Güclü Azərbaycan qürur mənbəyimizdir

Dövlət müstəqilliyi – 20

Dövlət başçısı İlham Əliyevin bu fikri ölkəmizin müstəqillik tarixində qazandığı uğurların ümumiləşdirilmiş ifadəsidir

Xalqımız daim azadlıq, müstəqillik qazanmaq arzusunda olmuşdur. 1991-ci ilin oktyabrın 18-də Müstəqillik Aktının qəbul olunmasına baxmayaraq Azərbaycan xalqı bu sevinci yalnız ulu öndər Heydər Əliyevin hakimiyyətə qayıdışından sonra yaşamağa başladı. Müstəqillik 1991-93-cü illərdə formal xarakter daşıyırdı. Bir tərəfdən daxili çəkişmələr və hakimiyyət uğrunda aparılan mübarizə, vətəndaş müharibəsi, digər tərəfdən isə Ermənistanın Azərbaycana etdiyi təcavüz siyasəti nəticəsində torpaqlarımızın işğal altına düşməsi şəraitində yaşamışıq.

1993-cü ildə Azərbaycan xalqının tələbi ilə ulu öndər Heydər Əliyevin siyasi hakimiyyətə gəlişindən sonra ölkədə vəziyyət sabitləşdi. 1993-2003-cü illər, sözün əsl mənasında, sabitlik və inkişaf illəri olmuşdur. Məhz o illər ərzində Azərbaycanda dövlətçiliyin əsasları quruldu. O illərdə başlanmış və bu gün uğurla davam etdirilən həm siyasi, həm iqtisadi islahatlar Azərbaycanın dünya birliyinə inteqrasiya etmək istiqamətində atılmış addımlarını təmin etdi. O illərdə ulu öndər Heydər Əliyev tərəfindən başlanmış neft strategiyası bu gün Azərbaycan xalqının rifah halının yaxşılaşmasına, ölkəmizin müstəqil dövlət kimi yaşamasına xidmət edir. O illərdə hüquqi islahatlar aparıldı. Bir sözlə, 1993-2003-cü illər Azərbaycanın müstəqil dövlət kimi inkişaf etdirilməsində həlledici rol oynamışdır. Dövlət başçısı İlham Əliyev bildirir: “Bu gün biz Heydər Əliyev siyasətinə sadiq qalaraq bu siyasəti davam etdiririk, onu yaşadırıq. Bu illərdə biz Heydər Əliyev siyasətinin təntənəsini görürük. Çünki onun fiziki yoxluğu şəraitində bu siyasət yaşayır və yaşayacaqdır. Azərbaycanın son illər ərzində keçdiyi yol bir daha sübut edir ki, 1993-cü ildə Azərbaycan xalqı düzgün seçim etmişdir və bu, yeganə düzgün seçim idi. Azərbaycan xalqı bu seçimə sadiqdir və biz müxtəlif mərhələlərdə bunu görmüşük.”

“İyirmi il həm böyük, həm də çox da böyük olmayan müddətdir. İyirmi il ərzində çox iş görmək olar, heç nə görməmək də olar. Azərbaycanda son 17 ildə, müstəqilliyimizin birinci iki ilini çıxmaq şərti ilə, doğrudan da tarixi nailiyyətlər əldə edilmişdir. Bu gün danışdığımız bütün uğurlar bu müstəqilliyin nəticəsidir” söyləyən dövlət başçısı İlham Əliyev bildirir ki, ölkəmizin bu illər ərzində müxtəlif sahələrdə qazandığı uğurların düzgün təbliği qarşımızda dayanan əsas vəzifələrdəndir. Prezident İlham Əliyevin 21 yanvar 2011-ci il tarixli “Azərbaycan Respublikasının dövlət müstəqilliyinin bərpasının iyirminci ildönümü haqqında” sərəncamı da bu məqsədə xidmət edir. Sənəddə də qeyd olunduğu kimi, Azərbaycanın dövlət müstəqilliyi respublikamızın hər bir vətəndaşı üçün ən böyük sərvətdir. Azərbaycanın dövlət müstəqilliyinin bərpasının iyirmiillik yubileyinin ölkəmizin həyatında müstəsna əhəmiyyət daşıyan ictimai-siyasi hadisə olduğunu nəzərə alaraq imzalanan sərəncama əsasən 20 illik yubileyin ölkəmizdə dövlət səviyyəsində qeyd olunması müstəqillik illərində Azərbaycanın keçdiyi zəngin inkişaf yolunda qazandığı parlaq nailiyyətlərə bələdçilik edərək, uğurların təbliğində mühüm rol oynayacaq.

