Azərbaycan tarixində inkişaf və tərəqqi illəri

Heydər Əliyevin Azərbaycana ilk rəhbərliyi dövründən 45 il keçir

14 iyul 1969-cu ildə hakimiyyətə gələn ulu öndər Heydər Əliyevin uğurlu fəaliyyəti nəticəsində 1970-1980-ci illər baş verən dəyişikliklərin miqyasına, ictimai və iqtisadi sahədəki dərin islahatların səviyyəsinə və xalqın maddi rifah halının keyfiyyətcə yeni mərhələyə keçməsinə görə Azərbaycanın quruculuq salnaməsində, sözün həqiqi mənasında, ən parlaq səhifələri təşkil edir

Bu gün müstəqil Azərbaycanın uğurlarından geniş bəhs edərkən tarixi paralellər aparmağa böyük zərurət duyulur. Bu fakt inkaredilməzdir ki, Azərbaycanı müstəqil dövlət quruculuğuna aparan yol məhz 1969-cu ildən, yəni ulu öndər Heydər Əliyevin hakimiyyətə gəlişindən başlanıb. O dövrdə Azərbaycan müttəfiq respublikalar arasında ən geridə qalanlar sırasında idi. İqtisadiyyat inkişaf etmirdi, kənd təsərrüfatının inkişafı üçün lazımi tədbirlər görülmürdü, sənaye istehsalı isə aşağı səviyyədə idi.

Məhz ulu öndər Heydər Əliyevin fəaliyyəti nəticəsində 13 il ərzində Azərbaycan keçmiş ittifaq miqyasında ən qabaqcıl ölkə oldu. Əgər o dövrdə iki respublika özünü təmin edə bilirdisə, onlardan biri Azərbaycan idi. Bir sözlə, 1970-ci illər Azərbaycan tarixində inkişaf və tərəqqi illəri kimi qaldı. Təbii ki, ölkəmiz müstəqil deyildi, amma bütün bu uğurları o vaxt mövcud ideoloji çərçivələr daxilində əldə etmək mümkün olmuşdur. Dahi şəxsiyyət Heydər Əliyev 1993-cü ildə xalqın təkidli tələbi ilə hakimiyyətə qayıdışından sonra o illərdə əldə olunan nailiyyətləri belə dəyərləndirmişdir: “O dövrdə yaranmış iqtisadi potensial da bizim böyük sərvətimizdir. Bu sərvət də Azərbaycanın tam sərbəst, heç bir dövlətdən asılı olmayaraq yaşamasına imkan verir. Güman edirəm ki, biz müstəqilliyimizi tam bərqərar etdikdən sonra ölkəmizin bu iqtisadi potensialının bəhrələrini Azərbaycanın hər bir vətəndaşı görəcək və bunun sayəsində şən, firavan yaşayacaqdır.”

70-ci illərdən başlayaraq iqtisadi potensialın yaratdığı bu yüksəliş Azərbaycanı özünün iqtisadi inkişafının növbəti mərhələsi kimi tarixən zəruri azadlıq mübarizəsinə də daxilən hazırlamışdır. 80-ci illərin sonu 90-cı illərin əvvəlində müstəqillik hərəkatının geniş vüsət alması ulu öndər Heydər Əliyevin hakimiyyətinin birinci dövründəki həmin iqtisadi yüksəliş və ona paralel olaraq tarixi fürsətdən dərhal bəhrələnməyə hazır milli mübarizlik ruhunun təşəkkül tapması sayəsində mümkün olmuşdur. Həmin dövrün ictimai-siyasi, sosial-iqtisadi mənzərəsinin təhlili fonunda deyə bilərik ki, hakimiyyətə gələn yeni rəhbərin qarşısında respublikada iqtisadi potensialın dağılmasının, ictimai-siyasi həyatda yaranmış tənəzzülün qarşısını almaq kimi mühüm vəzifə dayanırdı. Milli kadrların hazırlanması, milli dilin inkişaf etdirilməsi və istifadə olunması, dövlət idarəetmə strukturlarında çalışan məmurların azərbaycanlı olmasına diqqət yetirilməsi istiqamətində nəinki ciddi addım atılmır, hətta bu yöndə edilə bilən təşəbbüslərin qarşısı alınırdı. Dahi şəxsiyyət Heydər Əliyev uğurlu addımları sayəsində bu problemlərin həllinə nail olundu. Ulu öndər bu fikri hər zaman önə çəkirdi ki, millətin siyasi müstəqilliyinin əsasını onun iqtisadi cəhətdən azadlığı şərtləndirir.

