Salyanın təbii qazla

təchizatında ciddi dönüş yaranıb

Son bir neçə ildə rayonda təbii qazın itki faizi 64 faizdən 10 faizə endirilib

Əhalinin təbii qazla fasiləsiz və təhlükəsiz təmin edilməsi “Azəriqaz” İB-nin qarşısında duran ən mühüm vəzifələrdəndir. Məhz cari ilin ötən dövrü ərzində bu istiqamətdə ciddi işlər həyata keçirilib. Onun bir strukturu olan Salyan qaz istismar sahəsi də rayon ərazisində qaz təchizatını daha da yaxşılaşdırmaq, qaz təsərrüfatının təhlükəsiz istismarını təmin etmək, qaz itkisinin qarşısını almaq məqsədi ilə ötən dövrdə xeyli təmir-bərpa işləri həyata keçirib. Sahə rəisi Xəyyam Rzayev bildirir ki, qaz təsərrüfatında işin günün tələbləri səviyyəsində qurulması, həyata keçirilən dəyərli tədbirlərdən, aparılan təmir və xidmət işlərinin keyfiyyətindən asılıdır. Ötən illərdə və bu ilin birinci rübündə Salyan şəhərində və ətraf yaşayış məntəqələrində daşıyıcı və paylayıcı qaz kəmərləri üzərində həm podratçı təşkilatlar, həm də QİS tərəfindən əsaslı təmir işləri aparılmış, qaz sayğacları yeni çəkilmiş qaz xətləri üzərinə köçürülmüşdür. Təzəkənd ölçü qovşağından Qırxçırağa 22.6 km uzunluqda 315 mm-lik, Şorsulu AQPS-dən Şorsuluya 14 km uzunluqda yeni çəkilmiş 315 mm-lik, Şorsulu-Daykənd istiqamətində 11 km uzunluqda 200 mm-lik, Kürsəngi ölçü qovşağından Qırxçıraq-Çuxanlı-Salyan QTM-ə 28 km uzunluqda 315 mm-lik, Aşağı Noxudlu, Yuxarı Noxudlu və Xurşud kəndlərini təbii qazla təmin edən 5015 metr uzunluqda 160 mm-lik orta təzyiqli, daşıyıcı polietilen yeraltı qaz kəməri çəkilərək istismara verilmişdir. Babazanan qəsəbəsinin qaz təsərrüfatında əsaslı təmir işləri aparılmışdır. 444 qaz sayğacı yeni qaz xətlərinin üzərinə köçürülməklə təbii qazın verilməsi təmin olunmuşdur.

Rayonun Çuxanlı kəndində QİS-in daxili imkanları hesabına yeni qaz xətlərinin çəkilişi sona çatmaq üzrədir. Sayğaclar yeni xətlərin üzərinə köçürülmüşdür. Comuşlu və Təzəkənd kəndlərinin qaz təchizatının yaxşılaşdırılması məqsədi ilə podratçı təşkilat tərəfindən bu kəndlərin qaz təsərrüfatında yeni qazlaşma işləri aparılaraq kəndlərə təbii qazın verilməsi təmin olunmuşdur. Şəkərli, Şorsulu, Boranıkənd, Dayıkənd, Seyidlər, Kürqaraqaşlı kəndlərində əsaslı təmir işləri aparılmaqla qaz sayğacları yeni çəkilmiş qaz xətləri üzərinə köçürülmüşdür. Hazırda Dayıkəndin yarımçıq qalan hissəsində qazlaşma işləri aparılır və burada QİS-in daxili imkanları hesabına sayğaclar yeni xətlərin üzərinə köçürülmüşdür. Xurşud və Yuxarı Noxudlu kəndlərində qazlaşma işləri aparılaraq başa çatdırılmış və hər iki kəndə ümumilikdə 360 qaz sayğacı quraşdırılmışdır. Həmçinin Qaraçala qəsəbəsində yeni qazlaşma işləri aparılmaqla 820 ədəd qaz sayğacı quraşdırılmışdır. Arbatan kəndinini genişlənmiş hissəsində yeni qazlaşma işləri aparılmaqla 58 yeni qaz sayğacı quraşdırılmış və təbii qazın açılışı olmuşdur.