Bu günün reallıqları ulu öndər Heydər Əliyevin söylədiyi: “Biz bütün bu çətinliklərdən keçdik, bütün maneələrin qarşısını aldıq, Azərbaycanın düşmənlərinə layiqli cavablar verdik, ölkəmizin dövlət müstəqilliyini qoruduq, Azərbaycanı parçalanmaq təhlükəsindən xilas etdik. Azərbaycanın dövlət müstəqilliyini yaşadırıq və bundan sonra da yaşadacağıq!” fikrinin bir daha təsdiqidir.

Ulu öndər Heydər Əliyevin yaradıcısı olduğu Yeni Azərbaycan Partiyasının II qurultayında çıxışı zamanı qarşıya qoyduğu vəzifələri bir daha xatırlatmaq istərdik. Gənclərin böyük əksəriyyətinin Azərbaycanın müstəqillik yolunun nə qədər ağır dövrdən keçməsindən məlumatlı olmadığını önə çəkən ümummilli lider Heydər Əliyev bildirmişdir ki, biz elə nəsil tərbiyə etməliyik ki, onlar nəinki bizim dövrümüzdə, hətta bizdən sonra da Azərbaycanı fəlakətlərdən qorusunlar. Gənclər düzgün yolla, milli hisslər yolu ilə getməlidirlər.

20 il zaman baxımından qısa dövr olsa da, qazanılan uğurların miqyası böyükdür. “İqtisadiyyatı güclü olan dövlət hər şeyə qadirdir” bəyan edən ulu öndər Heydər Əliyevin 17 il əvvəl əsasını qoyduğu yeni neft strategiyası, bu strategiyanın təməlində dayanan “Əsrin müqaviləsi” Azərbaycanın bugünkü və gələcək yoluna işıq saçır. Azərbaycanın zəngin təbii resurslarının dünya bazarlarına çıxarılması, neft gəlirlərini ölkəmizin hərtərəfli inkişafına, xalqımızın rifahının yüksəlməsinə sərf edilməsi ulu öndərin uzağa hesablanmış fəaliyyətində əsas yer tuturdu.

“Əsrin müqaviləsi”nin imzalanması mərasimində çıxış edən ulu öndər Heydər Əliyev bildirmişdir: “Biz bu müqaviləni imzalamaqla Azərbaycan Respublikasının suveren hüquqlarının bərqərar olduğunu, xalqımızın öz sərvətlərinə sahib olduğunu dünyaya bir daha nümayiş etdiririk. Biz bu müqaviləni imzalamaqla Azərbaycan Respublikası ilə dünyanın inkişaf etmiş dövlətləri, onların ən böyük şirkətləri arasında əlaqələr yaradır, Azərbaycan iqtisadiyyatının dünya iqtisadiyyatına, azad bazar iqtisadiyyatına qoşulması üçün əsas yaradırıq. Biz bu müqaviləni imzalamaqla dünyaya bir daha nümayiş etdiririk ki, Azərbaycan Respublikası demokratik və hüquqi dövlətdir.”

