SONETLƏR

Heç kimin sözünə yoxdur etibar,

Heç kimin sözünə inanma əsla!

Ancaq tək özünə ümid bağla sən,

Ancaq özün çalış min ehtirasla.

Özündən savayı yoxdur heç kimin

Dar gündə dayağın təkcə özünsən.

Gecə-gündüz dağıt maneələri,

Hansı gündə olsan, elə o günsən.

Elə çalış, yarat namərdlər belə,

Sənə əl tutmağa məcbur olsunlar.

Elə yüksəklərdə pərvaz eylə ki,

Sənin dostluğunla məğrur olsunlar.

Sənin bir yolun var: yeni zirvələr!

Onda harayına oğullar gələr.

* * *

Bəli, gəlib çıxdı yaz,

Amma hələ uşaqdır.

Qış dəlilik eyləyir

Əlində də bıçaqdır.

Hirslə çıxıb özündən,

Söyür, meydan sulayır.

Gah qar səpir, gah yağış

Gah qurd kimi ulayır.

Gülləri qırıb tökür,

Sındırır budaqları.

Yol getməyə qoymayır

Qaytarır uşaqları.

Vaxtı çoxdan bitsə də,

Hamıya gəlir hədə.

* * *

Hər gecə mənim üçün

Nə qədər qorxuludur.

Gecələr çox qədimdir,

Gecələr çox uludur.

Gündüz fəal, arxayın.

Çox mübariz olursan.

Gecələrsə köməksiz,

Həm də aciz olursan.

Gecələr dostlar uzaq

Düşmənlərsə yaxındır.

Çoxu gözəgörünməz

Həm də axın-axındır.

Amma beyin oyaqdır

Düz danışan qoçaqdır.

* * *

QƏZƏL

Rəzalətlər sultanı sənlə sonacan varam,

Sən rahat olmayınca qapıları açaram.

Adilərlə işim yox, müdriklər sirdaşıyam

Harda bir zirvə varsa, orda əbədi qaram.

Dılğırlar səltənəti, düşüb bəxtimə neynim

Heç kimim yox, nəyim yox, bəxtiyar bir naçaram.

Bütün gecələrimi qayğılarla yatıram.

Min illik kilidlənmiş qapılara AÇARAM.

Hələ ki qürubumun şəfəqində məsudam.

Görsəm göylər qaralır, baş götürüb qaçaram.

Nadanlar arasında ey Nicat, fəqir dərviş,

Qananlar məclisində şaham, sultanam, çaram.

* * *

Harda dələduz varsa vəzifəylə şad edib

Qulduru, rüşvətxoru ömürlük azad edib.

Düş ölkəyə gəz axtar, bir kişi tapmaq çətin,

Hamısını özünə qiyabi arvad edib.

Özgələrə kilsələr, məktəblər təmir edir,

Özündə qalaları, evləri bərbad edib.

Küçədə üç-dörd nəfər durub danışa bilməz,

Dincliyi qoruyan yox, polisi cəllad edib.

Hər işi, hər qərarı tərsinə həll eyləyib

Zöhhakı bir qəhrəman, Nəmrudu şəddad edib.

De bu qədər mövzunu harda tapa bilərdin,

Ey Nicat nə yazardın Kubəni Bağdad edib.

Əlisa Nicat

Hürriyyət.- 2020.- 12-14 sentyabr. S. 14.