Heydər Əliyevin Azərbaycanın gələcəyini düşünərək uzaqgörənliklə atdığı addımlardan biri də azərbaycanlılardan ibarət gənclərimizi gələcəyin müstəqil ölkəsi üçün gərəkli ixtisaslara yiyələnməkdən ötrü keçmiş ittifaqın nüfuzlu ali məktəblərinə göndərmək təcrübəsi kimi dəyərli təhsil ənənəsinin əsasını qoyması idi. Bu yolla Azərbaycanımızın elmi və kadr potensialı yüksəldiyi kimi, xalqımızın milli mənəvi, əxlaqı dəyərlərinin təbliği də həyata keçirilirdi. Milli hərbçi kadrların hazırlanması da xalqın müstəqil gələcəyini görən ulu öndər Heydər Əliyev üçün xüsusilə böyük əhəmiyyətli məsələ idi. Məhz C.Naxçıvanski adına hərbi liseyin əsası 70-ci illərdə qoyulmuşdur. Hazırda orduda xidmət edən zabitlərin böyük əksəriyyəti ümummilli lider Heydər Əliyevin gərgin səyləri nəticəsində yaradılan həmin liseyin yetirmələridir.

Dahi şəxsiyyət Heydər Əliyevin gələcəyin müstəqil Azərbaycanını nəzərdə tutaraq, milli məfkurənin yüksəlişi və xalqın milli dövlətçilik arzularının daha da güclənməsi üçün dövlət quruculuğu sahəsində gördüyü mühüm işlərdən biri də Azərbaycanın beynəlxalq aləmdə elmi-texniki, iqtisadi və mədəni əlaqələrinin genişləndirilməsi üçün səylər göstərməsi idi. Bu məqsədlə Bakıda ittifaq və beynəlxalq əhəmiyyətli tədbirlər təşkil olunduğu kimi, müttəfiq respublikalarda da Azərbaycan mədəniyyəti və incəsənəti günləri keçirilirdi. Bütün bunlar son nəticədə Azərbaycanın xarici ölkələrlə və orada yaşayan azərbaycanlılarla əlaqələrinin qurulması üçün zəmin yaradır, azərbaycanlıların özünəməxsus tarixi, mədəni ənənələri olan xalq olaraq tanınmasını, Bakının isə həmin dövrdə dünya miqyasında tanınan bir elm və mədəniyyət mərkəzinə çevrilməsini təmin edirdi.

Ulu öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışı Azərbaycanın tarixində yeni bir mərhələnin əsasını qoydu. Tarixi paralellər apardıqda ümummilli liderin hakimiyyətinin hər iki dövründə bir amal, məqsəd özünü qabarıq şəkildə büruzə verir- Doğma xalqına sədaqətlə xidmət etmək. Heydər Əliyev ictimai-siyasi quruluşdan asılı olmayaraq bütün dövrlərdə Azərbaycanın inkişafına çox böyük töhfələr vermişdir.

