Möhtəşəm siyasi təşkilat

Yeni Azərbaycan Partiyası

Real, konkret iş görməklə ölkə iqtisadiyyatının güclənməsində fəallığı artıran iqtidar partiyası ölkədə birlik və həmrəyliyin qarantı, dövlətçiliyin, milli maraqların qorunmasına xidmət edən sağlam dialoq və müzakirələrin tərəfdarıdır

Azərbaycanın dünya miqyasında qüdrətli dövlət kimi tanınmasında ümummilli lider Heydər Əliyevin hazırladığı inkişaf strategiyası nə qədər əhəmiyyətlidirsə, ölkədə demokratiyanın təntənəsi və siyasi sabitliyin bərqərar olunması üçün göstərdiyi xidmətlər eyni dərəcədə vacib idi. Qısa da olsa ötən əsrin sonunda ölkədə baş verənlərə nəzər salaq.

Azərbaycanın müstəqilliyinin əbədiliyinə, gələcəyinə şübhələrin artdığı ölkədə xaos, hərc-mərclik, qanunsuzluq və hakimiyyətsizliyin baş alıb getdiyi o vaxtlarda insanlar təlaş içərisində idi. Daxili çəkişmələr, vəzifə hərisliyi, bəzi qüvvələr arasında davam edən siyasi oyunlar demək olar ki, xalqımızın sabaha ümidini heçə endirmişdi. Azərbaycanda baş verən biri-birindən mürəkkəb, həlli çətin problemlərin aradan qaldırılması üçün qüdrətli bir liderin rəhbərliyini, insanları arxasınca apara biləcək güclü siyasi partiyanın yaranmasını zamanın tələbi kimi dərk edənlər aydın başa düşürdülər ki, ölkəmizə qarşı yönələn xarici qüvvələrin təsir dairəsinin gücləndiyi bir zamanda respublikanı xaosdan, insanları gözləyən və təşvişə salan narahatlıqdan qurtarmaq o qədər də asan deyildir. Belə bir zamanda bütün nəzərlər Naxçıvana yönəldi. Ümid yeri kimi muxtar respublika Ali Məclisinin sədri Heydər Əliyevdən nicat gözləyənlərin sayı artdı.

Keçirilən sorğulardan da aydın oldu ki, Azərbaycanı bu vəziyyətdən yalnız güclü siyasi partiyanın və qətiyyətli liderin iradəsi ilə xilas etmək mümkündür. Müxtəlif dövrlərdə rəhbərliyi zorla ələ keçirən səbatsız və siyasi cəhətdən piyada, idarəetmədə səriştəsi olmadığı üçün zor tətbiq etməklə kreslolarını qorumağa çalışan “hakimiyyət” hərislərinin özündən müştəbehliyi sayəsində müstəqilliyimizin itirilmək təhlükəsi qarşısında olduğunu dərk edən ölkə ziyalılarının, elm, mədəniyyət, incəsənət xadimlərinin yekdil rəyi bu idi ki, obyektiv qanunauyğunluqlardan çox subyektiv mülahizələrlə idarə olunan respublikanı gözlənilən fəlakətlərdən, Azərbaycanı yox olmaq təhlükəsindən ancaq zəngin dövlətçilik təcrübəsinə malik Heydər Əliyev qətiyyəti, iradəsi qurtara bilər. Vəziyyətdən çıxış yolu kimi insanlara doğru yol göstərəcək bir partiyanın yaradılması və o təşkilata Heydər Əliyev kimi müdrik siyasətçinin başçılıq etməsi ideyası yarandı və qərara alındı. 1992-ci ildə Naxçıvan MR Ali Məclisinin sədri işləyən Heydər Əliyevə ünvanlanan müraciətdə qeyd olunduğu kimi yaradılması nəzərdə tutulan mütəşəkkil, siyasi yetkinlik məktəbi olacaq Yeni Azərbaycan Partiyası məhz ulu öndər kimi dövlət xadiminin rəhbərliyi altında xalqımızı üzləşdiyi bəlalardan qoruya bilər. “Əminik ki, YAP müdrik ağsaqqalımız Heydər Əliyevin ətrafında birləşəcək dərin zəkalı, təmiz əxlaqlı, yüksək mədəniyyətli, müstəqil düşüncəli, milli qürurlu və peşəkar insanların siyasi partiyasına çevriləcək.”

Beləliklə, 1992-ci il noyabrın 21-də Naxçıvanda 550 nəfərdən artıq iştirakçı ilə keçirilən təsis konfransında yekdil səslə Yeni Azərbaycan Partiyasının sədri seçilən, siyasi proseslərin müsbət məcrada inkişafı, plüralizm , söz, fikir azadlığının bərqərar olması üçün ilk növbədə demokratiyanın əsas tələbi olan çoxpartiyalılıq sisteminə keçidi zəruri hesab edən ümummilli lider Heydər Əliyevə xilaskarlıq missiyasını yerinə yetirmək kimi məsuliyyətli vəzifə həvalə olundu. Ulu öndərin Azərbaycanın müstəqilliyinin qorunması istiqamətində gördüyü işlər müəyyən mənada başçılıq etdiyi partiyanın fəaliyyəti ilə birbaşa bağlıdır.

