Əkbər Hacıyev: 2012-ci il regionların qazlaşdırılmasında dönüş mərhələsi kimi tarixə düşəcək

“Azəriqaz” ötən il böyükhəcmli işlər həyata keçirərək 184 yaşayış məntəqəsini qazlaşdırmış və 119527 yeni əhali abonentini mavi yanacaqla təmin etmişdir

Prezident İlham Əliyevin ölkəmizin sosilal-iqtisadi inkişafına dair imzaladığı mühüm Dövlət proqramlarında-(2005-2015-ci illər üzrə “Azərbaycan Respublikasının yanacaq-enerji kompleksinin inkişafına dair Dövlət Proqramı” və “Azərbaycan Respublikası Regionlarının 2009-2013-cü illərdə sosial-iqtisadi inkişafına dair Dövlət Proqramı”) ölkənin qaz təsərrüfatının tamamilə yenidən qurularaq müasirləşməsi prioritet məsələ kimi önə çıxarılıb.

Xüsüsən, 2012-ci ildə respublikanın regionlarında qaz təminatının yaxşılaşdırılması, mavi yanacaqla təmin olunmayan yaşayış məntəqələrinin qazlaşdırılması ilə bağlı ARDNŞ-ə bir sıra mühüm vəzifələr həvalə olunub. Artıq bu gün “Azəriqaz” İstehsalat Birliyi ARDNŞ-in böyük bir strukturu kimi ölkənin qazlaşdırılmasında, o cümlədən əhalinin təbii qazla fasiləsiz və təhlükəsiz təmin edilməsində ciddi işlər həyata keçirir. Xüsusən, 2012-ci ildə bu istiqamətdə həyata keçirilən işlər genişmiqyaslıdır. İB-nin baş direktoru Əkbər Hacıyevdən bu gün ölkə həyatı üçün aktual olan və insanların sosial-məişət firavanlığını təminatı hesab edilən qazlaşdırmanın səviyyəsi ilə bağlı müsahibə aldıq. O dedi:

-Ötən il əhalinin və digər istehlakçıların normal və təhlükəsiz qaz təchizatının təmin olunması, yaşayış məntəqələrinin qazlaşdırılması və qaz təminatının bərpası, qaz təchizatı şəbəkəsinin əsaslı təmiri istiqamətlərində bir çox nailiyyətlər əldə edilmişdir. Belə ki, 2013-cü ilin yanvar ayının 1-dək “Azəriqaz” İB tərəfindən 13 qazpaylayıcı stansiya və tənzimləyici məntəqə quraşdırılmış, 39-u əsaslı təmir olunmuşdur. 2012-ci il ərzində İB-nin sifarişi ilə uzunluğu 6362,7 km olan müxtəlif diametrli qaz xətləri çəkilmiş, 2855,3 km qaz kəməri əsaslı təmir edilmişdir. İB-nin fəaliyyəti dövründə 16 157,7 km yeni qaz kəməri quraşdırılmış, 5953,9 km qaz kəməri isə əsaslı təmir edilmişdir. Bildiyiniz kimi, “Azəriqaz”-ın əsas vəzifəsi istehlakçıların fasiləsiz və keyfiyyətli təbii qazla təchiz edilməsidir. Bu istiqamətdə görülən işlərin nəticəsi olaraq, bu ilin yanvarın 1-dək ölkə üzrə təbii qazla təmin olunan abonentlərin sayı 1483769-a (1465254 əhali, 18515 qeyri-əhali abonenti) çatmışdır. Bu abonentlərin 664921-i Bakı şəhəri (655035 əhali, 9886 qeyri-əhali abonenti), 818848-i isə regionların payına düşür (810219 əhali, 8629 qeyri-əhali abonenti). Ümumilikdə 1483451 abonent (99,98 faiz) sayğaclaşdırılmışdır ki, bu rəqəmin də 1464936-sı əhali (99,98 faiz), 18515-i qeyri-əhali (100 faiz) istehlakçılarıdır. Sayğaclaşdırmanın nisbətinə gəlincə, bu sahədə vəziyyət aşağıdakı kimidir: Bakı şəhəri üzrə 654905 əhali abonenti (99,98 faiz), 9886 qeyri-əhali abonenti (100 faiz), regionlar üzrə isə 810031 əhali abonenti (99,98 faiz) və 8629 qeyri-əhali abonenti (100 faiz) sayğaclaşdırılmışdır. Bu ilin yanvarın 1-dək əhali abonentlərinin mənzillərində 594 mindən çox “smart-kart” tipli sayğac quraşdırılmışdır. Qeyd etməliyəm ki, bu tipli qaz sayğaclarının əhatə dairəsinin genişlənməsi və müvafiq əməliyyatların kəskin artması ilə əlaqədar qeyd olunan kartlara ödənişlərin edilməsində texniki problemlərin yaranmasının qarşısını almaq üçün köklü yeniliklərin tətbiqi və islahatlar aparılması planlaşdırılır. Belə ki, kütləvi ödənişlərin artması daha güclü proqram təminatına ehtiyac yaratdığından mart ayından yeni proqram təminatı tətbiq olunacaqdır. Bu isə təxminən 1 milyon abonentə keyfiyyətli xidmət göstərməyə imkan verəcəkdir.

