Ölkənin ictimai, sosial-iqtisadi həyatı “İki sahil”in səhifələrində

Azərbaycan Mətbuat Şurasında qəzetin 20 illik yubileyi ilə əlaqədar bu mövzuda tədbir keçirildi

Dünən Mətbuat Şurasında “İki sahil” qəzetinin 20 illik yubileyi ilə əlaqədar tədbir keçirildi. Tədbiri giriş sözü ilə açan Mətbuat Şurasının sədri Əflatun Amaşov öncə qəzetin rəhbərliyini və kollektivini yubiley münasibətilə təbrik etdi, yeni-yeni yaradıcılıq uğurları arzuladı.

Ə.Amaşov qeyd etdi ki, 20 il bundan öncə qəzet yaranarkən əsas ideyası “Vahid Azərbaycan uğrunda” oldu: “Bu gün də qəzet bu deviz əsasında fəaliyyətini davam etdirir. 20 il müddətində qəzet mütəmadi fəaliyyət göstərib. İlk əvvəl həftəlik, bu gün isə gündəlik işıq üzü görür. Ən çoxtirajlı qəzetlərdəndir. Qəzetin yarandığı vaxta nəzər salıb Azərbaycanın ictimai-siyasi həyatını göz önünə gətirəndə mürəkkəb tarixi şəraitdə yaşadığımızı aydın görürük. O zaman Azərbaycanda milli dəyərlərimizi qoruyan qəzetlərlə yanaşı digər ideyalara xidmət edən nəşrlər də var idi. Belə bir çətin məqamda “İki sahil” işıq üzü gördü. Qəzetin arxivdəki ilk saylarını vərəqlədim. Bu gün də, iyirmi il bundan öncə də Azərbaycanda ictimai-siyasi fikrə təsir göstərən şəxslərin ya şəkillərini, ya da yazılarını görmək olar. Qəzetin ilk müəllifləri, əməkdaşları Azərbaycanın bu gün də, o zaman da ictimai fikrə təsir göstərən insanları olub.”

Mütəxəssislərin qəzetin fəaliyyətini bir neçə dövrə böldüyünü qeyd edən Ə.Amaşov vurğuladı ki, bu ilk dövr, 1993-cü ildən 2003-cü ilə qədər olan dövr və bugünkü mərhələdir. Həmin dövrlərdə də qəzet Azərbaycanın ictimai-siyasi, iqtisadi, mədəni həyatında baş verən bütün olayları oxucularına çatdırmağı özünün əsas məqsədi bildi və bu işin öhdəsindən çox böyük uğurla gəldi. “Son illər Azərbaycan jurnalistikasında, Azərbaycan KİV-lərində ixtisaslaşma deyilən bir proses davam edir. Dünyanın hər yerində bu proses gedir. İqtisadi mövzuda yazan qəzetlər kifayət qədər öz səhifələrində iqtisadi məsələlərə daha çox yer ayırırlar. Sosial sahəyə üstünlük verənlər sosial, ictimai-siyasi istiqamətli qəzetlər isə ictimai-siyasi prosesləri daha çox işıqlandırırlar. “İki sahil” qəzeti də neft-qaz məsələlərinə daha çox yer ayırır.

Materialların hamısı müəllif yazıları deyil. Onlar arasında əsasən ekspertlərin, alimlərin neft və qazla bağlı rəyləri xüsusu yer tutur. Bu rəylər arasında beynəlxalq ekspertlərin də fikirləri diqqət çəkir. Hazırda qəzet bu istiqamətdə fəaliyyətini daha da genişləndirir. Bu da qəzetin təsisçisinin ARDNŞ olması ilə bağlıdır. Düşünürəm ki, Şirkət “İki sahil” qəzeti ilə yaxından əməkdaşlıq etməklə, Azərbaycanda və ölkədən xaricdə gördüyü işlərin ictimaiyyətə ətraflı çatdırılmasına nail olur. ARDNŞ-in bu fəaliyyətini yüksək dəyərləndirirəm.”

Ə.Amaşov diqqəti tədbir üçün seçilən “Ölkənin ictimai, sosial həyatı “İki sahil”in səhifələrində” mövzusuna yönəltməklə, qəzetin ötən 20 ildə Azərbaycanın uğurlarının təbliğində böyük rol oynadığını bir daha təsdiqlədi.