Eyni fikirlər ulu öndərin ölkə ziyalılarının müraciətinə cavabında olduğu kimi az müddətdə tərəfdaşları artan YAP-ın bəyanatında da əksini tapdı: “YAP-ın başlıca proqram məqsədi dövlət müstəqilliyinin möhkəmləndirilməsi, ərazi bütövlüyü, sivilizasiyalı , demokratik, hüquqi dövlətin yaradılması, möhkəm əmin- amanlıq və ictimai həmrəylik, sabit və sosial istiqamətli iqtisadiyyat yaratmaqdan, irqindən, milliyyətindən, dinindən və dilindən asılı olmayaraq şəxsiyyətin hüquq və azadlıqlarının hərtərəfli inkişafı və etibarlı müdafiəsini təmin etmək məqsədilə geniş demokratik islahatların həyata keçirilməsi uğrunda mübarizə aparmaqdan ibarətdir.” Şüarı müxalifət naminə müxalif olmamaq, yalnız obyektivliyə əsaslanan partiyanın yarandığı şəraitin və siyasi hadisələrin mürəkkəbliyini nəzərə alan ümummilli lider Heydər Əliyev bildirirdi ki, YAP müxalif partiya kimi yaransa da, indiki müxalifətdən fərqli olaraq biz dövlətə, dövlətçiliyə yox, o vaxtkı antimilli, səbatsız iqtidara qarşı müxalifətdə idik. İlk gündən siyasi mədəniyyət , siyasi davranış nümunəsi göstərən Yeni Azərbaycan Partiyası mübarizəni silahla, daş-kəsəklə, xalqın milli mənliyinə zərbə vuran qərəzli təbliğatla yox, sağlam ideologiya, qələmlə aparır, demokratiyadan qaynaqlanan sivil qaydalara əməl edir, xalqın iradəsinə arxalanır. “ YAP o vaxtkı mövcud vəziyyətdə bütün Azərbaycan xalqının mənafeyinə xidmət etmək üçün və xalqın o ağır dövründə ölkəmizin qarşısında duran məsələlərin həll edilməsi üçün zamanın tələblərinə uyğun olaraq zərurətdən yaranmış bir partiyadır” söyləyən ulu öndər vurğulayırdı ki, azadlıq, müstəqillik istəyini ruhunda, qanında, canında yaşadan Azərbaycan xalqında milli təfəkkür və məfkurəyə bağlılıq hissi partiyanın hər üzvünün fəaliyyət prinsipidir.

İllərin təcrübəsi göstərdi ki, YAP yarandığı gün qarşıya qoyduğu məqsəd və məramına sadiq qalmışdır. Fəaliyyətini xalqın istəyinə, dövlətin maraqlarına uyğun müəyyənləşdirən, xalqla birliyini digər partiyaları zəiflətmək, onlara qarşı qərəzli mövqe göstərməklə yox, gördüyü əməli işləri ilə sübut edən YAP-a artan inamın yenilməzliyi də təşkilatın demokratik şərtlər əsasında inkişaf yolu ilə irəliləməsidir.

Xalq partiyası kimi yaranan və düşünülmüş proqramı olan YAP-ın fəaliyyətinin ana xəttini təşkil edən Azərbaycan vətəndaşlarının yaxşı, təhlükəsiz yaşaması, ölkə iqtisadiyyatının dinamik inkişafında avanqard rolunu möhkəmləndirməsi istiqamətində gördüyü işlər haqqında əlavə izahata ehtiyac yoxdur. 2004-cü ildən partiyaya rəhbərlik edən Prezident İlham Əliyevin vurğuladığı kimi cəmiyyətin bütün təbəqələrinin birləşdiyi YAP nəinki Azərbaycanın, bölgənin ən güclü siyasi qüvvəsidir. Ölkəmizdə siyasi münasibətlər sivil müstəvidə inkişaf edir. Demokratiyanın tələblərinə uyğun formalaşmış və təkmilləşdirilən iqtisadi, siyasi, sosial islahatlar davam etdirilməklə mütərəqqi təcrübənin tətbiqində partiyanın hər bir üzvü qabaqcıl mövqeyini qoruyur.

