“Azəriqaz” İB ötən ili böyük uğurlarla yekunlaşdırmışdır

2012-ci il ərzində “Azərbaycan Respublikasının yanacaq-enerji kompleksinin inkişafı (2005-2015-ci illər) üzrə Dövlət Proqramı”, “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” və “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq, ARDNŞ-nin “Azəriqaz” İstehsalat Birliyi tərəfindən respublika ərazisində qaz təchizatının yaxşılaşdırılması, əhalinin ''mavi yanacaq''la itkisiz və keyfiyyətli təminatı istiqamətində mühüm işlər görülmüş, yeni-yeni qaz xətləri çəkilmiş, istismara yararsız borular yeniləşdirilmiş, yenidənqurma işləri aparılmış, nəticədə uzun müddət təbii qaz almayan yaşayış massivləri ''mavi yanacaq''la təmin olunmuşdur.

Belə ki, 01 yanvar 2013-cü il tarixə Birlik tərəfindən 13 qazpaylayıcı stansiya və tənzimləyici məntəqə quraşdırılmış, 39-u əsaslı təmir olunmuşdur. 2012-ci il ərzində Birliyin sifarişi ilə 6362,7 kilometr uzunluğunda müxtəlif diametrli qaz xətləri çəkilmiş, 2855,3 kilometr uzunluğunda qaz kəməri əsaslı təmir edilmişdir. Ümumiyyətlə, Birliyin fəaliyyət göstərdiyi 2009-2012-ci illər ərzində 16157,7 kilometr uzunluğunda yeni qaz kəməri quraşdırılmış, 5953,9 kilometr uzunluğunda qaz kəməri əsaslı təmir edilmişdir.

İstehlakçıların fasiləsiz və keyfiyyətli təbii qazla təchiz edilməsi istiqamətində görülən işlərin nəticəsi olaraq, 01 yanvar 2013-cü il tarixə ölkə üzrə təbii qazla təmin olunan abonentlərin sayı 1483769-a (1465254 əhali, 18515 qeyri-əhali abonenti) çatdırılmışdır. Bu abonentlərin 664921-i Bakı şəhəri (655035 əhali, 9886 qeyri-əhali abonenti), 818848-i isə regionların payına düşmüşdür (810219 əhali, 8629 qeyri-əhali abonenti). Ümumilikdə 1483451 abonent (99,98 faiz) sayğaclaşdırılmışdır ki, bu rəqəmin də 1464936-ı əhali (99,98 faiz), 18515-i qeyri-əhali (100 faiz) istehlakçılarıdır. Sayğaclaşdırmanın nisbətinə gəlincə, bu sahədə vəziyyət aşağıdakı kimidir: Bakı şəhəri üzrə 654905 əhali abonenti (99,98 faiz), 9886 qeyri-əhali abonenti (100 faiz), regionlar üzrə isə 810031 əhali abonenti (99,98 faiz) və 8629 qeyri-əhali abonenti (100 faiz). Bakı şəhəri üzrə cəmi 664791 abonent (100 faiz), regionlar üzrə isə 818660 abonent (100 faiz) sayğaclaşdırılmışdır. 01 yanvar 2013-cü il tarixə əhali abonentlərinin mənzillərində 594 mindən çox “smart-kart” tipli sayğac quraşdırılmışdır.

Yaşayış məntəqələrinin qazlaşdırılması və qaz təminatının bərpası məsələlərinə də xüsusi diqqət yetirilmişdir. Ötən il 184 yaşayış məntəqəsi qazlaşdırılmış, 119527 yeni əhali abonenti təbii qazla təmin olunmuşdur. Birliyin fəaliyyəti dövründə qazlaşdırılmış yaşayış məntəqələrinin sayı 408-ə, qazla təchiz olunmuş yeni əhali abonentlərinin sayı 315524-ə çatdırılmışdır. Cəbhə bölgələrinə yaxın yaşayış məntəqələrinin və sərhəd rayonlarının qazlaşdırılmasına xüsusi diqqət yetirilmiş, Ağdam və Qazax rayonlarının qazlaşdırılması tam başa çatmışdır.

İl ərzində magistral kəmərlərin etibarlı qaz təchizatı və təhlükəsiz istismarını təmin etmək, eləcə də qaz itkisinin azaldılması istiqamətində bir sıra tədbirlər həyata keçirilmişdir. 1200 mm-lik “Qazıməmməd-Astara” magistral qaz kəmərinin Biləsuvar rayonu ərazisində Araz çayının yeni məcrasına düşən 131-138-ci kilometrlərarası sahəsində 7 kilometr uzunluğundakı hissəsi yenidən qurularaq istismarda olan qaz kəmərinə qoşulmuşdur. “Qazıməmməd-Astara” magistral qaz kəmərinin Hacıqabul rayonu ərazisindəki 196-cı kilometrliyində 2,2 kilometr uzunluğundakı hissəsi yeni borularla əvəz edilmiş, həmin ərazidən kənarlaşdırılaraq istismarda olan qaz kəmərinə qoşulmuşdur. 530 mm-lik “Azadkənd-İmişli” magistral qaz kəmərinin 19,9-cu kilometrliyində hissəsi yeni borularla dəyişdirilərək istsmara verilmişdir. Biləsuvar rayonu ərazisindəki Şorsulu Qazpaylayıcı Stansiyası yeni Avtomatik Qazpaylayıcı Stansiya quraşdırılmaqla yeni əraziyə köçürülmüşdür.

Şimal istiqamətindəki regionların tələbatçılarının qazla fasiləsiz təmin edilməsi və Rusiya Federasiyasına dayanıqlı qaz nəqlini təmin etmək məqsədi ilə 1200 mm-lik “Altıağac-Ağsu” magistral qaz kəmərinin 21-ci kilometrliyində 26 metr uzunluğunda boru yenilənmiş, Şamaxı rayonu Mədrəsə kəndi ərazisində baş vermiş torpaq sürüşməsi ilə əlaqədar olaraq 399 metr uzunluğunda 500 mm-lik drenaj xətti çəkilmişdir. 1220 mm-lik “Mozdok-Qazıməmməd” magistral qaz kəmərinin 305-ci kilometrliyində Əngilan çay keçidində qəzalı vəziyyətdə olan 150 metrlik hissə yenisi ilə əvəz olunmuşdur.

Ölkənin qərb reginonlarını, eləcə də Mingəçevir Elektrik Stansiyası və Gürcüstan Respublikasının dayanıqlı qaz təminatı üçün “Qazıməmməd-Qazax” 2-ci xətt magistral qaz kəmərinin 335,4-cü kilometrliyində 424 metr, “Qazax- Saquramo” magistral qaz kəmərinin 38,2-ci kilometrliyində 180,5 metrlik hissələri yeni borularla əvəz edilmişdir.

Eyni zamanda, “Yevlax-Balakən” qaz kəmərinin 104-114 kilometrlərarası sahədə 9,2 km uzunluğunda 325-mm-lik qaz kəməri yeni borularla əvəz olunaraq istismara verilmiş, habelə Hacıqabul Kompressor Stansiyası - Qaradağ Kompressor Stansiyası arası yeni fibrooptik kabel xətti çəkilmişdir ki, bu da texnoloji rejimlərə nəzarət və idarələrarası birbaşa əlaqənin təmin olunması baxımından mühüm əhəmiyyət daşıyır.

İki sahil.- 2013.- 16 yanvar.- S.11.