Ötən il yaşayış məntəqələrinin qazlaşdırılması və qaz təminatının bərpası məsələlərinə də xüsusi diqqət yetirilmişdir. İl ərzində 184 yaşayış məntəqəsi qazlaşdırılmış, 119527 yeni əhali abonenti qazla təmin olunmuşdur. İB-nin fəaliyyəti dövründə (2009-2012-ci illər) qazlaşdırılmış yaşayış məntəqələrinin sayı 408-ə, qazla təmin olunmuş yeni əhali abonentlərinin sayı 315524-ə çatmışdır. Cəbhə bölgələrinə yaxın yaşayış məntəqələrinin və sərhəd rayonlarının qazlaşdırılmasına xüsusi diqqət yetirilmiş, Ağdam və Qazax rayonlarının qazlaşdırılması tam başa çatmışdır. Digər rayonlarda da mühüm işlər görülmüşdür. Məsələn, Füzuli rayonu Zobucuq 1, Zobucuq 2, Zobucuq 3, Zobucuq 4, Zobucuq 5, Horadiz qəsəbələrinin və Arayatlı, Babı, Qazaxlar, Mirzənağılar, Molla Məhərrəmli, Əhmədalılar, Yuxarı Kürdmahmudlu, Aşağı Kürdmahmudlu, Qarabağ, Mahmudlu, Mahmudlu-2, Əhmədbəyli, Aşağı Yağlıvənd, Bala Bəhmənli, Böyük Bəhmənli və Alxanlı kəndlərinin qazlaşdırılması işləri aparılaraq 252,4 km boru xətti quraşdırılmışdır. Tovuz rayonunun Qonaqlı, Qaralar, Kirən, Çataq, Şıxheybət, Qoşa və Muncuqlu (daşıyıcı qaz kəməri), Tovuz şəhərinin Qovlar qəsəbəsi ərazisinə aid olan yeni yaşayış massivinin və Şıxheybət, Qoşa, Muncuqlu və Qaralar kəndlərinin qazlaşdırılması işləri aparılmış, 91 km qaz kəməri çəkilmişdir.

- Əkbər müəllim, mavi yanacağın təhlükəsiz və davamlı nəqli qaz təsərrüfatı üçün önəmli məsələdir. Bu mənada ötən il magistral qaz kəmərlərində və kompressor stansiyalarında hansı yenidənqurma işləri aparılıb?