Müstəqilliyimizin ilk illərində Azərbaycanın yaşadığı ağır durum yaddaşlardadır. Dövlət başçısı İlham Əliyev daim bu fikri xüsusi qeyd edir ki, müstəqilliklə bağlı təbliğata daha geniş yer verilməlidir. Azərbaycanın gənc müstəqil dövlət olduğunu qeyd edən Prezident İlham Əliyev bildirir ki, buna baxmayaraq, öz maraqlarını müdafiə etməyə qadirdir, dünya miqyasında özünə layiqli yer tuta bilib. “Müstəqillik mövzusu daim gündəlikdə olmalıdır və tarixi paralellər aparılmalıdır. Buna da böyük ehtiyac vardır” söyləyən möhtərəm Prezidentimiz onu da bildirir ki, müstəqillik sadəcə dövlət atributları deyildir. Müstəqillik müstəqil həyatdır, müstəqil siyasətdir, dövlətin və milli maraqların qorunmasıdır. Qeyd etdiyimiz kimi, tarixi paralellər aparıldıqda Azərbaycanın müstəqillik tarixində hansı çətinliklərlə üzləşdiyinin və onların necə dəf olunduğunun şahidi olarıq. Azərbaycanın müstəqilliyini yenidən bərpa etdiyi ilk illərlə bu günü müqayisə etdikdə müstəqilliyin saxlanılmasının, qorunmasının onun əldə edilməsindən nə qədər çətin olduğunu görürük. Bu gün Azərbaycan müstəqil dövlət olaraq beynəlxalq aləmdə yeri və rolunu möhkəmləndirmiş, ikitərəfli və çoxtərəfli çərçivələrdə əlaqələri inkişaf etdirməklə dünya birliyinin layiqli üzvünə çevrilmişdir.

Təbii ki, bu uğurlar möhtərəm Prezidentimiz İlham Əliyevin qeyd etdiyi kimi, göydəndüşmə deyil, böyük səylərin, qətiyyətin nəticəsidir.

Müstəqilliyimizin ilk illərində Azərbaycan parçalanmaq, dünyanın siyasi xəritəsindən silinmək təhlükəsi ilə üz-üzə qalmışdır. Bir tərəfdən həmin dövrün iqtidarının səriştəsizliyi, idarəçilik qabiliyyətinin yoxluğu, öz şəxsi maraqlarını dövlət maraqlarından üstün tutmaları sayəsində ölkədəki mövcud olan xaos, anarxiya, özbaşınalıq, digər tərəfdən silahlı qüvvələrin torpaqlarımızın deyil, ayrı-ayrı qrupların maraqlarının müdafiəçisinə çevrilməsi fonunda ərazilərimizin erməni işğalçıları tərəfindən işğalına imkan yaradılması xalqımızn səbir kasasını doldurmuşdur. Belə ağır durumda xalq öz xilaskarına - Heydər Əliyevə üz tutdu. Ümummilli lider Heydər Əliyev xalqının səsinə səs verərək, tarixi nailiyyətimiz kimi dəyərləndirdiyi müstəqilliyimizin qorunmasına, möhkəmləndirilməsinə səy göstərdi. Dahi şəxsiyyət Heydər Əliyevin hakimiyyətə qayıdışı ilə əsası qoyulan inkişaf, tərəqqi yolu bu gün uğurla davam edir. Çünki xalqına, Vətəninə böyük məhəbbətlə bağlı olan ulu öndər Heydər Əliyevin müəyyənləşdirdiyi strategiya, onun ideyaları Azərbaycanın gələcəyinə hesablanıb.

Dahi şəxsiyyət Azərbpaycanı sabitlik diyarına, investisiyalar məkanına çevirdi. 1994-cü il mayın 12-də atəşkəs sazişinin, onun ardınca sentyabrın 20-də tarixə “Əsrin müqaviləsi” kimi daxil olan neft müqaviləsinin imzalanması Azərbaycanın dünya birliyində yeri və roluna öz müsbət təsirini göstərdi. Sabitliyin yaradılması fonunda ölkə iqtisadiyyatına sərmayə qoymaq istəyən dövlətlərin, şirkətlərin tərəddüdləri aradan qalxdı, iqtisadi əlaqələrin qurulmasında maraqlı olan ölkələrin sayı artdı. Baxmayaraq ki, Azərbaycan hər zaman yerləşdiyi coğrafi məkana, malik olduğu təbii resurslara görə dünyanın diqqətində olub, bu marağın 1994-cü ildən sonra sürətlə artdığı inkaredilməzdir.

