HEYDƏR ƏLİYEV YOLU

SABAHA İNAMLA APARAN YOL

Ulu öndərimiz Heydər Əliyev müstəqil Azərbaycan dövlətinin təməlini hələ 1969-cu ildə respublikaya birinci rəhbərlik dövründən qoymağa başlamışdı.

Sovet imperiyasının tərkibində olduğu müddətdə respublikada milli hərbi kadrların hazırlığı məqsədilə hərbi məktəblərin açılması, ölkəmiz üçün zəruri sahələr üzrə peşəkar mütəxəssislərin hazırlanması üçün keçmiş SSRİ-nin ali məktəblərinə tələbələrin göndərilməsi, Konstitusiyada Azərbaycan dilinin dövlət dili kimi təsbit olunması məhz ulu öndərimizin adı ilə bağlıdır.

Ölkənin iqtisadi potensialından səmərəli istifadə üçün qurulan yüzlərlə zavod, fabrik və emal sexləri, bu dövrdə formalaşdırılan müstəqil energetika sistemi, vətəndaşlarımızın ixtiyarına verilən yeni mənzillər, təhsil, səhiyyə, mədəniyyət obyektləri, milli intellektin inkişafı, milli mədəni dəyərlərimizin qorunub saxlanması və yüksəlişi də ulu öndərimizin mənsub olduğu xalqa xoş töhfələridir.

Ulu öndərimiz Heydər Əliyevin rəhbərliyi ilə dönmədən və ardıcıl şəkildə həyata keçirilən islahatlar nəticəsində Azərbaycanda müasir, sivil, azad iqtisadi sistemin əsası qoyulmuş, bunun sayəsində ölkə sənayesinə xarici investisiya qoyuluşu xeyli artmış, inşaat işlərinin həcmi və səviyyəsi yüksəlmiş, infrastruktur dəyişikliklərinin miqyası nəzərəçarpacaq dərəcədə genişlənmişdir.

Həyata keçirilən siyasət çox qısa bir zamanda iqtisadiyyatda əsaslı keyfiyyət dəyişikliklərinə səbəb olmuşdur. 1996-cı ildən etibarən ölkəmizdə inflyasiyanın səviyyəsi sabit qalmış, dövlət büdcəsi bir neçə dəfə artmış, əmək haqlarının, pensiya və müavinətlərin artırılması, əhalinin sosial müdafiəsi istiqamətində aparılan ardıcıl siyasət ölkədə həyat səviyyəsinin əhəmiyyətli dərəcədə yüksəlməsini təmin etmişdir. Təkcə bir faktı diqqətə çatdıraq ki, ümummilli lider Heydər Əliyevin müstəqil Azərbaycan Respublikasına rəhbərliyi dövründə ölkəmizdə orta aylıq əməkhaqqı və pensiyaların məbləği 6 dəfədən də çox artmışdır.

Heydər Əliyevin Vətən və xalq qarşısında göstərdiyi böyük xidmətlərdən biri də milli dövlətçiliyimizin möhkəmləndirilməsi üçün çox əhəmiyyətli olan azərbaycançılıq ideyasının, milli birlik meyillərinin daha da dərinləşdirilməsi sahəsində gördüyü işlər olmuşdur. Azərbaycan Respublikası Prezidentinin “Dövlət dilinin tətbiqi işinin təkmilləşdirilməsi haqqında” 2001-ci il 18 iyun tarixli fərmanı, dahi şairimiz Məhəmməd Füzulinin 500, “Dədə Qorqud” eposunun 1300 illiyinin dünya miqyasında təntənə ilə qeyd edilməsi, “Azərbaycanda dövlət dili haqqında” Azərbaycan Respublikası qanununun qəbulu, ümummilli liderimizin ölkəmizdə elmin, təhsilin inkişafına yaratmış olduğu şərait, Onun elm, mədəniyyət, incəsənət xadimlərinə yüksək diqqət və qayğısı bunun ifadəsidir.