ARDNŞ-in İqtisadiyyat və Uçot İdarəsinin rəis müavini Rəşid Hüseynov bildirdi ki, əlbəttə, “İki sahil” deyəndə ilk növbədə ARDNŞ-lə əməkdaşlıq edən qəzet yada düşür. ARDNŞ-in hansı şəraitdə, hansı illərdə yarandığı bəllidir. Amma neft sənayesindən danışanda fikrimiz 8 min il bundan əvvələ gedir. İlk neft 8 min il bundan əvvəl Azərbaycanda Abşeron yarımadasında çıxarılıb. O zaman neftin hansı üsulla çıxarıldığı elmə bəllidir. Azərbaycan tarixən neft ölkəsi kimi tanınıb. Ölkə iqtisadiyyatının inkişafında neft amilinin rolu inkaredilməzdir.

1994-cü ildən ARDNŞ-də çalışdığını qeyd edən R.Hüseynov o zaman maliyyə şöbəsinin rəisi vəzifəsində işlədiyini bildirdi. Vurğuladı ki, “İki sahil” qəzetinin baş redaktoru Vüqar Rəhimzadə ilə tanışlığımız da o zamandan başlayır. Qəzetin daimi oxucularından biriyəm. “İki sahil”in səhifələrində ARDNŞ-in fəaliyyətinin ətraflı işıqlandırılmasını yüksək dəyərləndirirəm.

R.Hüseynov ARDNŞ barədə fikirlərini tədbir iştirakçılarının diqqətinə çatdırdı. Qeyd etdi ki, Şirkət böyük layihələr həyata keçirir. ARDNŞ-in beynəlxalq əlaqələri günbəgün genişlənir. Ölkə xaricində investisiya layihələrini uğurla həyata keçirir. Bugünkü uğurların əsasında ulu öndər Heydər Əliyevin müəllifi olduğu neft strategiyası dayanır. 1994-cü il sentyabrın 20-də “Əsrin müqaviləsi”nin imzalanması ölkəmizin iqtisadi imkanlarının genişlənməsinə zəmin yaratdı. 1996-cı ildə “Şahdəniz” layihəsi ilə bağlı müqavilə imzalandı. Bu layihələrin icrasına böyük şirkətlər cəlb olundu. Bu gün həmin layihələr uğurla icra olunmaqdadır. Bu, beynəlxalq əməkdaşlıq sayəsində icra edilən layihələrdir. Amma bu faktı da qeyd edərdim ki, ARDNŞ öz daxili imkanları hesabına layihələr icra etməkdədir. “Ümid” qaz yatağının açılması ilə bağlı mətbuatda ətraflı məlumatlar dərc olundu.

ARDNŞ 2008-ci ilin yanvarından beynəlxalq uçot sisteminə keçmişdir. SAP proqramı əsasında beynəlxalq uçot sistemi tətbiq olunur. Bu da beynəlxalq əməkdaşlıq əlaqələrinin inkişafı üçün mühüm amillərdən biridir.

ARDNŞ-in 10-dan artıq ölkədə nümayəndəliyi fəaliyyət göstərir. Hasilatın pay bölgüsü ilə əlaqədar birgə layihələr həyata keçirilməkdədir. Bu da ARDNŞ-in potensialının təqdimatında əsas rol oynayır.

Bildirildi ki, neft-qaz hasilatında artım diqqətdən kənarda qalmır. Neft tarixində ən yüksək göstərici ötən ilə aiddir. Belə ki, 2010-cu ildə 50 milyon ton neft hasil edildi. Qaz hasilatı da artmaqdadır. ARDNŞ bu istiqamətdə mühüm tədbirlər həyata keçirir.

R.Hüseynov vurğuladı ki, bunları qeyd etməkdə məqsəd neft amilinin ölkəmizin ictimai, siyasi, iqtisadi həyatında mühüm rol oynadığını təsdiqləməkdir. Bu sahədə qazanılan uğurların “İki sahil” qəzetinin səhifələrində dolğun şəkildə işıqlandırılması təqdir olunur.

R.Hüseynov yubiley münasibətilə qəzetin kollektivini təbrik etdi, uğurlar arzuladı.

