Məktəblilərin Heydər Əliyev sevgisi

Şagird təxəyyülünün ümummilli liderə səmimi ürək sözləri çatdırılıb

Dünən "Gülüstan" sarayında Heydər Əliyevin anadan olmasının 86-cı ildönümü münasibətilə respbulikanın orta ümumtəhsil məktəblərinin VII - XI sinif şagirdləri arasında keçirilən "Ulu öndər Heydər Əliyevi düşünərkən..." adlı inşa-yazı müsabiqəsinin nəticələrinə həsr olunan konfrans keçirildi.

Heydər Əliyev Fondu, Təhsil Nazirliyi, Yeni Azərbaycan Partiyası (YAP), Rabitə və İnformasiya Texnologiyaları Nazirliyi və Həmkarlar İttifaqları Konfederasiyası ilə birgə həyata keçirilən tədbirdə təhsil naziri Misir Mərdanov, YAP-ın icra katibi Əli Əhmədov, rabitə və informasiya texnologiyaları naziri Əli Abbasov, AHİK sədri Səttar Mehbalıyev və digər hökumət və dövlət nümayəndələri iştirak edirdilər.

Tədbiri giriş sözü ilə açan Misir Mərdanov 3 mərhələdə keçirilən müsabiqədə 700 mindən artıq şagirdin iştirak etdiyini, son mərhələdə isə onlardan 86 nəfərin qaldığını dedi. Nazirin sözlərinə görə, müsabiqədə şagird, uşaq təxəyyülünün Heydər Əliyevə səmimi ürək sözləri çatdırılıb: "Bu tədbiri keçirməklə biz bir tərəfdən Heydər Əliyevin xatirəsini kütləvi şəkildə yad edirik, digər tərəfdən onun çox sevdiyi və Azərbaycanın gələcəyi adlandırdığı gənclərdə ona məhəbbət və hörmət hissini aşılayırıq. Tədbirlər davamlı olaraq bundan sonra da uzun illər keçiriləcək".

Müsabiqə ilə bağlı 2 qeyri-adi halı qeyd edən nazir bildirdi ki, ulu öndərin 86-cı ildönümü ərəfəsində keçirilən tədbirdə 86 qalib seçilib. Bundan əlavə, bildiyimiz kimi, 8 may Şuşa şəhərinin ermənilər tərəfindən işğal olunduğu gündür və müsabiqənin 1-ci yerinə layiq görülən qalibi də Şuşa şəhər məktəbinin şagirdidir.

Heydər Əliyevin hakimiyyəti dövründə Azərbaycanın çox böyük templə inkişaf etdiyini, iqtisadi inkişaf tempinə görə dünyada birincilər siyahısında olduğunu deyən nazir siyasi sabitliyə görə də ölkəmizin dünyada öz yerini tutduğunu söylədi: "Hazırda ölkəmiz iqtisadi və təhsil potensialı ilə yanaşı, siyasi potensialını da inkişaf etdirməkdədir. İşğal olunan torpaqlarımız Heydər Əliyevin layiqli davamçısı İlham Əliyevin rəhbərliyi ilə geri qaytarılacaq və ölkəmiz bundan sonra daha da inkişaf edəcək".

Qalibləri təbrik edən YAP icra katibi Əli Əhmədov qeyd etdi ki, müstəqil Azərbaycanın gələcəyini qoruya biləcək, ölkəmizin parlaq gələcəyini təmin edə biləcək gənclər yetişir. Ulu öndər Heydər Əliyevin Azərbaycanın gələcəyini gənclərlə əlaqəli hesab etdiyini deyən icraçı katibi bildirdi ki, o, hər zaman gənclərə xüsusi qayğı göstərirdi: "Bu müsabiqə Azərbaycan gəncliyinin Heydər Əliyev ideyalarına, şəxsiyyətinə dərin hörmətini əks etdirir. Gənclər yaşlılardan fərqli olaraq həyatı daha dərindən öyrənirlər. Heydər Əliyev ideya və prinsiplərini öyrənməklə, irsinə sahib olmaqla həm Azərbaycanı dərk edirlər, həm də ölkəmizin müstəqilliyini qoruyaraq həyata hazırlanmış olurlar. Artıq 3-cü dəfə keçirilən müsabiqə Azərbaycan gənclərinə cəmiyyətin gələcəyinin təmin edilməsi məqsədi və ümummilli liderin ideyalarının mənimsənilməsi baxımından həyata keçirilən ən geniş və kütləvi tədbirdir".

Ə.Əhmədov onu da vurğuladı ki, YAP-ın qəbul etdiyi qərara əsasən, bu müsabiqənin qaliblərinin hər biri ali məktəbə daxil olduqdan sonra onlara aylıq 50 manat məbləğində müavinət ayrılacaq. Tədbirin sonunda qaliblərin mükafatlandırılması keçirildi. Şagirdlərə mükafatları ölkənin tanınmış ziyalıları, ali məktəb rektorları, millət vəkilləri və digər tanınmış xadimlər təqdimlədilər. Əvvəlki illərdən fərqli olaraq bu il müsabiqə iştirakçılarına məhz inşa müsabiqəsi üçün xüsusi tərtibatla hazırlanmış dəftər, qələm və üzərində Heydər Əliyevin şəkli olan döş nişanı təqdim edildi.

Müsabiqənin yekun mərhələsinin nəticəsinə görə, 5 nəfər I, 5 nəfər II, 10 nəfər III yerə layiq görülüb, 56 nəfər isə Təhsil Nazirliyinin fəxri fərmanı ilə təltif olunub. I, II, III yerin qalibləri isə noutbuklarla təltif edilib. Bundan əlavə, RİTN tərəfindən I yerə 300 manat, II və III yerə isə 200 manat, HİK-dən isə hər yerin qaliblərinə 300 manat məbləğində pul vəsaiti ayrılıb. Qeyd edək ki, qaliblərin inşa yazıları "Heydər Əliyev məktəblilərin gözü ilə" adlı topluda dərc edilib.

Naibə

Həftə içi.- 2009.- 9-12 may.- S. 5.