ARDNŞ rəhbərliyi Hacıqabul və Cəlilabad rayonlarında olmuşdur

Aprelin 10-da ARDNŞ prezidenti Rövnəq Abdullayev başda olmaqla Şirkət rəhbərliyinin nümayəndələri Hacıqabul və Cəlilabad rayonlarında olmuşlar. Əvvəlcə, Hacıqabul rayonuna gələn ARDNŞ rəhbərləri yeni qurulan kompressor stansiyasına baş çəkmiş, burada aparılan yenidənqurma işləri ilə tanış olmuşlar. Qeyd edilmişdir ki, yeraltı qazsaxlama anbarlarına təbii qazın vurulmasında Hacıqabul Kompressor Stansiyasının əhəmiyyəti nəzərə alınaraq, burada yenidənqurma və təmir-bərpa işləri aparılır. Sonra Hacıqabul Rayon İcra Hakimiyyətinin binasında müşavirə keçirilmişdir. “Azəriqaz” İB-nin baş direktoru Əkbər Hacıyev və onun tikinti məsələləri üzrə müavini Asif Ağayev Hacıqabul şəhəri və ətraf kəndlərdə əhalinin qaz təminatının yaxşılaşdırılması istiqamətində görülmüş işlər və nəzərdə tutulan tədbirlər barədə ARDNŞ prezidentinə məruzə etmişlər. “Azəriqaz” təmsilçiləri həmçinin, “Azərbaycan Respublikası Dövlət Neft Şirkətinin “Azəriqaz” İstehsalat Birliyi üzrə qaz təsərrüfatının 2010-2013-cü illərə dair İnkişaf Proqramı”na uyğun olaraq Hacıqabul rayonunun qazlaşdırılması istiqamətində görülən işlər barədə məlumat vermişlər. Qeyd olunmuşdur ki, 2009-cu ilin sentyabrında rayonda baş vermiş təbii fəlakət - sel və daşqınlar mövcud qaz xətlərinin yararsız hala düşməsinə, əhaliyə təbii qazın verilişinin dayandırılmasına səbəb olmuşdur. Hazırda ARDNŞ tərəfindən rayonun qaz təchizatı sisteminin tam şəkildə yenidən qurulması işləri həyata keçirilir. Hacıqabul rayonunun yenidən qazlaşdırılması istiqamətində aparılan intensiv işlər rayonda fasiləsiz və keyfiyyətli qaz təminatına imkan yaradacaqdır. ARDNŞ prezidenti Rövnəq Abdullayev görülən işləri qənaətbəxş qiymətləndirmiş, bu ilin sonuna kimi Hacıqabul şəhərində və ətraf 12 kənddə qaz təchizatı sisteminin yenidən qurulmasının başa çatdırılmasının zəruriliyini vurğulamış, bu məqsədlə “Azəriqaz” İB qarşısında bir sıra həllivacib vəzifələr qoymuşdur. Hacıqabul rayon İcra Hakimiyyətinin başçısı Əhməd Muxtarov öz çıxışında son zamanlar ölkə əhalisinin təbii qaza olan tələbatının tam ödənilməsi, “2009-2013-cü illərdə regionların sosial-iqtisadi inkişafı üzrə Dövlət Proqramı” çərçivəsində respublikanın hər yerində olduğu kimi Hacıqabul rayonunda da qaz şəbəkəsinin yenidən qurulması istiqamətində ARDNŞ tərəfindən həyata keçirilən tədbirləri yüksək qiymətləndirmiş, görülmüş işlərə görə Şirkət rəhbərliyinə minnətdarlığını bildirmişdir. Daha sonra Cəlilabad rayonuna gələn ARDNŞ prezidenti Rövnəq Abdullayev burada da qazlaşdırma işlərin gedişi ilə tanış olmuş müvafiq qurumlara konkret tapşırıqlar vermişdir. Şirkət rəhbərliyi eyni zamanda rayonda inşa olunan regional müalicə-diaqnostika mərkəzində olmuş, burada görülən işlərlə maraqlanmışlar. ARDNŞ-in vitse-prezidenti Qorxmaz Hüseynov mərkəz haqqında ətraflı məlumat vermiş, tikinti işlərinin qrafikə uyğun aparıldığını və nəzərdə tutulan vaxtda təhvil veriləcəyini diqqətə çatdırmışdır. O qeyd etmişdir ki, Azərbaycan Respublikasının Prezidenti cənab İlham Əliyevin şəxsi nəzarəti və bilavasitə rəhbərliyi altında ‘’Regionların sosial-iqtisadi inkişafı üzrə Dövlət Proqramı’’ çərçivəsində ARDNŞ-in maliyyə vəsaiti hesabına inşa olunan, müasir tələblərə cavab verən, dünya standartlarına uyğun bu səhiyyə ocağı təkcə Cəlilabad rayonunun deyil, eləcə də ətraf rayonların əhalisinə yüksək səviyyəli tibbi xidmət göstərəcəkdir.

Nail Rəhimzadə

İki sahil.- 2010.- 13 aprel.- S. 4.