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli “İki sahil” qəzeti ilə bağlı xatirələrindən, qəzetin yarandığı gündən bu günə qədər əqidəsinə sadiq olmasından geniş bəhs etdi. Bildirdi ki, 20 il elə sürətlə keçdi ki, elə bil qəzetin ilk sayı dünən işıq üzü görmüşdür. “Həmin dövrdə Qəzet-jurnal ekspedisiyasının rəisi vəzifəsində çalışırdım. Bildiyiniz kimi o dövrdə qəzet çıxarmaq çox çətin idi. Həftəlik, aylıq qəzetlər çox az idi. O sıradan olan qəzetlərdən biri də “İki sahil” qəzeti idi. Həmin qəzetlərin “Azərbaycan” nəşriyyatında çap qrafikləri var idi. Həmin dövrlərdə qəzetlərin A3 formatda, 4 səhifə çıxdıqları bəllidir. Elə olurdu ki, 4 səhifəlik materialların yığılması mümkün olmurdu, yaxud da ki, digər problemlər yaranırdı. Nəşriyyatla imzalanan müqaviləyə əsasən qrafikdə dəyişiklik ola bilməzdi. Çünki həmin qəzetlərin yayımı üçün sənədlər əvvəldən hazırlanmalı idi. Əgər qəzet axşam çıxırdısa, yayımı növbəti günə saxlanılırdı. Bu problem yarananda, qəzetlər nəşriyyatın çap qrafikindən çıxanda, Qəzet-jurnal ekspedisiyasından razılıq əldə olunması tələb edilirdi. “İki sahil” qəzetinin baş redaktoru Vüqar Rəhimzadə ilə ilk tanışlığım da elə qəzetin həmin dövrdə bu problemlə üzləşdiyi üçün mənə müraciəti zaman olmuşdu.”

“İki sahil” qəzetinin dövlətə, dövlətçiliyə xidmət yolunu tutması qəzet üçün qrafik probleminin olmamasında mühüm rol oynadı.

Sərbəst fikrə qadağanın qoyulduğu bir dövrdə “İki sahil” qəzeti öz əqidəsindən dönmədi, Azərbaycan reallıqlarını ictimaiyyətə olduğu kimi çatdırdı.

Bu gün “İki sahil” qəzetinin 20 yaşı tamam olur. Qəzet çoxtirajlıdır. Gündəlik qəzet olaraq maraqlı yazıları ilə oxucularının görüşünə gəlir. Ötən bu illərdə göstərdiyi şücaətlərə görə qəzetin baş redaktoru Vüqar Rəhimzadəyə və qəzetin kollektivinə təşəkkürümü bildirirəm. Qəzetin kollektivinin əməyi dövlətmiz tərəfindən də yüksək dəyərləndirlib. Belə ki, qəzetin baş redaktoru və digər əməkdaşları fəxri adlarla təltif olunublar. Bir daha qəzetin rəhbərliyini və kollektivini təbrik edir, qəzetin ötən bu illər ərzində qazandığı nüfuzu daha da möhkəmləndirməsini arzulayıram.

“Azərbaycan” qəzetinin baş redaktoru, Milli Məclisin deputatı, Mətbuat Şurasının İdarə Heyətinin üzvü Bəxtiyar Sadıqov bu ilin yubileylər ili olduğunu qeyd etdi. Bildirdi ki, Azərbaycanın dövlət müstəqilliyinin yenidən bərpa olunmasının 20 illiyi qeyd ediləcək. Eyni zamanda “İki sahil” qəzetinin fəaliyyətə başlamasının 20 ili tamam olur. “Qəzet boldur. Bu bolluqda yer tutmaq, oxucu məhəbbəti qazanmaq, qəzet bazarında duruş gətirmək, yaşamaq çox çətindir. Bu çətinliyi ancaq hər gün qəzet cəbhəsində döyüşənlər yaxşı bilirlər. Gündə 30-40 qəzet oxuyuruq. Onlarda bir oxşarlıq mövcuddur. Bu oxşarlıq içərisində qəzeti fərqləndirmək çox çətindir. Amma “İki sahil” qəzeti bu işin ikisinin də öhdəsindən gəlib. Qəzetin səhifələrinə baxdıqda həm dizayn, həm məzmun cəhətdən öz simasının olduğunu görürük. “İki sahil”in istənilən sayını təhlil edib orda informasiya materialları ilə qəzetin orijinal materialları nisbətini götürsək, oxucu üçün daha çox orijinal material verən qəzet olduğunu görərik. Oxucu məhəbbəti qazanmağın yollarından biri də budur. “İki sahil” qəzeti həm də sahə qəzeti kimi fəaliyyət göstərir. Neft sənayesini, ulu öndər Heydər Əliyevin müəllifi olduğu neft strategiyasının uğurlarını geniş şəkildə ictimaiyyətə çatdırır. Neft strategiyası Azərbaycanın bugünkü uğurlarını təmin edir. Uğurlarımız barədə geniş danışmaq olar. Dövlət başçısı İlham Əliyev bildirir ki, neft xalqlara xoşbəxtlik də gətirə bilər, fəlakət də. Çalışacağam ki, neft Azərbaycan xalqına firavanlıq bəxş etsin. Prezidentimiz bu vədini əməli işi ilə təsdiqləyir. Neft strategiyası da məhz Azərbaycan xalqının bugünkü və gələcək xoşbəxtliyinə xidmət edir.”