Azərbaycan neftinin Ceyhan terminalına çatması münasibətilə xalqa müraciətində Prezident İlham Əliyev ulu öndər Heydər Əliyevin neft strategiyasının əhəmiyyətini bir daha açıqlayaraq bildirmişdir ki, “Əsrin müqaviləsi” imzalanmasaydı, bu gün Azərbaycanın iqtisadi imkanlarının, beynəlxalq aləmdə yeri və rolunun hansı səviyyədə olduğunu düşünmək çətin olmazdı. Azərbaycan neftinin məhz 28 may- Respublika Günündə Ceyhan terminalına çatmasının rəmzi mənası olduğunu bir daha açıqlayan dövlət başçısı vurğulamışdır ki, bu, Azərbaycanın dövlət müstəqilliyinin möhkəmləndirilməsində “Əsrin müqaviləsi”nin rolunun təsdiqidir.

“Əsrin müqaviləsi”nin imzalanması kimi mürəkkəb işi ulu öndər Heydər Əliyev həyata keçirdisə, neft strategiyasının əsas tərkib hissəsi olan layihələrin reallaşması, BTC-nin tikilib istifadəyə verilməsi, Azərbaycan neftinin dünya bazarlarına çıxarılması, neft gəlirlərinin ölkəmizin hərtərəfli inkişafına yönəldilməsi Prezident İlham Əliyevin uğurlu siyasətinin nəticəsidir. Bu gün Azərbaycan beynəlxalq əhəmiyyətli enerji layihələrinin əsas təşəbbüsçüsü və iştirakçısı kimi tanınır, mövqelərini möhkəmləndirir. Ölkəmizin iştirakı olmadan bölgədə hansısa iqtisadi və siyasi layihənin həyata keçirilməsinin mümkünsüzlüyü artan imkanların təsdiqidir. “Biz təşəbbüsləri gerçəkliyə çeviririk” söyləyən dövlət başçısı İlham Əliyev hər zaman bəyan edir ki, reallaşan layihələr dostluğa, əməkdaşlığa xidmət edir. Bu layihələr ölkələr arasında münasibətlərin qurulmasında körpü rolunu oynayır.

Uğurlu neft siyasəti iqtisadiyyatın şaxələndirilməsinə geniş yol açıb. Bu gün qeyri-neft sektorunun inkişafı, əhalinin həyat şəraitinin təmin olunmuş səviyyəyə çatması ulu öndərin başladığı neft strategiyasının uğurla davam və inkişaf etdirildiyinin təsdiqidir. “Azərbaycan nefti, Azərbaycanın təbii sərvətləri Azərbaycan xalqının xidmətindədir və bu, əsas məqsəddir” deyən dövlət başçısı vurğulayır ki, “Əsrin müqaviləsi” ölkəmizə sabitlik, tərəqqi gətirmiş, Azərbaycanın qüdrətli dövlətə çevrilməsini təmin etmişdir. Bu gün ulu öndər Heydər Əliyevin böyük uzaqgörənliklə yaratdığı Dövlət Neft Fondunun vəsaitlərinin həcmi 30 milyard dollardan artıqdır. Fond dövlət siyasətinin prioritetlərini müəyyənləşdirir. Fondun vəsaitləri hesabına mühüm əhəmiyyətli sosial-iqtisadi layihələr həyata keçirilir. Vəsaitlər eyni zamanda günümüzün əsas tələbi olan kadr hazırlığı probleminin həllinə də yönəldilir. Belə ki, dövlət başçısı İlham Əliyevin sərəncamı ilə təsdiqlənən gənclərin xarici ölkələrdə təhsili ilə bağlı Dövlət Proqramı bu vəsaitlər hesabına maliyyələşdirilir.

Azərbaycanın uğurları harda yaşamasından asılı olmayaraq bütün soydaşlarımızı sevindirir, onlara üzərilərinə düşən məsuliyyəti daha yüksək səviyyədə yerinə yetirmələrinə stimul verir.

