ARDNŞ beynəlxalq standartlara, müasir tələblərə cavab verən modern və güclü bir quruma çevrilir

Şirkət 2009-cu ildə istehsala yönəltdiyi sərmayələrin həcminə görə beynəlxalq miqyasda liderlik qazanıb

“Əsrin müqaviləsi”nin imzalanmasından ötən dövr ərzində Azərbaycan yeni neft strategiyasının uğurla həyata keçirilməsi nəticəsində mühüm nailiyyətlərə imza atıb. Hasil olunan neftin və qazın dünya bazarlarına ixrac edilməsi üçün şaxələndirilmiş neft-qaz kəmərləri sistemi yaradılmışdır.

Bu gün Azərbaycan nefti və qazı Bakı-Tbilisi-Ceyhan, Bakı-Novorossiysk, Bakı-Supsa kəmərləri, təbii qazı isə Bakı-Tbilisi-Ərzurum marşrutu üzrə Cənubi Qafqaz əsas ixrac qaz kəməri ilə dünyanın bir çox ölkələrinə nəql olunur.

Neft strategiyasının uğurla həyata keçirilməsinin nəticəsidir ki, artıq Azərbaycan yalnız investisiya qoyulan deyil, eyni zamanda investisiya qoyan ölkə kimi də tanınır. Bir məqamı xüsusi qeyd etməliyik ki, iqtisadiyyatın inkişafına mühüm töhfələr verən Azərbaycan Dövlət Neft Şirkəti müxtəlif ölkələrdə investisiya layihələri həyata keçirir. Məlum olduğu kimi, dövlət başçısı İlham Əliyev ARDNŞ qarşısında beynəlxalq standartlara, müasir tələblərə cavab verən modern və güclü bir quruma çevrilmək vəzifəsi qoymuşdur. Bu isə ilk növbədə Şirkətin strukturunun beynəlxalq standartlara uyğunlaşdırılmasını, idarəetmənin effektivliyinin artırılmasını nəzərdə tutur. Məlum olduğu kimi, ARDNŞ beynəlxalq enerji bazarlarına yaxınlaşmaq məqsədi ilə 2007-ci ildən xarici investisiya layihələri həyata keçirmək xətti götürmüş və qısa müddətdə nəzərəçarpacaq irəliləyişlərə nail olmuşdur.

Həm region ölkələrində, həm Avropanın mərkəzində, hətta Uzaq Şərqdə ARDNŞ-in nümayəndəlikləri açılmışdır. Bu proses davam etməkdədir. Şirkətin Türkiyə və Gürcüstandan başqa Rumıniyada, Böyük Britaniyada, İsveçrədə, İranda, Ukraynada, Avstriyada, Qazaxıstanda nümayəndəlikləri təsis edilib. Bu isə son nəticədə Azərbaycanın neft-qaz gəlirlərinin daha da artmasına güclü təkan verəcəkdir.

Yeni texnologiyaların tətbiqi nəticəsində, ARDNŞ-in mövcud resursları imkan verir ki, şirkətin yeni strukturları müstəqil olaraq işləsin. Hazırda Dövlət Neft Şirkəti dənizdə və quruda yerləşən və ölkənin yanacaq-enerji təhlükəsizliyinin təminatında mühüm rol oynayan 58 yataqda müstəqil şəkildə uğurla işləyir.

Yeni neft strategiyası müxtəlif sahələrdə köklü islahatların aparılmasına, misilsiz nailiyyətlərin qazanılmasına möhkəm zəmin yaratmışdır. Ulu öndər Heydər Əliyevin müəyyənləşdirdiyi inkişaf və tərəqqi konsepsiyasının Prezident İlham Əliyev tərəfindən uğurla davam etdirilməsi bu gün Azərbaycan dövlətinin nailiyyətlərinin əsasını təşkil edir.

Neftdən əldə olunan gəlirlər neft sənayesinin modernizasiyası ilə yanaşı, digər istehsal sahələrinin inkişafına, sosial infrastrukturun bərpasına da ciddi təsir göstərir. Bu isə ulu öndər Heydər Əliyevin “Neft digər istehsal sahələrinin inkişafına təkan verməlidir” ideyasının gerçəkləşməsi deməkdir. Ölkədə gedən müsbət proseslər, sürətli iqtisadi artım, sosial yüksəliş Azərbaycan dövlətçiliyini daha da möhkəmləndirir. Bu baxımdan iqtisadiyyatın inkişafına mühüm töhfələr verən Azərbaycan Dövlət Neft Şirkəti ölkənin sosial həyatında fəal iştirak edir.

Bu yaxınlarda Bakıda müasir standartlara cavab verən gəmiqayırma zavodunun təməlqoyma mərasimində çıxış edən Prezident İlham Əliyev zavodun tikintisinin beynəlxalq əməkdaşlığın nəticəsi olduğunu və bu işdə Azərbaycan Dövlət Neft Şirkətinin böyük rolu olduğunu vurğuladı: “Zavodun tikintisi, ümumiyyətlə Azərbaycanda aparılan iqtisadi siyasətin nəticəsidir. Qeyri-neft sektorunun inkişafı bizim üçün prioritet məna daşıyır. Xarici şirkətlərlə əməkdaşlığımız uğurla davam edir. Bu əməkdaşlığın güclənməsində Dövlət Neft Şirkətinin böyük rolu vardır. Çünki bizim böyük xarici şirkətlərlə əməkdaşlığımız məhz neft sənayesindən başlamışdır və bu gün bu əməkdaşlıq başqa sahələri də əhatə edir”.

Dövlət başçısı şirkətin fəaliyyətini yüksək qiymətləndirərək çıxışında xüsusi vurğuladı ki, bizim enerji təhlükəsizliyimizin mənbəyi Dövlət Neft Şirkətinin hasil etdiyi təbii resurslardır. Əlbəttə ki, bu resurslar ondan sonra elektrik enerjisinə çevrilir, ondan sonra qaz təminatı təmin olunur. Ancaq ilkin mənbə Neft Şirkətinin fəaliyyətidir.

Neft gəlirlərindən səmərəli istifadənin digər sahələrin inkişafına geniş imkanlar açdığını bildirən dövlət başçısı İlham Əliyev ARDNŞ-in bu gün dünyanın aparıcı enerji şirkətləri sırasına daxil olduğunu önə çəkdi: “Azərbaycan Dövlət Neft Şirkəti artıq beynəlxalq şirkətə çevrilibdir. Şirkətin çox böyük potensialı var, böyük infrastruktura malikdir. Bu gün dünyanın aparıcı enerji şirkətləri sırasına daxil olmuş Azərbaycan Dövlət Neft Şirkəti əminəm ki, gələcəkdə də öz imkanlarını genişləndirəcək, ölkəmiz üçün lazım olan yeni layihələri uğurla icra edəcəkdir”.

Sevinc Azadi

İki sahil.- 2010.- 3 aprel.- S.7.