Şəkidə bu il 232 iş yeri açılıb

Şəki şəhər İcra Hakimiyyətindən aldığımız məlumata görə, cari ilin 1-ci rübü ərzində adıçəkilən rayonda 33 milyon 597 min manatlıq məhsul buraxılıb və bu, ötən ilin müvafiq dövrü ilə müqayisədə 35,4 faiz çoxdur. Buraxılan məhsulun 37,8 faizi dövlət, 62,2 faizi isə özəl sektorun payına düşüb: "Adambaşına faktik qiymətlərlə 196,9 manatlıq məhsul buraxılıb və bu, ötən ilin eyni dövrü ilə müqayisədə 32,5 faiz çoxdur. 200-ü daimi olmaqla 232 yeni iş yeri açılıb. İqtisadi və sosial sahənin inkişafına 4 milyon 986 min manatlıq investisiya yönəldilib. Bu, 2008-ci ilin 1-cü rübünə nisbətən 4,1 dəfə çoxdur. Şəkidə fəaliyyət göstərən bank və kredit təşkilatları tərəfindən sahibkarlara 13 milyon 780 min manat həcmində kredit verilib. Rayonda tikinti-quruculuq və abadlıq işləri də davam etdirilib. İnşasına 2008-ci ildə başlanılan sosial təyinatlı obyektlərin, emal yönümlü müəssisələrin tikintisi davam etdirilib, şəhərin bir sıra küçələrində ümumilikdə 256 min manatlıq təmir işləri görülüb. Regionların 2009 - 2013-cü illərdə sosial-iqtisadi inkişafını əhatə edən dövlət proqramına əsasən, növbəti 5 ildə Şəkidə bir sıra mühüm tədbirlərin, o cümlədən sənaye və kənd təsərrüfatı istehsalının genişləndirilməsi, ərazinin təbii sərvətlərindən səmərəli istifadə olunması, elektrik enerjisi, istilik və qaz təchizatı sahəsində işlərin davam etdirilməsi, su təchizatı və kanalizasiya sisteminin yenidən qurulması, meliorasiya və irriqasiya işlərinin həyata keçirilməsi, səhiyyə, təhsil, mədəniyyət və idman müəssisələrinin inşası və yenidən qurulması sahəsində bir sıra tədbirlər nəzərdə tutulub".

Təbriz Vəfalı

Həftə işi.- 2009.- 2-4 may.- S. 5.