Çuxanlıdakı hərbi hissəni təbii qazla təmin edən yeni polietilen yeraltı qaz xətti çəkilmişdir. Həmin qaz xətti orta təzyiqli daşıyıcı qaz kəmərinə qoşularaq istismara verilmişdir. Kürqaraqaşlı kəndinin 350 evdən ibarət hissəsində qazlaşma işləri aparılaraq sona çatdırılmış və qaz sayğacları quraşdırılmışdır. Yeni çəkilmiş qaz xətləri möhkəmliyi və kipliyi yoxlanılaraq sinaqdan keçirilmişdir. Ə.Quliyev küçəsində 17 evdən ibarət yeni yaşayış sahəsində qazlaşma işləri aparılaraq sona çatdırılmışdır. Rayonun uzun illər qazsız qalmış kəndlərinin və eyni zamanda yeni salınmış yaşayış massivlərinin qaz təsərrüfatının yenidən qurularaq qazlaşdırılması məqsədi ilə layihə-smeta sənədlərinin hazırlanması üçün “Azəriqaz”İB-ə müraciət olunmuşdur və cari ildə icrası mərhələlərlə həyata keçiriləcəkdir. Hazırda 20 Yanvar küçəsinin 500 evdən ibarət bir hissəsində yeni qazlaşma işləri aparılır və qaz sayğaclarının quraşdırılmasına başlanılmışdır. Ümumilikdə rayon üzrə 863 km uzunluqda müxtəlif diametrli yeraltı və yerüstü yeni qaz kəmərləri çəkilərək istismara verilmişdir.109 ədəd müxtəlif sərfli müasir tipli qaz tənzimləyicilər və 250 ədəd müxtəlif diametrli siyirtmələr yeni çəkilmiş qaz kəmərləri üzərində quraşdırılmışdır. Rayon üzrə 12 kənddə əsaslı təmir və 15 kənddə isə yeni qazlaşma işləri aparılmışdır. Demək olar ki, rayon üzrə təbii qazla təmin olunan əhali istehlakçılarının sayı ümumi əhalinin 75 % -ni təşkil edir. Abonentlərin sayı 18 minə çatmışdır.

Sahə rəisinin sözlərinə görə, Salyan QİS-də çalışan işçilərin əmək şəraitinin yaxşılaşdırılması məqsədi ilə yeni müasir tipli inzibati binanın tikintisi başa çatmaq üzrədir. Hazırkı inzibati bina da əsaslı təmir olunaraq işçilərin istifadəsinə verilmişdir. Əmək şəraitinin yaxşılaşdırılması işçilərin işə olan həvəsini daha da artırmışdır ki, bu da son illərdə QİS-in hər bir xidməti sahəsində göstəricilərin yüksək səviyyədə olmasında özünü göstərir.

X. Rzayev dedi ki, QİS üzrə əhali və qeyri-əhali istehlakçılarına satılan təbii qaza görə ödəniş faizi son illərdə 100% -dən çox olmuşdur: “Ən əsası Salyan QİS-ə rəis təyin olduğum 2011-ci ilin 6 ayında itki 64 faiz olduğu halda 2014-cü ilin 1 rübündə bu rəqəm 10 faizə endirilmişdir. Məlumat üçün bildirirəm ki, 2011-ci ildə qeyri-əhali istehlakçılarına 500 000 m3 təbii qaz satılırdısa, 2014-cü ilin I rübündə qeyri-əhali istehlakçılarına 3 500 000 m3 təbii qaz satılmışdır.”

O, sonda xüsusi vurğuladı ki, sahənin işinin sürətli və səmərəli şəkildə həyata keçirilməsində mühüm şərt ARDNŞ, o cümlədən “Azəriqaz” İB-nin rəhbərliyinin onlara göstərdiyi diqqət və qayğıdır. Məhz QİS-lərin vaxtlı-vaxtında mal və materiallarla, avadanlıqlarla təchiz olunması kollektivdə işgüzar mühit yaradıb. 2014-cü ilin nəticələrinin daha da yüksək olması və itkilərin minimuma endirilməsi üçün kollektiv bundan sonra da bacarığını sərf edəcəkdir.

Elçin Zaman

İki sahil.- 2014.- 22 aprel.- S.16.