2 SONET

Təbiət öz işindədir,

Cəmiyyət də öz işində.

Hamı alverə qurşanıb,

İrandadır, ya da Çində.

Ölkə maşın sərgisidir,

Nə sevgi var, nə də hünər.

Hanı gözəl operalar,

Dillərdə gəzən nəğmələr.

Nə baş verir, heç kimin də,

Anlamaq həvəsi yoxdur.

Hətta xoruzların belə,

Banlamaq həvəsi yoxdur.

Neyləməli, bu gündəyik,

Elə bil ki, sürgündəyik.

* * *

Mətləb dolu, söz dolu,

Hamı olubdur həpənd.

Çıxasan səyahətə –

Gəzib ölkəni kənd-kənd.

İnsan çox danışanda,

Naqqal və çənə olur.

Yüz kitabı satınca

Mənimki mənə olur.

Yüz nəfər də oxuyan,

Yoxsa bu məmləkətdə,

Gərək gedib qurd kimi

Ulayasan Ələtdə.

Ha qarala, ha sən yaz,

Gəlməyəcək əsla yaz.

05.IV.2018

DOSTUM ELDAR MƏMMƏDBƏYLİYƏ

Sən adicə bir alim yox,

İnstitutda da tək bir ASsan.

Təbiətə qalib gələn,

Sən ilk təbiətşünassan.

Bilirəm ki, sən bilirsən,

Həyat nədir, insan nədir.

Mən bilirəm, köksün necə,

Hikmət dolu xəzinədir.

Mən bilirəm yüzündə də

Belə cavan qalacaqsan.

Bəsirətli, cəsarətli,

Bir qəhrəman qalacaqsan.

Bil ki, bütün dostlarınçın

Sən nikbinlik mayakısan.

Sən bir ailənin deyil,

İnstitutun dayağısan.

Səksən yaşın mübarəkdir,

Səksən il də dostum var ol!

Həm mübariz, həm sarsılmaz.

Həm də xoşbəxt, bəxtiyar ol!

Əlisa NİCAT

Hürriyyət.- 2020.- 26-28 sentyabr. S. 4.