İqtisadi tərəqqi Azərbaycanın beynəlxalq münasibətlər sistemində yeri və roluna da öz müsbət təsirini göstərdi. Ulu öndər Heydər Əliyevin xarici ölkələrə səfərləri, Azərbaycanın malik olduğu resurslar barədə ətraflı məlumatları ölkəmizə diqqəti daha da artırdı. Uğurlarımızın biri-birini əvəzləməsi xaricdə yaşayan soydaşlarımızın da fəaliyyətinə təsirsiz olmadı. Hər zaman dünyanın müxtəlif ölkələrinə səpələnmiş soydaşlarımızı bir amal, məqsəd - azərbaycançılıq ideyası ətrafında birləşməyə çağıran ulu öndər Heydər Əliyevin səyləri nəticəsində ayrı-ayrı ölkələrdə Azərbaycan cəmiyyətlərinin, mərkəzlərinin yaradılmasına nail olundu. Sonra onların vahid mərzəkdən idarə olunmasının vacibliyi önə çəkilərək, ümummilli lider Heydər Əliyevin sərəncamı əsasında 2001-ci ildə Dünya Azərbaycanlılarının I qurultayı keçirildi. Dahi şəxsiyyət Heydər Əliyev ən yüksək tribunalardan bəyan edir ki, Azərbaycan bütün dünya azərbaycanlılarının tarixi vətəni, ata-baba ocağıdır. Hər bir vətəndaş Vətənimizin, xalqımızın taleyi ilə yaşamalıdır.

Ulu öndər Heydər Əliyevin hakimiyyətinin hər iki dövrünün səciyyəvi xüsusiyyətlərindən biri də tariximizin öyrənilməsinə, araşdırılmasına diqqətin göstərilməsi idi. Ulu öndər Heydər Əliyev 1993-cü ildə xalqın təkidli tələbi ilə hakimiyyətə qayıtdıqdan sonra ilk görüşü məhz ziyalılarla oldu. O, tarixçilərin qarşısında araşdırmaların aparılmasını, tariximizin təhrifinə yol verilməməsini ən ümdə məqsəd kimi qoydu. Məhz həmin illərdən başlayaraq Azərbaycan həqiqətlərini özündə əks etdirən xeyli sayda kitablar yazılıb, erməni vəhşilikləri faktlar əsasında dünya ictimaiyyətinin diqqətinə çatdırılıb. “Tariximizin hər bir səhifəsi bizim üçün əzizdir” söyləyən ulu öndər Heydər Əliyev bildirirdi ki, gərək biz tariximizi heç vaxt unutmayaq, onun hər bir səhifəsinə hörmətlə, ehtiramla yanaşaq. Heydər Əliyev bu reallığı da hər zaman çıxışlarında bildirirdi ki, əgər XX əsrin əvvəlində xalqımız milli azadlıq, dövlət müstəqilliyi yolunda ilk dəfə böyük addım atıbsa, XX əsrin sonunda milli azadlığa, dövlət müstəqilliyinə tam nail olub. Müstəqilliyimizin qorunması, əbədiliyinin təmin edilməsi üçün həmrəy olmalıyıq.

Dövlət müstəqilliyimizin yenidən bərpa olunmasının 23 ilə yaxın dövründə böyük inamla qeyd edirik ki, bu gün Azərbaycan, sözün əsl mənasında, artıq tam müstəqil ölkədir. Ölkəmizdə gerçəkləşdirilən siyasət daim Azərbaycan xalqının maraqlarına xidmət göstərir.