B.Sadıqov “İki sahil” qəzetinin digər bir məqamını da diqqətə çatdırdı. Qeyd etdi ki, bu da qəzetin Azərbaycanda baş verən bütün proseslərə çevik, operativ münasibətidir. “İki sahil” qəzetinin çox zəhmətkeş, bacarıqlı, jurnalist peşəkarlığına yiyələnmiş kollektivi var. Gün ərzində qəzetin redaksiyasında qaynar iş gedir. Nəticədə də hər gün “İki sahil”in yeni sayları ilə rastlaşır, maraqla oxuyuruq. Təbii ki, kollektivin daxilində bu işgüzar mühiti yaradan qəzetin baş redaktoru Vüqar Rəhimzadədir.”

“Qəzetin digər mühüm cəhətlərindən biri onun əqidəli qəzet olmasıdır” söyləyən B.Sadıqov bildirdi ki, “İki sahil” 20 ildə əqidəsindən dönməyərək, daim öz dəst-xəttinə sadiqlik nümayiş etdirib. “İki sahil” əqidəsinə görə sevilən qəzetlərdən biridir.

Baş redaktor V.Rəhimzadə başda olmaqla qəzetin yaradıcı heyətini, kollektivini təbrik edir, yeni-yeni yaradıcılıq uğurları arzulayıram. “İki sahil” özünəməxsus üslubu, qəzet bazarında yeri olan, daim oxucularla ünsiyyətdə olmağı bacaran, oxucu auditoriyasını genişləndirən, həm də dövlətə və milli maraqlara xidmət edən qəzetdir. Bu yolda uğurlar arzulayıram.

“Olaylar” İnformasiya Agentliyinin baş direktoru Yunus Oğuz qeyd etdi ki, qəzetin yarandığı dövr hər birimizə aydındır. Belə bir dövrdə qəzet yaratmaq, ölkə reallıqlarını səhifələrində olduğu kimi əks etdirmək böyük cəsarət tələb edirdi. “İki sahil” qəzeti belə bir çətin anda yaranıb və ötən 20 ildə öz yoluna sadiq olub. Qəzetin rəhbərliyini və kollektivini yubiley münasibətilə təbrik edirəm.

Millət vəkili Musa Qasımlı bildirdi ki, jurnalist olmaq çox çətindir. Dünyada baş verən hadisələrdən məlumatlı olmaqla, hadisələrdən düzgün nəticə çıxarmaq üçün geniş dünyagörüşünə malik olmalısan. Oxucuların diqqətini cəlb etmək, insanlarla dil tapmaq, mehriban, isti münasibət qurmaq, fərdi çalışmaq bacarığına yiyələnməlisən: “Çox sevinirəm ki, “İki sahil”in 20 illik yubileyində iştirak etmək mənə də nəsib oldu. Demək olar ki, “İki sahil”in daimi oxucularından biri də mənəm. Adına görə bu qəzetə həmişə marağım olub. “İki sahil” deyəndə yadıma Arazın o taylı, bu taylı sahilləri düşür. Çox sevinmişəm ki, respublikamızda bu adla bütöv Azərbaycanı ehtiva edən bir qəzet var. Bu qəzetin kollektivinə qiyabi olsa da böyük hörmətim, rəğbətim olub. Bu adla qəzet çıxartmaq, Azərbaycanın ictimai-siyasi həyatında özünəməxsus dəyişməz mövqe tutmaq, əqidəsinə sadiqlik böyük jurnalistlik məharəti tələb edir. Təbii ki, qəzetin başında işinə bağlı, məsuliyyətli rəhbər olanda kollektivin gücü ilə bütün çətinlikləri aradan qaldırmaq mümkündür. Mən qəzetin bütün yaradıcı və texniki heyətini təbrik edirəm. Nəhayət, qəzetin baş redaktoru Vüqar Rəhimzadə haqqında bir neçə söz demək istəyirəm. Doğrudan da qəzetə baş redaktorluq etmək çox çətindir. Hamı ilə dil tapmalı, peşəkarlığın ilə əməkdaşlara nümunə olmalısan. Vüqar müəllim şəxsi keyfiyyətləri, davranışı ilə daim birləşdirici mövqeyinə sadiq qalaraq əməkdaşlar arasında yaratdığı səmimiyyəti işi ilə də doğruldur. Bu qəzetin ərsəyə gəlməsində əməyi olan hər kəsə minnətdarlığımı bildirir, kollektivə çətin işlərində müvəffəqiyyətlər arzulayıram.”

