Gözəllik ondur, doqquzu sizdən asılıdır

Universitet tələbəsi idim. Daimi iş yerim yox idi. Elə ona görə də guya valideynlərimi çox xərcə salmamaq üçün ən yaxın rəfiqəmlə alış-veriş etmək məqsədilə yollandıq Binə ticarət mərkəzinə. İndi “guya”mı açıqlayıram... Paltar, çanta, ayaqqabı filan aldıq və birdən gözümüz xeyli rəngarəng və bir o qədər də səliqəsiz səpələnən kosmetik vasitələrə sataşdı. Sözün açığı, rəfiqəm belə şeylərə məndən daha çox maraqlı olduğu üçün o satıcıya daha çox xeyir verdi, amma mən o zamankı 1000 manata (20 qəpik) bir göz kölgəsi aldım. Sən demə Çin istehsalı olan bu göz kölgəsi olduqca möcüzəvi bir şey imiş. Çünki onu istifadədən sonra gözlərim şişdi və get-gedə əsl çinliyə oxşamağa başladım. Ta ki həkimə müraciət edənə qədər...

Kosmetika, parfümeriya bu gün dünyanın ən gəlirli sahələrindən biridir. Sağlamlıq, gözəllik və bunları əldə etmək üçün lazımi vasitələrin kefiyyəti və yararlılığı yalnız insanların onları əldə edib sınadıqdan sonra ortaya çıxır. (Məsələn, saç, cild, dırnaq və s. sahələr sürətli göz önündə olan bölgələrdir. İnsanlar, gəlin etiraf edək ki, faiz etibarilə daha çox qadınlar bu yöndə canfəşanlıq edirlər.) Kosmetologiyanın tətbiqi tarixi min illər öncəyə təsadüf edir. Xüsusən İran və Fransanın adıçəkilən istiqamətdə tarixinin qədim olduğu göstərilir. İranlılar müalicəvi kosmetologiyada məşhur olduqları halda, fransızlar müasir kosmetik vasitələrlə tanındılar.

Müasir dövrümüzdə yuxarıda da qeyd etdiyimiz kimi əksər qadınlar kosmetik vasitələrdən istifadə etməklə həmcinsləri arasında öz gözəllikləri ilə seçilməyə səy göstərirlər. Lakin kosmetika sahəsi gəlirli olduğundan bazarlara işbazlar tərəfindən mənşəyi məlum olmayan çox sayda məhsullar da çıxarılır. Müxtəlif tanınmış firmaların məhsulları ilə yanaşı, bu firmaların adı altında saxta kosmetik vasitələr daha ucuz qiymətə təklif olunduğundan daha artıq alınır və istifadə olunur. Asan gəlir əldə etmək istəyən “biznesmenlər” insan sağlamlığı bahasına olsa belə, dünyanın brend markalarını saxtalaşdırmaqdan çəkinmirlər. (Məsələn, Fransanın “Yves Rocher” firmasının məşhur “Evidence” ətrinin saxta qablaşdırılması ilə bütün saxta parfümeriya satılan nöqtələrdə rastlaşa bilərsiniz. Qiyməti də çox ucuz - 8 manatdan 12 manata qədər.) Bakıda müxtəlif satış yerlərində, o cümlədən mağazalarda, metro keçidlərində, yol kənarlarında, bazarlarda müşahidə kifayət edir ki, külli miqdarda mənşəyi bəlli olmayan keyfiyyətsiz, saxta məhsulların satılmasına şahid olaq. Təbii həmin məhsulların istifadəsi zamanı isə dəridə müxtəlif ağır ləkələr, hətta yanıqlar yaranır, yəni gözəllik naminə istifadə olunan vasitələr, hətta tibbi yolla belə aradan qaldırıla bilməyən nəticələrə gətirib çıxarır.

Lakin əgər ümumi kosmetologiya sahəsinə maraqdan danışsaq, xarici ölkələrdə aparılan tədqiqatlar göstərib ki, bir neçə ildən sonra dünyada bəzi peşələrə tələbat kəskin artacaq. Bunların əksəriyyəti iqtisadiyönümlü işlərdir. Qadınların artan tələbləri kosmetologiyada yeniliklərə səbəb olur, bu yeniliklərin tətbiqi üçün də heç şübhəsiz təcrübəli kosmetoloqlara ehtiyac duyulur.

Hətta aparılan araşdırmalar onu da sübut edib ki, kosmetoloqlar yalnız gəlirli sahə olduğu üçün yox, həm də öz işlərindən zövq aldıqları üçün bu işlə məşğuldurlar. Belə ki, “City & Guilds” Britaniya şirkətinin apardığı tədqiqat göstərib ki, kosmetoloq və saç ustaları öz peşələrindən daha çox zövq alırlar. Birinci yeri kosmetoloqlar, ikinci yeri isə saç ustaları tutublar.

Gözəllik sağlamlıqdır. Sağlam olub gözəl görünmək isə sizin öz əlinizdədir.

Günel Eyyubova

İki sahil.- 2013.- 22 noyabr.- S.15.