Ömrün gözəl illəri

Ömür - gün axar çaylar kimi ötüb gedir... Ömürdən ötən illər o zaman gözəl olur ki, onu faydalı işlərə, qurub yaratmağa həsr edirsən. O da zəhmətkeş ailədə doğulub boya - başa çatdığı üçün yeniyetməlik çağlarından işə - zəhmətə qatlaşıb. Orta məktəbdə əla qiymətlərlə oxusa da, gələcəkdə təhsilini davam etdirmək kimi bir fikri də olmayıb. Çünki işə - zəhmətə vurğunluq onun canında - qanında idi. Hər səhər gözünü açıb ata - anasını işə gedən görmüşdü. Düzdür, Səlahəddin kişinin ailəsinin günü - güzəranı yaxşı idi. Övladları erkən yaşlarından özlərini ehtiyac üzündən işə həsr etməmişdilər. Onsuz da bu ailənin süfrəsi ruzili - bərəkətli idi, bu evin təknəsindən çörəyi əskik olmurdu. Bu ocaqda Tanrı bərəkəti vardı...

Səlahəddin Həsənov özü sovxozda rəhbər vəzifədə işləyirdi, ömür - gün yoldaşı, “Qəhrəman ana” Cəmafər xanım isə Çiləgir kənd feldşer məntəqəsinin müdiri vəzifəsində çalışırdı. Çiləgir kəndində hamı ona “Cəmafər ana” deyə müraciət edir. Ona görə yox ki, o, çoxuşaqlı anadır. Ona görə ki, Çiləgir kəndində hər yeni doğulan uşaq öz doğma anaları ilə yanaşı Cəmafər xanımın da nəfəsini duyur, hiss edirdi. Cəmafər ana sağlam doğulub böyüyən uşaqlara baxanda özünü bəxtəvər sanırdı. Təkcə doğmalar deyil, yadların uşaqları da onu çox istəyirdilər, başına pərvanələr kimi dolanırdılar. Qəlbi, varlığı nurdan yoğrulmuş ana adının gözəlliyinə baxın!

Uzun illər həkim işləmiş Cəmafər ana indi yaşlaşıb, çoxdan təqaüdə çıxıb, o uşaqlar da böyüyüb, hərəsi bir iş, vəzifə sahibi olub. Bu gün də onu özlərinin mənəvi anası kimi xoş hisslərlə xatırlayırlar. Əlbəttə, qəlbi təmiz, ürəyi düz analar özgəsinin balasına övlad gözü ilə baxanda Tanrıya da xoş gəlir. Tanrı da bu halallığa görə belə anaların övladlarını mükafatlandırır.

... Hikmət Həsənov Səlahəddin kişi ilə Cəmafər ananın dünyaya gətirdiyi on övladından - üç bacının yeddi qardaşından biridir. Özü də Tanrı haqqını, halal ata - ana haqqını bütün ruhu ilə varlığında yaşadanlardandır. Onun orta məktəbdə dərslərini əla qiymətlərlə oxuması müəllimlərinin diqqətindən yayınmırdı. Valideynlərinə tövsiyə etmişdilər ki, onun təhsilini davam etdirməsi qayğısına qalsınlar. Elə də oldu. Hikmət Həsənov 1984 - cü ildə Qusar şəhərindəki bir sayli orta məktəbi bitirdikdən sonra ali təhsil almaq üçün Bakıya gəldi. İmtahanlardan müvəffəq qiymətlər alıb Azərbaycan İnşaat Mühəndislər İnstitutuna (indiki Azərbaycan Memarlıq və İnşaat Universiteti) qəbul olundu. Həmin dövrdə Sovet ordusunda əsgər çatışmazlığı mövcud idi. O səbəbdən də institutun əyani şöbəsinə qəbul olunmasına baxmayaraq, onu hərbi xidmətə çağırdılar. İki illik əsgəri borcunu verdikdən sonra yenidən ali təhsilini davam etdirməyə başladı. Tələbə olduğu vaxtlarda elmi işlərə sonsuz maraq göstərirdi. Tələbə Elmi Cəmiyyətinin fəal iştirakçılarından sayılırdı. İnstitutda oxuduğu müddətdə o dövrün ən böyük tələbə təqaüdü sayılan “Lenin təqaüdü”nə layiq görülmüşdü.

Elmi biliklərlə öz hafizəsini zənginləşdirən Hikmət Həsənov 1991 - ci ildə institutu fərqlənmə diplomu ilə bitirib, təyinatla “Neft Daşları” Neft - Qaz Çıxarma İdarəsinə (NQÇİ) göndərilib. Gənc mütəxəssis kimi NQÇİ - nin Əsaslı tikinti şöbəsində mühəndis vəzifəsinə təyin olunub. Cəmi üç il işlədikdən sonra həmin şöbədə rəis müavini vəzifəsinə irəli çəkilib. Orada on il çalışdıqdan sonra “Azneft” İB - nin idarəetmə aparatında Stasionar platformaların tikintisi, istismarı, təmiri və korroziya ilə mübarizə üzrə istehsalat şöbəsinə rəis müavini vəzifəsinə irəli çəkilmişdir. Onun ardınca “Azərdənizneftinşaat” trestinin baş mühəndisi vəzifəsinə yüksəlmişdir.

