"Azercell" və AFFA arasında əməkdaşlıq sazişi imzalandı

Ali Ağan: "Azərbaycanda futbolun inkişafı üçün görülən işlərə ortaq olacağıq"

Mayın 24-də Azərbaycanın lider mobil operatoru olan "Azercell Telekom" MMC ilə Azərbaycan Futbol Federasiyaları Assosiasiyası (AFFA) arasında əməkdaşlıq müqaviləsi imzalandı. Bu müqaviləyə görə, "Azercell" Azərbaycan futbolunun inkişafına öz məxsusi töhfəsini verəcək.

Açıq havada keçirilən təntənəli imzalanma mərasimində tanınmış ictimaiyyət nümayəndələri, millət vəkilləri, idmançılar və digər qonaqlar iştirak edirdi. Müqavilə imzalanmazdan öncə AFFA-nın və Azərbaycan Dövlət Neft Şirkətinin prezidenti Rövnəq Abdullayev söz alıb bu sənədlə böyük bir əməkdaşlığın təməlinin qoyulduğunu bildirdi: "İndi Azərbaycan futbolu üçün islahatlar dövrüdür. Azərbaycan prezidenti İlham Əliyev futbolla əlaqədar inkişaf proqramını qəbul etdikdən sonra bu sahədə çoxlu dəyişiklik baş verib".

Rövnəq Abdullayev hər iki qurumun devizində "birlik" sözünün olduğunu xüsusi vurğuladı: "AFFA-nın devizi "Biz birlikdə güclüyük" şüarından ibarətdir. "Azercell" isə özünə "Bizi birləşdirən dəyər" devizini əsas seçib. Deməli, bu iki qurum birlikdə böyük işlər görəcək. "Azercell" öz imkanlarından istifadə edərək Azərbaycanı dünya çapında tanıtmağımıza yardımçı olacaq". AFFA prezidenti əminliklə bildirdi ki, AFFA ilə "Azercell" arasında əməkdaşlığın möhkəmləndirilməsi futbolun inkişafına yardım edəcək.

Daha sonra "Azercell Telekom" MMC prezidenti Ali Ağan sazişlə bağlı fikirlərini açıqladı. O, rəhbərlik etdiyi şirkətin Azərbaycanda yeganə hədəfi olduğunu bəyan etdi: "Tək hədəfimiz Azərbaycanın qürur duyacağı şirkət ola bilməkdir. Hədəfimiz rəqəmlərlə, manat və ya dollarla ölçülmür. Biz texniki baxımdan, insan qaynaqları, həm də tanıtım sahəsində xeyli iş görmüşük, tək MDB məkanında deyil, dünyada olan son nailiyyətləri Azərbaycana gətirmişik ki, örnək olaq".

Ali Ağan indiyədək "Azercell"in mədəniyyət, təhsil və digər sahələrdə iri sosial layihələrə imza atdığını xatırlatdı: "İndi isə istənilən ölkənin inkişafında önəmli olan bir sahəyə - futbola dəstək vermək qərarındayıq. Futbol artıq bir idman növündən də irəli gedib. Bu oyun ölkənin tanınması, turizmi üçün böyük önəm daşıyır. Bu vaxta qədər biz AFFA və ARDNŞ-in Azərbaycan futbolu üçün böyük işlər gördüyünün şahidi olmuşuq. İndi isə biz də həmin işlərə ortaq olmağı planlaşdırırıq". Ali Ağan bir daha vurğuladı ki, AFFA ilə "Azercell" arasında imzalanan sənəd sponsorluq yox, ortaqlıq və əməkdaşlıq sazişidir.