2001-ci il noyabrın 9-10-da Bakıda Dünya Azərbaycanlılarının I qurultayının keçirilməsi, ümummilli lider Heydər Əliyevin fərmanı ilə Xarici ölkələrdə Yaşayan Azərbaycanlılarla İş üzrə Dövlət Komitəsinin yaradılması da milli həmrəyliyə və yekdilliyə nail olmaq amalının Azərbaycanın dövlət siyasətinin tərkib hissəsinə çevrildiyini nümayiş etdirmiş, həyata keçirilən bütün bu kimi tədbirlər həm sayına, həm də milli mənəvi, intellektual potensialına görə dünyanın böyük millətləri ilə bir sırada dayanan xalqımızın mütəşəkkil qüvvə kimi formalaşmasına güclü təkan vermişdir.

Qədim Hindistanda belə bir məsəl xeyli məşhurdur: “Ənənə əgər davam edərsə, ənənəyə çevrilir”. Azərbaycanda müstəqil dövlətçilik ənənələrini formalaşdıran, müstəqil Azərbaycan dövlətini qurub-yaradan Heydər Əliyevin Azərbaycan xalqı qarşısındakı ən böyük xidməti də elə bundan ibarətdir, ki, ulu öndərimiz müəllifi olduğu ənənələrin davamlılığını təmin etmiş, ümummilli liderin dərin zəkası hesabına Azərbaycanın gələcək uğurlarına təminat yaradılmışdır

Tarixin konkret məqamında ümummilli lider Heydər Əliyev siyasi kursunun davam etdirilməsinin labüdlüyünü şərtləndirən amillər isə heç şübhəsiz ki, bu kursun bütünlüklə Azərbaycanın dövlətçilik maraqlarının həyata keçirilməsinə yönəlməsindən ibarət idi. Belə bir zamanda ulu öndərimiz Heydər Əliyevin müəyyənləşdirmiş olduğu siyasi kursun, o dahi dövlət xadiminin müəyyənləşdirdiyi milli dövlətçilik konsepsiyasının varisliyinin təmin olunması zərurəti həmin konsepsiyanın uğurlarını öz həyatında yaşayan və ulu öndərimizin cismani yoxluğu zamanı kursu həyata keçirə biləcək liderin yoxluğu səbəbindən bu xəttin yarıda qırılması ehtimalını çox düzgün dəyərləndirən Azərbaycan ictimaiyyətinin sosial sifarişi kimi ortaya çıxmışdır.

Ulu öndərimizin müəllifi olduğu milli dövlətçilik konsepsiyasını davam etdirə biləcək qüdrət sahibinin axtarışında olan ictimai rəyin birmənalı olaraq İlham Əliyev fenomeni üzərində qərar tutması isə onun Heydər Əliyev siyasi kursunun müəyyənləşdirdiyi prioritetlərin varisliyini təmin edə biləcək alternativsiz şəxs olmasından irəli gəlirdi.

Eyni mövqeyə, statusa iddia edən opponentlərindən fərqli olaraq İlham Əliyevin bu siyasi kursa dair baxışlar sisteminin institutlaşmış xarakter daşıması, bu baxışların taktiki, strateji və perspektiv rakursunda Heydər Əliyev siyasi kursunun ehtiva etdiyi prioritetlərin dayanması, ən əsası isə ulu öndərimizin siyasət məktəbində yetişmiş, peşəkar diplomat, şəffaf keçmişə, müasir lider imicinə malik İlham Əliyevin bu konsepsiyaya dair baxışlarının təkcə nəzəri səciyyə daşımadan həm də əməli fəaliyyətdə dəfələrlə öz təsdiqini tapması İlham Əliyev fenomeninə cəlbedicilik qazandıran başlıca cəhətlərdən idi.