Mətbuat Şurası İdarə Heyətinin üzvü, “Paralel” qəzetinin baş redaktoru Tapdıq Abbas söylədi ki, “İki sahil” mənim maraqla oxuduğum, daim izlədiyim qəzetdir. “AXCP-nin II qurultayı keçiriləndə bu qəzetdə mübahisəli bir yazı getmişdi. Həmin yazıda o dövrdəki AXC-Müsavat hakimiyyəti ciddi tənqid olunurdu. O tənqidlər bu qəzetə marağı daha da artırdı. Elə o vaxtdan öz cəsarəti, obyektivliyi ilə diqqəti cəlb edən “İki sahil” bu günədək mövqeyinə sadiqliyini səhifələrində dərc olunan yazıları ilə təsdiqləyir. O vaxt iqtidarda olan hakimiyyəti tənqid etmək həqiqətən çətin, bəlkə də qeyri-mümkün idi. Bütün qəzetlərin mətbuata verilən tələblərin əksinə olaraq obyektivlikdən kənar, yerli-yersiz təriflərə geniş yer verdiyi bir zamanda “İki sahil” mövqeyinə uyğun olaraq çətin məqamlarda tutduğu yolu sağlam əqidə ilə davam etdirdi. Qəzetin adı elə seçilmişdi ki, hər bir azərbaycanlının qəlbində yer tuturdu. İkiyə bölünmüş vətəni birləşdirmək həvəsi “İki sahil”in əsas ideyası idi. Mən də bu qəzetin daimi oxucusu olduğum üçün bu yubileyə qəlbən sevinirəm. Qəzet səhifələrində dərc olunan sanballı, savadlı, təhlili yazıları ilə çoxsaylı oxucularının rəğbətini qazanır. Əsas odur ki, bu qəzetin hər bir yazısında dövlətçiliyə sədaqət, xalqa, vətənə məhəbbət duyğuları hiss olunur. Arzum budur ki, qəzetin sonrakı yubileylərində də belə xoş sözlər deyilsin.”

Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının sədri Umud Rəhimoğlu bildirdi ki, adının “İki sahil” olmasına baxmayaraq qəzetin rəhbərliyinin də, əməkdaşlarının da bir mövqeyi olub. “Qəzetin yaşamasını şərtləndirən iki amil var. Qəzetə təsisçinin yardımı, himayəsi və yaradıcı kollektivə düzgün rəhbərlik. Bizim hamımıza doğma olan bu qəzetin yaşamasına daim diqqət və qayğı göstərən ARDNŞ-in rəhbərliyinə bir oxucu kimi öz adımdan təşəkkürümü bildirirəm. Yaradıcı kollektivə isə qolunuza təpər, həmişə sadiq qaldıqları əqidə möhkəmliyi və saflığı arzulayıram.”

ARDNŞ-in mətbuat xidməti və ictimaiyyətlə əlaqələr şöbəsinin rəisi Nizaməddin Quliyev bildirdi ki, qəzetin oxucuları çox olsa da, onların arasında neftçilər üstünlük təşkil edir. Müasir Azərbaycan iqtisadiyyatının təməlini təşkil edən yeni neft strategiyasının geniş işıqlandırılmasında bu qəzetin böyük rolu və xidmətləri var. Bu strategiyanın tətbiqi ilə əldə olunan nailiyyətləri işıqlandırmağın özü qəzetin dövlətçilik mövqeyindən çıxış etdiyini göstərir. Bu gün də Azərbaycanın iqtisadi cəhətdən güclənməsi, xalqın sosial müdafiəsinin etibarlı təminatı elə neft strategiyasının uğurları ilə bağlıdır. Bu strategiyanın həyata keçirilməsində, dünyanın ən tanınmış xarici şirkətləri ilə birgə həyata keçirilən layihələrin əhəmiyyətinin ictimaiyyətə çatdırılmasında qəzetin böyük rolu var. Etiraf edək ki, bu layihələrin həyata keçirilməsində Azərbaycan dövlətini təmsil edən ARDNŞ-in böyük rolu var. Son illərdə beynəlxalq aləmdə belə böyük nüfuz qazanan, sıçrayışla inkişaf edən bu şirkətin xarici ölkələrdəki aktivlərinin həcmi artır. Həmin aktivlər bu gün də, gələcəkdə də Azərbaycan xalqına divident gətirir. ARDNŞ xarici ölkələrdə Azərbaycan xalqını layiqincə təmsil edir. Ölkəmizin mədəni, sosial həyatında böyük dəyişikliklərlə müşahidə olunan dəstək layihələrində də şirkətin payı var. “İki sahil” qəzeti ARDNŞ-in strukturlarında baş verən yenilikləri həssaslıqla izləyir, həyata keçirilən layihələrin əhəmiyyəti barədə oxuculara ətraflı məlumatlar çatdırır. Təsisçi-qəzet münasibətləri haqqında da yalnız xoş sözlər demək olar. Bu illərdə ARDNŞ rəhbərliyi ilə “ İki sahil” arasında heç bir ciddi fikir ayrılığı müşahidə olunmayıb və əminəm ki, olmayacaq da. Çünki qəzetdə çalışanlar Azərbaycan dövlətçiliyinə daim sadiq olan yaradıcı, sağlam fikirli ziyalılardır. Əməkdaşların hamısı Azərbaycanın iqtisadi cəhətdən güclənməsində maraqlı olmaqla, ölkə iqtisadiyyatının aparıcı qüvvələrindən biri olan ARDNŞ-in xidmətlərini mütəmadi olaraq səhifələrində işıqlandırırlar. Ona görə də şirkətin rəhbərliyi bu qəzetin fəaliyyətini yüksək qiymətləndirir. ARDNŞ prezidenti cənab Rövnəq Abdullayevin təbriklərini çatdırır, kollektivin bütün üzvlərini yubiley münasibətilə təbrik edirik. Neft strategiyasının bundan sonra da geniş işıqlandırılmasında “ İki sahil”ə böyük ümidlər bəsləyirik. Əminəm ki, bu inam və ümidlər həmişə olduğu kimi qarşıdakı illərdə də birgə fəaliyyət üçün stimul olacaq.

