HESABAT KONSERTİ BAŞ TUTDU

Naxçıvan Dövlət Universitetində incəsənət fakültəsinin “Xalq çalğı alətləri” kafedrasının növbəti hesabat konserti keçirildi.

Ali məktəbin çoxsaylı ziyalılarının iştirak etdiyi musiqili tədbirin açılışı Azərbaycan bəstəkarı Süleyman Əsgərovun “Vətənimdir” adlı musiqi əsəri ilə oldu.

Sonra məşhur bəstəkarlar Vasif Adıgözəlovun “Bakı”, Fikrət Əmirovun “Kor Ərəbin”, Üzeyir Hacıbəyovun “Leyli və Məcnun” operasından parçalar ifa olundu, həmçinin bir sıra klassik xarici bəstəkarların əsərlərinə də müraciət olundu. Ümumilikdə konsert Azərbaycanın klassik musiqi əsərlərinin üstünlüyü ilə keçdi. Bundan əlavə konsertdə saz havaları, “Dilkeş təsnifi”, “Şur çələngi”, kamança, tar, saz və udda digər bir-birindən maraqlı musiqi nömrələri də səsləndi. Konsert proqramında universitet müəllimləri, Naxçıvan MR əməkdar artistləri Gülyanaq Fərzəliyeva və Mübariz Əsgərovun peşəkar ifaları da yaddaqalan oldu.

Sonda fakültənin “Musiqi təlimi” kafedrasının müdiri Şəmsəddin Qasımovun, “Bəstəkarlıq” kafedrasının müdiri Kamal Əhmədovun və başqalarının ifalarla bağlı fikirləri dinlənildi.

Rektor, akademik İsa Həbibbəyli “Xalq çalğı alətləri” kafedrasının fəaliyyətində nəzərəçarpacaq irəliləyişlərin olduğunu sevinc hissi ilə vurğuladı, bütövlükdə növbəti hesabat konsertini baş tutmuş hesab etdi. Natiq fakültənin tələbə və müəllimlərinin, xüsusilə də bu işdə böyük əməyi keçən kafedra müdiri Aynurə Quliyevanın işini yüksək qiymətləndirərək heyət üzvlərinə sənət uğurları dilədi.

Nərmin Cəfərova

İki sahil.- 2010.- 16 aprel.- S. 16.