-İl ərzində magistral qaz kəmərlərinin etibarlı qaz təchizatı və təhlükəsiz istismarını təmin etməyə, eləcə də qaz itkilərinin azaldılmasına yönəldilmiş mühüm işlər görülmüşdür. Bakı şəhərinin dayanıqlı qaz təchizatını və qaz kəmərlərinin təhlükəsiz istismarını təmin etmək məqsədi ilə Abşeron Magistral Qaz Kəmərləri Sahəsinin (MQKS) obyektlərində 28 ədəd tənzimləyici quraşdırılmış, 113 ədəd kran, siyirtmələr dəyişdirilmiş və ya təmir olunmuş, 150-yə qədər manometr yenisi ilə əvəz edilmişdir. Sənaye və məişət istehlakçılarına nəql olunan qazın təzyiq rejimlərinin nizamlanması məqsədi ilə 6 qazpaylayıcı stansiyada (QPS) kollektor quraşdırılmış, 3 ədəd qaz-ölçü qovşağı inşa edilmişdir. Qaz-ölçü qovşaqlarında 7255 pm impuls xətləri dəyişdirilmiş və yenidən çəkilmişdir. Qəbul olunmuş təbii qazı mexaniki qarışıqlardan təmizləmək üçün Abşeron MQKS-nin qazpaylayıcı stansiyalarında (QPS) 5 ədəd separator quraşdırılmışdır. 720 mm-lik Hövsan-Digah-Qaradağ magistral qaz kəmərinin Sədərək Ticarət Mərkəzinə yaxın sahəsində 2060 pm hissə yeni 530 mm-lik boru ilə əvəz edilmişdir. 530 mm-lik “Qum adası”-Qazanlar” magistral qaz kəmərinin Qazanlar QPS-dən Neyrocərrahiyə xəstəxanasına qədər 2700 pm uzunluğunda hissəsi 325 mm- lik boru ilə əvəz edilmişdir, “Qum adası” QPS-dən Zığ beton yoluna kimi 4860 pm uzunluğunda hissə 530 mm-lik boru ilə, Zığ beton yolundan Q.Yəhya küçəsinə qədər 438 pm uzunluğunda hissə 273 mm-lik yeni borularla dəyişdirilərək istismara verilmişdir. 1220 mm-lik Qazıməmməd-Astara magistral qaz kəmərinin 151-161-ci km-lər arasında 10 km uzunluğunda inşa olunmuş qaz kəməri istismarda olan magistral qaz kəmərinə qoşulmuş, 131-138-ci km-lər arası sahədə Araz çayının məcrasından keçən hissədə 7 km qaz kəməri yenidən inşa olunaraq istismara verilmişdir. Hacıqabul rayonunda kəmərin 2,126 km hissəsi yeni borularla əvəz edilib kənarlaşdırılmışdır.1200 mm-lik Astara-Qazıməmməd magistral qaz kəmərinin 131-ci km-də Biləsuvar QPS gələn 325 mm-lik qaz kəməri yeni borularla əvəz olunaraq üzərində 300 mm-lik kran quraşdırılıb istismara verilmişdir. Diametri 530 mm olan Azadkənd-İmişli qaz kəmərinin başlanğıcından 14,7 km-i yenidən tikilərək istismara verilmişdir. 20-i km-də 2 ədəd 500 mm-lik kranlar quraşdırılmışdır. Həmin kəmərin ümumi 20,089 km hissəsi yeni borularla əvəz edilmişdir. 1220 mm-lik Altıağac-Ağsu” magistral qaz kəmərinin 59-59,5 km hissəsində Şamaxı rayonunun Mədrəsə kəndi ərazisində baş vermiş torpaq sürüşməsi ilə əlaqədar olaraq 399 pm uzunluğunda 500-mm-lik drenaj qurğusu quraşdırılmış və 4 yerdə polietilen keçidlər qoyulmuşdur.1220 mm-lik Qazıməmməd-Qazax 2-ci xətt magistral qaz kəmərinin 6,209 km uzunluğunda hissəsi əsaslı təmir olunmuşdur.1020 mm-lik Qazıməmməd-Qazax 1-ci xətt magistral qaz kəmərinin 47-ci və 1220 mm-lik Qazıməmməd-Qazax 2-ci xətt magistral qaz kəmərinin 75,7-ci km-də xətti kranlar yenisi ilə əvəz edilmişdir. 1020 mm-lik Qazıməmməd-Qazax magistral qaz kəmərinin 118-ci km-də baş vermiş qəzanın nəticələrini aradan qaldırmaq məqsədi ilə 34 pm uzunluğunda hissəsi yenisi ilə əvəzlənmişdir.