“Azərdənizneftinşaat” və “Xəzərdənizneftqaztikinti” trestlərinin bazasında yeni “Neftqaztikinti” tresti yaradıldıqdan sonra o, trestin Hidrotexniki qurğuların tikintisi üzrə müdir müavini və bir neçə ildən sonra həmin trestin baş mühəndisi vəzifəsinə təyin olunmuşdur. Daha sonra trestin 7 saylı Tikinti Quraşdırma İdarəsinin rəisi vəzifəsində çalışmışdır. Hal - hazırda isə ARDNŞ - in “Qaz İxrac” İdarəsi rəisinin tikinti üzrə müavini kimi əmək fəaliyyətini davam etdirir.

İllərlə müxtəlif rəhbər vəzifələrdə çalışan Hikmət müəllim söhbət zamanı dedi:

- Doğrudan da insan ən böyük səadətinə sevdiyi işlə məşğul olanda çatır. Ali təhsilimi bitirib təyinatla “Azneft” İB - yə göndəriləndə birliyin rəhbərliyi tərəfindən mənə idarə aparatında işləmək təklif olunmuşdu. Amma mən çətin və peşəkar neftçi əməyini daha üstün tutduğumdan “Neft Daşları”nda işləməyə qərar verdim. Ömrümün dənizdən başlanan yolu məni əsl həyat məktəbinə aparmışdı. Orada çalışdığım illərdə neçə - neçə fırtınalar, qasırğalar görsəm də, heç zaman çətinliklərdən, təhlükələrdən qorxub çəkinmədim. Dənizin üzü dönəndə insanı vahimələndirsə də, sakit, küləksiz havada çox romantik olur... Bu gün quruda işləyirəm, amma ömrümün dəniz qoynunda keçən illərini heç zaman unuda bilmirəm. Dənizdə çalışdığım çağlar ömrümün ən gözəl illəri idi.

Bəli, indi o illər arxada qalıb. Amma mənalı ömrün örnək səhifələri, Hikmət müəllimin dəniz qoynundakı danılmaz xidmətləri unudulmur. Ötən əsrin 90 - cı illərinin əvvəllərində “Neft Daşları”nda güclü küləyin və qasırğalı havanın təsirindən estakada və meydançaların bir çoxunda uçma və dağılmalar baş verdi. Çoxlu sayda neft - mədən və yığım texnoloji xətləri qırıldı. Nəticədə hasilat, demək olar ki, tam dayandırıldı. Çətin şəraitdə, qısa bir zamanda qarşıda mövcud kommunikasiyanı, vacib estakada və meydançaları bərpa etmək kimi təxirəsalınmaz vəzifə dururdu.

... Bərpa dövründə “Neft Daşları” böyük bir tikinti meydançasına çevrilmişdi. Tikinti idarələrinin hamısı bərpa işlərinə cəlb olunmuşdu. Hikmət müəllim belə gərgin aylarda gecəsini gündüzünə qatıb çalışırdı. Çəkilən gərgin zəhmət hədər getmədi. Üç - dörd ay müddətinə neft hasilatı tamamilə bərpa olundu. Yatağın qalıq neft ehtiyatının çıxarılmasının texniki - iqtisadi əsaslandırılması işləndi. Bu istiqamətdə görülən işlər əsasən yeni sualtı xətlərin çəkilməsindən, mövcud estakada və meydançaların əsas istiqamətlərinin bərpasından, bir sıra texnoloji obyektlərin, 3 - 4 saylı KS - lərin və onlarca yeni obyektlərin tikintisindən ibarət idi.

Bərpa işəri həyata keçiriləndən uzun müddət sonra - 1999 - cu ildə dənizin 50 metr dərinliyində beş dayaq blokundan ibarət 1887 saylı DSP - nin tikintisinə başlanıldı. Üzən qazma qurğusundan qazılmış dörd ədəd quyu istismara verildi. Bundan əlavə, 28 quyunun qazılması üçün nəzərdə tutulan platforma da tikilərək istismara verildi.

