Vətənlə bir vuran qəlb sahibi

İkinci Qarabağ müharibəsi Mirlətif Mirislam oğlu Ağayev kimi qeyrətli igidlərin qanı bahasına zəfərimizlə bitdi. Cəlilabad rayonunun Göytəpə şəhərində boya-başa çatan Mirlətif ömrünü canından artıq sevdiyi Vətəni üçün yaşadı, 30 yaşında əbədiyyətə qovuşdu. Ağır müharibə meydanında qəhrəmanlığı ilə tarix yazan Cəlilabad elinin igid oğlu cismən aramızdan getsə də, iftixar mənbəyimizə, qürur yerimizə döndü. İndi o, Günəş ömrü yaşamaqla daha əzəmətli görünür. İnsanın həyatda ləyaqətlə, şərəflə yaşaması üçün bütün dəyərləri bu əzəmətdən görüb-götürmək olur.

Qəlb dünyası sevdalı olan Mirlətif Ağayev 2008-ci ildə orta məktəbi bitirib. Həyat amali insanlara daha çox fayda vermək, qəlb sevindirmək olan yeniyetmə elə həmin il Tibb Universitetinə daxil olub, 2013-cü ildə ali təhsilini mükəmməl şəkildə başa vurub. Vətən məhəbbəti Mirlətifi ordu sıralarına aparıb. Cəbhə bölgəsində zabit kimi doğma Azərbaycana ləyaqətlə xidmət edib. Öz şəxsi nümunəsi ilə əsgərlərin qəlbində də Vətənə məhəbbət, cəsurluq, Qarabağımızı işğal etmiş yağıya nifrət hisslərini aşılayıb. Vətən eşqli zabit 2015-ci ildə ehtiyata buraxılıb.

Doğma elində Mirlətif əynində ağ xalatı görəndə qürur hissi keçirdib. Xəstələrinə həssas, qayğıkeş münasibət bəsləyib. Onlara ikinci həyat bəxş edəndə dünyalar qədər sevinib. Gözəl həkim, ləyaqətli, vicdanlı, təmiz oğul olaraq el-obada hamının hörmətini qazanıb. Bütün bunlara baxmayaraq Mir lətf həmişə düşmən tapdağında qalan Qarabağımızın taleyini düşünüb və Vətən çağıracağı, işğal olunmuş ərazilərin hərbi yolla azad olunacağı təqdirdə hər an ön sıralarda yer almağa, düşmənə qarşı son nəfəsinə qədər döyüşməyə hazır durub.

İkinci Qarabağ müharibəsi başlanan günü Azərbaycan Ordusunun leytenantı Mirlətif Ağayev Vətəni hər şeydan üstün bilməklə savaş meydanına girib. Cəbrayılın və Qubadlının azadlığı uğrunda gedən döyüşlərdə yağıya ağır zərbələr vurmaqla yanaşı, yaralanan hərbçilərə yerindəcə yardım edib, onlara ikinci həyat verib. 247 yaralı əsgəri, 20 şəhidi döyüş meydanından çıxarıb. Özü isə oktyabrın 26-da Qubadlı döyüşləri zamanı qəhrəmancasına şəhid olub. Noyabr ayının 7-də ata yurdu olan Ləkin kəndində torpağa tapşırılıb. Müharibə meydanında göstərdiyi şəxsi şücaətinə görə ölümündən sonra “İgidliyə görə”, “Vətən uğrunda”, Cəbrayılın və Qubadlının azadlığına görə medallarına layiq görülüb.

Bəli, deyirlər ki, hər bir insanın tarixi dəyəri onun öz Vətəni, xalqı üçün gördükləri ilə ölçülür. Mirlətif dünyadan tez getsə də, göstərdiyi qəhrəmanlıqla Azərbaycanın yeni, şərəfli tarixinə daxil oldu.

Zəfər ORUCOĞLU

Azərbaycan Jurnalistlər Birliyinin üzvü

Hürriyyət.- 2025.- 27 may, №19.- S.12.