Prezident İlham Əliyevin əzmi, iradəsi Azərbaycanı inamla irəli aparır

Dünyanın nüfuzlu siyasətçiləri və KİV-ləri son bir ildə dövlətimizin başçısının fəaliyyətini məhz belə səciyyələndirirlər

Azərbaycanın dünyada günəş kimi işıq saçdığı artıq beynəlxalq aləmdə təsdiqini tapmış həqiqətdir. Ortada təkcə Azərbaycan üçün deyil, yaxın-uzaq dövlətlər üçün də böyük işlər görüldüyü, nəhəng neft-qaz layihələrinin gerçəkləşdiyi bir vaxtda ölkəmiz, onun Prezidenti İlham Əliyevin dünya siyasətçilərinin və mətbuatının diqqət mərkəzində olması təbiidir.

Xarici ölkələrin nüfuzlu nəşrlərinin İlham Əliyevlə müsahibəyə can atması, bir tərəfdən dövlətimizin rəhbərinin mətbuat üçün açıq olmasından irəli gəlirsə, digər tərəfdən ona verilən sualların tam qaneedici şəkildə cavablandırılması, Azərbaycanın dünya siyasətində və iqtisadiyyatında sözü ötən, hesablaşılan bir dövlətə çevrilməsinin təsdiqidir.

Prezident İlham Əliyevin zəkası, siyasəti və iqtisadiyyatı incəliklərinə qədər bilməsi, dünyada hansı ölkənin hansı problemlərlə üzləşdiyi barədə tam məlumatlı olması, Azərbaycanın reallıqlarını açıq-aydın beynəlxalq aləmə təqdim etməsi, idarəçilik məharəti, islahatçılığa meyilliliyi son bir ildə xarici KİV-lərdə dönə-dönə etiraf olunmuşdur.

İlham Əliyevin xarici mətbuat nümayəndələrinə hər müsahibəsi Azərbaycanın milli mənafelərini dolğunluğu ilə əks etdirir. Rusiyanın “İzvestiya” qəzeti müxbirlərinin - “Sizi texnokratlar sırasına aid edirlər. Bu o deməkdir ki, məqsəd vasitələri - doğruldur. Siz bu barədə nə düşünürsünüz?” sualını və bu suala Prezidentin cavabını xatırlayaq:

Hesab edirəm ki, bu, düzgün yanaşma deyildir. Odur ki, məqsəd də nəcib olmalıdır, vasitələr də. İnsanlar hansısa məqsədlər naminə heç vaxt ləyaqətsiz hərəkət etməməlidirlər. Mən texnokratam? Hesab edirəm ki, mən realistəm. Reallıqları əsas tutmaq, yaşadığın cəmiyyətin və dünyanın reallıqlarını qəbul etmək gərəkdir. Əgər hər hansı romantikaya qapılsan, uğursuzluğa düçar olacaqsan. Ona görə də mən həmişə öz hərəkətlərimdə realizmə, praqmatizmə əsaslanıram.”

Xarici müxbirlərdən birinin “başqa işlərinizdən daha çox siyasi karyeranızı izləyirlər. Azərbaycanda siyasi vəziyyət necədir” sualına Prezidentın cavabı qətiyyətli və aydındır: “Mən belə hesab edirəm ki, Azərbaycanın uğurlu, təhlükəsiz inkişafının ən mühüm amili indi aparılan siyasətdir. ... Heydər Əliyevin siyasəti həmişə davam etdirilməlidir”.

Prezident İlham Əliyev ABŞ-ın EN-Bİ-Sİ telekanalına müsahibəsində maraqlı bir məqama aydınlıq gətirir. Müxbirin “atanız kimi Siz də ABŞ ilə çox yaxın əlaqələr qurulmasının tərəfdarısınız. Bunu nə ilə izah edə bilərsiniz” sualına İlham Əliyevin cavabı:

“Bizim ABŞ, digər Qərb ölkələri ilə yaxın əlaqələr qurmağımızın bir məqsədi var. Bu da azad iqtisadiyyata malik olan, insanlarda sərbəstlik təmin edən, dünya iqtisadiyyatına tam inteqrasiya olunan müasir dövlət qurmaqdır”.