“Xalq Cəbhəsi” qəzetinin baş redaktoru Elçin Mirzəbəyli qəzetin bütün əməkdaşlarını yubiley münasibətilə təbrik etdi. Mətbuat üçün 20 il böyük zaman kəsiyidir. Maraqlı odur ki, Azərbaycanın dövlət müstəqilliyinin bərpa olunmasının da bu il 20 ili tamam olur. Qəzetin yubileyinin belə bir əlamətdar tarixlə eynilik təşkil etməsinin özü belə “İki sahil”in dövlətçilik mövqeyinə sadiqliyinin əlamətidir. Arxada qalan illər o qədər də asan olmayıb. Çoxlu kataklizmlər, kəşməkəşlərlə üzləşsələr də, “İki sahil”çilər bu problemlərin öhdəsindən birgə çalışmaqla gələn və barmaqla sayıla biləcək qədər az olan mətbu orqanlardandır.

“İki sahil” öz mövqeyinə, prinsiplərinə sadiqliyi ilə seçilən mətbu orqanıdır. Müstəqillik qarşıya qoyulan prinsiplərə sədaqətlə qulluq etməkdir. Mən də qəzetin kollektivinə tutduğu bu yolda uğurlar arzulayıram. Arzu edirəm ki, “Vahid Azərbaycan uğrunda” yola çıxan “İki sahil”in baş xəbərlərindən biri də “Sahillər qovuşdu” olsun.

“Yeni Təfəkkür “ qəzetinin baş redaktoru, Əməkdar jurnalist Şəmsiyyə Kərimova qeyd etdi ki, “İki sahil”in 20 yaşının qeyd olunması məndə qəribə duyğular yaratdı. Mənim də jurnalistlik fəaliyyətimin ən məhsuldar, yaddaqalan və şirin xatirələri bu qəzetlə bağlıdır. Bu qəzet mövqeyindən dönməyən qəzetdir. Bu sadiqliyi yaradan amillərdən ən başlıcası qəzetə rəhbərlik edən, namuslu, işinə bağlı, məsuliyyətli Vüqar müəllimin peşəkarlığı ilə bağlıdır. Bir rəhbər kimi o, qəzetin ən kiçikyaşlı əməkdaşına belə diqqət və qayğı ilə yanaşıb. “İki sahil”də işə qəbul olunduğum günlərimi bu gün də həyatımın ən xoş anı kimi xatırlayıram. O anları yada salanda həmişə duyğulanıram. Peşəkarlıqlarını ictimaiyyət arasında qazandıqları nüfuzları ilə təsdiqləyən həmkarlarıma ən xoş arzularımı diləyir, aldığım “Əməkdar jurnalist” adını da bu qəzetdə qazandığım təcrübənin bəhrəsi kimi yüksək qiymətləndirirəm.