Bütün bu keyfiyyətlər İlham Əliyevi, həmçinin beynəlxalq maraq obyektinə çevirmiş, onun xarici siyasətin bütün sahələrində, o cümlədən cəmiyyət həyatı üçün son dərəcə mühüm əhəmiyyətə malik bir sıra sahələrdə üzərinə götürdüyü missiyanı uğurla həyata keçirməsi, siyasi proseslərə yanaşma tərzi xüsusilə rasional analitik təfəkkürə dayaqlanan çıxışlarının bir çox məqamları Azərbaycan cəmiyyətində, eləcə də beynəlxalq ictimaiyyətdə böyük maraq doğururdu. Cənab İlham Əliyev 90-cı illərin ortalarından etibarən Azərbaycan Dövlət Neft Şirkətinin birinci vitse-prezidenti, eləcə də Milli Olimpiya Komitəsinin prezidenti kimi geniş fəaliyyəti ilə yanaşı, ölkəmizin Avropa Şurası Parlament Assambleyasındakı nümayəndə heyətinin rəhbəri statusunda da Azərbaycanın milli maraqlarının təmin olunması ilə bağlı mühüm işlər görmüşdür. Cənab İlham Əliyevin fəaliyyəti nəticəsində Azərbaycan nümayəndə heyəti Dağlıq Qarabağ məsələsinin Avropa Şurasında müzakirəsi zamanı böyük uğurlar əldə etmiş, İlham Əliyev AŞPA-nın tribunasından bu münaqişəni ümumilikdə Avropanı təhdid edən problem kimi gündəmə gətirmiş, nümayəndə heyətimiz əsir və girovların qaytarılması, Dağlıq Qarabağda narkotik maddələrin yetişdirilməsi və bundan əldə edilən gəlirlərin terrorçuluq fəaliyyətinə yönəldilməsi, Dağlıq Qarabağda tarixi abidələrin, mədəniyyət abidələrinin dağıdılmasına dair Azərbaycan nümayəndə heyəti Avropa Şurasında çoxsaylı sənədlər yaymışdır. Azərbaycan nümayəndə heyətinə rəhbərliyi dövründə AŞPA-nın vitse-prezidenti kimi mühüm posta seçilən cənab İlham Əliyevin ardıcıl səyləri nəticəsində Avropa Şurası Ermənistanın Azərbaycana qarşı işğalçı siyasətini tanımış, Ermənistanı işğalçı dövlət kimi qəbul etmişdir.

İstər ARDNŞ-in birinci vitse-prezidenti, istər Milli Olimpiya Komitəsinin prezidenti, istərsə də Milli Məclisin deputatı və Azərbaycanın AŞPA-dakı nümayəndə heyətinin rəhbəri kimi cənab İlham Əliyevin müstəqil dövlətimizə qazandırdığı uğurlar onun Azərbaycan və dünya siyasətində özünütəsdiqi idi. Ümummilli lider Heydər Əliyevin zəngin dövlətçilik ənənələrinin ən layiqli davamçısı olduğunu əməli addımları ilə sübuta yetirən İlham Əliyev 90-cı illərin sonlarına doğru artıq geopolitik məkanda siyasi-iqtisadi proseslərin istiqamətini müəyyənləşdirən, ona təsir göstərən ciddi fenomen kimi çıxış edir, bütün bunlarla yanaşı Heydər Əliyev siyasi kursunun layiqli davamçısı statusu onun siyasi portretini zənginləşdirən ştrix kimi nəzərə çarpırdı. Ulu öndərimizin müəyyənləşdirmiş olduğu yeni neft strategiyası çərçivəsində dünyanın transmilli korporasiyaları ilə imzalanmış müqavilələrin Azərbaycanın milli maraqlarına cavab verməsi üçün o bütün səylərini ortaya qoyaraq bu prosesə öz töhfəsini vermiş, eyni zamanda Milli Olimpiya Komitəsinin prezidenti kimi onun ölkəmizdə idmanın kütləviliyini təmin etmək məqsədilə həyata keçirdiyi müvafiq tədbirlər qısa zaman ərzində bəhrəsini vermişdir. Azərbaycan idmançılarının mötəbər yarışlarda qazandıqları qələbələr mütəmadi xarakter almış, olimpiya hərəkatında ölkəmizin fəallığı artmış, Azərbaycanın idman ölkəsinə çevrilməsi, respublikamızın bütün regionlarında olimpiya idman komplekslərinin tikilərək vətəndaşların ixtiyarına verilməsi prosesi geniş vüsət almışdır. Azərbaycan vətəndaşları İlham Əliyevin deputatlıq fəaliyyəti dövrünü də xoş duyğularla xatırlayırlar. Hələ birinci çağırış Milli Məclisin səlahiyyət müddəti dövründə onun parlamentdə təmsil etdiyi Qaradağ rayonu ərazisində tikdirmiş olduğu yaşayış binaları, çoxsaylı infrastruktur obyektləri cənab İlham Əliyevin hələ o illərdə ona etimad göstərmiş insanlara ərməğanıdır. Məhz bu dövrdə Qaradağ rayonu inkişaf yoluna qədəm qoymuş, rayonun sosial-iqtisadi infrastrukturunda dönüş, tərəqqi dövrü başlanmışdır. Cənab İlham Əliyevin Qaradağ rayonunun sosial-iqtisadi inkişafına kömək məqsədilə yaratdığı “Qaradağ rayonunun sosial-iqtisadi inkişafına yardım fondu”nun köməyi ilə rayonda bir sıra sosial problemlər öz həllini tapmış, sosial və mədəni-məişət obyektləri tikilərək istifadəyə verilmişdir.

