Şuşa 2 saylı peşə liseyində anıldı

Razim Mikayılov: "İnşallah, milli bayramlarımızı, qələbə günlərimizi orada qeyd edəcəyik"

Tarixin elə nadir günləri var ki, zaman-zaman xatırlanır. Dərs kimi, ibrət kimi yaddaşa yazılır, görk kimi göz önündə tutulur.

17 ildir Kəbəmiz, Məkkəmiz, qibləgahımız adlanan doğma Şuşa yağı düşmən tapdağı altındadır. Bakı şəhər 2 saylı Peşə Liseyində də Şuşanın işğal günü anıldı.

Tədbirdə liseyin direktoru Razim Mikayılov çıxış edərək bildirdi ki, həmin gün doğulan uşaqlar bu gün gənclik dövrünü yaşasalar da, onlar həmin günü yaddaşlarında bir təcavüz tarixi kimi yaşadırlar: "Biz həyata nikbin baxırıq. İnanırıq ki, möhtərəm prezidentimiz cənab İlham Əliyevin müdrik siyasəti nəticəsində nəinki Şuşa, işğal altında olan bütün torpaqlarımız, doğma Qarabağımız erməni tapdağından tezliklə azad ediləcək. Biz burada işğal gününü yox, inşallah, Şuşamızda milli bayramlarımızı, qələbə günlərimizi qeyd edəcəyik".

Tədbirdə şagirdlərin hazırladığı ədəbi-bədii kompozisiya çox maraqlı idi. Şuşa, vətənlə bağlı şeirlər, mahnılar səsləndirildi, kiçik səhnəciklər göstərildi. Tədbir başa çatdıqdan sonra liseyin direktoru Razim Mikayılov rəhbərlik etdiyi təhsil ocağının fəaliyyəti barədə məlumat verərək dedi: "9 May - Qələbə günü və ümummilli lider Heydər Əliyevin anadan olmasının 86-cı ildönümü ilə bağlı böyük tədbirlərimiz olacaq. Dahi öndərin ad günü ilə bağlı liseyin hər bir qrupunun şagirdləri divar qəzetləri buraxıblar. Əvvəlcə məktəbin öz nəzdində, sonra isə ümumtəhsil və peşə məktəb və liseyləri arasında Heydər Əliyevin anadan olmasının 86-cı ildönümü münasibətilə inşa müsabiqəsi keçirildi. Məktəblərarası respublika inşa yazı müsabiqəsində bir şagirdimiz Kəmalə təhsil nazirinin mükafatına layiq görüldü. Artıq 2 sınaq test imtahanı arxada qalıb. Həmin testdə XI sinif şagirdlərinin 50 faizdən çoxu yüksək bal toplayıb. Yay buraxılış imtahanlarına şagirdlərimiz müvəffəqiyyətlə hazırlaşırlar. Mən 1 ildən çoxdur məktəbə rəhbərlik edirəm. İlk gündən nizam-intizama fikir vermişəm. Məktəbin binasında əsaslı təmir işləri aparmışıq. Laboratoriyalar və emalatxanalarımız, o cümlədən kompüter otaqları fəaliyyət göstərir. Dərsdənqalma, gecikmə hallarına yol verilmir. Bu da dərsin keyfiyyətinin yaxşılaşmasına gətirib-çıxarır. Biz şagirdlərə təhsillə yanaşı, müxtəlif peşələr də veririk. Şagirdlər peşəyə maraq göstərir və ustalarımız tərəfindən onun sirlərinə yiyələnirlər".

R.Mikayılov həmçinin vurğuladı ki, bu il keçirilən Olimpiada yarışlarında qaynaq texnologiyası fənni üzrə bir şagirdləri I yerə çıxıb, kimya fənni üzrə II, fizika fənni üzrə isə III yerləri bölüşdürüblər. Liseydə idmana maraq artıb. Bir məzunumuz döyüş növü üzrə dünya çempionu, digər iki şagirdimiz isə idmanın güləş və karate növü üzrə respublika çempionudur: "Litseydə futbol, voleybol, basketbol komandaları da fəaliyyət göstərirlər. Peşə məktəbi və liseyləri arasında keçirilən yarışlarda komandalarımız hər dəfə uğurla çıxış edərək qalib olurlar. Müəssisəmizdə gənclərin çağırışaqədərki hazırlıq kabineti fəaliyyət göstərir. Kabinetə Qarabağ müharibəsi veteranı, "N" saylı hərbi briqadanın komandir müavini olmuş, təcrübəli zabit Seyran Musayev rəhbərlik edir. Heydər Əliyev Fondu tərəfindən kabinetə 12 əyani vəsait verilib, şagirdlərimiz həmin vəsaitdən bəhrələnirlər. Gənclərin hərbi vətənpərvərlik tərbiyəsi yüksəkdir. Onlar hərbə böyük maraq göstərirlər. Hərbi xidmətə gedənə qədər ibtidai hərbi biliyə yiyələnməyə çalışırlar. Mayın 26-da liseydə Mülki Müdafiə günü keçiriləcək. Artıq gənc hərbçilərimiz həmin tədbirə hazırlaşırlar".

R.Mikaylıov həmçinin bildirdi ki, liseyə şagirdlər müsabiqə yolu ilə qəbul edilir: "Artıq müəssisəmizdə 280 şagird təhsil alır. Dərsdən üzrsüz səbəbə görə qalan şagirdlər müəssisədən azad edilir. Təhsil naziri Misir Mərdanovun bizə qayğısını daim hiss edirik. Bir nazir kimi öz köməkliyini əsirgəmir".

Qələndər Xaçınçaylı

Həftə içi.- 2009.- 8 may.- S. 3.