baxmayaraq əksər
abonentlər istifadə etdikləri "mavi
yanacağ"ın haqqını vaxtında ödəmədiyindən
çox ciddi sıxıntı yaşayırıq. Təkcə
2008-ci ildə əhaliyə satılan qazın dəyərinin
cəmi 54 faizi ödənilib. Dekabr ayında isə ödəniş
50,5 faiz olub. Qazpulunu ödəmədiklərindən son
zamanlar Xaçmaz şəhərindəki H.Aslanov və
Ü.Hacıbəyov küçələrinin sakinlərinə,
həmçinin Müşfiq, Qaraçı və Xaspoladova kəndlərinə
qaz verilişi dayandırılıb".
59 enerji oğurluğu aşkarlanıb
Xatırladaq ki,
Ş.Xanbabayevin açıqlamasına görə, il ərzində
5,1 milyon manatlıq 123,8 milyon kilovat-saat enerji alınıb. Əhali
sektorundan verilən enerjiyə görə 3,3 milyon manat, yəni
65,7 faiz vəsait yığılıb: "Bu rəqəm
2007-ci ildəki 38,5 faizlə müqayisədə xeyli artıq
olsa da, yenə də qaneedici deyil. Xaçmaz Elektrik Şəbəkəsinin
(XEŞ) rəhbərliyi bu istiqamətdə radikal addımlar
atmalı, yığım faizinin maksimum həddə
çatdırılması üçün bütün
imkanlarını reallaşdırmalıdır. Yeni
salınmış yaşayış massivlərinin elektrik
enerjisi ilə təchizatının
yaxşılaşdırılması sahəsində də məqsədyönlü
və təsirli tədbirlər görülməlidir".
XEŞ rəisi Qismət
Əsgərov da tənqidlərlə razılaşaraq deyib ki,
176 yaşayış məntəqəsində 36.400 abonent var.
Rayon üzrə sayğaclaşdırma işi 97,6 faizə
çatıb. Bir sıra yerlərdə açıq xətlər
qapalı sip kabellərlə əvəzlənib. Əksər
evlərin sayğacları həyət və evlərdən
bayıra çıxarılıb: "Bu, enerjinin
uçotunun düzgün aparılması və oğurluq
hallarının qarşısının alınması
baxımından çox əhəmiyyətlidir. Bununla belə,
təkcə dekabr ayında ayrı-ayrı şəxslər tərəfindən
enerji oğurluğuna yol verildiyinə dair 59 fakt
aşkarlanıb və aktlaşdırılıb.
Gördüyümüz işlər və bir sıra
yaşayış məntəqələrinin
qazlaşdırılması nəticəsində əvvəlki
dövrlərlə müqayisədə elektrik enerjisi sərfi
nəzərəçarpacaq dərəcədə azalıb.
Təkcə ötən ilin sentyabrında orta aylıq
yığım 92,4 və əhali sektorundan yığım
isə 84,2 faiz olduğu halda, noyabr və dekabr aylarında
xeyli azalıb. Bütün bunlar da normal fəaliyyətimizə
mənfi təsirini göstərir".
Təbriz Vəfalı
Həftə içi.- 2009.- 3 mart.- S. 1; 5.