2000-ci ildə ikinci çağırış Milli Məclisə seçkilər dövründə Yeni Azərbaycan Partiyasının proporsional siyahısına rəhbərlik edən cənab İlham Əliyevin qazandığı yüksək nailiyyət onun vətəndaşlar arasında ölkəmizin sabahını təmin edəcək alternativsiz lider kimi qəbul olunması həqiqətinin təsdiqinə çevrildi. 2003-cü ilin 4 avqustunda cənab İlham Əliyevin Azərbaycan Respublikası Milli Məclisinin yekdil razılığı ilə ölkənin Baş naziri vəzifəsinə seçilməsi də əslində xalqın ona verdiyi dəstəyin ifadəsi idi ki, 2003-cü ilin 15 oktyabr prezident seçkisi günü bu dəstək ölkənin siyasi həyatında daha aydın şəkildə öz əksini tapmışdır.

“O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm”-bu iqtibas ulu öndərimiz Heydər Əliyevin 2003-cü ilin prezident seçkiləri ərəfəsində öz namizədliyini İlham Əliyevin xeyrinə geri götürməsi ilə bağlı Azərbaycan xalqına müraciətindən seçilmişdir. Əgər cənab İlham Əliyevin xalqımızın siyasi iradəsi əsasında Azərbaycan Respublikasının Prezidenti seçildiyi 2003-cü ilin 15 oktyabr günündən keçən müddət ərzində Azərbaycan həyatında baş verən ictimai-siyasi proseslərə, qazanılan uğurlara diqqət yönəltsək, ümummilli liderin böyük uzaqgörənliklə söylədiyi bu fikirlərin həyatda nə dərəcədə özünü doğrultduğuna şahid ola bilərik. Bu gün Azərbaycan Prezidentinin həyata keçirdiyi siyasət hesabına ölkəmizin əldə etmiş olduğu uğurlar əslində ulu öndərimizin bir vaxtlar ideallarında yaşatdığı və onların həyata keçirilməsi üçün zəruri əsaslar hazırladığı ülvi arzulardır.

Prezident İlham Əliyevin Azərbaycana rəhbərliyi dövründə cərəyan edən proseslər isə başqa məqamlardan xəbər verir.

Mövcud reallıqları operativ və obyektiv şəkildə qiymətləndirməyi bacaran, cəmiyyətin sosial sifarişinə uyğun praqmatik qərarlar qəbul edən Prezident İlham Əliyevin öz şəxsiyyəti ilə formalaşdırdığı siyasi fenomenin cəmiyyətimizin simpatik göstəricisinə çevrilməsi ilk növbədə təbii-siyasi amillərdən qaynaqlanan reallıqdır. Azərbaycan Prezidenti öz simasında Qərb standartlarını kübar rəftarın, rasional düşüncə tərzinin, sarsılmaz vətənpərvərliyin praqmatizmin milli mentalitetimizlə uğurlu sintezini yaratmış, bu keyfiyyətləri ilə Azərbaycan siyasətinə yeni nəfəs, siyasi ruh və müasirlik gətirmişdir.

Bir sıra politoloqlar haqlı olaraq qeyd edirlər ki, onun siyasətçi kimi formalaşmasına təsir göstərən amillər sırasında siyasi romantizm, psevdovətənpərvərlik, arxaik siyasi elementlər yoxdur. Prezident İlham Əliyevin dövlətə rəhbərliyinin ilk aylarından etibarən Azərbaycanda və ümumilikdə bütün dünyada cərəyan edən proseslərin avanqardına çevrilməsi cəmiyyətin siyasi tələbatlar sisteminin məntiqi sonluğu nəticəsində ortaya çıxan obyektiv bir prosesin yekunudur. Bütün bunlarla yanaşı, İlham Əliyev fenomenini zəruri ictimai-siyasi hadisəyə çevirən amillər sırasında siyasi prinsiplərə sadiqlik, Heydər Əliyev siyasi kursuna bağlılıq və sədaqət, intellektual imkanlar və siyasi istedad, cəmiyyət üçün açıq siyasətin olması və fəaliyyətin şəffaflığı, tolerantlıq, müsbət şəxsi və siyasi keyfiyyətlər və s. bu kimi məqamlar xüsusilə diqqəti cəlb edir.