Azərbaycanın 20 illik müstəqillik tarixinin uğurlarından bəhs edərkən xarici siyasətin əsas tərkib hissələrindən biri olan diaspor quruculuğu prosesinə xüsusi diqqət yetirməyə böyük zərurət duyulur. Diasporun bir dövlətin xaricdə varlığı demək olduğunu nəzərə alsaq, bu zərurət özü-özlüyündə açıqlanar. Müasir Azərbaycanın qurucusu, xalqımızın ümummilli lideri Heydər Əliyev çoxşaxəli siyasi fəaliyyətində daha mühüm bir tarixi missiyanı- dünyanın müxtəlif ölkələrində yaşayan soydaşlarımızın milli birliyinin ideoloqu, təbliğatçısı və təşkilatçısı kimi çətin, ancaq vacib bir vəzifəni üzərinə götürdü və daim diqqətdə saxladı. Ümummilli liderin “Kim Azərbaycanı sevirsə, kim Azərbaycanın müstəqil dövlət olmağını istəyirsə, kim Azərbaycanın işğal edilmiş torpaqlarının azad olunmasını istəyirsə, kim Azərbaycanın ərazi bütövlüyünü istəyirsə, o bu bayraq altında, bu sözlər altında, bu amal ətrafında birləşməlidir” çağırışı harada yaşamasından asılı olmayaraq bütün soydaşlarımızı azərbaycançılıq ideyası ətrafında sıx birləşdirdi. Ulu öndər Heydər Əliyev dünyanın müxtəlif ölkələrinə səpələnmiş soydaşlarımızın vahid mərkəzdən idarə olunması təşəbbüsünü irəli sürərək, 2001-ci ildə Dünya azərbaycanlılarının I qurultayının Bakıda keçirilməsinə nail oldu.

Bu siyasət dövlət başçısı İlham Əliyev tərəfindən uğurla davam etdirilir. Belə ki, 2006-cı ilin martında Dünya azərbaycanlılarının II qurultayı, bu ilin iyulunda isə III qurultayı keçirildi. II qurultaydan ötən dövr ərzində Azərbaycanın ictimai-siyasi, iqtisadi, mədəni həyatında, diplomatiya sahəsində qazandığı uğurlardan məmnunluq hisslərini qeyd edən qurultay nümayəndələrinin, qonaq qismində iştirak edən təmsilçilərin açıqlamalarından bir daha aydın oldu ki, Azərbaycan daim yeniləşir, müasirləşir, dünyanın ən qabaqcıl ölkələrinin təcrübələrinin tətbiqinə çalışır. Bu yenilikləri şərtləndirən ən mühüm amillərdən biri ölkəmizin hər bir dövrün cağırışlarına uyğun addım ataraq, qabaqcıl texnologiyaların tətbiqi ilə uğurların davamlılığını təmin etməsidir. Son beş ildə ölkəmizin inkişafı böyük heyranlıqla qarşılandısa, 20 ilin uğurlarının hansı hissləri yaratdığını geniş təhlil etməyə ehtiyac yoxdur. Dövlət başçısı İlham Əliyevin “Güclü Azərbaycan qürur mənbəyimizdir” fikri 20 illik müstəqillik tariximizin uğurlarının ümumi ifadəsidir.

Əsrlər boyu müstəqillik həsrətində olan xalqımız milli azadlığını görüb sevinir, özünü dünyanın xoşbəxt xalqlarından biri hesab edir. Bu günün reallıqları fonunda ulu öndər Heydər Əliyevin vaxtilə söylədiyi bu fikri xatırlatmaq istərdik: “Müstəqil Azərbaycan Respublikası yaşayacaq və demokratiya prinsipləri, demokratik iqtisadiyyat sahəsində başqa dövlətlər üçün nümunə olacaqdır”.

Yeganə Əliyeva

İki sahil.- 2011.- 7 sentyabr.- S. 4.