Bir qədər də kompressor stansiyaları barədə məlumat vermək istərdim. Ötən il Qalmaz Yeraltı Qaz Anbarlarına verilən təbii qazın təzyiqinin qaldırılması məqsədi ilə Qazıməmməd kompressor stansiyasında da təmir-bərpa, sınaq-sazlama işləri görülərək quraşdırılmış 8 aqreqatdan dördü bütün köməkçi avadanlıqları və sistemləri ilə birlikdə istismara tam hazır vəziyyətə gətirilmişdir. Qazötürücü aqreqatların köhnəlmiş avtomatik idarəetmə sisteminin müasir tipli avtomatik idarəetmə sistemi ilə əvəz edilməsi üçün layihə işləri aparılır. Qaradağ kompressor stansiyasında Almaniyanın MAN Diesel & Turbo şirkətinin istehsalı olan qazturbinli THM-1304-11D tipli 2 aqreqat quraşdırılmışdır və hal-hazırda hər iki aqreqat tam işlək vəziyyətdədir. 2012-ci il ərzində Qaradağ kompressor stansiyası Qaradağ Yeraltı Qaz Anbarlarına qazın vurulması mövsümündə tam gücü ilə işləmişdir. Astara kompressor stansiyasından çıxan qazın şeh nöqtəsi mənfi 5oC alınması üçün stansiyada Qazqurutma qurğusu quraşdırılmışdır. Qurğunun maksimal buraxma qabiliyyəti sutkada 2,0 mln. m3 təşkil edir. Hal-hazırda aqreqatların hər ikisi tam işlək vəziyyətdədir. Ötən il Bakı və Abşeron rayonunun qaz təchizatı sisteminin yenidən qurulması layihəsi üzrə Sabunçu, Binəqədi, Qaradağ və Abşeron rayonları ərazisində yerləşən yeraltı və yerüstü orta və yüksək təzyiqli qaz şəbəkələrinin ArcGIS proqram təminatında elektron məlumatlar bazasının (elektron xəritənin) yaradılması işləri üzrə texniki prosedurlar icra olunmuş, Sabunçu, Binəqədi, Abşeron rayonları üzrə bazaların yaradılması işləri başa çatdırılmışdır. Qaradağ rayonu üzrə işlər davam etdirilir. İB üzrə QİS və MQKS-lərdə reqlament işlərində, eləcə də təmir-bərpa işlərində xüsusı texnoloji ehtiyaclara və daxili tələbata qaz sərfinə nəzarət təmin edilmişdir. Hər bir QİS və MQKS üzrə texnoloji sərf (həmçinin MQKS-lərdə qəza hallarında) hesabatları normativ-texniki sənədlərin tələbinə uyğun olaraq yoxlanılmış, aylar üzrə yekun hesabatlar hazırlanmışdır.

-Bakı şəhərinin inkişafı və abadlaşması ilə bərabər paytaxtın qaz təsərrüfatında da müasirləşmə davam edirmi?

-Ötən il Bakı şəhərinin Binəqədi, Xəzər, Qaradağ, Səbail, Nərimanov, Nizami, Sabunçu və Suraxanı rayonlarının qaz təchizatının yaxşılaşdırılması, qaz kəmərlərinin və məişət qaz sayğaclarının fərdi həyətlərdən çıxarılması, qaz kəmərlərinin yenidən qurulması məqsədilə 176,7 km boru xətti quraşdırılmışdır. Bakı və Abşeron rayonunun qaz təchizatı sisteminin müasirləşdirilməsi və yenidən qurulması layihəsi üzrə “Texniki-iqtisadi əsaslandırma”nın hazırlanması üçün Almaniyanın “E.ON Ruhrgas” şirkəti ilə bağlanmış xidmət müqaviləsinin şərtlərinə uyğun olaraq Abşeron MQKS-nin mövcud şəbəkəsinin təsviri 8 rayon üzrə ArcGIS proqram təminatında, qalan 4 (Sabunçu, Binəqədi, Qaradağ, Abşeron) rayon üzrə isə “Google Earth” proqramında “E.ON Ruhrgas” şirkətinə təqdim edilmişdir. Ötən il layihə-smeta sənədlərinin ekspertizası, razılaşdırılması və texniki şərtlərin hazırlanması sahəsi üzrə fəaliyyətimiz də müsbət olmuşdur. Belə ki, 2012-ci ildə fiziki və hüquqi şəxslərin müraciətləri əsasında qeyri-yaşayış sahələrinin (obyektlərin) qazlaşdırılması üçün 3728 ədəd texniki şərt verilmişdir. İB-nin sifarişi əsasında tikintisi nəzərdə tutulan qaz təchizatı obyektlərinin və qurğularının, yaşayış məntəqələrinin, daşıyıcı qaz kəmərlərinin və digər təyinatlı bina, tikili və qurğuların layihələndirilməsi üçün 1156 ədəd texniki şərt, texniki tapşırıq və layihə tapşırıqları hazırlanmışdır. Fiziki və hüquqi şəxslərin müraciətləri əsasında 2734 ədəd qeyri-yaşayış sahələrinin (obyektlərin) layihə-smeta sənədləri razılaşdırılmışdır. “Azəriqaz”-ın sifarişi ilə razılaşdırılmış layihə-smeta sənədlərinin sayı isə 1960 ədəd olmuşdur. Layihə-smeta sənədlərinin hazırlanması sahəsi üzrə də mühüm işlər görülmüşdür. Bu dövrdə İB-nin Layihə-konstruktor bürosu tərəfindən 10129 layihə-smeta sənədi hazırlanaraq Birliyə və digər sifarişçilərə təhvil verilmişdir ki, bunun da 5684-ü fərdi yaşayış evləri üzrədir. Kənd və qəsəbələrin qazlaşdırılması üzrə 934, obyektlərin təmiri üzrə 856, sənaye və kommunal, məişət obyektləri və qeyri-yaşayış sahələri üzrə isə 2629 layihə-smeta sənədi hazırlanmışdır. İnzibati binalar, anbar binaları və s. tikinti işləri üzrə 26 layihə-smeta sənədi hazırlanaraq tikintiyə icraata verilmişdir.