Təbii ki, ulu öndər Heydər Əliyevin Azərbaycan dövləti, xalqı qarşısındakı xidmətlərini bir yazı çərçivəsində qeyd etmək mümkün deyil. Bugünkü reallıqlarımız Heydər Əliyev siyasətinin təntənəsidir. Tarixi müstəqil Azərbaycanın tarixi kimi dəyərləndirilən Yeni Azərbaycan Partiyası ulu öndər Heydər Əliyevin adı ilə bağlıdır. 1992-ci ildə təsis konfransını 550 nümayəndənin iştirakı ilə keçirən YAP-ın sıralarında bu gün 600 mindən artıq üzvün birləşməsi məhz Heydər Əliyev ideyalarına sədaqətin, Prezident İlham Əliyevin həyata keçirdiyi siyasətin gələcəyinə inamın göstəricisidir.

Yeni Azərbaycan Partiyasının əsas məqsədi Heydər Əliyev ideyalarını yaşatmaq, bu ideyalar əsasında Azərbaycanın inkişafının davamlılığını təmin etməkdir. 22 illk tarixi dövrdə Yeni Azərbaycan Partiyası bu missiyanı layiqincə yerinə yetirib. YAP taleyinə uğurlar yazılmış bir siyasi təşkilatdır. 22 il ərzində Yeni Azərbaycan Partiyasını uğurlar, nailiyyətlər müşayiət edib. Bu, yalnız Yeni Azərbayan Partiyasının deyil, eyni zamanda müasir Azərbaycanın taleyidir. Bu uğurlar sadəcə bir təşkilatın əldə etdiyi uğurlar deyil, eyni zamanda Azərbaycan xalqının, dövlətinin əldə etdiyi uğurlardır. Yeni Azərbaycan Partiyasının əldə etdiyi uğurlar ümumilikdə ölkənin inkişafında, tərəqqisində özünü təsdiqləyən, əks etdirən uğurlardır. Yeni Azərbaycan Partiyasının V qurultayında ölkə Prezidenti, cənab İlham Əliyev bir daha bəyan etmişdir ki, Yeni Azərbaycan Partiyasının əsas ideoloji dayaqları müstəqillikdir, azərbaycançılıqdır, müasirlikdir, inkişafdır, sosial rifahdır, iqtisadi və siyasi islahatlardır.

Böyük fəxrlə qeyd edirik ki, 2003-cü ildən sonrakı dövr Böyük Yolun davamıdır. Heydər Əliyev siyasi kursunun layiqli davamçısı cənab İlham Əliyev uğurlu addımları ilə Azərbaycanı daha da zirvələrə yüksəldir. Möhtərəm Prezidentimiz İlham Əliyevin böyük əminliklə qeyd etdiyi kimi, əgər bugünkü vəziyyəti təhlil etsək və gələcək planlarımızı buna əlavə etsək, görərik ki, Azərbaycan bundan sonra ancaq inkişaf yolu ilə gedəcək: “Bizim artıq güclü dövlətimiz vardır- müstəqil Azərbaycan dövləti. Bizim dəqiq konsepsiyamız, inkişaf proqramımız vardır. Bu proqramların reallaşması nəticəsində Azərbaycan inkişaf etmiş ölkələrin sırasına daxil ediləcəkdir. Əgər gələcəklə bağlı fikirlərimizi bir cümlə ilə ifadə etsək deməliyik: Biz inkişaf etmiş ölkəyə çevrilməliyik! İnkişaf etmiş ölkələrin meyarları vardır. Bunları bilirik və biz hər bir istiqamət üzrə o meyarlara çatmalıyıq- həm siyasi, iqtisadi islahatlar, sosial siyasət və digər istiqamətlərdə.”

