Xalqın dəstəyini qazanan və dövlətçiliyin qarantı olan lider

Prezident İlham Əliyevin Rusiyada təsis edilmiş “İlin adamı-2009” Qran-pri mükafatına layiq görülməsi ölkənin ictimai-siyasi, iqtisadi və dövlət mənafelərinə xidmət sahəsində əldə etdiyi uğurların təsdiqidir

Prezident İlham Əliyevin son altı ildə hər bir vədini konkret əməli işi ilə təsdiqləməsi, həyata keçirdiyi siyasətin alternativsizliyi dünyanın tanınmış siyasətçilərinin, politoloqlarının, nüfuzlu araşdırmalar mərkəzlərinin açıqlamalarında xüsusi qeyd edilir, ən yüksək mükafatlara layiq görülür. Dövlət başçısının Rusiyada təsis edilmiş “İlin adamı-2009” Qran-pri mükafatına layiq görülməsi də ölkənin ictimai-siyasi, iqtisadi və dövlət mənafelərinə xidmət işində göstərdiyi səylərinin təsdiqidir. Mükafatın təsisçiləri bildirirlər ki, “İlin adamı” öz ölkəsinin inkişafının mühüm meyillərini təcəssüm etdirən, onun gələcəyini formalaşdıran insanlardır.

Mütəmadi olaraq Cənubi Qafqaz ölkələrində əhalinin prezidentlərinə etimadını, həyata keçirilən siyasətin gələcəyinə inamı öyrənmək üçün sorğu keçirən ABŞ-ın nüfuzlu “Gellup” təşkilatının hesabatında da Prezident İlham Əliyev siyasəti ilə liderliyini qoruyur.

ABŞ Prezidentinin milli təhlükəsizlik üzrə keçmiş köməkçisi, məşhur siyasətçi, politoloq, ABŞ-ın Strateji və Beynəlxalq Araşdırmalar Mərkəzinin məsləhətçisi Zbiqnev Bjezinski Prezident İlham Əliyevi regionda mühüm rolu və konstruktiv mövqeyi ilə seçilən ciddi dövlət adamı kimi dəyərləndirir. Verdiyi müsahibəsində “Siz Prezident İlham Əliyevin hakimiyyəti dövrünü necə qiymətləndirirsiniz” sualına cavab olaraq politoloq bildirir: “O, Azərbaycanda bir siyasi davamçı kimi mühüm rol oynayır. Eyni zamanda, beynəlxalq səhnədə də onun rolu artmaqdadır. Başqa ölkələr kimi, Azərbaycan da keçmiş sovet respublikasından müasir dövlətə keçid mərhələsini yaşayır.” Sözsüz ki, ölkələr arasında əməkdaşlıq əlaqələrinin genişlənməsində demokratik inkişafın rolu böyükdür. Z.Bjezinski bununla əlaqədar “Prezidentin təkamül yolu ilə demokratik inkişaf konsepsiyasına münasibətiniz necədir” sualını da cavablandırır. Bildirir ki, bu konsepsiya barədə geniş məlumatı olmasa da, bir vaxtlar demokratiya və milli müstəqillikdən məhrum olan cəmiyyətdə demokratiya quruculuğunun çox mürəkkəb və çətin proses olduğunu bilir. “Bəziləri üçün bu proses yavaş, digərləri üçün sürətli görünə bilər. Çox zaman xarici müşahidəçilərin siyasi dəyişikliyin mürəkkəbliyi barədə ətraflı məlumatı olmur və vaxtaşırı səbirsizlik edərək tənqidi mövqe tuturlar. Bunun da nəticəsində müəyyən bir proses barəsində sadə və ümumiləşdirilmiş qiymətləndirmə aparmaq asan olmur. Lakin mənim ümumi fikrim belədir ki, Azərbaycan daha müasir, daha inkişaf etmiş və daha plüralist cəmiyyətə çevrilməkdədir və bununla bağlı Azərbaycanın daha da demokratikləşməsi prosesi qaçılmazdır.”

Bir müddət öncə ABŞ-ın nüfuzlu internet qəzeti “Haffinqton Post” tanınmış amerikalı politoloq, Kaliforniyanın “Tool Shed Group LLC” analitik mərkəzinin eksperti Ceyson Katzın Azərbaycanla bağlı məqaləsini dərc etmişdir. Məqalədə bildirilirdi ki, Şərq-Qərb enerji dəhlizinin fəaliyyətinin təmin edilməsində mühüm rol oynayan Azərbaycanın təşəbbüsü və iştirakı ilə reallaşdırılan enerji layihələri, xüsusilə Bakı-Tbilisi-Ceyhan neft kəməri Qərb ölkələri üçün çox böyük önəm daşıyır. Müəllif bildirir ki, Azərbaycan haqqında məlumat əldə etmək istəyən hər bir kəs bu ölkənin öz milli maraqlarından çıxış edən olduqca praqmatik bir ölkə olduğunu öyrənər. Azərbaycan kimi bir dostun itirilməsi ABŞ-ın xarici siyasəti və maraqları üçün böyük zərbə ola bilər.