- Təbii qazdan qeyri-qanuni istifadə hallarına qarşı İB hansı qanuni təbirlər həyata keçirib və eyni zamanda dəyən ziyan ödənilibmi?

-2012-ci ildə Birlik üzrə təbii qazdan istifadə qaydalarının pozulmasına görə 31033 istehlakçı, o cümlədən 12335 əhali, 1223 qeyri-əhali abonentin qaz təsərrüfatına müvafiq “qüsur akt”ı” tərtib olunmuş, təbii qazdan qeydiyyatsız istifadəyə görə isə 17475 istehlakçı müvafiq akta əsasən abonent bazasında qeydiyyata alınmışdır. Tərtib olunmuş “qüsur akt”ları” əsasında itirilmiş təbii qazın bərpası üzrə 6 615 095 AZN dəyərində dəymiş ziyan hesablanmışdır. 2012-ci ildə müvafiq şöbə tərəfindən 19472 istehlakçının qaz təsərrüfatında, o cümlədən 2968 qeyri-əhali, 13493 əhali, 3011 istixana və qazpaylayıcı stansiyalardan hesabat aparılan 117 ölçü qovşağında (“ROK-407” sərfölçmə cihazı) yoxlama-təftiş işləri aparılmışdır. Keçirilmiş yoxlamalar zamanı təbii qazdan istifadə qaydalarının pozulmasına görə 955 istehlakçıya müvafiq “qüsur akt”ı” tərtib olunmuş, 1523 istehlakçının qaz sayğacı dövlət yoxlamasına göndərilmiş və aşkar olunmuş digər qüsurların aradan qaldırılması üçün müvafiq tədbirlərin görülməsi barədə yazılı tapşırıqlar verilmişdir. 2202 qeyri-əhali istehlakçısının qaz təsərrüfatına seçmə üsulla yerində baxış keçirilərək abonent bazasında yeni qeydiyyata alınmışdır. Xüsusi vurğulamaq istərdim ki, təbii qazdan istifadə qaydalarının pozulmasının qarşısının alınmasına yönəlmiş tədbirlər bundan sonra da davam etdiriləcəkdir.

- ARDNŞ rəhbərliyi üçün insan amili, onun təhlükəsiz iş şəraiti daimi öndə olubdur. Bu mənada, İB-də əməyin mühafizəsi, sağlamlığın qorunması və ekoloji təmizlik işləri istiqamətində nə kimi işlər həyata keçirilib?