Prezident İlham Əliyevin kadr siyasətində də maraqlı məqamlar diqqəti çəkir. Əgər ümummilli lider Heydər Əliyevin idarəçilik prinsiplərində kadrlara münasibətdə dövrün çətin və mürəkkəb şəraitindən irəli gələrək sədaqət amili ön planda dayanırdısa, Prezident İlham Əliyevin idarəçilik üslubunda kadrın peşəkarlığı, vəzifə məsuliyyəti, xalqa qüsursuz xidməti daha mühüm amil kimi aktuallıq kəsb edir. Çunki ulu öndərimiz uzun illər ərzində elə bir dövlətçilik təsisatı formalaşdırmışdır ki, müasir dövrdə hansısa kadr öz liderinə xəyanəti, pozucu fəaliyyəti ilə bu təsisatın fəaliyyətinə əngəl törədə, öz çirkin məqsədlərini həyata keçirə bilməz. Bu zaman sistem özü onu dərhal sıralarından kənarlaşdıracaq, onun səlahiyyətləri saf əqidəyə malik digər şəxsə həvalə ediləcəkdir. Bununla belə Prezident İlham Əliyevin həyata keçirdiyi siyasi kursa sadiqlik amili yenə də aktualdır. Bu sadiqlik anlayışı isə daha çox hər hansı kadrın müasir təfəkkürə malik olması, ona tapşırılmış sahədə vicdanla fəaliyyət göstərməsi, xalqın problemlərinə həssas münasibəti və s. meyarlar əsasında müəyyənləşir.

Prezident İlham Əliyev irəli çəkdiyi hər bir kadrın xidmətini onun respublikamızın bütün bölgələrində özünü göstərən sosial-iqtisadi inkişaf prosesinə töhfələri, vahid strategiyaya, vahid kursa sadiqliyi, ən ümdəsi isə vətəndaşlara xidməti əsasında dəyərləndirir. Dövlət rəhbərimizin bu barədə də mövqeyi qətidir: “Tutduğu vəzifədən asılı olmayaraq, hər bir rəhbərin başlıca vəzifəsi xalqa, millətə xidmət etməkdir.”

Ümumiyyətlə, ümummilli lider Heydər Əliyev tərəfindən nəzəri olaraq irəli sürülmüş bütün ideyaların bu gün Prezident İlham Əliyev tərəfindən yaradıcı şəkildə reallığa çevrilməsi Azərbaycan həyatının sevindirici gerçəklikləridir. Müstəqil dövlətimizin memarı və qurucusu Heydər Əliyevin başladığı böyük işlər və taleyüklü məsələləri, planları, gənc dövlətimizin milli mənafeyinə tam uyğun müstəqil daxili və xarici siyasəti Heydər Əliyev siyasi məktəbinin ən layiqli yetirməsi, Azərbaycan Respublikasının Prezidenti cənab İlham Əliyevin rəhbərliyi altında uğurla davam etdirilir. Prezident İlham Əliyev dövlət başçısı kimi fəaliyyətinin ilk günlərindən respublikanın müxtəlif regionlarında seçkiqabağı görüşlərində verdiyi vədlərinə əməl edərək, ölkə iqtisadiyyatının daha sürətlə inkişaf etdirilməsi və əhalinin maddi rifah halının yaxşılaşdırılması istiqamətində çox mühüm tədbirlər həyata keçirmişdir. Dövlət rəhbərinin imzaladığı “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” fərmanı, “Azərbaycan Respublikası regionlarının sosial-iqtisadi inkişafı Dövlət Proqramı” və digər çoxsaylı proqramların icrası ölkəmizin dinamik inkişafını təmin etmişdir. Qısa müddət ərzində bütün respublika boyunca yüz minlərlə iş yeri açılmış, yeni istehsal müəssisələri yaradılmış, regionlarımızın tarazlaşdırılmış inkişafı təmin olunmuşdur. Azərbaycanda daxili siyasi sabitliyin qorunması üçün zəruri əsasların daha da möhkəmləndirilməsi, xarici ölkələr, nüfuzlu beynəlxalq təşkilatlarla münasibətlərin yeni inkişaf müstəvisinə qədəm qoyması da bu dövrün həyatımıza gətirdiyi ən böyük nailiyyətlərdəndir. Azərbaycan vətəndaşlarının mədəni-intellektual səviyyəsinin yüksəlişi üçün məqsədyönlü tədbirlərin həyata keçirilməsi bu dövrün səciyyəvi xüsusiyyətlərindən biri kimi nəzərdən keçirilə bilər.