“Zaman-Azərbaycan” qəzetinin baş direktoru Süleyman Ünal vurğuladı ki, zirvəyə çıxmaq asandar. Əsas odur ki, qət etdiyin bu zirvədə qalasan. 20 il yol qət edərək bu ucalığa sahib olan “ İki sahil” hamının maraq göstərdiyi qəzetlərdəndir. Belə bir fikir var. Deyərlər ki, gecənin uzunluğunu xəstə bilər. Jurnalist peşəsinin çətinliyini isə bu peşəni həyat yolu seçənlər anlayarlar. Yəqin ki, qəzetin kollektivinin 20 ildə qət etdiyi yolda çətinliyi də, sevincli anları da olub. Elə jurnalistikanı sevdirən də onun problemləri ilə yaşamaq, yaratmaq, insanlarla daim təmasda olmaqdır. Mən də bu kollektivə xoş arzularımı çatdırıram. Bir təklifimi də bildirmək istəyirəm. Burada qeyd olunduğu kimi qəzetin təsisçisi ARDNŞ-in xarici ölkələrdə xeyli təmsilçiliyi var. ARDNŞ-in Gürcüstandakı törəmə müəssisələrində bu qəzetin yayılması məncə daha faydalı olardı. Arzu edirəm ki, “İki sahil”in səsi Azərbaycanın nişanəsi, nəfəsi duyulan bütün sahillərdə eşidilsin.

“Qaya” Mətbuat Yayımı Şirkətinin rəhbəri Xanhüseyn Əliyev qeyd etdi ki, “İki sahil” Azərbaycanın bütün bölgələrində tanınır, böyük həvəslə oxunur. Qəzetin kollektivinə ən səmimi arzularımı həm də bir oxucu kimi çatdırıram.

“Xalq qəzeti”nin redaktor müavini Tahir Aydınoğlu söylədi ki, qəzet bolluğunun hiss olunduğu mətbuat dəryasında üzən gəmilər və qayıqlar var. Belə bir məqamda oxucu rəğbəti qazanmaq o qədər də asan deyil. “İki sahil” qəzeti ilə yaradıcılıq əlaqələrimiz olub. İlk gündən qəzetin yaradıcı kollektivi arasında hiss olunan səmimiyyət, peşəkarlıq yazılarında da hiss olunur.

ARDNŞ-in Neft və qaz hasilatı şöbəsinin müdiri Əsgər Aslanov qeyd etdi ki, “İki sahil” qəzeti ilk günlərdən çoxsaylı neftçilər ailəsində özünəməxsus yer tutub. Neft sənayesinin 20 illik fəaliyyəti ilə maraqlanmaq istəyənlər üçün “ İki sahil” zəngin ensiklopediya sayıla bilər. 1990-cı illərin əvvəllərində neft sənayesində mövcud olan çətin şəraitdə belə qəzet öz mövqeyinə sadiq qaldı. 1994-cü ildən başlayan neft strategiyasının həyata keçirildiyi bütün illərdə bu qəzet neftçilər ailəsinin bir üzvü kimi daim sıralarımızda olub. Obyektiv, təhlili məqalələri ilə diqqəti çəkib. Buna görə də ARDNŞ ilə “ İki sahil” arasında həmişə sağlam münasibətlər olub, bu gün də eyni səmimiyyət davam etməkdədir. Qəzetin kollektivinə uğurlar arzulayıram.

Demokratik Jurnalistlər Liqasının sədri Yadigar Məmmədli bildirdi ki, ARDNŞ-in Azərbaycanın iqtisadi inkişafındakı xidmətləri göz qabağındadır. Şirkətin gənclərin xarici ölkələrdə təhsil almaları üçün maddi yardımları bir çox ailələrin sevincinə səbəb olub. “İki sahil” qəzeti bu məsələlərə də diqqət yetirib. Mən də qəzetə uğurlar arzulayıram.

“Ekspress” qəzetinin baş redaktoru Qəzənfər Bayramov vurğuladı ki, “İki sahil”in çox uğurlu missiyası var və inanıram ki, qəzet bu vəzifəni uğurla davam etdirəcək: “Ümid edirəm ki, gələcəkdə nəvələrimiz, nəticələrimiz “İki sahil”in yüz illik yubileyini qeyd edəcəklər. Mən bu tədbiri təşkil edənlərə də öz təşəkkürümü bildirirəm, uğurlar arzulayıram.”

