“Ənənələr və müasirlik-Bakı-2009”

3-cü beynəlxalq foto müsabiqəsinin qalibləri mükafatlandırılmışlar

Yanvarın 13-də Muzey Mərkəzində mərhum heykəltəraş Müslüm Eldarovun xatirəsinə həsr olunmuş “Ənənələr və müasirlik - Bakı-2009” 3-cü beynəlxalq foto müsabiqəsinin qalibləri mükafatlandırılmışlar.

Tədbirdə çıxış edən “Yeni qalereya” sərgi salonunun direktoru Rafael Gülməmmədli bildirmişdir ki, tədbir 2001-ci və 2005-ci illərdə keçirilmiş eyniadlı müsabiqələrin məntiqi davamıdır. Bu genişmiqyaslı mədəni layihənin həyata keçirilməsinin bilavasitə təşəbbüskarı rəssam və ictimai xadim, əsl vətənpərvər insan Müslüm Eldarov olmuşdur.

Bu müsabiqələrin əsas ideyası və başlıca məqsədi mədəniyyət, ümumən humanitar sahələrdə qazanılan təcrübənin yayılması, mübadiləsi, xalqların və ölkələrin tərəqqisi naminə beynəlxalq qüvvələrin səfərbər edilməsidir.

Tədbirdə Müslüm Eldarova həsr olumuş sənədli film nümayiş etdirilmişdir.

Gecədə Rəssamlıq Akademiyasının rektoru, xalq rəssamı, mərhum sənətkarın atası Ömər Eldarov, Mədəniyyət və Turizm Nazirliyinin şöbə müdiri Leyla Axundzadə, Rəssamlar İttifaqının katibi, xalq rəssamı Ağəli İbrahimov, layihənin əlaqələndiricisi İrina Eldarova, xarici işlər nazirinin müavini Mahmud Məmmədquliyev və başqaları çıxış etmişlər. Natiqlər yaradıcılığının çiçəkləndiyi dövrdə həyatdan qəfil getmiş mərhum heykəltəraş Müslüm Eldarovun qrafika və rəngkarlıq janrında yaratdığı əsərlərin, xüsusilə heykəltəraşlıq nümunələrinin sənətkarlıq məziyyətlərindən, müəllifin zəhmətsevərliyindən, vətəndaş təəssübkeşliyindən danışmışlar.

Bildirilmişdir ki, vaxtilə Müslüm Eldarovun rəhbərliyi altında fəaliyyət göstərmiş Bakı İncəsənət Mərkəzi bir sıra vacib siyasi-ictimai və mədəni tədbirlərin mərkəzinə çevrilmişdir. Məhz M.Eldarovun səyi nəticəsində Rusiya, Fransa, İngiltərə, Birləşmiş Ərəb Əmirlikləri və başqa dövlətlərlə əməkdaşlıq genişləndirilmiş, rəssamlarımızın xarici ölkələrdə əsərlərinin sərgisi keçirilmişdir. Eyni zamanda, Müslüm Eldarov 1996-cı ildə Londonda açılmış Azərbaycan Mədəniyyət Mərkəzinin rəhbəri kimi də bu vəzifədə 7 il səmərəli fəaliyyət göstərmişdir.

Vurğulanmışdır ki, 2009-cu ilin aprelində elan edilmiş “Ənənələr və müasirlik - Bakı-2009” 3-cü beynəlxalq foto müsabiqəsi 8 nominasiya üzrə keçirilmişdir. Yarışmada 15 ölkədən 200-ə yaxın müəllif iştirak etmişdir. Onlar müsabiqəyə 2000-ə yaxın foto təqdim etmişlər. Bu əsərlərin içərisindən ən yaxşı 50 iş min nüsxə ilə buraxılan kataloqda çap olunmuşdur.

Müsabiqənin nəticələrinə uyğun olaraq hər nominasiya üzrə 3 qalib müəyyən olunmuş və onlara diplomlar təqdim edilmişdir.

Ən yaxşı fotolardan ibarət sərgi də iştirakçılar tərəfindən böyük maraqla qarşılanmışdır.

İki sahil.- 2010.- 14 yanvar.- S. 11.