Çıxışlardan sonra Azərbaycan futbolu tarixində ilk olan əməkdaşlıq müqaviləsi imzalandı. Sonra tərəflər bir-birlərinə hədiyyələr təqdim etdilər. Ali Ağan AFFA prezidentinə üzərində AFFA və "Azercell" loqosu olan mobil telefon, Rövnəq Abdullayev isə ona üzərində Azərbaycan milli yığma komandası üzvlərinin imzası olan futbol geyimini təqdim etdi. Azərbaycanın kişilərdən və qadınlardan ibarət yığma komandasının üzvləri də bu təntənəli yığıncaqda iştirak edirdi. Onların hər biri "Azercell"dən dəyərli hədiyyələr qazandılar. Komanda üzvləri Ali Ağan və Rövnəq Abdullayevlə birlikdə xatirə şəkli də çəkdirdilər. Azərbaycan futbolunun inkişafına dəstək olacaq bu sənədin imzalanması tədbir iştirakçıları üçün də əsl bayrama çevrilmişdi. Qonaqlar milli yığma komandanın üzvləri ilə təmas qurmaq, onlarla birlikdə açıq sahədə futbol oynamaq imkanı qazanmışdılar. İştirakçılar arasında keçirilən lotereya oyunu zamanı isə mobil telefon, videokamera oynanıldı. Növbəti priz - Azərbaycan - İspaniya yığmalarının oyununa bilet isə futbol həvəskarlarının lap ürəyincə oldu.

Müqavilənin şərtlərinə əsasən, "Azercell Telekom" MMC Azərbaycanda futbolun inkişafına dəstək verən hər bir layihənin altına imza atacaq. Əsasən də uşaq futbolunun inkişafına yönələn layihələrin reallaşmasına yardım göstərəcək. Müqavilə qüvvəyə minəndən sonra AFFA-nın təşkilatçılığı ilə keçirilən futbol oyunlarının televiziya ilə yayımına maddi dəstək verəcək. Şirkət Azərbaycanda uşaq futbolunun inkişafına dair layihələrə də imzasını qoyacaq. "Azercell" ilə AFFA arasında sazişə görə, bu mobil operatorun abonentləri istənilən futbol oyunu haqqında SMS vasitəsilə əvvəlcədən elanlar alacaqlar. Bu da futbol həvəskarlarının ölkədə keçirilən oyunlar barədə hər kəsdən əvvəl xəbər tutmasına, daim futbol aləmindəki yeniliklərdən xəbərdar olmağa imkan verəcək. "Azercell Telekom" Azərbaycanda futbolçuların reklamına da xüsusi diqqət ayıracaq. Hətta "scratch" kartlar üzərində Azərbaycan futbolçularının rəsmlərinin çap olunması da nəzərdə tutulub. Bir sözlə, "Azercell" Azərbaycan futbolu ilə bağlı ictimaiyyətə lazım olan məlumatlarını ötürülməsində önəmli vəzifəni yerinə yetirəcək.

"Azercell" haqqında

"Azercell Telekom" MMC 1996-cı il yanvarın 19-da təsis edilib. Elə həmin ilin dekabrında fəaliyyətə başlayıb. Şirkətin əsas payçıları "Telia Sonera" və "Turkcell" şirkətləridir. Azərbaycandakı fəaliyyəti müddətində şirkət ölkəmizə 1 milyard ABŞ dolları miqdarında sərmayə yatırıb. Hazırda "Azercell" ölkənin aparıcı mobil operatoru olmaqla yanaşı, həm də qeyri-neft sektorunda ən böyük vergi ödəyicisidir. Hazırda "Azercell"in mobil telekommunikasiyalar sahəsindəki bazardakı payı 60 faizdən çoxdur.

AFFA haqqında

AFFA - Azərbaycan Futbol Federasiyaları Assosiasiyası 1992-ci ilin martında təsis edilib. Azərbaycanın rəsmi futbol təşkilatı 1994-cü ilin mayında UEFA-ya, 1994-cü ilin iyununda FİFA-ya üzv qəbul olunub. Bu müddət ərzində Azərbaycanın milli yığma komandası dünya və Avropa çempionatlarında iştirak edib.

Həftə içi.- 2009.- 26 may.- S. 4.