Yalçın Adıgözəlovun yeni iş yeri

Dünyanın ən məşhur simfonik orkestrləri ilə birgə çıxışlarından daha çox tanınan dirijor Yalçın Adıgözəlov Ş.Qurbanov adına Musiqili Komediya Teatrına dəvət alıb.

Teatrın mətbuat xidmətindən aldığımız məlumata görə, direktor Əliqismət Lalayevin imzaladığı müvafiq əmrlə Y.Adıgözəlov məşqlərinə yenicə başlanmış İmre Kalmanın "İddialı qaraçı" operettasının tamaşasının dirijoru vəzifəsinə təyin edilib. Tamaşanın əsas məziyyəti ondadır ki, "Muskomediya"nın tarixində ilk dəfə olaraq klassik Avropa operettası azəri türkcəsində səhnəyə gətiriləcək. Librettonun tərcüməçiləri S.Məmmədzadə və F.Zöhrabovdur. F.Zöhrabov eyni zamanda tamaşanın quruluşçu rejissorudur.

Ə.Lalayev: "Əsər Mədəniyyət və Turizm Nazirliyinin sifarişi ilə hazırlanır. Bizim kollektivə hörmət və məhəbbət bəsləyən hər bir istedadlı sənət adamı üçün teatrımızın qapıları hər zaman açıqdır. Bu gün Musiqili Komediya Teatrına Sumqayıt teatrından Valeh Kərimov, Gənc Tamaşaçılar Teatrından Naibə Allahverdiyeva, eləcə də digər teatr və başqa yaradıcı kollektivlərdən Anar Şuşalı, rejissorlar Oruc Qurbanov, Elvin Mirzəyev, Mikayıl Mikayılov, Nicat Kazımov dəvət olunublar. Gənc rəssam Nüşabə Hüseynova quruluşçu rəssam kimi ilk müstəqil işini artıq tamaşaçılara təqdim edib. "İddialı qaraçı" tamaşasında isə daha bir gənc rəssam - Əli Cəfər yaradıcı heyətə daxil edilib".

Ə.Lalayev onu da qeyd edib ki, son 20 ilə yaxın müddətdə Yalçın Adıgözəlov ilk dirijordur ki teatra dəvət edilir. Direktorun fikrincə, Azərbaycandan kənarda yetərincə tanınan dirijorla çalışmaq "Muskomediya"nın orkestri üçün də çox maraqlı olacaq. Xatırladaq ki, teatrın baş dirijoru Nazim Hacıəlibəyovdur.

Samirə

Həftə içi.- 2009.- 19 may.- S. 7.