Heydər Əliyev ideyaları Azərbaycanın qarşısında yeni-yeni imkanlar açır. Ulu öndər Heydər Əliyevin irsinin öyrənilməsində və təbliğində Heydər Əliyev Fondunun xidmətləri böyükdür. Fondun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban Əliyevanın ümummilli lider Heydər Əliyevin anadan olmasının 86-cı ildönümü və Heydər Əliyev Fondunun fəaliyyətə başlamasının 5 illiyi münasibətilə keçirilən təntənəli mərasimdə söylədiyi bu fikirlər dahi şəxsiyyətin dövlətimiz, xalqımız qarşısındakı xidmətlərinə bir daha işıq salır: “Ölkəmizin hər bir vətəndaşı ömrünün böyük hissəsini, mənalı və yetkin çağlarını bu insanın rəhbərliyi altında yaşamışdır. Bu rəhbərlik təkcə yüksək vəzifə borcu kimi qalmadı, özünü insani mənada daha geniş əks etdirdi. Bu rəhbərlik vətənsevərliyə, iradəyə, qüdrətə köklənmiş mərd ata və müdrik ağsaqqal qayğısı idi. Söhbət XX əsr Azərbaycan tarixinin baş qəhrəmanı, müasir, müstəqil Azərbaycan Respublikasının banisi və qurucusu unudulmaz Prezident Heydər Əliyevdən gedir. Heydər Əliyevin həyatı böyük bir epoxanın aynası kimi ölkəmizin sevincli- kədərli günlərini və anlarını, Azərbaycanın bu tarix yollarını özündə əks etdirir. Məhz Heydər Əliyevin həyatı və fəaliyyəti sübut etdi ki, əlçatmaz xəyalların və arzuların reallaşması insan fenomeninin gücünə mümkündür... Böyük və nadir insanlar doğulduqları andan ömrün sonuna qədər yüksək və ali missiyanın daşıyıcıları olurlar. Onlar millətlərinin və ümumiyyətlə bəşər tarixinin inkişafında və tərəqqisində müstəsna və əvəzolunmaz rol oynamış olurlar. Yəqin ki, belə insanların ömrü elə bu səbəbdən alov parçası kimi sönmədən, yorulmadan, dayanmadan, son nəfəsə qədər böyük bir məqsədə xidmət edir və əbədi mübarizəyə həsr olunur. Belə insanlar tarixin mürəkkəb anlarında bütün çətinlikləri dəf edərək həmişə zəfər çalır, qalib gəlirlər. Heydər Əliyev qalibiyyətinin nəticəsi müasir, müstəqil Azərbaycan Respublikası və onun bugünkü nailiyyətləridir.”

Azərbaycan möhkəm təməl üzərində ucalan binaya bənzəyir. Məhz düzgün qurulan siyasətin nəticəsidir ki, uğurlar biri-birini əvəzləyir, Azərbaycan beynəlxalq münasibətlər sistemində söz sahibinə çevrilir. 155 ölkənin dəstəyini qazanaraq BMT Təhlükəsizlik Şurasına qeyri-daimi üzv seçilən ölkəmiz haqqın, ədalətin tərəfdarı olduğunu dünyaya nümayiş etdirdi. Ölkəmizin gələcəyinə inamı təsdiqləyən bu mühüm hadisə gənc müstəqil dövlət üçün böyük diplomatik və siyasi uğurdur. Möhtərəm Prezidentimiz İlham Əliyevin qeyd etdiyi kimi, bu, ölkəmizin imicini, qısa müddət ərzində nə qədər böyük yol keçdiyini göstərir.

Bu gün yeganə problemimiz Ermənistan-Azərbaycan, Dağlıq Qarabağ münaqişəsidir. Xalqımız tam əmindir ki, dövlətimizin uğurlu siyasəti nəticəsində bu problemimiz də öz ədalətli həllini tapacaq, Azərbaycanın ərazi bütövlüyü təmin ediləcək, soydaşlarımız doğma yurd-yuvalarına qayıdacaqlar. Azərbaycanın diplomatik xidmət orqanları rəhbərlərinin beşinci müşavirəsində ölkəmizin xarici siyasət sahəsində qazandığı uğurlara diqqət yönəldən dövlət başçısı İlham Əliyev bu fikri böyük qətiyyətlə bildirmişdir ki, dünyada gedən proseslərin inkişafı onu göstərir ki, biz hər il, hər ay öz məqsədimizə yaxınlaşırıq və məqsədimiz ərazi bütövlüyümüzü bərpa etmək, Azərbaycan bayrağını Şuşada, Xankəndidə qaldırmaqdır: “Budur bizim əsas vəzifəmiz və bu məqsədə çatmaq üçün nəinki diplomatlar, bütün cəmiyyət öz səylərini birləşdirməlidir, birləşdiribdir. Bu, bizim milli məsələmizdir. Azərbaycanda bundan vacib məsələ yoxdur və bu məqsədə çatmaq üçün biz hər gün çalışırıq və çalışacağıq.”

