Qaliblər mükafatlandırıldı

İki ay davam edən seçmə mərhələsində 13 istiqamət üzrə 74 şagird qalib seçilib

Dünən Musiqili Komediya Teatrında Bakı şəhəri üzrə Təhil İdarəsi (BŞTİ) və Təhsil İşçiləri Azad Həmkarlar İttifaqı Komitəsinin birgə təşkilatçılığı ilə məktəblilər arasında keçirilən "Azərbaycan - dünyam mənim" adlı yaradıcılıq müsabiqəsinin qaliblərinin mükafatlandırılması mərasimi keçirildi.

Mərasimdə çıxış edən BŞTİ sədri Nailə Rzaquliyeva dedi ki, sözügedən müsabiqə ifaçılıq, musiqi, bədii qiraət və müəllif şeirləri, rəsm, inşa yazı, fizika və astronomiya, coğrafiya, iqtisadiyyat, kimya, tarix, biologiya, ekologiya, Azərbaycan dili, ədəbiyyat üzrə keçirilib. N.Rzaquliyeva müsabiqənin keçirilməsi və onun şərtləri barədə əvvəlcədən Bakının bütün məktəblərində təbliğat işləri aparıldığını bildirdi: "330 min şagirdin təhsil aldığı paytaxtın ümumtəhsil məktəblərində müsabiqəyə böyük maraq göstərilib. Müsabiqənin 2 ay davam edən seçmə mərhələsində 13 istiqamət üzrə 74 şagird qalib seçilib. Bunlardan 28 şagird birinci, 30 nəfər ikinci, yerdə qalanı isə üçüncü yeri tutub. Ümummilli lider Heydər Əliyev ikinci dəfə hakimiyyətə gəldikdən sonra onun bilavasitə rəhbərliyi ilə təhsil sistemində çox ciddi islahatlara start verildi. Azərbaycanın tarixində ilk dəfə 1996-cı ildə istedadlı uşaqların müəyyənləşdirilməsi və onların istedadının qayğısına qalınması haqqında qərarının mahiyyəti, məramı yüz illər keçsə belə, əhəmiyyətini qoruyub-saxlayacaq".

Təhsil naziri Misir Mərdanov isə bu cür müsabiqələrin təkcə Bakıda deyil, regionlarda, hətta kənd məktəblərində də təşkil olunacağını bildirdi. Onun sözlərinə əsasən, prezidentin istedadlı gənclərin üzə çıxarılmasına dair təsdiq etdiyi dövlət proqramına uyğun olaraq ayrı-ayrı fənlər üzrə məktəblilər arasında müsabiqələr keçiriləcək: "Artıq riyaziyyat, fizika, kimya və biologiya üzrə müsabiqənin yekun turuna hazırlaşırıq. Mayın sonlarında biz bu müsabiqəni yekunlaşdıracağıq". Təhsil nazirinin sözlərinə görə, bu cür müsabiqələrdə qalib gələn gənclərlə daim iş aparılır, onlarla görüşlər təşkil edilir. Nazir müvafiq dövlət qurumlarını da belə gənclərə istedad və bacarıqlarını nümayiş etdirə bilməsi üçün lazımi şərait yaratmağa çağırdı: "Azərbaycanda istedadlı və qabiliyyətli uşaqlar çoxdur. Əsas məsələ odur ki belə uşaqlar həm rayon icra hakimiyyətlərinin, həm də digər müvafiq qurumların nəzarətində olsun. Bu uşaqlar qeydiyyata alınmalı və onların gələcək inkişafı üçün köməkliklər göstərilməlidir". M.Mərdanov əlavə etdi ki, Təhsil Nazirliyi "İlin ən yaxşı müəllimi" müsabiqəsinin yekun turuna hazırlıq tədbirlərinə başlayıb. Mayın 12-dən nazirlikdə sonuncu tur üzrə seçim aparılacaq. Əvvəlki turlar üzrə müsabiqəyə təqdim olunan sənədlər araşdırılıb. Belə ki, "İlin ən yaxşı müəllimi" adına iddialı namizədlərin pedaqoji fəaliyyəti, təhsildə yenilikləri və digər kriteriyalar üzrə yoxlama tədbirləri həyata keçirilib. Yaxın günlərdə isə müsabiqənin yekun turu üzrə müvafiq tədbirlərə start veriləcək.

Həmkarlar İttifaqları Konfederasiyasının sədri Səttar Mehbalıyev ümummilli lider Heydər Əliyevin hakimiyyəti illərində saysız-hesabsız azərbaycanlı tələbənin dünyanın ən qabaqcıl ölkələrində təhsil aldığını dedi: "Ölkə iqtisadiyyatının ən ağır vəziyyətində ulu öndərin uzaqgörən siyasəti və rəhbərliyi ilə ardıcıl və sistemli tədbirlərin həyata keçirilməsi nəticəsində Azərbaycan dövləti nəinki ağır böhrandan qurtulub, həmçinin uğurlu inkişaf yoluna qədəm qoyub".

Tədbirdə iştirak edən Səbail rayon İcra Hakimiyyətinin başçısı Sahib Ələkbərov Heydər Əliyevin siyasi fəaliyyətindən söz açaraq onun adının dünyanın ən qabaqcıl siyasətçilərinin adı ilə yanaşı çəkildiyini dedi. Sonda müsabiqənin qaliblərinə diplom və hədiyyələr təqdim olundu və tədbir bədii hissə ilə davam etdirildi.

Naibə

Həftə içi.- 2009.- 8 may.- S.6.