Ağdamın qəsəbə və kəndləri telefonlaşdırılır

Vahid Cəfərov: "Artıq ərazimizdə 5 ATS fəaliyyət göstərir"

Ağdam telekommunikasiya qovşağı 2 ilə yaxındır sərbəst fəaliyyət göstərir.

Bu müddətə qədər rayonun ancaq Quzanlı qəsəbəsində bir neçə ailədə telefon olub. Rayon Telekommunikasiya Qovşağının rəisi Vahid Cəfərov bildirdi ki, artıq dairələri genişlənib, abonentlərin sayı 1000 nəfərə çatıb: "Nəzərdə tutmuşuq ki, cari ilin sonuna qədər 1800 nəfərdən çox sakinin evinə telefon çəkilsin. Artıq ərazimizdə 5 ATS fəaliyyət göstərir. Hazırda Qaradağlı, Quzanlı, Dörd yol-1, Xındırıstan, Əfətli, Mahrızlı kənd və qəsəbələrinə telefon xətləri çəkilir. Mahrızlı kəndində ATS-in tikintisi başa çatıb, bu yaxınlarda istifadəyə verəcəyik".

V.Cəfərov həmçinin vurğuladı ki, bu sahədə "Aztelekom" İB-nin baş direktoru Məhəmməd Məmmədovun xidmətləri böyükdür: "O, bir rəhbər kimi bizimlə sıx əlaqə saxlayır. ATS-ləri müasir tipli avadanlıqlarla təchiz edir. Çalışır ki, Ağdamın kəndlərində ATS-lər tikilib fəaliyyət göstərsin".

V.Cəfərov rayon İcra Hakimiyyətinin başçısı Həsən Sarıyevin də onlara dəstək olduğunu bildirdi: "Həsən müəllim bir başçı kimi çalışır ki, rayonun bütün kəndləri abadlaşsın. O, əhalinin sosial rifahının yaxşılaşdırılması istiqamətində çox işlər görüb. Artıq Quzanlı tikinti meydanına çevrilib, qəsəbədən çox şəhərə bənzəyir. Onun diqqəti və qayğısı nəticəsində rayonun bütün qəsəbə və kəndlərində müasirləşmə gedir, əhalinin sosial təminatı ödənilir. Təşkilatlardan danışıq pullarını yığılmasında və digər sahələrdə bizə yaxından köməklik göstərir. Bir sözlə, hər gün bizim problemlərimizlə maraqlanır və ona yardımçı olmağa çalışır".

Qələndər Xaçınçaylı

Həftə içi.- 2009.- 20 may.- S. 6.