“Neft Daşlar”nın şimal - şərq qanadında tikilmiş 1887 saylı DSP - dən qazılmış quyuların göstəriciləri bu sahədə yeni platformaların tikintisinin perspektivliyinə yol açdı. Hikmət Həsənov 2007 - 2011 - ci illər ərzində “Neftqaztikinti” trestinin Hidrotexniki qurğuların tikintisi üzrə müdir müavini vəzifəsində çalışarkən “Neft Daşları” yatağında yeni inşa olunan 2415, 2387, 2521 və 2585 saylı DSP - lərin, daha sonra isə ARDNŞ - in dəniz obyektlərində - əsasən “Neft Daşları”, “28 May”, “N.Nərimanov”, “Abşeronneft” NQÇİ - lərin, “Xəzərdənizneftdonanma” İdarəsinin sifarişi ilə dənizlə yanaşı, sahil zonalarında yerləşən bütün hidrotexniki və texnoloji qurğuların tikintisinə, eyni zamanda təmir işlərinə rəhbərlik etmişdir.

Həmin dövrlərdə bir sıra böyük kapital tutumlu obyektlərin, o cümlədən;

- “Günəşli” yatağında əlavə 6 istismar quyusunun qazılması üçün 11 saylı DSP - nin genişləndirilməsi,

- “Günəşli” yatağında 4 saylı DSP - də alçaq təzyiqli KS - in tikintisi,

- “Günəşli” yatağında 6, 8, 11, 14, 19 saylı DSP - lərdə əlavə quyuların qazılması ilə əlaqədar yenidənqurulması,

- “Günəşli” yatağında 2,3,4,5, 10, 14, 19 saylı DSP - lərdə kompleks əsaslı təmir,

- “Günəşli” yatağında DSP - lər arası sualtı xətlərin çəkilməsi,

- “Ümid” yatağında ilk DSP - nin tikintisi,

- Qazın yığım və nəql sisteminə aid DSP - 4 , DDÖ - 14, Neft Daşları - Bahar - Qum, Bahar - Qum - Hövsan sahələrarası 500 mm- lik ümumi uzunluğu140 km olan sualtı qaz xətlərinin çəkilməsi,

- Dəniz yataqlarında kilometrlərlə estakadaların tikintisi, təmiri və s. onlarca mühüm işlərin həyata keçirilməsinə rəhbərlik etmişdir.

2011 - 2013 - cü illərdə isə “Neftqaztikinti” trestinin 7 saylı Tikinti Quraşdırma İdarəsinin rəisi işlədiyi dövrdə “Neft Daşları”nda müasir dünya standartlarına cavab verən 6 qaz turbin mühərrikli elektrik stansiyasının tikintisinin yüksək keyfiyyətlə başa çatdırılmasına rəhbərlik etmişdir.

Hikmət Həsənov, demək olar ki, gənc yaşlarından keçib gəldiyi vəzifə pillələrində hər zaman məsuliyyətlə və vicdanla işləmişdir. Harada, hansı vəzifədə çalışmasından asılı olmayaraq, həyatın hər cür sınaq və çətinliklərinə sinə gərmişdir. Bu gün də “Qaz İxrac” İdarəsi rəisinin tikinti üzrə müavini kimi irili - xırdalı layihələrin həyata keçirilməsində öz bilik və bacarığını əsirgəmir. Ötən ilin və başa çatmaqda olan 2014 - cü ilin tikinti - təmir proqramları üzrə böyük həcmdə layihələrin həyata keçirilməsində də Hikmət müəllimin əməyi danılmazdır. İdarənin 2013 - 2016 - cı illər üzrə ARDNŞ tərəfindən təsdiq olunmuş tədbirlər proqramında nəzərdə tutulan işlər beynəlxalq standartların tələblərinə uyğun təhlükəsiz və yüksək keyfiyyətlə yerinə yetirilir. O cümlədən, əsaslı tikinti üzrə “Qazıməmməd - Qazax” magistral qaz kəmərinin 0 - 210 kilometrlərarası hissəsində tikinti işləri uğurla davam etdirilir. Eləcə də əsaslı təmir proqramına uyğun olaraq, 2014 - cü ildə 100 km - dən artıq magistral boru xətləri təmir olunaraq istismara verilir və bu yöndə də işlər layihə - smeta sənədlərinə uyğun müvəffəqiyyətlə icra olunur.

Hikmət Həsənov öz əmək yolunu bu gün də şərəflə davam etdirir. Onun əməyi dövlətimiz tərəfindən yüksək qiymətləndirilmişdir. O, neft - qaz sənayesindəki xidmətlərinə görə “Tərəqqi” medalı ilə təltif edilmişdir. Əlbəttə, insanın zəhmətinə qiymət veriləndə qürur doğurur, daha yaxşı işləməyə ruhlandırır.

Hikmət müəllim təcrübəli, məsuliyyətli və intizamlı rəhbər işçi olmaqla bərabər, həm də gözəl ailə başçısıdır. Onun keçdiyi həyat yolu rəhbərlik etdiyi sahədə çalışan gənclərlə yanaşı, öz övladları üçün də bir örnəkdir.

Həzi Həsənli,

Azərbaycan Yazıçılar

Birliyinin və Jurnalistlər Birliyinin üzvü

İki sahil.- 2014.- 26 dekabr.- S.19.