Dövlət rəhbərinin yürütdüyü məqsədyönlü siyasət hesabına ölkəmizdə işsizlik, yoxsulluq səviyyəsi minimuma yaxınlaşmış, milli iqtisadiyyatımızın neft asılılığından çıxarılması məqsədilə qeyri-neft sektorunun inkişafı istiqamətində əsaslı irəliləyişlər əldə edilmiş, sahibkarlıq fəaliyyəti üçün əlverişli imkanlar yaradılmışdır. Xalqın aztəminatlı hissəsinin sosial müdafiəsinin gücləndirilməsi yönündə görülən işlərsə bu gün daha böyük intensivliklə davam etdirilir və insanlarımızın öz dövlətinə, dövlət rəhbərinə inamını artırır.

İllərdən bəridir ki, Azərbaycan cəmiyyətini narahat edən Ermənistan-Azərbaycan, Dağlıq Qarabağ münaqişəsinin həlli məsələsi də daim Prezident İlham Əliyevin diqqət mərkəzindədir. Ölkəyə rəhbərliyi dövründə bu istiqamətdə böyük əzmkarlıq nümayiş etdirən ölkə başçısının öz qətiyyətli mövqeyindən geri çəkilməməsi beynəlxalq aləmi nəhayət ki, münaqişənin Azərbaycanın ərazi bütövlüyü, beynəlxalq hüququn norma və prinsipləri çərçivəsində həlli zərurəti üzərində düşünməyə məcbur etmişdir. Problemin həllinə səy göstərən nüfuzlu beynəlxalq təşkilatlar, dünyanın fövqəldövlətləri dərk etməyə başlamışlar ki, Azərbaycanı respublikamızın milli maraqlarına zidd hər hansı güzəştə məcbur etmək əsla mümkün deyil. Problemin sülh yolu ilə öz həllini tapmayacağı təqdirdə Prezident İlham Əliyevin xalqın iradəsinə söykənərək digər vasitələrin köməyi ilə Azərbaycanın ərazi bütövlüyünü təmin edəcəyinə isə kimsənin şübhəsi yoxdur. Son illər əldə edilən sosial-iqtisadi nailiyyətlər ölkəmizin müdafiə potensialını da artırmış, ulu öndərimiz Heydər Əliyevin qurduğu milli ordumuz daha da qüdrətlənmişdir. Bu gün Azərbaycanın təkcə hərbi büdcəsinin işğalçı Ermənistanın ümumilikdə dövlət büdcəsinə bərabər olması faktını nəzərə alsaq, əgər Azərbaycan hərbi əməliyyatlara əl atarsa, bu variantın hansı tərəfin qələbəsi ilə tamamlanacağını proqnozlaşqdırmaq o qədər də çətin deyil. Prezident İlham Əliyev dəfələrlə bildirmişdir ki, Qarabağsız Azərbaycan olmayacaqdır. Bu münaqişənin yalnız və yalnız Azərbaycanın ərazi bütövlüyü, habelə beynəlxalq hüqüq norma və prinsipləri çərçivəsində öz həllini tapacağı dövlət rəhbərimizin birmənalı mövqeyidir. Azərbaycan Prezidenti qətiyyətlə bəyan etmişdir: “...Nə 5 ildən sonra, nə 10 ildən sonra, nə 15 ildən sonra, nə də 100 ildən sonra Dağlıq Qarabağ Azərbaycandan ayrılmayacaqdır. Mən nə qədər Prezidentəm, buna yol verməyəcəyəm”.