-Ötən il əmək şəraitinin yaxşılaşdırılması və əməyin mühafizə olunması, sağlamlığın qorunması, təhlükəsizlik və yanğın texnikası qaydalarının təmin edilməsi məqsədilə “Azərbaycan Neft Sənayesində Əməyin Mühafizəsinin Vahid İdarəetmə Sistemi”nin, Ekologiya Qanunvericiliyinin, Beynəlxalq Keyfiyyəti İdarəetmə sisteminin tələblərinə uyğun olaraq bir sıra işlər görülmüşdür. O cümlədən əməyin təhlükəsizliyi üzrə Daimi Fəaliyyət göstərən Komissiya (DFK) tərəfindən hər rüb struktura daxil olan təşkilatların hər birində yoxlamalar keçirilmiş, aşkar edilmiş nöqsan və çatışmazlıqların aradan qaldırılması ilə bağlı zəruri tədbirlər görülərək onların nəticələri Birlik rəhbərliyinin yanında müzakirə edilmiş və yerlərdə aidiyyəti mütəxəssislərə lazımi metodiki köməklik göstərilmişdir. Ötən il yüksək təzyiqli magistral qaz kəmərlərində aparılmış bütün qəza-bərpa işlərinin tərtib olunmuş iş planları əsasında icra edilməsi təmin olunmuşdur. Əməyin mühafizəsi və təhlükəsizlik texnikasına aid jurnallar, “Ekologiya qanunvericiliyi” kitabı və Ekoloji plakatlar alınaraq tabeli təşkilatlara verilmişdir. Eyni zamanda, əməyin mühafizəsi və ilkin tibbi yardımla bağlı müxtəlif adda plakatlar və müxtəlif təyinatlı xəbərdaredici nişanlar alınaraq aidiyyəti üzrə paylanılmışdır. Birlik üzrə qaz kəmərlərinin mühafizə zonasında inşa edilən qeyri-qanuni tikililər haqqında məlumatlar hazırlanmış, onların ləğv edilməsi və qoruq zonasında hazırda aparılan digər işlərin dayandırılması məqsədilə hüquq mühafizə orqanlarına və aidiyyəti dövlət qurumlarına müraciətlər olunmuşdur. “Azəriqaz” İB-nin sifarişi əsasında tikinti işləri aparan podratçı təşkilatların işçiləri tərəfindən təhlükəsizlik texnikası qaydalarına riayət edilməsi vəziyyəti daim diqqətdə saxlanılmış, ciddi qayda pozuntularına yol verilmiş tikinti sahələrində həmin pozuntular aradan qaldırılana qədər aparılan işlər müvəqqəti olaraq dayandırılmışdır. Birliyin tabeli təşkilatları üçün Ekoloji Pasportların hazırlanması işi başa çatdırılmış, buraxıla bilən axıntı və tullantı həddi normativ sənədlərinin hazırlanması sahəsində işlər davam etdirilmişdir. Qaz istismar və magistral qaz kəmərləri sahələrində ekologiya üzrə aparılmış işlərin icra vəziyyəti yerində yoxlanılmış, monitorinqlər keçirilmiş, aşkar edilmiş nöqsan və çatışmazlıqların aradan qaldırılması üçün müvafiq tövsiyələr verilmişdir. Birliyin idarə və müəssisələrində istehsalat prosesləri zamanı formalaşan tullantıların ARDNŞ prezidentinin əmri ilə təsdiq edilmiş “Tullantıların idarə olunması Planı”na” əsasən idarə olunması üçün müvafiq tədbirlər ğörülmüş, onların yığılması, çeşidlənməsi, qablaşdırılması, daşınaraq aidiyyəti üzrə təhvil verilməsinin təmin olunması barədə tabeli təşkilatların rəhbərlərinə müvafiq göstərişlər verilmiş və bu işlər ciddi nəzarətə götürülmüşdür. İl ərzində 22900 ədəd ağac və müxtəlif növ kollar əkilmiş, mövcud yaşıllıqlara aqrotexniki qulluq edilmişdir. 2013-ci ildə əkiləcək sahələr və yaşıllıqların salınması üçün tələb edilən tinglərin sayı müəyyən edilmişdir. ARDNŞ-in və aidiyyəti dövlət qurumları nümayəndələrinin iştirakı ilə ayrı-ayrı sahələrdə ekoloji monitorinqlər keçirilmiş, Birliyin Nəqliyyat və Xüsusi Texnika İdarəsinə məxsus avtomaşınlarda yanma prosesinin vəziyyəti yoxlanılmışdır. 01.07.2012-ci il tarixdə tabeli təşkilatlarda iş yerlərinin attestasiyası başa çatdırılmış, attestasiya nəticəsində zərərli hesab edilmiş iş yerlərində işləyən işçilərə qanunvericilikdə nəzərdə tutulmuş qaydada güzəştlər tətbiq edilmişdir. Ümumilikdə ötən il Keyfiyyəti İdarəetmə Sisteminin tətbiqi ilə bağlı aparılan işlər davam etdirilmiş və “İntertek-Moody International Limited” şirkətinin auditor qrupu tərəfindən aparılmış auditlərin nəticələrinə əsasən Birlik ISO 9001:2008 standartı sertifikatına layiq görülmüşdür.

Elçin Zaman

İki sahil.- 2013.- 30 yanvar.- S.8-9.