Hər bir məsələnin həllində beynəlxalq hüququn norma və prinsiplərinin əsas götürülməsinin vacibliyini bəyan edən möhtərəm Prezidentimiz İlham Əliyev bu reallığı da diqqətə çatdırır ki, beynəlxalq hüquqda tarixi amillər öz rolunu oynayıb, presedent hüququ vardır. Erməni lobbisi çalışır ki, faktları dünya ictimaiyyətinə təhrif edilmiş şəkildə çatdırsın: “Biz isə çalışmalıyıq ki, real faktları dünya ictimaiyyətinə çatdıraq, o cümlədən İrəvan xanlığı ilə bağlı olan həqiqətləri çatdırmalıyıq.”

Möhtərəm Prezidentimiz Dağlıq Qarabağ probleminin gündəlik işimiz olmasını qarşıya mühüm vəzifə kimi qoyur. Bu gün hər bir Azərbaycan ziyalısının qarşısında duran əsas vəzifə məhz faktlara əsaslanan təbliğata dəstək olmaq, gənclərimizin vətənpərvərlik hisslərini daha da artırmaqdır. Bakı Dövlət Universitetində “Qafqaz xalqları tarixi” nəzdində “Erməni araşdırmaları” laboratoriyası fəaliyyət göstərir. Biz ermənilərin tariximizi təhrif etmək cəhdlərinə hər zaman tutarlı, faktlara söykənən tədqiqatlarımızla cavab verməliyik.

Azərbaycan həqiqətlərinin dünya ictimaiyyətinə çatdırılmasında Heydər Əliyev Fondu xidmətlərini xüsusi vurğulamaq lazımdır. Heydər Əliyev Fondu tərəfindən hazırlanan vəsaitlər - kitablar, albomlar, video disklər dünyanın müxtəlif ölkələrində erməni yalanlarının ifşasında, həqiqətlərimizin faktların dili ilə təbliğində böyük dəstəkdir. İctimai-siyasi fəaliyyətə başladığı gündən cəmiyyətin bütün təbəqələrinin diqqət mərkəzində olan Mehriban xanım Əliyeva haqqında belə təsəvvür formalaşıb - O, səmimidir, məsuliyyətlidir, həssasdır, işgüzardır və xeyirxahdır. Genişmiqyaslı xeyriyyəçilik fəaliyyətinə, bəşəriyyətin ali ideyalarına xidmət sahəsində yüksək nailiyyətlərinə görə Mehriban xanım Əliyeva bir sıra beynəlxalq mükafatlara layiq görülüb.