Gənc, müstəqil dövlət olan Azərbaycanın demokratiya sahəsində qazandığı təcrübəni təqdir edərək başqa ölkələrə nümunə göstərən beynəlxalq ekspertlərin vurğuladığı kimi ölkəmizin siyasi mənzərəsi çox müsbətdir. Ulu öndər Heydər Əliyevin müəyyənləşdirdiyi neft strategiyasının tətbiqi ilə dinamik inkişaf yolu ilə dövlətçiliyin möhkəmlənməsini təmin edən, ölkəmizi dünya birliyində qüdrətli respublika kimi tanıdan, bölgənin güclü siyasi təşkilatına başçılıq edən yüksək intellektə və potensiala malik lider Prezident İlham Əliyev dünya siyasətini müəyyənləşdirən qlobal problemlərin həllində də müdrikliyi, müasir düşüncə tərzi və intellekt səviyyəsi ilə fərqlənir.

ATƏT, Avropa Şurası kimi beynəlxalq təşkilatların iştirakı ilə keçirilən siyasi partiyalararası dialoqlarda iqtidar partiya kimi sivil mübarizə üsullarına üstünlük verən YAP opponentləri olan müxalif qüvvələrdən fərqli olaraq bütün danışıqlarda dövlətçilik, azərbaycançılıq ideyalarının qorunması üçün siyasi mədəniyyət nümunəsi göstərmiş, bütün siyasi partiyalara hörmət və ehtiramla yanaşır.

Bu gün Azərbaycanda ÜDM-in həcmi 3 dəfə artmış, dövlət büdcəsi 12 dəfə yüksələrək 20 milyard dollara çatdırılmışdır. Ölkənin valyuta ehtiyatları 38 milyard dolları ötmüş, əhalinin pul gəlirləri 17 faiz çoxalmışdır. Əhalinin sosial müdafiəsinin daha etibarlı təminatı üçün respublikada ən müasir pensiya -sığorta sistemi tətbiq olunur. Coğrafiyası genişlənən sənaye və emal müəssisələrinin fəaliyyəti ilə ölkədə 1 milyona yaxın iş yeri açılmış, əhalinin məşğulluq səviyyəsinin yüksəlməsi nəticəsində yoxsulluq səviyyəsi 9,1 faizə endirilmişdir. Deyilən və gündəlik həyatımızda müşahidə olunan bu uğurların qazanılmasında aparıcı qüvvə kimi iştirak edən və ətrafında 550 mindən artıq üzvü birləşdirən YAP bir məqsəd naminə çalışır - ümummilli lider Heydər Əliyevin “ Azərbaycan dünyaya günəş kimi doğacaq” tövsiyəsini reallaşdırmaq.

Ölkəmizin getdikcə güclənən diplomatiyasının uğurları, dünya birliyində möhkəmlənən mövqeyi də təsdiqləyir ki, ulu öndərin bu arzusu həqiqətə çevrilib. YAP-ın təşəbbüsü ilə ölkəmizdə keçirilən “Sivilizasiyaların dialoqu: siyasi partiyaların rolu” kimi beynəlxalq konfranslar göstərir ki, dünya dövlətləri ilə əməkdaşlığa böyük önəm verən Azərbaycanın, iqtidar partiyası kimi YAP-ın xarici əlaqələri də genişlənməkdədir.

Siyasi vədlərə deyil, konkret faktlara qiymət verən xalqımızın YAP-a rəğbəti keçirilən prezident, parlament, bələdiyyə seçkilərində də aydın ifadə olunur. Bütün siyasi kampaniyalarda vahid proqram əsasında, birlik, həmrəylik şəraitində iştirak edən YAP-ın bütün seçkilərdə qalib olması partiyanın xalqla birliyinin ifadəsidir. Bütün seçkilərin ədalət prinsipləri və obyektivlik şəraitində keçirilməsini tələb edən partiyanın sədri Prezident İlham Əliyev seçki praktikasının təkmilləşdirilməsi istiqamətində həyata keçirdiyi tədbirlər, imzaladığı sərəncamlar ölkədə demokratiyanın təntənəsinin bariz nümunəsi kimi beynəlxalq müşahidəçilərin də diqqətini cəlb edir. Xarici ekspertlərin “Azərbaycan demokratiyası başqa ölkələr üçün nümunə ola bilir” kimi sözləri ölkədə artıq təkmilləşən seçki institutlarının qazandığı təcrübəyə, bu cür demokratik şəraitin yaradılmasında qarşılıqlı anlaşma prinsiplərinə hörmətlə yanaşan YAP-ın fəaliyyətinə verilən yüksək qiymətdir. Qazanılan uğurlar yarım əsrə yaxın müddətdə Azərbaycanda siyasi və dövlət xadimlərini formalaşdıran Heydər Əliyev məktəbinin qələbəsi, bəşəri və Qərb dəyərlərinə ölkəmizdə milli dövlətçilik əsasında verilən qiymətdir. Dövlət başçısı kimi “ Mən hər bir Azərbaycan vətəndaşının prezidentiyəm” vədini əməli işi ilə doğruldan cənab İlham Əliyev iqtidar partiyasının rəhbəri kimi daxili sabitliyin, siyasi partiyalar arasında həmrəyliyin qarantıdır.

Xuraman İsmayılqızı

İki sahil.- 2011.- 8 sentyabr.- S. 6.