Təhsil Sektoru üçün DATA mərkəzi yaradılır

Mərkəzdə Azərbaycanda analoqu olmayan təhlükəsizlik sistemləri quraşdırılıb

Azərbaycanda "2008 - 2012-ci illər təhsil sisteminin informasiyalaşdırılması üzrə dövlət proqramı" çərçivəsində informasiya və resurs mərkəzi (DATA mərkəzi) yaradılır.

Bu barədə məlumat verən ULTRA şirkətinin prezidenti Tahir Mirkişilinin sözlərinə görə, mərkəz Azərbaycanın təhsil sektorunun informasiyalaşdırılması prosesində böyük önəm daşıyır. Mərkəzin yaradılması "İntel", "HP", "Microsoft", "Cisco" şirkətlərinin Azərbaycanda rəsmi partnyoru olan ULTRA şirkəti tərəfindən həyata keçirilir. T.Mirkişilinin sözlərinə görə, dünyanın aparıcı şirkətlərinin təqdim etdiyi müasir texnologiyaların tətbiqi sayəsində Məlumat və Resurs Mərkəzinin funksionallığı olduqca genişdir və ən müasir texnoloji standartlara cavab verir. Azərbaycan təhsil şəbəkəsində internetə "giriş və çıxış nöqtəsi" olmaqla yanaşı, mərkəz həmçinin təhsilə aid informasiya resurslarının toplanacağı yer olacaq. Burada xüsusi təhlükəsizlik qəfəsi qurulub, bütün avadanlıqların 24 saat çalışması üçün hər cür texniki imkan yaradılıb. Mərkəzdə Azərbaycan təhsil şəbəkəsinin məlumatlarını yerləşdirmək üçün ən müasir "İntel" platformalı dördnüvəli HP serverləri quraşdırılıb. Bundan əlavə, mərkəzdə Azərbaycanda analoqu olmayan ən yeni fiziki təhlükəsizlik sistemləri quraşdırılıb ki, bu da toplanılacaq məlumatlara kənar müdaxilələrin qarşısını alacaq.

T.Mirkişili onu da qeyd etdi ki, quraşdırılmış avadanlıq mərkəzə bir çox funksiyaları yerinə yetirməyə imkan verir. Məsələn, xüsusi mərkəzləşdirilmiş antivirus proqram təminatı məktəblərdəki kompüterlərə avtomatik olaraq yerləşdiriləcək: "Məktəblərdəki bütün kompüterlər birbaşa mərkəzdən idarə olunacaq ki, bu da kompüterlərə texniki xidmətin səviyyəsini əhəmiyyətli dərəcədə artıracaq. Mərkəzdə quraşdırılmış texnologiya videokonfranslar keçirməyə imkan verəcək. Bu texnologiya mərkəzin konfrans zalından Azərbaycan təhsil şəbəkəsinə qoşulmuş bütün məktəblərinə eyni zamanda mühazirələr və ya açıq dərslər keçirməyə imkan yaradacaq. Mərkəzdə həmçinin tədris elektron resursları yerləşdiriləcək. Bu resurslar İKT-nin təhsildə tətbiqini daha effektiv etməklə yanaşı, tədrisin keyfiyyətini də qaldırmağa imkan verəcək. Mərkəzin serverində həmçinin Azərbaycan məktəblərinin elektron xəritəsi də yerləşdiriləcək. İnternet vasitəsilə ictimaiyyət üçün açıq olan bu resurs vasitəsilə məktəblər haqqında bütün zəruri məlumatlar əldə etmək mümkün olacaq".

Təhsil sisteminin informasiyalaşdırılmasının effektivliyini təmin etmək üçün "Call-mərkəz"in yaradılması üzrə də iş gedir. Məlumat aə Resurs Mərkəzinin nəzdində yaradılan "Call-mərkəz" vahid telefon nömrəsi vasitəsilə informasiya təhlükəsizliyi, texniki dəstək və digər xidmətlərlə əlaqəni asanlaşdıracaq.

Naibə

Həftə içi.- 2009.- 6 mart.- S. 6.