“Palitra” qəzetinin baş redaktoru Namiq Əliyev qəzeti ilk günlərdən tanıdığını qeyd etdi: “”İki sahil” qəzeti sovet hökumətinin dağıldığı bir vaxtda ortaya çıxdı, mövcud boşluğu doldurdu. Cənab Prezident İlham Əliyev bu yaxınlarda belə bir fikir bildirdi ki, Azərbaycanın qazı hələ bundan sonra 100 il Azərbaycana və digər dövlətlərə çatacaq. Bu o deməkdir ki, hələ 100 il bundan sonra da bu qəzet nəşr olunacaq. “İki sahil”ə gələcək fəaliyyətində uğurlar arzulayıram.”

“Ədalət” qəzetinin baş redaktorunun müavini Məzahir Əhmədoğlu qeyd etdi ki, çıxış edənlər qəzetin tarixi, onun missiyası haqqında çox geniş danışdılar. Doğrudan da “İki sahil” deyilən xoş sözlərə layiqdir. Bu gün qəzet yüksək səviyyədə nəşr olunur. İstər xəbərlərin, materialların seçilməsində, istər tərtibat məsələlərində yüksək peşəkarlıq hiss olunur. Bu da qəzet rəhbərliyinin uzun illər ərzində formalaşdırdığı mühitdən irəli gəlir. Mən həm öz adımdan, həm “Ədalət” qəzeti adından, həm də qələm yoldaşlarım adından “İki sahil”i 20 illik yubiley münasibətilə təbrik edirəm. İnanıram ki, qəzet hər zaman oxucuların diqqətində olacaq.

“SƏS” İnformasiya Agentliyinin icraçı direktoru Vəli Vəliyev qəzetin rəhbərliyini və kollektivini yubiley münasibətilə təbrik etdi. “Gün o gün olsun ki, çoxlu yubileyləriniz qeyd edilsin.”

“Respublika gəncləri” qəzetinin baş redaktoru Nazilə Rafiq isə 1992-ci ildən bu qəzetdə çalışdığını bildirdi. “Mən o dövrdə “İki sahil”in yaşadığı çətin anların şahidi olmuşam. Biz o vaxt kiçik bir kollektivlə qarşımıza bir məqsəd qoymuşduq-dövlətçiliyə, Heydər Əliyev ideyalarına ləyaqətlə xidmət etmək. İnanıram ki, ötən 20 il ərzində “İki sahil” bu vəzifənin öhdəsindən layiqincə gəlməyi bacardı. İndi də bu yolu baş redaktor Vüqar Rəhimzadənin rəhbərliyi altında qəzetin peşəkar kollektivi yüksək səviyyədə davam etdirir.

“İki sahil” operativ xəbərləri, analitik yazıları, araşdırmaları ilə artıq öz geniş oxucu kütləsini qazanmış bir qəzetdir. “İki sahil”, həmçinin tərtibatı ilə də ölkə mətbuatında öz dəsti-xətti ilə seçilir. Bütün bu keyfiyyətlər isə qəzetin hələ bundan sonra uzun illər uğurla fəaliyyət göstərəcəyindən və bundan da çox oxucu rəğbəti qazanacağından xəbər verir. Mən baş redaktor Vüqar Rəhimzadəni və qəzetin bütün kollektivini 20 illik yubiley münasibətilə təbrik edir, onların hər birinə cansağlığı, yeni-yeni yaradıcılıq uğurları arzulayıram.”

Azərbaycan Jurnalistlər Birliyinin katibi Şahin Babayev “İki sahil”in bir qrup əməkdaşına təşkilatın diplomlarını təqdim etdi.

Sonda “İki sahil” qəzetinin baş redaktoru, Əməkdar jurnalist Vüqar Rəhimzadə göstərilən bu diqqətə görə Mətbuat Şurasının sədri Əflatun Amaşova və həmkarlarına minnətdarlığını bildirdi” “Mətbuat Şurasında keçirilən bu tədbir qəzetimizin tarixində çox əlamətdar günlərdən biri kimi qalacaq. 1991-ci ildə “İki sahil” çox çətin bir şəraitdə yarandı. Ancaq bu gün ölkəmizdə həyatın bütün sahələrində olduğu kimi, media sahəsində də sürətli inkişaf mövcuddur. Azad söz, azad fikir üçün hər bir şərait yaradılıb.

Mən, həmçinin təsisçimiz olan Dövlət Neft Şirkətinin rəhbərliyinə də minnətdarlığımı bildirirəm. Sizi əmin edirəm ki, “İki sahil” hər zaman Azərbaycan dövlətinə və xalqına xidmət edib və gələcəkdə də bu xətt üzrə öz fəaliyyətini davam etdirəcək.”

Xuraman İsmayılqızı,

Yeganə Əliyeva,

Nail Rəhimzadə

İki sahil.- 2011.- 13 iyul.- S.11-13.