Bu qətiyyət təbii ki, xalqın iradəsindən, əldə edilmiş sosial-iqtisadi nailiyyətlərin dövlətimiz üçün yaratdığı imkanlardan, Azərbaycanın beynəlxalq aləmdə ildən-ilə daha da güclənməkdə olan mövqeyindən, ən əsası isə cəmiyyətimizdəki mütəşəkkillikdən irəli gəlir. Prezident İlham Əliyevin ölkəmizə rəhbərliyi dövründə Azərbaycanda vətəndaş cəmiyyəti quruculuğu daha ardıcıl xarakter daşımağa başlamış, milli həmrəylik əldə olunmuşdur. Ümummilli maraqlara uyğun məsələlərlə bağlı ölkə daxilindəki siyasi qüvvələr arasında normal dialoqun alınması, Azərbaycan siyasətində radikalizm təzahürlərinin getdikcə öz yerini liberalizmə verməsi xalqımızın son illərdə əldə etdiyi ən ciddi uğurlardan biridir.

Prezident ölkədə demokratik vətəndaş cəmiyyətinin qurulması, söz azadlığının, fikir müxtəlifliyinin təmin olunması üçün öz səylərini əsirgəmir. Prezident İlham Əliyev dövlətə rəhbərlik fəaliyyəti dövründə dünya azərbaycanlılarının həmrəyliyi xəttini kamil elmi-nəzəri konsepsiya səviyyəsinə qaldırmaqla Azərbaycan diasporunu dünyanın əksər ölkələrində proseslərə əhəmiyyətli təsir göstərə biləcək real güc mərkəzinə çevirmişdir. Bu gün planetin hansı qütbündə yaşamasından asılı olmayaraq azərbaycanlı millətinə mənsub hər bir kəs dövlətin ona dəstəyini yaxından hiss edir.

Avroatlantik məkana geniş inteqrasiya yolu tutmuş Azərbaycan öz mədəni və mənəvi nailiyyətləri ilə bu gün sivilizasiyalararası dialoqun fəal iştirakçısıdır. Ulu öndərimiz Heydər Əliyevin müəllifliyi ilə reallaşan Bakı-Tbilisi-Ceyhan əsas-ixrac boru kəməri layihəsi bu gün qlobal proseslərin ən əhəmiyyətli tərəflərindən biri kimi Azərbaycanın dünya üçün əhəmiyyətini daha da artırır. Prezident İlham Əliyevin əzmlə həyata keçirdiyi siyasət Azərbaycanı Cənubi Qafqaz regionunun ən güclü dövlətinə çevirmiş, ölkəmiz iqtisadi inkişaf tempinə görə bütün dünyada rekord göstəricilərə sahib olmuşdur.

Təməli ulu öndərimiz Heydər Əliyev tərəfindən qoyulmuş dövlət quruculuğu prosesinin bu gün Prezident İlham Əliyev tərəfindən daha böyük dinamizm, yüksək əzmkarlıqla davam etdirilməsi vətəndaşlarımızın sabaha inamını artırır. Fərəh doğuran haldır ki, Heydər Əliyev Fondunun Prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyeva da öz əməlləri ilə bu prosesin ən fəal iştirakçılarından biridir. Azərbaycan mədəniyyətinin inkişafı, milli irsimizin bütün dünyada təbliği, bir sıra sosial problemlərin həlli yönündə həyata keçirdiyi layihələrlə o, xalqın qürur mənbəyinə, ümid yerinə çevrilmişdir.

Bəli, bu gün əldə etdiyimiz nailiyyətlərə, uğurlara rəğmən deyə bilərik ki, Tanrı XX əsrdə aramızdan Azərbaycan xalqının ümummilli lideri, müstəqil dövlətçiliyimizin qurucusu Heydər Əliyevi seçdi, Azərbaycan xalqının tarixində şanlı salnamələr açdı. Bu gün Heydər Əliyev dühası həyatının mənasını xalqa və dövlətə təmənnasız xidmətdə görən, bu müqəddəs amal uğrunda ən çətin maneələrə mərdliklə sinə gərən Millət Atası kimi hər bir azərbaycanlının qəlbində yaşayır.

Bəhruz Quliyev

İki sahil.- 2011.-11 dekabr.-14-15.