Sahilin Vətən sevgisi

Masallı rayonu, Ərəb kəndində dünyaya göz açan Sahil Sarıbala oğlu Babayev 19-20 sentyabr 2023-cü ildə Qarabağ bölgəsində həyata keçirilən lokal xarakterli antiterror əməliyyatları zamanı Vətən uğrunda şəxsi igidlik, şücaət göstərərək şəhidlik zirvəsinə ucalıb. Şərəfli ölümü ilə adını qəhrəmanlıq tariximizə yazan Azərbaycan Silahlı Qüvvələrinin hərbi qulluqçusu, 3-cü dərəcəli “Vətənə xidmətə görə” ordenli Sahillə Babayevlə bütün Azərbaycan xalqı fəxr edir. Onun 31 illik ömür yolu gələcək nəsillər üçün də gözəl örnəkdir.

Mənən qəlblərdə yaşayan, hər an xatırlanan, bütün sevgi, məhəbbətə layiq olan şəhid Sahil Babayevin 32 yaşı oxuduğu təhsil ocağında - Ərəb kənd ümumi orta məktəbində qeyd olunub. Tədbirdə şəhidin doğmaları və digər şəhid ailələrinin üzvləri, Vətən müharibəsi iştirakçıları, Masallı Rayon İcra Hakimiyyətinin, rayon üzrə təhsil sektorunun, Xırmandalı kənd ərazi nümayəndəliyinin işçiləri, məktəbin müəllim və şagirdləri, kənd sakinləri iştirak ediblər.

Çıxışlar zamanı Lənkəran-Astara Regional Təhsil İdarəsi Masallı rayonu üzrə təhsil sektorunun müdiri Qoşqar Hətəmov, şəhid valideynləri Hafiz Qurbanov, Baloğlan Qasımov, Masallı Rayon İcra Hakimiyyəti başçisının Xırmandalı kənd inzibati ərazi dairəsi üzrə nümayəndəsi Məhəmməd Yusifov, şəhidin dostu, Vətən müharibəsi iştirakçısı Sabir İmanov, Sığıncaq kənd tam orta məktəbinin direktoru Əhliman Əliyev, Xırmandalı kənd tam orta məktəbinin müəllimi Qulu Gözəlov və başqaları Vətən müharibəsində, eləcə də antiterror tədbirləri zamanı qazanılan şanlı Zəfərdən və şəhid Sahil Babayevin keçdiyi şərəfli döyüş yolundan qürurla söz açıblar.

O da bildirilib ki, Sahili əsl insana xas olan mənəvi dəyərlərə, əxlaqi keyfiyyətlərə malik bir gənc kimi sevilirdi. Vətən, torpaq sevgisi onu şəhidlik zirvəsinə ucaltdı. Bu müqəddəs yolu tutanlar heç zaman ölmürlər. Adında xalqının qəhrəmanlıq simvolunu yaşatmaqla ölümsüzlüyə qovuşurlar.

Şəhid Sahil Babayevin 3 övladı- Samir, Elçin, Milay yadigar qalıb. Qəhrəman ataları ilə qürur duyan övladların söylədikləri şer parçaları çox kövrək alınıb. Həmçinin məktəblilərin ifasında qəhrəmanlarla bağlı ədəbi-bədii kompozisiya nümayiş olunub, vətənpərvərlik mövzusunda şerlər səslənib.

Şəhidin atası isə oğlu Sahil və onun timsalında Vətən yolunda canından keçən bütün Azərbaycan övladları ilə iftixar keçirtdiyini deyib, tədbirin təşkilatçılarına və iştirakçılara, şəhid ailələrinə göstərilən diqqət və qayğıya görə ölkə rəhbərinə minnətdarlığını bildirib.

Şəhidin məzarına baş çəkən ziyarətçilər xatirəsinə ehtiram əlaməti olaraq üzərinə gül dəstələri düzüblər.

Zəfər ORUCOĞLU,

Azərbaycan Jurnalistlər Birliyinin üzvü

Hürriyyət.- 2024.- 9 aprel, №13.- S.7.