QHT-lərə Dövlət Dəstəyi Şurası müsabiqəyə ciddi dəyişiklik etməyib

Təşkilatlar bunu birmənalı qarşılamır

QHT-lərə Dövlət Dəstəyi Şurası builki müsabiqəyə ciddi dəyişikliklər etməyib. Bəzi fərqlər var ki, bunların da ictimai təşkilatları qane edib-etməməsi ilə maraqlandıq.

Ötən il sənədlərin qəbulu, qiymətləndirilməsi, maliyyə vəsaitinin ayrılmasının aşkarlıq şəraitində keçdiyinə deyən Qarabağ Azadlıq Təşkilatının (QAT) sədri Akif Nağı bildirdi ki, hansısa narazılıqları olmayıb. Onun sözlərinə görə, 2009-cu ilin müsabiqəsində isə Qarabağla bağlı istiqamətdə müəyyən fərqlər var. Ötən il Qarabağla bağlı yalnız bir istiqamət müəyyənləşmişdi, indi isə 3. Gənclərin vətənpərvərlik tərbiyəsi, qaçqın və köçkünlərin problemləri və Qarabağ həqiqətlərinin beynəlxalq ictimaiyyətə çatdırılması istiqamətləri var. Bu istiqamətlərin hər birinə 90 min manat vəsait ayrılıb: "Eyni zamanda həmin istiqamətlərin fərqləndirilməsi müsbət haldır. Bunların hamısı bütövlükdə Qarabağ həqiqətləri istiqamətidir". Hər bir layihə üçün maksimal məbləğin yenə də 20 min manat olmasından təssüflənən QAT sədri həmin rəqəmin artırılmasını arzuladı: "QHT-ləərə Dövlət Dəstəyyi Şurası məbləğin artırılmasını müzakirə edib. Şura dövlətdən 5 milyon manat istəsə də, 2,7 milyon manat vəsait ayrıldı. Ola bilsin, bu səbəbdən hər layihə üçün nəzərdə tutulan məbləğ artırılmadı. Məncə, bu istiqamətdə maliyyə dəstəyi genişləndirilməlidir".

Ötənilki müsabiqənin müddətinin çox az olduğunu bildirən "Həsrət yolu" Əsir və Girovlara Kömək İctimai Birliyinin sədri Esmira Orucova dedi ki, layihələr yalnız 3 aylıq müddətə qəbul olunurdu. Ancaq bu il vaxt limiti qoyulmayıb. Bu il isə layihələri qəbul olunan QHT-lərə maliyyə vəsaiti aprelin 1-dən veriləcək. Layihə 9 ay müddətinə həyata keçirilə bilər: "Vaxtla bağlı məsələlər bizi qane edir. Ötənilki layihəyə çox az məbləğ verdilər. Az məbləğə az iş görmək olur. Ötən il əsir və girovların hüquqlarının beynəlxalq aləmdə qorunması üçün istiqamət var idi. Bu il nədənsə həmin istiqaməti çıxarıblar. Ona görə də məcburam ki, layihəmi Dağlıq Qarabağla bağlı olan bölməyə verim".

2009-cu il QHT-lərlə bağlı elan edilən müsabiqənin ötənilkiylə fərqinin işin xeyrinə olduğunu diqqətə çatdıran Media və Mülki Cəmiyyət İctimai Birliyinin sədri Xanoğlan Əhmədov söylədi ki, bunlar layihələrin daha səmərəli həyata keçirilməsi üçün yardımçı olan məqamlardır: "Həyata keçirdiyimiz layihə artıq yekunlaşmaq üzrədir. Növbəti müsabiqədə bunun davamı olaraq iştirak edəcəyik. Cənubda mətbuatın inkişafı ilə bağlı Lənkəranda Cənub Media və Resurs Mərkəzi təsis etmişik".

"Builki müsabiqədə ciddi dəyişikliklər ona görə yoxdur ki, Azərbaycan prezidentinin QHT-lərə dövlət dəstəyi konsepsiyasında nəzərdə tutulmuş 15 istiqamətin hamısı saxlanılıb" deyən Vətəndaşların Əmək Hüquqlarını Müdafiə Liqasının rəhbəri Sahib Məmmədov bildirdi ki, bunların dəyişməsi məqsədəuyğun deyil. O həmçinin əlavə etdi ki, bu vəsait dövlətindir, istiqaməti də dövlət özü müəyyənləşdirib: "Amma müsabiqənin şərtləri əvvəlkindən fərqli olaraq bir qədər detallaşdırılıb. İstiqamətlər konkret göstərilmir. Amma ümumi şəkildə əks olunur. Məsələn, "İnsan hüquqları və demokratiya" yarımqruplara bölünüb. Bu cür dəyişikliklər, bəzi adlarda dəqiqləşmələr var. Bundan başqa, ərizə və büdcə formasında qismən korrektələr edilib. Ölkədə elə QHT yoxdur ki, onun ixtisaslaşdığı sahəyə aid olmayan məsələ qalsın. Xarici donorlarda vətənpərvərlik, Qarabağ, azərbaycançılığın təbliği ilə bağlı mövzular yox idi. Ölkədə bütün sahələri əhatə edən QHT-lərə imkan yaradılıb ki, layihələrin təqdim edə bilsinlər. Məbləğ ötənilkinə nisbətən bir az çoxdur, bir də ehtiyat pul saxlanılacaq. 400 min manat il ərzində vacib sayılan layihələrin maliyyələşməsinə sərf olunacaq".

Əli Zülfüqaroğlu

Həftə içi.- 2009.- 30 yanvar.- S. 4.