Təsis etdiyi Azərbaycan Mədəniyyəti Dostları Fondunun məqsədi də məhz budur - Mədəniyyətimizin inkişafına kömək göstərmək, xalqımızın dəyərli mədəniyyət nümunələrinin xaricdə təbliğini dəstəkləmək. Mehriban xanım Əliyevanın gənc nəslin təhsilinin inkişafı istiqamətində atdığı addımlar da təqdirəlayiqdir. Belə ki, Fondun “Yeniləşən Azərbaycana yeni məktəb” layihəsi çərçivəsində məktəb tikintisinə, yenidən bərpasına, dünya standartlarına cavab verən avadanlıqlarla təchiz edilməsinə göstərdiyi diqqət ölkə ictimaiyyəti tərəfindən yüksək dəyərləndirilir. Körpələrin fiziki və əqli cəhətdən sağlam böyüməsi üçün əhəmiyyətli tədbirlər, kütləvi aksiyalar keçirən Heydər Əliyev Fondunun layihələrinin başlıca meyarı uşaqlara diqqət və qayğıdan ibarətdir. Humanizm, insanpərvərlik və mərhəmətlilik kimi bəşəri prinsiplər Mehriban xanım Əliyevanın fəaliyyətinin əsasında dayanır. Qarşıdakı illərdə Mehriban xanım ölkə və beynəlxalq səviyyəli neçə-neçə əhəmiyyətli layihələrə imza atacaq, mədəniyyətimizin, təhsilimizin inkişafına, həqiqətlərimizin təbliğinə biri-birindən əhəmiyyətli töhfələr verəcək.

Heydər Əliyev Fondunun vitse-prezidenti Leyla xanım Əliyeva da həqiqətlərimizin təbliğində ciddi səylər göstərir. Onun təşəbbüsü ilə həyata keçirilən “Xocalıya ədalət - Qarabağa azadlıq” kampaniyasına dəstək böyükdür.

Diplomatik mübarizədə qələbə qazanan Azərbaycanın hərbi sahədə də əldə etdiyi nailiyyətlər göz qabağındadır. Dövlət başçısı İlham Əliyev Azərbaycanın diplomatik xidmət orqanları rəhbərlərinin beşinci müşavirəsində bu bəyanatı da böyük qətiyyətlə və inamla səsləndirdi: “Əlbəttə ki, məsələnin həlli başqa yolla da mümkündür. Biz bunu heç vaxt inkar etməmişik və açıq bəyan etmişik ki, hərb yolu da istisna edilmir. Çünki son aylarda, illərdə beynəlxalq arenada müşahidə olunan mənzərə onu göstərir ki, əfsuslar olsun, beynəlxalq hüquq işləmir. Güc amili əsas rol oynayır. “Kim güclüdür, o da haqlıdır” prinsipi əfsuslar olsun ki, beynəlxalq əlaqələrin konstruksiyasına böyük zərbə vurmuşdur.”

Uğurlarımıza qısa baxış inkaredilməz olan bu reallığı ortaya qoyur ki, Azərbaycan Heydər Əliyev yolu ilə inamla irəliləyir. Möhtərəm Prezidentimiz İlham Əliyevin sərəncamı ilə təsdiqlənən “Azərbaycan 2020: Gələcəyə baxış” İnkişaf Konsepsiyası da ölkəmizin 20 illik müstəqillik tarixində qazandığı uğurlara əsaslanır. Qarşıdakı on ilin əsas hədəfi Azərbaycanı inkişaf etmiş ölkələr sırasında görməkdir. Xalq-iqtidar birliyinin möhkəmliyi, sarsılmazlığı hər bir hədəfə yüksək səviyyədə çatacağımıza stimul verir. Cənab İlham Əliyev ulu öndər Heydər Əliyevin “Nə qədər ki Azərbaycan var, mən də varam. Mən isə Azərbaycanda əbədi olacağam!” fikrinin davamı olaraq bildirir: “Bütün gələcək planlarımızın həyata keçirilməsi üçün Heydər Əliyev siyasəti davam etməlidir. Bu gün Heydər Əliyev siyasəti yaşayır və əbədi yaşayacaqdır.” Azərbaycan ulu öndər Heydər Əliyevin hakimiyyətinin birinci dövründə yaratdığı möhkəm baza əsasında müstəqilliyini möhkəmləndirir, dönməzliyini təmin edir.

İradə Hüseynova,

YAP Siyasi Şurasının üzvü, BDU-nun “Qafqaz xalqları

tarixi” kafedrasının müdiri, tarix elmləri doktoru, professor,

Azərbaycan Respublikasının Əməkdar müəllimi

İki sahil.- 2014.- 11 iyul.- S.8-9.