Tələbə qəbulu sistemində təkmilləşdirmə tədbirləri davam etdirilir

TQDK-nın sədri M.Abbaszadə keçirdiyi mətbuat konfransında ötən ilin elmi-statistik nəticələrini təhlil edərkən açıqladı ki, ən hazırlıqlı məzunlar II və IV qruplara üstünlük verirlər

Tələbə Qəbulu üzrə Dövlət Komissiyasında (TQDK) 2010-2011-ci tədris ili üçün tələbə qəbulunun nəticələrinin elmi-statistik təhlilinə aid mətbuat konfransında “Abituriyent” jurnalının da təqdimatı keçirildi.

Tələbə qəbulunun müxtəlif parametrlər üzrə göstəricilərini açıqlayan TQDK-nın sədri Məleykə Abbaszadə ixtisaslar üzrə yerlərin sayı, sənəd verən gənclərin ümumi sayı, onların ixtisas qrupları üzrə paylanması, müsabiqə vəziyyəti, imtahanların nəticələri, yüksək nəticələri ilə fərqlənən rayonların və məktəblərin təcrübəsi barədə məlumat verdi. Bildirildi ki, ali təhsil müəssisələrinə dövlət sifarişi əsasında tələbə qəbulu “Azərbaycan Respublikasının ali təhsil müəssisələrinə və tam orta təhsil bazasında orta ixtisas təhsili müəssisələrinə tələbə qəbulu qaydaları”na əsasən mərkəzləşdirilmiş sistemlə keçirilib.

M.Abbaszadənin sözlərindən aydın oldu ki, bu il də tələbə qəbulu sisteminin təkmilləşdirilməsi istiqamətində mühüm tədbirlər həyata keçirilib:

- Yeniliklər, ilk növbədə cəmiyyətin, təhsil sisteminin inkişaf tələbatının nəzərə alınması, gənclərin təhsillə bağlı maraqlarının keyfiyyətli təmin edilməsi zərurətindən irəli gəlib. Bunun üçün ictimaiyyətdən TQDK-ya daxil olan təkliflər araşdırılıb, gənclərin istəkləri öyrənilib ümumiləşdirilir. Yeniliklər həm də qəbul imtahanlarının logistikasının, məzmununun və texnologiyasının dünyada qəbul edilmiş standartlara inteqrasiyasını təmin etmək məqsədi daşıyır.

Mətbuat konfransında vurğulandı ki, 2010-2011-ci tədris ili üçün respublikanın ali təhsil müəssisələrinə 30510 tələbə qəbulu nəzərdə tutulmuşdur. Bunlardan 52 yer qəbul imtahanlarında müsabiqədən kənar iştirak edən abituriyentlər tərəfindən tutulmuşdur. Qalan 21145 yer Azərbaycan, 3683 yer rus bölməsi üçün ayrılmış, 5630 yer isə hər iki bölmənin birgə müsabiqəsi üçün nəzərdə tutulmuşdur. Qəbul planının 25949 yeri dövlət, 4561 yeri isə özəl ali təhsil müəssisələrinin payına düşür. Qəbul imtahanlarının nəticələrinə əsasən birinci mərhələdə 27687, əlavə müsabiqə və yerləşdirmə nəticəsində isə 734 abituriyent tələbə adını qazanıb.

“Bu il ali təhsil müəssisələrinə qəbul imtahanlarında respublikanın 71 bölgəsini əhatə etməklə 5.424 abituriyent 500-dən, 1.414 abituriyent isə 600-dən yuxarı bal toplayıb” söyləyən komissiya sədri qeyd etdi ki, Bakı, Naxçıvan, Sumqayıt şəhərlərinin, o cümlədən Ordubad, İsmayıllı və Qax rayonlarının göstəriciləri yüksək olmuşdur.

Bildirildi ki, 500-700 arasında bal toplayan abituriyentlərin əksəriyyəti ən nüfuzlu ixtisaslara üstünlük veriblər. Belə bir amil diqqətə çatdırıldı ki, abituriyentin ali təhsil alacağı təhsil ocağını seçməsi, maraq göstərdiyi ixtisasların hansı təhsil müəssisələrində olması, biliyin səviyyəsi və qiymətləndirilməsi meyarları, ali təhsil müəssisəsini bitirdikdən sonra iş yeri tapmaq, diplomun ölkə daxilində və xaricdə dəyərləndirilməsi barədə düşünmək imkanlarının yaradılması qəbul qaydalarında tətbiq olunan əhəmiyyətli yeniliklərdəndir:

- Yaradılmış sərbəstlik, abituriyentlərin ixtisas seçimi əsasında ali təhsil müəssisələrinin reytinqi formalaşır. Bu üstünlük öz əksini hər bir ali təhsil müəssisəsinin digər ali təhsil müəssisələri ilə rəqabətdə, dövlət büdcəsi vəsaiti hesabına təhsil almaq hüququ qazanmış abituriyentləri özünə cəlb etməsində, ali təhsil müəssisələrinin ixtisas kodlarının abituriyentlərin ərizələrində neçənci yerdə göstərilməsində, tələbələrin topladıqları balların miqdarında və ali təhsil müəssisəsinə sənəd verənlərin ümumi bilik səviyyəsində tapır. Bunlar nəzərə alınaraq, qabiliyyət imtahanı tələb etməyən ixtisaslar üzrə hər bir ali təhsil müəssisəsinin qəbul kampaniyasındakı reytinqi müəyyənləşdirilib.

Bu göstəricilər əsasında formalaşdırılmış ali məktəblərin reytinq cədvəlinə Azərbaycan Respublikası Prezidenti yanında Dövlət İdarəçilik Akademiyası başçılıq edir. Sonrakı yerlər Azərbaycan Dövlət Tibb Universitetinə, Qafqaz Universitetinə, Azərbaycan Dövlət Neft Akademiyasına, Azərbaycan Turizm İnstitutuna məxsusdur.

Deyildi ki, ötən illərdə olduğu kimi, bu il də ən yüksək keçid balı Azərbaycan Respublikası Prezidenti yanında Dövlət İdarəçilik Akademiyasının ixtisaslarına aiddir. Həm Azərbaycan, həm də rus bölməsində ən yüksək keçid balı Akademiyanın II qrupa daxil olan “Menecment” ixtisasına olub. Bu ixtisas üzrə keçid balı Azərbaycan bölməsində 675-ə, rus bölməsində isə 650-ə bərabərdir.

Belə bir amilə diqqət yetirildi ki, orta məktəbi “ əla” qiymətlərlə bitirənlərin 63 faizi 500-700 bal qazanıb. Ən hazırlıqlı məzunlar II-IV qruplarda göstərilən ixtisaslara üstünlük verirlər.

M.Abbaszadənin sözlərindən aydın oldu ki, qəbul imtahanlarının nəticələri bölgələr üzrə keçiriləcək seminarlarda geniş müzakirə olunacaq, statistik nəticələri əks etdirən məlumat kitabçaları təqdim olunacaq.

Sonda TQDK sədri jurnalistləri maraqlandıran sualları cavablandırdı.

X.İsmayılqızı

İki sahil.- 2011.- 26 yanvar.- S. 14.