Publisist, beynəlxalq icmalçı, politoloq, “İlham Əliyev: Azərbaycanıma inanıram” kitabının müəllifi Mixail Vitalyeviçin də ölkəmizlə bağlı açıqlamaları olduqca maraqlıdır. Kitabın yaranma səbəbindən bəhs edən müəllif bildirir ki, son illər Azərbaycan qüdrətli dövlətə çevrilib: “Burada sözün əsl mənasında nəhəng qlobal və pozitiv dəyişikliklər baş vermişdir. İkinci səbəb isə şəxsidir. Kitabın əsl müəllifi İlham Əliyevdir. Çünki oxucu Azərbaycanı ilk növbədə onun “prizması”ndan görür. Söhbət sözün əsl mənasında planetar təfəkkürlü və geniş dünya görüşlü insan haqqında getdiyindən, bu, xüsusilə dəyərlidir.” “Prezident öz ölkəsini necə də möhkəm, qətiyyətlə, ardıcıl olaraq inkişaf yolu ilə aparır” deyən C.Katzın bildirir ki, ölkə lideri haqqında nə qədər material toplayıramsa, bir o qədər də məndə ona qarşı hörmət və hətta heyranlıq yaranırdı. Mənə daha da aydın olurdu ki, haqqında söhbət gedən şəxsiyyətin səviyyəsinə layiq kitab yalnız maraqlı deyil, həm də əzəmətli olmalıdır.

Mixail Vitalyeviçin “Azərbaycanın hazırkı inkişaf yolu haqqında nə deyərdiniz” sualına cavabı da diqqətdən kənarda qalmır: “Mən bugünkü respublikanı “çiçəklənən Azərbaycan” adlandırardım. Bu, yazıçı obrazı deyil, reallıqdır. Kitab üzərində iş məni cəlb etdikcə, ölkədə baş verən dəyişikliklərə sadəcə olaraq heyran qalırdım. Sənaye istehsalı hər il həqiqətən rekord göstəricilərlə artır, kənd təsərrüfatı yüksəlir, maliyyə və yenicə yaranmaqda olan bank sistemi möhkəmlənir. Azərbaycan bildiyimiz kimi, enerji resurslarını Qərbə ixrac edən və ötürən ölkələr sırasına qədəm qoymuşdur. Sözün əsl mənasında, əsrin layihəsi olan Bakı-Tbilisi-Ceyhan boru xəttinin tikilməsi və açılışı ilə Azərbaycanın bütövlükdə Avropa və Qərb üçün nə qədər böyük əhəmiyyətə malik olduğu aşkar edildi. Sosial sferadakı ciddi dəyişiklikləri mən hətta sıçrayış adlandırardım. Mən bu haqda çox danışa bilərəm, lakin Azərbaycanda baş verənlər haqqında dünyanın bilməsi, ölkənin qüdrətli dövlətə çevrilməsinə səbəb olmuş dəyişikliklərin mahiyyətinin anlanılması çox vacibdir.”

Xarici siyasətçilərin, politoloqların Prezident İlham Əliyev haqqında fikirlərini önə çəkərək son illərdə Azərbaycanın keçdiyi inkişaf yoluna qısaca nəzər salaq.

Dövlət başçısı İlham Əliyev altı ildə həyata keçirdiyi iqtisadi, siyasi, demokratik islahatları ilə Azərbaycanı daha da qüdrətləndirir, əhalinin inamını, etimadını artırır, ən əsası vədinə sadiq olduğunu təsdiqləyir, xalq seçimində yanılmadığının şahidi olur. Bu günün reallıqları ümummilli lider Heydər Əliyevin 2003-cü il prezident seçkilərindən öncə xalqa müraciətində bildirdiyi: “İlham Əliyev yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir. Sizi əmin edirəm ki, həm İlham Əliyev, həm də Yeni Azərbaycan Partiyası bundan sonra da xalqımızın ən layiqli övladlarını öz ətrafında sıx birləşdirərək, Azərbaycan dövlətinin inkişafı və xalqımızın firavanlığı yolunda çox işlər görəcəklər. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən Ona özüm qədər inanıram və gələcəyinə böyük ümidlər bəsləyirəm” fikrinin təsdiqidir.

