“Biz oğul verdik, amma o torpaqlarda bir bayraq sancdıq!”

Bu gün haqqında söz açacağım qəhrəmanımız Vətən müharibəsinin növbəti şəhidi leytenant Vəli Kamal oğlu Quliyevdir.

Vəli Quliyev 1997-ci il iyulun 20-də Culfa rayonunun Qazançı kəndində anadan olub. Təhsilini 2003-2009-cu illərdə Culfa rayonu Aslanov Elsəvər adına nömrəli tam orta məktəbdə, 2009-2011-ci ildə Azər Tağıyev adına Naxçıvan şəhər 17 nömrəli məktəbdə alıb. 2011-2014-cü illərdə isə Heydər Əliyev adına Hərbi Liseydə təhsil alıb. 2014-2018-ci illərdə Heydər Əliyev adına Azərbaycan Ali Hərbi Məktəbində (AAHM) ali hərbi təhsil alıb. Vəli Quliyev 2018-ci ildən Azərbaycan Silahlı Qüvvələrinin Ağcabədi rayonunda yerləşən "N" saylı hərbi hissəsində xidmət edirdi. Subay idi.

Şəhidin atası Quliyev Kamal bəy deyir ki, mənim oğlum əsil vətənpərvər oğul idi. O, Vətəninə, millətinə çox sadiq idi:

“Vətənini canından artıq bilirdi. Biz ona erməni haqqında təəssüratlarımızı danışanda deyərdi ki, erməninin dini-imanı yoxdur. Çox ehtiyatlı olun. Müharibə başlayandan özü bölük komandiri olub. 82 nəfər əsgərlərlə döyüşlərə qatılıb. Həmişə deyərdi ki, ata, hər şey yaxışdır, narahat olma biz arxadayıq, təlimdəyik. Həmişə deyirdim ki, Vəli, çox ehtiyatlı ol. O, nümunəvi bir zabit və bölük komandiri idi. Vəli Qiyadmanlını çox mükəmməl bilirdi. Hadrud döyüşlərindən sonra Zəngilan, Cəbrayılda iştirak edib. Balasoltanlı kəndində gecə ermənilər pusquya salıblar onları, oğlum həmin gün şəhid olub. Vəlinin bölüyü çox nümunəvi əsgərlər idi. Əsgərləri deyir ki, həmin pusqudabir gecədə 28 nəfər şəhid oldu.

Vətən varsa, torpaq varsa, onun yolunda şəhid olmalıyıq. Bütün qazilərmizə şəfa diləyirəm, şəhidlərimizin məkanı cənnət olsun! Bütün ordumuzu Allah qorusun! Ali Baş Komandanımız cənab İlham Əliyevin komandanlığı altında daima bir olaq. Biz bir oğul verdik, amma o torpaqlarda bir bayraq sancdıq!”

Şəhidin anası Quliyeva Həqiqət xanım deyir ki, bir ana kimi Vəlidən nə qədər danışsam, doymaram. Vəli çox gözəl övlad olub:

“Cəmi istəyənlərə Vəli kimi övlad arzu edirəm. Mən bir ana kimi oğlumla fəxr edirəm! Vəli oxuyanda da, işləyəndə də, şəhidiliyində də el içində mənə baş ucalığı gətirib. Kaş Vəli mənə haqqını halal etsin. Mənim balam çox gözəl, mehriban bala idi. Düzdür, şəhidlər ölməz. O, daima yaşayır!

Vəli bir gün dedi ki, ana, istəyirəm bizim çoxlu qonaqlarımız olsun. Dedim, evimiz olsun qonaqlarımız da olacaq. Vəli bütün arzularına çatdı, onun ən böyük arzusu şəhidlik zirvəsi idi.Bütün videolarda deyir ki, şəhidlik hər oğula qismət olmur. Hər zaman deyirdi, mən heç kimin haqqına girmədim. Vəlinin bütün deyimləri videoları mənə xatirədir.

Vəlinin dəstəsi könüllü olub. Onun 23 yaşı vardı, amma atası, anası yaşda əsgərləri vardı. Həmin insanlar danışır ki, Vəli gələndə bölük ayağa qalxardı, ona o qədər rəğbət, hörmət vardı.

Hadrudu azad edən zaman erməni postun alıb, ayaqlarının altında erməni bayrağın tapdalayıb, bizim üçrəngli bayrağımızı asıb! Əsgərləri, zabitləri Vəli haqqında danışdıqca onunla çox fəxr edirəm! Mənim balam çox seçilmiş oğul idi. Çox istəyirdim ki, Vəli balam general olsun! Mənim balam mənim arzumun arxasınca getdi, şəhid oldu!

Vəli Quliyev oktyabrın 22-də Qubadlı döyüşləri zamanı şəhid olub. Naxçıvan şəhərində dəfn olunub. Şəhid Vəli Quliyevə məxsus materiallar ailəsi tərəfindən Milli Azərbaycan Tarixi Muzeyinin Vətən müharibəsi fonduna təhvil verilmişdir.

Azərbaycan Ordusunun leytenantı olan Vəli Quliyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Cəbrayılın, Füzulinin, Zəngilanın və Qubadlının azadlığı uğrunda gedən döyüşlərdə savaşıb. Vəli Quliyev oktyabrın 22-də Qubadlı döyüşləri zamanı şəhid olub. Naxçıvan şəhərində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamlarına əsasən, Vəli Quliyev ölümündən sonra "Vətən uğrunda", "Cəbrayılın azad olunmasına görə", "Qubadlının azad olunmasına görə", “Cəsur döyüşçü” medalları və "Azərbaycan Bayrağı" ordeni ilə təltif olunub.

Ruhun şad olsun, əziz qardaşım!

Aydın Tağıyev

Müstəqil araşdırmaçı jurnalist

mr-aydin@mail.ru

Hərbi And.- 2023.- 19 may.- S.7.