Prezident İlham Əliyev Böyük Britaniyanın “Skay Nyus” televiziyasına müsahibəsində Azərbaycanın sosial-iqtisadi uğurlarını diqqətə çatdırdıqdan sonra vurğulamışdır ki, mənim başlıca məqsədim Azərbaycanın milli maraqlarını maksimum dərəcədə qorumaqdır. Prezident milli mənafe dedikdə xalqın həyat səviyyəsinin daha da yaxşılaşdırılması üçün həyata keçirilən sosial-iqtisadi proqramların əhəmiyyətini qeyd edərək deyir:

“Ancaq biz Dövlət Neft Fondunun vəsaitlərinin böyük bir hissəsini gələcək nəsillər üçün saxlayırıq. Beləliklə, gələcək nəsillər hər hansı çətinlikdən qoruna biləcəklər.”

Dövlət başçısının elə bir müsahibəsi olmur ki, orada Ermənistan-Azərbaycan, Dağlıq Qarabağ münaqişəsi ilə bağlı suala cavab verilməsin. Bu il aprelin 18-də Prezident İlham Əliyev Moskvada işgüzar səfərdə olarkən Rusiyanın “Vesti” telekanalına və İTAR-TASS agentliyinə müsahibəsində bu məsələ barədə suala cavabında dedi:

“Son beş ildən artıq müddətdə Azərbaycan Prezidenti kimi mən bilavasitə bu məsələ ilə məşğulam. ... Biz ümid edirik ki, Ermənistan tərəfi bu məsələyə konstruktiv mövqedən yanaşacaqdır. Bizim səbrimiz tükənmişdir. Əgər Ermənistan işğal etdiyi torpaqları danışıqlar yolu ilə azad etməsə, Azərbaycan öz ordusunun gücü ilə ərazi bütövlüyünü qoruyacaqdır.”

Prezident Reuters agentliyinə, İtaliyanın “PAU İnternational” telekanalına, Belarusun milli dövlət teleradio şirkətinə müsahibəsində də Ermənistan-Azərbaycan, Dağlıq Qarabağ münaqişəsinin həlli ilə bağlı sualları ətraflı cavablandırmış, Dağlıq Qarabağa heç vaxt müstəqillik verilməyəcəyi birmənalı şəkildə diqqətə çatdırılmışdır.

“Dağlıq Qarabağ münaqişəsi həll edilməmiş bölgədə heç bir müsbət meyil gözlənilmir. Çünki bölgənin əsas problemi Dağlıq Qarabağ münaqişəsidir. İlk növbədə bu münaqişə öz həllini tapmalıdır. Bundan sonra bütün başqa məsələlər öz həllini tapa bilər” deyən Prezident münaqişənin Azərbaycanın ərazi bütövlüyü çərçivəsində həll olunması üçün xarici dövlətlərin və beynəlxalq təşkilatların Ermənistana təzyiq göstərəcəklərinə inam bəslədiyini bildirmişdir.

Prezidentin xarici KİV-lərə müsahibələrində Azərbaycanın uğurları geniş əksini tapır. Dünyada gedən maliyyə böhranı şəraitində ölkəmizdə iqtisadi inkişafın davam etdiyini vurğulayan dövlətimizin başçısı bu inkişafın 2010-cu ildə də davam etdiriləçəyinə, xalqın həyat səviyyəsinin daha da yaxşılaşacağına, Azərbaycanın mövqelərinin daha da güclənəcəyinə əminliyini ifadə edir.

Telman Qafar

İki sahil.- 2010.- 6 yanvar.- S. 2.