Bu günün statistik rəqəmlərinə müraciət etsək bir daha məlum olur ki, dünya dövlətlərini narahat edən qlobal maliyyə böhranına baxmayaraq milli iqtisadiyyatı sürətli, dinamik və davamlı inkişaf yolu ilə irəliləyən Azərbaycan aparılan məqsədyönlü islahatlar nəticəsində qazandığı liderlik adını qoruyub saxlayır. Prezident İlham Əliyevin “İlin adamı-2009” Qran-pri mükafatına layiq görülməsində də ölkəmizin uğurlu siyasət nəticəsində dünyanı bürüyən iqtisadi və maliyyə böhranını hiss etməməsi önə çəkilir. Bildirilir ki, laureatların çoxunun qələbəsi məhz onların böhrana qarşı uğurlu mübarizəsi sayəsində təmin edilmişdir. Bu mükafat il ərzində öz ölkələrinin ictimai, siyasi və dövlət mənafelərinə xidmət işində ən parlaq nəticələr göstərmiş insanlara təqdim edilir ki, dövlət başçısı İlham Əliyevin bütün sahələrin inkişafına yönələn addımları daim təqdir olunur.

“Azərbaycan Respublikası regionlarının sosial-iqtisadi inkişafı Dövlət Proqramının (2004-2008-ci illər)” qəbulu ilə aparılacaq islahatların, ölkə iqtisadiyyatının tərəqqisinə təkan verəcək layihələrin istiqamət və parametrləri dəqiq müəyyənləşdirildi. Nəzərdə tutulan beş ildə bölgələrdə yaşayan əhalinin sosial-iqtisadi vəziyyətinin yaxşılaşdırılması, yeni iş yerlərinin açılması, infrastruktur layihələrinin həyata keçirilməsi, investisiya qoyuluşunun artırılması, ən başlıcası isə sahibkarlığı inkişaf etdirməklə qeyri- neft sektorunun genişləndirilməsinin təminatına yönəldilmiş təxirəsalınmaz vəzifələr Dövlət Proqramında əsas prinsiplər kimi qarşıya qoyuldu. Həyata keçirilən tədbirlər nəticəsində Azərbaycan dünya iqtisadiyyatına inamla inteqrasiya edən dövlət kimi beynəlxalq ictimaiyyətin marağını cəlb etdi. Azərbaycanın büdcəsi 10 dəfə artdı. Ölkəmizin valyuta ehtiyatları 20 milyard dollar həcminə çatdırıldı. 2004-cü ildə əsas vəzifə kimi qarşıya qoyulan qeyri-neft sektorunun, sahibkarlığın inkişafı təmin edildi.

Həyata keçirilən infrastruktur layihələrinin uğurlu tətbiqi nəticəsində bölgələrin siması dəyişdi. Ən başlıcası isə tanınmış maliyyə təşkilatı olan Dünya Bankı tərəfindən açıqlanan “Diong Busines-2009” hesabatında Azərbaycan dünya ölkələri sırasında ən islahatçı dövlət elan olundu.

“Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın həyata keçirilməsi ilə daha möhtəşəm vəzifələrin əldə olunacağına inandığını bildirən dövlət başçısı İlham Əliyev ötən ilin sosial-iqtisadi inkişafının yekunlarına dair müşavirədə ölkə iqtisadiyyatının ümumi vəziyyətini müsbət qiymətləndirdi. Qeyd olundu ki, qlobal iqtisadi böhran şəraitinin davam etməsinə baxmayaraq milli iqtisadiyyat tarazlığını qoruyub. Ötən il ÜDM 9,3 faiz artmışdır. Sənaye istehsalı 8,6 faiz, kənd təsərrüfatı 3,5 faiz artıb. 2005-ci ildən başlayaraq Azərbaycan iqtisadi artım sürətinə görə dünyada liderlik edir. Həyata keçirilən islahatlar nəticəsində ölkədə yoxsulluğun səviyyəsi 49 faizdən 11 faizə enmişdir.

Əsas problemimiz olan Ermənistan-Azərbaycan, Dağlıq Qarabağ münaqişəsinin həllində Azərbaycanın haqlı mövqeyini dəstəkləyənlərin sayının artması da Prezident İlham Əliyevin qətiyyət və səyinin nəticəsidir. “Dağlıq Qarabağa heç bir zaman müstəqillik verilməyəcək” söyləyən dövlət başçısı Azərbaycan xalqının rəyinin ifadəsi olan torpaqlarımızın bütövlüyünün təminatı üçün bütün imkanlardan istifadə olunacağını əminliklə bildirir. Bütün beynəlxalq səviyyəli görüşlərdə bölgədə və dünyada sülhün, sabitliyin təminatı üçün maneə olan Dağlıq Qarabağ probleminin əsas müzakirə mövzusu kimi gündəmə gətirilməsi Azərbaycanın uğurlu xarici siyasətinin nailiyyətidir.

Görülən işləri yüksək dəyərləndirən ölkə əhalisi Prezident İlham Əliyevin ətrafında sıx birləşərək, gələcəyə böyük inamla irəliləyir.

Yeganə Əliyeva

İki sahil.- 2010.- 2 mart.- S. 3.